Luc 21

1Gɔtn se, daan bɔɔr Ɓee Raa ki se, Isa uun kaamin̰ aak jee maalgen ɔmb kɔmb sɛrkɛ Raa ki maakŋ tukul kaag ki se. 2Maakɗe ki se, naan̰ aak mɛnd‑daay kalaŋ kic kɛn ɔɔɗ kɔɔɗ yɛɛɓin̰a ɓaaɗo ɔmb tammage sɛɛm sɛɛm dio. 3Ɔɔ Isa ɗeekɗen ɔɔ: «'Booyki bɛɛ, m'asen taaɗa: mɛnd‑daay kɛn daay naŋ takŋ ese se, ɔmbga dɛn cir jee ɓaa se paac. 4Taa jeegen se paac se ɛɗ do nak dɛnɗe ki, gaŋ mɛnd‑daay se nakŋ naan̰ ɔkŋ kɛn an tiŋg se ɓo, naan̰ ɓaaɗo ɔmbin̰ paac.» 5Gɔtn se jee mɛtin̰ge taaɗ ɔɔ: «Ɓee Raa se, ute kogen j'iin̰in̰ga ute nakgen jeege ɓaano sɛrkɛ Raa ki jaay k'tamarin̰ tɛɗ aak bɛɛ bɛɛ se.» Gaŋ Isa ɗeekɗen ɔɔ: 6«Ɓii kalaŋ se, ɓee kɛn aakin̰ki ɗaar aak bɛɛ bɛɛ se, jeege utu an̰ ru naŋ tak. Kon̰gen rɛɛs aak bɛɛ bɛɛ se, utu wɔɔkŋ kalaŋ kalaŋ ɔɔ ko tap ɓo 'kɔŋ tooɗn do naapin̰ ko ki eyo.» 7Gɔtn se, jee mɛtin̰ ki se tɔnd mɛtin̰a ɔɔ: «Debm dooyje, 'taaɗjen tu, nakgen se 'kaan nuŋ ki? Ɔɔ naan̰ se 'tɛɗn ɔɔ ɗi jaay ɓo naaje j'an kaakŋ jeel ro ki se?» 8Isa taaɗɗen ɔɔ: «Ɔndki kɔndɔ! Ɔn̰te 'kɔn̰ki jeege asen kaan̰ dala. Taa jeege dɛna utu aɗe ɓaa ute roma ɔɔ utu asen taaɗn ɔɔ: ‹Maam ɓo al‑Masi› ɔɔ: ‹Ɓɛrɛ, kaaɗn dunia aan naŋ se, ɔɔpga gɔɔrɔ.› Jee bin se, ɔn̰te 'tookki taarɗe. 9«Kɛn 'booykiga jeege jaay baaga kɔɔsn maan bɔɔrɔ, ɔɔ jeege baagga tɛɗn pitini te naapa num, ɔn̰te 'ɓeerki. Taa nakgen se jaay utu 'kaana naɓo, duni se 'kɔŋ naŋ ey ɓɔrtɔ.» 10Tɛr Isa taaɗɗen ɔɔ: «Naase utu aki kaakŋ jee taa naaŋ kaam kalaŋ utu kiin̰ bɔɔrɔ ute jee taa naaŋ kuuy. Taa naaŋ gaar kaam kalaŋ utu kiin̰ bɔɔrɔ te taa naaŋ gaar kɛn kuuy. 11Maakŋ naaŋge tun mɛtin̰ naaŋa utu 'te makɔn̰ɔ ɔɔ gɔtgen mɛtin̰ge se ɓo utu 'tɔɔlɔ ɔɔ kɔɔn̰gen ɗɛt ɗɛt se utu 'kaan do jeege tu. Maakŋ raa ki se, naase utu aki kaakŋ nakŋ‑kɔɔɓgen magal magal kɛn utu 'teecn̰ nirl jeege. 12«Kɔr jaay nakgen se 'kaan se, naase j'utu j'asen tɔkɔ, j'asen dabara ɔɔ j'utu j'asen kɔjn̰ bɔɔrɔ maakŋ ɓee kɛn Yaudgen lee tusn maak ki se ɔɔ j'utu j'asen tɔl daŋgay ki. Ɔɔ taa maam se, j'utu j'asen ɓaa naan gaarin̰ge tu ute naan magal taa naaŋge tu. 13Kɛn nakgen se jaay 'kaan dose ki se, naase amki tɛɗn saaɗumge. 14Kɛn 'ɓaaki ɓaa se ɔndin̰ki dose ki jiga ɔɔ ɔn̰te 'saapki do taar kɛn naase anki nakŋ dose, 15num maam mala ɓo m'utu m'asen kɛɗn jeel‑taara ute taargen naase aki ɓaa taaɗa; kɛn naase jaay 'baagkiga taaɗa se, jee taamooysege se paac 'kɔŋ naajn̰ do taarse ki eyo ɔɔ 'kɔŋ ɗoobm kɛn asen 'kɔŋ tɛrl taar eyo. 16Ɔɔ tɛr kɛn̰sege ute bubsege, gɛnaasege, taassegen gɔɔrɔ ute mɛɗsege se, utu asen tɔkŋ tɔl ji jee wɔɔysege tu ɔɔ maakse ki se, jee mɛtin̰ge j'utu j'aɗen tɔɔlɔ. 17«Taa maam se, jeege paac utu asen kɔɔɗn kundu. 18Naɓo bɛɛkŋ dose kic ɓo, kalaŋ 'kɔŋ kut eyo. 19Ɔkki maakse tɔɔgɔ. Aayki kaamse ɔɔ naase aki kɔŋ kaajn̰ gɛn daayum.» 20Tɛr Isa taaɗɗen daala ɔɔ: «Kɛn naase jaay aakkiga asgarge ɓaaɗo ɔl gurugga Jeruzalɛm num, 'jeelki kɛse kaaɗn tɛrɛcin̰, ɓɛrɛ aanga. 21Bin se, jee kɛn iŋg taa naaŋ Jude ki se k'j'aan̰ k'j'ook maakŋ koge tu ɔɔ jeegen iŋg maakŋ gɛgɛr kɛn Jeruzalɛm ki se, k'j'aan̰ k'teecn̰ naatn ɔɔ jeegen naatn lɛ, j'ɔn̰te tɛrlo ɓeene. 22Taa ɓii kɛn se ɓo, Raa utu 'kɔjn̰ bɔɔrɔ do jeege tu aan gɔɔ kɛn Kitapm Raa taaɗno. 23Ɓii kɛn se, mɛndgen mɛndkaamge ute ko gaangen gɛnɗege aay kaay si se, aɗen tɛɗn ɔɔn̰ aak eyo. Taa Raa se, maakin̰ taarin̰ do jeege tun taa naaŋ kɛn gɔtn ese ɔɔ naaɗe se, utu 'kɔɔɗn yɛɛɓɗe dɛna. 24Jee Jeruzalɛm ki se, j'utu j'aɗen tɔɔl ute gɔrɗ‑jɛrlɛ ɔɔ j'aɗen dirin̰ ɓulu ɔɔ j'aɗen wɔɔkŋ maakŋ naaŋge tu paac. Ɔɔ Jeruzalɛm se, j'utu j'an̰ kɔsɔ, ɔɔ jeegen Yaudge ey se utu kiŋg doɗe ki bini kaaɗɗe utu 'kaas jaayo.» 25Tɛr Isa taaɗɗen daala ɔɔ: «Naan̰ kɛn se, daan kaaɗ ki, laap ki ɔɔ maakŋ k‑dijge tu se utu aki kaakŋ nakŋ‑kɔɔɓge. Ɔɔ kuulu utu 'kɔl do baar ki ɔɔ 'tɛɗn maane 'tɔnd te naapa 'keem makɔn̰ pum pum ɔɔ 'tɛɗn jeegen do naaŋ ki paac se, ɓeere aɗen kɔkɔ ɔɔ nirlɗe utu 'teece. 26Jeege jaay 'kaakŋ nakgen ɔɔn̰ utu ɓaaɗo do naaŋ ki se, jee mɛtin̰ge se ɓeere sum ɓo utu aɗen tɔɔlɔ, taa nakgen ɔk tɔɔgɔ maakŋ raa ki paac se, utu 'tea. 27Gɔtn se, jeege 'kaakŋ Goon Deba utu aɗe bɔɔy maakŋ gapara ki aɗe ɓaa ute tɔɔgŋ Raa, kɛn 'tɛɗn gɔtɔ wɔɔr kɛlɛŋ. 28Kɛn nakgen se jaay baagga kaan num, 'ɗaapki rose ɔɔ uunki dose raan, taa Raa se ɔɔpga gɔɔrɔ asen kɔɔɗn dose.» 29Tɛr Isa aalɗen naagŋ taara ɔɔ: «Aakki tu ko ba ute kaaggen kuuy paac se. 30Kɛn naaɗe jaay baagga dɔɔb kamba num, naase 'jeelki ɔɔki mɛt‑kijiri aanga ɔɔ ɓara ɔɔpga gɔɔrɔ. 31Bin num, naase kic ɓo aakkiga nakgen se jaay baagga kaan se, 'jeelki maakŋ Gaar Raa se ɔɔpga gɔɔrɔ. 32'Booyki bɛɛ m'asen taaɗa: jee duni kɛn ɓɔrse se 'kooy naŋ ey sum ɓo, nakgen se paac utu 'kaana. 33Maakŋ raa ute do naaŋa se utu 'deele, num taarumge se, 'kɔŋ deel eyo.» 34Isa taaɗɗen daala ɔɔ: «Ɔndki kɔndɔ. Ɔn̰te 'dɛrlki rose gɛn kaay koono, ro kɔs magal ki ɔɔ ɔn̰te kuunki nirlse do nakge tun duni ki; ey num ɓii kɛn Goon Deba aɗe ɓaa se, asen kɔkŋ do jise ki, 35aan gɔɔ gakala lee tɔnd daage se. Jeege paac do naaŋ ki se kic ɓo nakŋ se utu aɗen kaan doɗe ki bini. 36Num naase iŋgki do mɛtɛkse ki; eemki Raa daayum taa nakgen se kɛn aan dose kic ɓo asen tɛɗ ɗim eyo. Ɔɔ ɓii kɛn naane se, naase aki ɓaa ɗaar naan Goon Deb ki.» 37Ɓii‑raa Isa lee dooy jeege daan bɔɔr Ɓee Raa ki ɔɔ kɛn aanga nɔɔr num, naan̰ teec ɓaa lee tooɗ do kɔsn ɔlib ki. 38Kɛn gɔtɔ iipga num, jeege paac ɓaaɗo lee ɔŋin̰ daan bɔɔr Ɓee Raa ki gɛn booy taarin̰a.

will be added

X\