Luc 17

1Tɛr ɓii kalaŋ Isa ɗeek jeege tun mɛtin̰ ki ɔɔ: «Nakŋ utu 'tujn̰ jeege naan Raa ki se utu tap, naɓo ɔɔn̰ debm kɛn jaay ɓo 'kɔl jeege 'tujn̰ naan Raa ki se. 2Bɛɛki num, debm bin se, j'an̰ dɔɔkŋ ko tooto magala mindin̰ ki ɔɔ j'uun j'undin̰ naatn maakŋ baar ki kic ɓo kɛse ɔɔn̰ eyo. Num kɛn maakŋ gaan sɛɛmge tu se jaay naan̰ tujga deb kalaŋ naan Raa ki se, nakŋ utu kaan don̰ ki se, ɔɔn̰ cir kɛse daala. 3Kɛn bin num, ɔndki kɔndɔ! Kɛn gɛnaai jaay tujiga num, 'mooyin̰a. Kɛn naan̰ jaay jeelga kusin̰in̰ se, 'tɛɗin̰ kalɗɛ. 4Kɛn maakŋ ɓii ki ɓo, naan̰ tuj ɗɔɔli mɛt cili kic ɓo kɛn naan̰ jaay ɓaaɗo taaɗi ɔɔ: ‹Gɛnaama, maam se m'tujn̰ga roi ki, m'ɔki naagi.› Gɔtn se naai an̰ tɛɗn kalɗɛ.» 5Gɔtn se jee kaan̰ naabin̰ge tɛrlin̰ ɔɔ: «Mɛlje, 'ziiɗjen kaal maakje do Raa ki.» 6Isa tɛrlɗen ɔɔ: «Kɛn naase jaay ɔkki kaal maakŋ do Raa ki magal aan gɔɔ kaam koobi se num, naase aki kɔŋ ɗeekŋ ko kaag kɛn magal ese se ɔɔki: ‹Iin̰ gɔtn se, 'ɓaa ɗaar maakŋ baar ki naane› ɔɔ naan̰ 'tookŋ taar se.» 7Tɛr Isa ɗeekɗen ɔɔ: «Maakse ki se, nam kɛn ɔk ɓulu jaay ɓulin̰ iŋgo naaba, ey lɛ iŋgo gaam maalge, kɛn naan̰ utu aan kaan ɓeen sum ɓo, naan̰ an̰ naar taaɗn ɔɔ: ‹'Ɓaaɗo, yɔkɔɗɔ iŋg naaŋ ki ɔɔ 'kɔsɔ› bin ne? 8Num bin eyo! Gaŋ naan̰ an̰ ɗeekŋ ɔɔ: ‹Kali se 'ɓaa tooɗin̰a, uusu kal tɛɗn naabi ɔɔ 'ɓaaɗo 'tɛɗum kɔsɔ. Kɛn ɛɗumga maam m'ɔsga ɔɔ m'aayga jaay ɓo sɔm, naai kic utu 'kɔsɔ ɔɔ utu 'kaaye.› 9Taa nakŋ naan̰ tɛɗ se, ɓul se mɛlin̰ an̰ kɔŋ tɔɔm eyo. 10Naase kic kɛn 'tɛɗkiga naabm kɛn k'taaɗsenoga se num 'taaɗki ɔɔki: ‹Naaje se, k'ɓulge cɛrɛ sum ɔɔ naabm naaje k'tɛɗ se lɛ, naabm kɛn k'taaɗjen taaɗ sum.›» 11Kɛn Isa ɓaa ɓaa Jeruzalɛm ki se, naan̰ aal teec daan taa naaŋ Samari ute taa naaŋ Galile ki. 12Kɛn naan̰ jaay aan maakŋ naaŋ ki kalaŋ bin se, jee bikiɗge sik ɓaaɗo ɔŋin̰a. Gɔtn se, naaɗe ɗaar dɔkɔ, 13ɔɔ uun mindɗe raan ɗeekin̰ ɔɔ: «Isa, Debm dooy jeege, ɛɛjjen doje ki.» 14Kɛn Isa aakɗe se, ɗeekɗen ɔɔ: «'Ɓaa 'taaɗki rosege se jee tɛɗn sɛrkɛ Raage tu.» Ɔɔ kɛn naaɗe utu ɓaa ɓaa sum ɓo, naaɗe ɔŋ lapia ɔɔ roɗe ɗaap tooɗ kɔlɔn̰ kɔlɔn̰. 15Deb kalaŋ maakɗe ki jaay aak naan̰ ɔŋga lapia se, naan̰ ɔk tɛrl ɓaaɗo gɔtn Isa ki, uun mindin̰ raan ɔɔ nook Raa. 16Gɔtn se naan̰ ɓaaɗo ooc mɛtn jɛ Isa ki ɔɔs don̰ naaŋ ki ɔɔ tɔɔmin̰a. Gaŋ gaabm se, naan̰ kɔɗ Samari. 17Naan̰ kɛn se Isa ɗeekin̰ ɔɔ: «Naaɗen sik se ɔŋ te lapia paac ey la? Num jee ɔɔp jɛrnaŋ se gay? 18Bini maakɗe ki se, mɛrtɛ jaay ɓaaɗo nook Raa se.» 19Anum Isa ɗeek kɔɗ Samari ki se ɔɔ: «Iin̰ 'ɓaa ute lapia. Kaal maaki kɛn naai aal dom ki se, aajiga.» 20Ɓii kalaŋ Parizige tɔnd mɛtn Isa ɔɔ: «Nuŋ ki jaay Raa utu kɔsn gaara do jeege tu se?» Naan̰ tɛrlɗen ɔɔ: «Kɛn Raa jaay kɔsn gaara do jeege tu se j'an̰ kɔŋ kaakŋ ute kaam eyo. 21J'aki kɔŋ ɗeekŋ j'ɔɔki naan̰ utu ara ey lɛ utu naane eyo. Taa Raa se ɔsga gaara daanse ki.» 22Gɔtn se Isa ɗeek jeege tun mɛtin̰ ki ɔɔ: «Kaaɗin̰ utu 'kaan se, naase utu aki je gɛn kaakŋ Goon Deba, naɓo gɛn kaakŋ ɓii kalaŋ kic ɓo, an̰ki kɔŋ kaak eyo. 23J'asen taaɗn j'ɔɔ naan̰ utu naane ey lɛ naan̰ utu ara. Anum ɔn̰te 'ɓaaki ɔɔ ɔn̰te 'naarki rose. 24Taa ɓii kɛn Goon Deba aɗe ɓaa se tecn̰ aan gɔɔ maan aal wusuk jaay wɔɔr maakŋ raa bɛrɗ gɔtɔ lak se. 25Num kɔr nakgen se jaay 'kaan se, naan̰ 'dabar dɛna ɔɔ jee do duni kɛn ɓɔrse se, an̰ kɔɔɗn kundu. 26«Ɓii kɛn Goon Deba aɗe ɓaa se, 'tecn̰ aan gɔɔ nakgen deelo do Noe ki. 27Kaaɗ kɛn naane se jeege ɔsɔ, aaye, tɔk mɛndge ɔɔ tɔk gaabge, bini aan ɓii kɛn Noe ɛnd maakŋ markab kɛn magala. Naan̰ kɛn se, maan magala bɔɔyɔ ɔɔ ɓaaɗo gɔɔb tɔɔl te jeege paac. 28«Ey lɛ nakŋ utu 'kaan se 'tecn̰ aan gɔɔ nakgen kɛn aano do Lɔt ki se kici. Kaaɗ kɛn se jeege se ɔsɔ ɔɔ aaye, dugŋ nakge ɔɔ dugŋ ute nakɗege, duub jinɛnɛge ɔɔ iin̰ ɓeeɗege. 29Num gaŋ, ɓii kɛn jaay Lɔt teec ɔn̰ Sɔdɔm se, Raa bɔɔyɗen pooɗo ute kuɗn ɔŋg se doɗe ki tɔɔl utɗe kap. 30Ɓiin Goon Deba aɗe ɓaa se, utu 'tɛɗn bin kici. 31«Ɓii kɛn se, debm iŋg kiŋg do ɓeen̰ ki raan se, n̰'ɔn̰te bɔɔyo gɛn 'tɔsn nakin̰gen maak ki ɔɔ debm maakŋ gɔt ki se lɛ, n̰'ɔn̰te tɛrl ɓeen̰ ki gɛn 'tɔsn nakin̰ge kici. 32'Saapki tu do mɛtn taar mɛnd Lɔt ki! 33Debm je kaajn̰ kon̰ se utu an̰ kutu ɔɔ debm utga kon̰ lɛ, utu 'kaaja. 34'Booyki m'asen taaɗa: maakŋ nɔɔr kɛn se, jeege di jaay tooɗ tooɗ do daŋal ki kalaŋ se, deb kalaŋ se, Raa an̰ kuun ɓaa ɔɔ debm kuuy se, naan̰ an̰ rɛsɛ. 35Ɔɔ mɛndgen di ɗaar uus kuus do toot ki se kic, deb kalaŋ se, Raa an̰ kuun ɓaa ɔɔ debm kuuy se, naan̰ an̰ rɛsɛ.» 36[Ɔɔ gaabge di kɛn iŋg kiŋg maakŋ gɔt ki se kic lɛ, deb kalaŋ Raa an̰ kuun ɓaa ɔɔ deb kuuy se, naan̰ an̰ rɛsɛ.] 37Gɔtn se jee mɛtn Isa ki tɔnd mɛtin̰ ɔɔ: «Mɛlje, nakgen se 'deel kaam gay?» Isa tɛrlɗen ɔɔ: «Gɔtn jaay daa ooy tooɗn se ɓo, gɔtn ese ɓo marlge kic lee bɔɔy tus ro ki.»

will be added

X\