Luc 22

1Ɓii laa mappan ɔk ɔrɔm eyo kɛn k'daŋin̰ laa Paak jaay ɔɔp gɔɔr se, 2gɔtn se, magal jee tɛɗn sɛrkɛ Raage tu ute jee jeel taaɗn tɔɔkŋ mɛtn Ko Taar Raage je ɗoobm an goon̰ kɔkŋ Isa taa an̰ ɓaa tɔɔlɔ, naɓo naaɗe ɓeer ɓeer jeege tu. 3Gɔtn se Ɓubm sitange ɓaaɗo ɛnd maakŋ Judas, kɛn k'daŋin̰ Iskariɔt se ɔɔ naan̰ kic mɛtn jee Isagen kɛn sik‑kaar‑dio. 4Naan̰ ɓaa taaɗ ute magal jee tɛɗn sɛrkɛ Raage tu ute magal jee kɛn lee bɔɔb Ɓee Raa se, taa 'kɔŋ raay kɛn naan̰ an kɔkŋ Isa aɗesin̰ kɛɗa. 5Kɛn naaɗe booy taar se, maakɗe raapo ɔɔ naaɗe taaɗin̰ga taaɗ ɔɔ utu an̰ kɛɗn gurs. 6Naan̰ kɛn se, Judas tooko ɔɔ baag toom Isa taa kɛn naan̰ jaay aak jeege gɔtɔ num, naan̰ aɗesin̰ taaɗa ɔɔ naaɗe an̰ kɔkɔ. 7Ɓii gɛn laa mappan ɔk ɔrɔm ey jaay aan se, ɓii kɛn se ɓo bɛɛki num, k'tɔjn̰ gaan baatge gɛn laa Paak gɛn Yaudge. 8Taa naan̰ se ɓo, Isa ɔl Piɛr ute Jan ɗeekɗen ɔɔ: «'Ɓaa 'tɛɗjeki kɔsɔ gɛn laa Paak taa j'aki ɓaa kɔsɔ.» 9Naaɗe tɔnd mɛtin̰ ɔɔ: «Naai 'je j'aisin̰ tɛɗn kaam gay?» 10Isa tɛrlɗen ɔɔ: «'Ɓooyki: kɛn 'ɓaaki ɓaa maakŋ gɛgɛr ki se, naase aki dɔɔɗn ute gaaba uuno kɔɔyɔ ɗooc te maane se. Ɔkki mɛtin̰a ɔɔ 'ɓaaki maakŋ ɓee kɛn naan̰ an kɛnd maak ki se. 11Kɛn aankiga num, 'taaɗki mɛl ɓee ki se ɔɔki: ‹Debm dooy jeege ɔljeno ɔɔ k'tɔnd mɛti ɔɔ ɓee gay jaay ɓo naan̰ an kɔsn kɔsn laa Paak te jee mɛtin̰ ki se?› 12Num naan̰ asen taaɗn ɓee magala kɛn j'iin̰in̰ do ɓee ki raan, ɔɔ maakŋ ɓee se, nakin̰ge paac aas kart. Gɔtn ese ɓo ajeki tɛɗn kɔsn gɛn laa Paak.» 13Kɛn naaɗe ɓaa aan se, ɔŋ nakge se paac aan gɔɔ kɛn Isa taaɗɗeno. Gɔtn se ɓo naaɗe tɛɗ kɔsn gɛn laa Paak. 14Kɛn kaaɗn kɔsɔ jaay aan se, Isa ɓaaɗo iŋg kaaɗn tabil ki ute jee kaan̰ naabin̰ge. 15Gɔtn se Isa ɗeekɗen ɔɔ: «Maam m'je ute maakum paac m'kɔsn laa Paak ute naase jaay ɓo m'dabara. 16'Booyki m'asen taaɗa: maam mɔɔtn tap ɓo Laa Paak se, m'kɔŋ kɔs ey sum, bini nakŋ kɛn Laa Paak je taaɗa se utu 'kaan ɗoobin̰ ki maakŋ Gaar Raa ki.» 17Gɔtn se naan̰ uun kɔɔpm kɛn ɔk tɔtn koojn̰ bin̰ se jin̰ ki, tɔɔm Raa ɔɔ ɗeekɗen ɔɔ: «Ɔkki ɔɔ 'nig aayin̰ki ute naapa. 18'Booyki m'asen taaɗa: tɔtn koojn̰ bin̰ ese se, mɔɔtn m'an̰ kɔŋ kaaye ɗɔɔl ute naase ey sum, bini maakŋ Gaar Raa aɗe ɓaa.» 19Tɛr naan̰ uun mappa jin̰ ki, tɔɔm Raa ɔɔ dup ɛɗɗesin̰a ɔɔ ɗeekɗen ɔɔ: «Kɛse ɓo roma kɛn m'ɛɗin̰ sɛrkɛ taa naase. Nakŋ se 'lee 'tɛɗin̰ki bini ɔɔ 'saapki dom ki.» 20Kɛn naaɗe ɔs aas se, naan̰ uun kɔɔpm ɔk tɔtn koojn̰ bin̰ se ɔɔ tɛɗin̰ bin kici, taaɗɗen ɔɔ: «Tɔtn koojn̰ bin̰ kɛn maakŋ kɔɔpm ese se kɛse je taaɗn ɔɔ: Raa dɔɔkga kiji ute naase ɔɔ kɛse ɓo moosum kɛn ɔɔy taa naase.» 21Kɛn naaɗe iŋg ɔs kɔs se, Isa ɗeekɗen ɔɔ: «Aakki, debm am kut se ɔlga jin̰ maakŋ baay ki ute maam tɛlɛ. 22Goon Deba se, utu 'kooy aan gɔɔ kɛn Raa taaɗni, num gaŋ ɔɔn̰ deb kɛn an̰ kut se!» 23Kɛn naaɗe jaay booy taar se, naaɗe baag taaɗn ute naapa ɔɔ maakɗe ki se, naŋa ɓo 'kɔŋ tɛɗn nakŋ se. 24Gɔtn se, jee mɛtn Isa ki baag tɛɗn dɛkɛn̰ɛ ɔɔ naaj ute naapa ɔɔ maakɗe ki se, naŋa ɓo 'tɛɗn magala. 25Gaŋ Isa ɗeekɗen ɔɔ: «'Jeelki, gaarin̰gen do naaŋ ki se iŋg do jeege tu tɛɗ jeege kusin̰a, ɔɔ magalgen tiŋg do jeege tu se, je jeege aɗen daŋ jee bɛɛ. 26Num naase se, ɔn̰te 'tɛɗki bini. Anum maakse ki se, debm je 'tɛɗn magal se, ɔn̰ 'tɛɗ ron̰ aan goon cɔkɔ ɔɔ debm je tɛɗn naana se, ɔn̰ 'tɛɗn debm kaan̰ naabse. 27Debm magal ɓo kɛn gay: debm kɛn iŋg ɔs kɔs lɔɓu debm kɛn kɔsɔ ooyga num lee ɓaaɗo tɔndin̰ jeege tu se ne? Debm ɔs kɔs se ɓo debm magal ey la? Anum maam m'iŋg maakse ki se aan gɔɔ m'debm tɛɗn naabse. 28Kɛn maam maakŋ dubar ki se, naase ɓo, jee daayum iŋgkiro ute maama. 29Aan gɔɔ Bubum ɔn̰um gaara maam ki se, maam kic m'ɔn̰sen gaara naase ki, 30taa naase aki ɓaa kɔsɔ ɔɔ aki kaaye ute maama maakŋ gaarum ki. Ɔɔ naase utu aki kiŋg do kaag doge tu gɛn kɔjn̰ bɔɔrɔ do taa ɓee gaan Israɛlge tun sik‑kaar‑di se.» 31Gɔtn se Isa ɗeek Simon ki ɔɔ: «Simon, Simon, 'booyo! Ɓubm sitange se tɔndga mɛta ɔɔ je ai lɔɔyɔ aan gɔɔ teen̰ k'lɔɔyin̰ maakŋ gɛrt ki se. 32Gaŋ maam m'tɔndga mɛtn Raa taa naai, taa kaal maaki kɛn naai aal dom ki se, 'tɛɗn cɛr eyo. Ɔɔ kɛn naai jaay tɛrloga gɔtum ki num, gɛnaaige se, ɛɗɗen kaay kaama taa 'tɛɗn jee tɔɔgɔ naan maam ki.» 33Gaŋ Piɛr tɛrlin̰ ɔɔ: «Mɛluma, maam m'tookŋ m'ɓaa daŋgay ki ute naai ɔɔ m'kooy ute naai.» 34Tɛr Isa tɛrlin̰ ɔɔ: «'Booyo, Piɛr, m'ai taaɗa: jaaki se, kɔr kɔrɔn̰jɔ 'kɔɔy ey sum ɓo, naai 'naajn̰ ɗɔɔl mɔtɔ ɔɔ 'ɗeekŋ ɔɔ 'jeelum eyo.» 35Gɔtn se, Isa ɗeekɗen daala ɔɔ: «Kaaɗ kɛn m'ɔlseno naaba jaay m'taaɗsen m'ɔɔ ɔn̰te 'kuunki gursi, ɓɔɔnɔ ɔɔ saa se, ɗim baatsege la?» Naaɗe tɛrlin̰ ɔɔ: «Ɗim baatje te eyo.» 36Tɛr naan̰ ɗeekɗen daala ɔɔ: «Ɓɔrse se, debm ɔk gurs lɛ, uunu ɔɔ debm ɔk ɓɔɔnɔ kic lɛ, uunu; ɔɔ debm ɔk gɔrɗ‑jɛrlɛ ey lɛ dugŋ naatn ute kal magalin̰a ɔɔ n̰'dugŋ gɔrɗ‑jɛrlɛ. 37Taa naan̰ se, maam m'ɗeekseni: taar kɛn Kitap taaɗ rom ki se, utu 'kaan ɗoobin̰ ki kɛn ɔɔ: naan̰ se se j'aalga mun̰ maakŋ jee tujge tu. «Taar se ɓo ɓɔrse aanga ɗoobin̰ ki.» 38Gaŋ jee mɛtin̰ ki tɛrlin̰ ɔɔ: «Mɛlje, naaje j'ɔk gɔrɗ‑jɛrlɛ di ara.» Naan̰ tɛrlɗen ɔɔ: «Kɛse bɛɛga sum, taarse se ɔn̰in̰ki.» 39Gɔtn se Isa teec ɓaa ook do kɔs ɔlib ki, gɔtn kɛn naan̰ lee ɓaan ro ki. Ɔɔ jee mɛtin̰ ki se, ɓaa ute naan̰a. 40Kɛn naaɗe aan gɔtn ese se, naan̰ ɗeekɗen ɔɔ: «'Tɔndki mɛtn Raa taa naase aki koocn̰ maakŋ nakŋ naam ki eyo.» 41Tɛr Isa iik tɔɔk cɛɛs ki daanɗe ute jee mɛtin̰ ki se kaam kund koa; gɔtn se naan̰ ɛrg naaŋ ki ɔɔ baag tɔnd mɛtn Raa, 42ɗeek ɔɔ: «Bua, kɛn naai 'je num, kɔɔpm dubar utu 'kaan dom ki se, naai iikin̰ naatn dɔkɔ rom ki. Num gaŋ 'tɛɗ aan gɔɔ kɛn naai maaki jen ro ki, aan gɔɔ kɛn maam ɓo m'je se eyo.» 43Gɔtn ese kɔɗn Raa bɔɔyo maakŋ raa ki ɓaaɗo ɛɗin̰ gaab tɔɔgɔ. 44Kɛn Isa jaay maakin̰ tuj kasak kasak se, naan̰ tɔnd mɛtn Raa bini gɔtɔŋgin̰ teec ron̰ ki jaay taɗ naaŋ ki se tec aan gɔɔ mooso. 45Kɛn naan̰ tɔnd mɛtn Raa jaay aas se, iin̰ ɓaaɗo ɔŋ jee mɛtin̰ ki ɔɔ ute maak‑tujɗe se ɔlɗen naaɗe tooɗ bia. 46Naan̰ ɗeekɗen ɔɔ: «Gɛn ɗi jaay 'tooɗki bi se? Iin̰ki raan ɔɔ 'tɔndki mɛtn Raa, taa aki koocn̰ maakŋ nakŋ naam ki eyo.» 47Kɛn Isa utu taaɗ taaɗ ɓɔrt sum ɓo, jee dɛnge teeco ɔɔ debm tɔɔɗɗeno se ron̰ Judas. Naan̰ se mɛtn jee Isagen sik‑kaar‑di se. Naan̰ ɓaaɗo cɛɛ Isa ki, baam ɔkin̰a ɔɔ aay ciilin̰. 48Ɔɔ Isa tɛrlin̰ ɔɔ: «Judas, ute baam kɔkŋ kɛn naai 'baam ɔkuma ɔɔ aay ciilum se ɓo, naai an kutn Goon Deba ne?» 49Jee kɛn cɛɛ Isa ki jaay aak nakŋ kɛn utu 'tɛɗ se, naaɗe ɗeekin̰ ɔɔ: «Mɛlje, jee ese j'aɗen tɔgŋ ute gɔrɗ‑jɛrljege se la?» 50Maakɗe ki se, deb kalaŋ ɔɔɗo gɔrɗ‑jɛrlin̰a ɔɔ ɔg gaaŋ te bi do ji daama gɛn debm tɛɗn naabm magal debm tɛɗn sɛrkɛ Raa ki. 51Num gaŋ Isa taaɗɗen ɔɔ: «Ɔn̰ki! Ɔn̰te 'tɛɗki bini.» Ɔɔ Isa ɔl jin̰ ut bi gaabm se ɔɔ gaabm se ɔŋ lapia. 52Gɔtn se Isa taaɗ jeege tun ɓaan̰o kɔkɔ ɔɔ jee se, magal jee tɛɗn sɛrkɛ Raage tu, magal jee kɛn lee bɔɔb Ɓee Raa ute magal taa Ɓee Yaudge ɔɔ ɗeekɗen ɔɔ: «Naase 'teeckiro ute gɔrɗ‑jɛrlsege ɔɔ sirɗsege se, aan gɔɔ 'ɓaakiro kɔkŋ debm ɓoogo. 53Ey num ɓii‑raa, maam m'tiŋgo ute naase daan bɔɔr Ɓee Raa ki ɔɔ nam tap ɓo ɔŋ ɔl te jin̰ rom ki eyo. Naɓo ɓɔrse se, kaaɗn naasen ɔkki tɔɔgɔ maakŋ gɔt kɛn ɔɔɗ se ɓo, aanga.» 54Kɛn naaɗe jaay ɔk Isa se, naaɗe ɓaansin̰o maakŋ ɓee magal debm tɛɗn sɛrkɛ Raa ki. Naan̰ kɛn se, Piɛr lee tɔl goosɗe kaam mɔɔtn dɔkɔ. 55Kɛn naaɗe jaay aan se, ɔŋ gɔtn se k'tuuyga tuuy pooɗo daan bɔɔr ki ɔɔ jeege iŋg riib riibi ɔɔ Piɛr ɓaaɗo iŋg riib ute naaɗe kici. 56Mɛnd tɛɗn naabm gɔtn ese jaay aakin̰ naan̰ iŋg riib riib pooɗo se, naan̰ ɔndin̰ kaama tak ɔɔ ɗeek ɔɔ: «Gaabm se kic debm naan̰a.» 57Gaŋ Piɛr naaj ɔɔ: «Mɛnd ara, ɓɛrɛ, gaabm se maam m'jeelin̰ eyo.» 58Tɛr cɔkɔ sum ɓo, deb kuuy aakin̰ se, ɗeekin̰ ɔɔ: «Naai kic 'mɛtn naaɗe.» Ɔɔ Piɛr tɛrlin̰ ɔɔ: «A‑a, maam mɛtn naaɗe eyo.» 59Cɔkɔ sum se, deb kuuy ɓaaɗo ɗeekin̰ daala ɔɔ: «Ɗeer ɗeer, gaabm ese debm naan̰ kici, taa naan̰ se kic kɔɗ Galile.» 60Gaŋ Piɛr tɛrlin̰ ɔɔ: «Taari se tap ɓo, naai 'je ɗeekŋ ɔɔ ɗio?» Gaŋ kɔr naan̰ utu taaɗ taaɗ ɓɔrt se sum ɓo, kɔrɔn̰jɔ naar ɔɔɗ ɔɔyɔ. 61Gɔtn se, Mɛljege tɛrl aak Piɛr, ɔɔ kɛn kaamɗe jaay dɔɔɗ se, Piɛr naar saap do taar kɛn Mɛljege taaɗin̰o, kɛn ɔɔ: «Jaaki, kɔr kɔrɔn̰jɔ tɔɔy ey sum ɓo, naai am baatn ɗɔɔl mɔtɔ.» 62Gɔtn se naan̰ teeco ɔɔ baag keeme gab gab. 63Jee iŋg bɔɔb Isa se, naaɗe tɛrɛcin̰ mɛtin̰a ɔɔ tɔndin̰a. 64Naaɗe teelin̰ kaamin̰a, tɔndin̰a ɔɔ taaɗin̰ ɔɔ: «Debm taaɗ taar teeco taar Raa ki se, 'taaɗjen tu: debm kɛn tɔndi se tap ɓo naŋa?» 65Gɔtn ese, naaɗe naajin̰ rap rap. 66Tanɔɔrin̰ nɔɔrin̰ se, magal taa ɓee Yaudge, magal jee tɛɗn sɛrkɛ Raage tu ute jee jeel taaɗn tɔɔkŋ mɛtn Ko Taar Raage, naaɗe se ɓo jee kɛn lee aak mɛtn taarge, naaɗe tusu paac ɔɔ ɔl j'ɔk k'ɓaano te Isa naanɗe ki. 67Aan gɔtn se, naaɗe tɔnd mɛtin̰a ɔɔ: «Kɛn naai ɓo al‑Masi lɛ, 'ɗeekjeni.» Isa tɛrlɗen ɔɔ: «Maam m'taaɗsenga kic lɛ, naase aki 'tookki eyo. 68Ɔɔ kɛn m'tɔnd mɛtse kic lɛ, naase amki 'kɔŋ tɛrl eyo. 69Num naan ki se, Goon Deba se utu 'ɓaa kiŋg do ji daam Raa Sidburku ki.» 70Naaɗe paac tɛrlin̰ ɔɔ: «Do taari ki se, naai je ɗeekŋ ɔɔ naai ɓo 'Goon Raa ɗaamo?» Isa tɛrlɗen ɔɔ: «Kɛse naase malin̰ge ɓo 'taaɗki ɔɔki maam Goon Raa.» 71Gɔtn se naaɗe ɗeek ɔɔ: «Naase nakage k'jeki saaɗn nam kuuy se, gɛn ɗi daala! Naajege lɛ, k'booyin̰kiga te bijege, naan̰ mala ɓo taaɗjeki ute taarin̰a.»

will be added

X\