Luc 2

1Kaaɗ kɛn se, Gaar magal iŋg Rɔm ki kɛn k'daŋin̰ Sezar Ogust se, ɔlo ɔɔ jee taa naaŋin̰ ki paac se j'aɗen 'ɓaa mɛɗɛ. 2Mɛɗn deet deet bin se baag kaaɗ kɛn Kirinius ɓo magal jee taa naaŋ Siri ki. 3Jeege paac, naŋa naŋa kic ɓo iin̰ ɓaa maakŋ naaŋin̰ ki taa j'an̰ ɓaa mɛɗɛ. 4Taa naan̰ se ɓo Yusup iin̰o maakŋ gɛgɛr kɛn Nazarɛt kɛn taa naaŋ Galile ki, naan̰ kic ook ɓaa maakŋ gɛgɛr kɛn Betleem kɛn taa naaŋ Jude ki. Betleem se, gɔtn j'oojn̰ Gaar Daud. Kɛn ɔlin̰ Yusup jaay ɓaa naane se, taa naan̰ kic iin̰o mɛtjil Daud ki ɔɔ teeco kaagŋ ɓee naan̰ ki. 5Naan̰ ɓaa ute mɛnd kɛɛsin̰ Mari mɛndkaama maakin̰ magalga magala taa j'an̰ ɓaa mɛɗɛ. 6Kɛn naaɗe aan Betleem ki se, kaaɗ kɛn naaɗe tiŋg naane se ɓo, ɓii kɛn Mari an kooj se, aasa. 7Gɔtn se Mari ooj goon paragin̰ gaaba. Naan̰ teelin̰ ute kala ɔɔ uun aalin̰ maakŋ kɔlay ki taa naaɗe ɔŋ te gɔt eyo maakŋ ɓee tooɗn mɛrtge tu se. 8Maakŋ taa naaŋ gɔtn ese se naatn cɛɛs ki cɛɛs ki se, jee gaam baatge tiŋg lee gaam baatɗege nɔɔr. 9Gɔtn se sum ɓo kɔɗn Raa naar teec naanɗe ki, ɔɔ Mɛljege Raa tɛɗɗen gɔtɔ wɔɔr kɛlɛŋ ɔɔ naaɗe nirlɗe teece. 10Num kɔɗn Raa se ɗeekɗen ɔɔ: «Ɔn̰ten 'ɓeerki! 'Booyki: maam ɓaanseno ute Labar Jiga kɛn utu 'raapm maakŋ jeege paac dɛn bɛɛ eyo. 11Taa nɔɔr jaaki ara se, j'oojsega Debm Kaaja maakŋ gɛgɛr gɛn Gaar Daud ki. Naan̰ ɓo al‑Masi kɛn Raa taaɗo mɛtn taarin̰ do dɔkin̰a. Naan̰ se ɓo, Mɛljege. 12Kɛn naase jaay ɓaa aankiga se, naase aki kɔŋ goon k'taace se k'teelin̰ga teel ute kala ɔɔ j'aalin̰ga tooɗ tooɗ maakŋ kɔlay ki. Kɛse ɓo nakŋ kɛn naase anki kaakŋ jeel ro ki.» 13Gɔt kɛn se sum ɓo kɔɗn Raagen kuuy dɔɔlɔ naar ɓaaɗo ɔŋ debɗe se ɔɔ baag tɔɔm Raa tɛlɛ ute kaa ɔɔ: 14«K'nookki Raa kɛn iŋg raan maakŋ raa ki. Naan̰ ɓo debm ɛɗ tɔɔsɛ jeege tun do naaŋ ki kɛn naan̰ jeɗe.» 15Kɛn kɔɗn Raage jaay iin̰ ɔn̰ɗe ɔɔ ɔk tɛrl ɓaa maakŋ raa ki se, gɔtn se jee gaam baatge baag taaɗn ute naapa ɔɔ: «K'ɓaaki ɓɔrse Betleem ki j'aki ɓaa kaakŋ nakŋ kɛn tɛɗ jaay Mɛljege taaɗjekiro mɛtin̰ se.» 16Gɔtn se naaɗe naar iin̰ ɓaa. Kɛn naaɗe aan se ɔŋ Mari, Yusup ɔɔ goon k'taace tooɗ tooɗ maakŋ kɔlay ki. 17Kɛn naaɗe jaay aakin̰ se, naaɗe baag kɔɔsn maanin̰ jeege tu taar kɛn kɔɗn Raa taaɗɗeno ro goon ki se. 18Ɔɔ jee paacn̰ kɛn booy maan jee gaam baatge paac se, naaɗe booy taar se ɔkɗen taaɗ eyo. 19Gaŋ Mari se, taargen deel paac se, naan̰ ɔkin̰ maakin̰ ki tak ɔɔ tiŋg saap do ki. 20Gɔtn se jee gaam baatge ɔk tɛrl uun ɗoobm baatɗege. Kɛn naaɗe ɓaa ɓaa se, nook Raa ɔɔ tɔɔmin̰ ute kaa taa nakgen naaɗe aako ɔɔ booyo se, taa nakgen se paac, naaɗe ɓaa ɔŋin̰ te ɗoobin̰a aan gɔɔ kɛn kɔɗn Raa taaɗɗeno se. 21Kɛn goono k'j'oojin̰ jaay ɔk ɓii marta se, kɛse ɓo ɓii kɛn j'ɔjin̰ pɔndɔ. Goono se j'ɔndin̰ ron̰ Isa, ro se ɓo kɛn kɔɗn Raa taaɗɗesin̰ kaaɗ kɛn kon̰a utu aam te ey ɓɔrtɔ. 22Kɛn nakgen se jaay deel paac se, kaaɗin̰ aas se naaɗe ɓaaɗo maakŋ gɛgɛr kɛn Jeruzalɛm ki ɛnd maakŋ Ɓee Raa ki gɛn tugŋ ɗaapm roɗe. Naaɗe tɛɗin̰ aan gɔɔ Ko Taar kɛn Raa ɛɗo Musa ki taaɗno. Ɔɔ kaaɗ kɛn se ɓo naaɗe uun ɓaano ute goono ɓaaɗo taaɗin̰ naan Mɛljege tu Raa ki kici. 23Taa maakŋ Ko Taar kɛn Raa ɛɗo Musa ki se k'raaŋga raaŋ j'ɔɔ: Gaan paragen gaabge paac se, j'ɛɗin̰ Mɛljege tu Raa ki. 24Taa naan̰ se tɛr Ko Taar kɛn Raa ɛɗo Musa ki se taaɗ ɔɔ gɛn tɛɗn sɛrkɛ Raa ki se j'ano ɓaa ute: dɛɛrge dio ey lɛ napar gaan dɛɛrgen kuuy dio. 25Anum maakŋ Jeruzalɛm ki se, gaaba kalaŋ ron̰ Simɛon. Naan̰ se debm daan ki ɔɔ ɔk ɗoobm Raa ɔɔn̰ɔ. Naan̰ iŋg aak kaam debm kɛn utu 'kaajn̰ gaan Israɛlge ɔɔ Nirl Salal utu te naan̰a. 26Nirl Salal taaɗin̰oga taaɗa ɔɔ: «Naai se 'kooy eyo 'tiŋg bini utu 'kaakŋ ute kaami al‑Masi kɛn Mɛljege Raa utu an̰o kɔl se jaayo.» 27Nirl Salal ɔl Simɛon iin̰ ɓaa maakŋ Ɓee Raa ki ɔɔ kaaɗ kɛn se ɓo bubm Isa ute kon̰a ɓaansin̰o naan Raa ki gɛn tɛɗn nakŋ kɛn Ko Taar kɛn Raa ɛɗo Musa ki ɔɔ k'tɛɗ se. 28Gɔtn se Simɛon uun Isa jin̰ ki ɔɔ tɔɔm Raa ɗeek ɔɔ: 29«Ɓɔrse Mɛluma, taar naai 'taaɗum se aanga ɗoobin̰ ki, ɔn̰ ɓuli se 'kooy ɓaa ute lapia. 30Taa kaamum se aakga Debm‑kaajn̰ kɛn naai ɔlin̰o se. 31Kɛse ɓo Debm‑kaajn̰ kɛn naai ɔlo jeege tu paac. 32Naan̰ ɓo debm kɛn utu wɔɔr gɔtɔ ɔɔ tɛɗn jeegen Yaudge eyo 'jeel Raa ɔɔ ute ro naan̰ se, gaan Israɛlge roɗe utu 'kookŋ raan.» 33Taar kɛn Simɛon taaɗ ro goon ki, jaay bubin̰ ute kon̰ booy se, taar se tap ɓo ɔkɗen taaɗ eyo. 34Gɔtn se Simɛon ɔɔɗɗen ɓooro ɔɔ ɗeek Mari kon̰ ki ɔɔ: «'Jeele, ute goon ese se gaan Israɛlgen dɛn mɛtin̰ge se, utu 'kiigi ɔɔ jee mɛtin̰ge se utu 'kaaja. Taa naan̰ ɓo 'tɛɗn debm kɛn jeege an jeel Raa, naɓo jeegen mɛtin̰ge se 'took eyo. 35Ute naan̰ se maak‑saapm naaɗe se, Raa utu an̰ 'tɛɗin̰ 'tooɗn tal ɔɔ naai, Mari kon̰ se, utu 'dabara aan gɔɔ debm k'j'ɔɔsin̰ ute gɔrɗ‑jɛrlɛ.» 36Gɔtn se mɛnd gɔɔlɔ kalaŋ se, ron̰ Ann. Naan̰ se, goon Panuel, mɛtjil gɛn Asɛrge. Naan̰ se mɛnd taaɗ taar teeco taar Raa ki. Ute gaabin̰ se, naaɗe tiŋgo ɓaara cili sum. 37Gɔtn gaabin̰ ooy sum se, naan̰ ɔɔp mɛnd‑daaye ɔɔ kaaɗ kɛn se naan̰ ɓaarin̰ sik‑marta‑kaar‑sɔɔ naan̰ lee maakŋ Ɓee Raa ki daayum gɛn tɛɗn naabm Raa. Ɔɔ nɔɔrɔ katara naan̰ eem Raa ɔɔ iin̰ga num lee uun siam. 38Num kaaɗ kɛn jaay k'ɓaano ute goon Isa naan Raa ki se, naan̰ baag tɔɔm Raa ɔɔ taaɗ mɛtn taar goon se jeege tun paacn̰ kɛn iŋg aak kaak kaam debm kɛn utu 'kɔɔɗn do jee kɛn Jeruzalɛm ki. 39Kɛn naaɗe jaay tɛɗ aas nakŋ kɛn Ko Taar kɛn Mɛljege Raa ɛɗo Musa ki jaay aas se, naaɗe ɔk tɛrl ɓaa taa naaŋ Galile ki, maakŋ gɛgɛrɗe kɛn Nazarɛt ki. 40Goono se teep ɓaa ute naanin̰a ɔɔ naan̰ mɛtɛkɛ ɔɔ jeel‑taara dɛna ɔɔ daayum Raa se tɛɗin̰ bɛɛn̰a. 41Aanga ɓaara tak ɓo, ko Isa ute gaabin̰ se lee ɓaaɗo Jeruzalɛm ki gɛn tɛɗn laa Paak gɛn Yaudge. 42Kɛn Isa jaay ɓaarin̰ aas sik‑kaar‑di se, naaɗe ɔk ɓaansin̰ Jeruzalɛm ki gɛn tɛɗn Laaɗen kɛn naaɗe lee tɛɗ se. 43Kɛn ɓii Laa Paak jaay naŋ sum se, naaɗe ɔk tɛrl ɓaa Nazarɛt ki. Num goonɗe Isa se ɔɔp iŋg Jeruzalɛm ki, naɓo kon̰ ute bubin̰ se, gɔtn goonɗe ɔɔp se, naaɗe jeel te eyo. 44Gɛn kon̰ te bubin̰ ki num ɔɔ kaaɗn naane, naan̰ utu ɓaaɗo ute jeeɗegen k'ɓaaɗo ɓaa kalaŋ se. Kɛn naaɗe lee lɛk tɛc se jaay ɓo naaɗe ɓaa saap don̰ ki ɔɔ gɔtn se, naaɗe baagin̰ je gɔtn jee jeelɗege tu ɔɔ gɔtn taasɗege tu. 45Kɛn naaɗe jaay je bini ɔŋin̰ ey se, naaɗe ɔk tɛrl ɓaan̰ je Jeruzalɛm ki. 46Naaɗe jen̰ ɓii mɔtɔ jaay ɓo ɓaa ɔŋin̰ maakŋ Ɓee Raa ki iŋg kiŋg daan jee jeel tɔkŋ mɛtn Ko Taar Raage. Naan̰ iŋg booy booy taarɗe ɔɔ do taarɗege tu se naan̰ tɔnd mɛtɗe. 47Jeegen paacn̰ iŋg uɗ bi do taar kɛn naan̰ tɛrlɗen se, naaɗe booy jeelin̰ se deel doɗe ɔɔ ɔkɗen taaɗ eyo. 48Kɛn kon̰ge jaay ɔŋin̰ se, naaɗe aakin̰ se tap ɓo, ɔkɗen taaɗ eyo. Ɔɔ gɔtn se kon̰ ɗeekin̰ ɔɔ: «Goonuma, kɛse naai 'tɛɗjen nakŋ‑kɔɔɓm ɗi bini? 'Booyo, maam ute bubi se, nirlje teecga k'lee k'jei jea.» 49Num gɔtn se Isa tɛrlɗen ɔɔ: «Naase 'jemki gɛn ɗi? Naase 'jeelki ey la kɛn maam m'ɓaaɗo tap ɓo gɛn maakŋ ɓee Bubum se?» 50Gaŋ taar kɛn naan̰ taaɗɗen se, naaɗe ɔŋ booy ɔk te mɛtin̰ eyo. 51Gɔtn se naan̰ iin̰ bɔɔy ɓaa ute naaɗe Nazarɛt ki ɔɔ daayum naan̰ lee took taarɗe. Anum nakgen deel paacn̰ ese se, kon̰ se ɔkin̰ maakin̰ ki. 52Ɔɔ Isa se teepe ɔɔ jeel‑taara ɓaa te naanin̰a. Kɛn Raa aakin̰ se, tɔɔlin̰ ɔɔ tɔɔl jeege tu kici.

will be added

X\