Luc 15

1Gɔtn se jee tɔkŋ miirge ute jeegen jeege paacn̰ jeelɗe naaɗe se jee kusin̰ge se, paac utu ɓaaɗo gɔtn Isa ki gɛn booy taarin̰a. 2Parizige ute jee jeel taaɗn tɔɔkŋ mɛtn Ko Taar Raage kɛn gɔtn ese se, mooy naaŋ ki dir dir ɗeek ɔɔ: «Gaabm se tiŋg ɓo gɛn kɔkŋ jee kusin̰ge ron̰ ki sum ɔɔ tɔs ute naaɗe!» 3Gɔtn se Isa taaɗɗen ute kaal naagŋ taara ɔɔ: 4«Aan gɔɔ maakse ki se, debm kɛn ɔk baatge kaaru jaay maakɗe ki se kalaŋ iigga num, baatgen sik‑jɛrnaŋ‑kaar‑jɛrnaŋ kuuy se naan̰ aɗe kɔn̰ kɔɗ‑ɓaar ki, taa 'ɓaa je kɛn kalaŋ iig kiig se, an̰ je bini an̰o kɔŋ jaay ey la? 5Kɛn jaay ɓaa ɔŋin̰ga se, naan̰ an̰o kuun kaal daamin̰ ki ute maak‑raapo. 6Ɔɔ kɛn naan̰ jaay tɛrl ɓaaɗoga ɓeen se, naan̰ 'daŋ tusn mɛɗin̰ge ute jee do daamboogin̰ge ɔɔ ɗeekɗen ɔɔ: ‹'Ɓaakiro, j'aki tɛɗn maak‑raapo ute maama, taa baatum iigo se, maam m'ɔŋin̰ga.› 7Bin ɓo 'booyki m'asen taaɗa: maakŋ jee kusin̰ge tu se, deb kalaŋ jaay tɛrlga maakin̰a do Raa ki num, taa debm ese se jee maakŋ raa ki paac se maakɗe‑raapm don̰ ki cir jee si‑jɛrnaŋ‑kaar‑jɛrnaŋ kɛn an ɗim eyo gɛn tɛrl maakɗe do Raa ki se.» 8«Lɔ aan gɔɔ mɛnd jaay ɔk tamma sik. Ɔɔ kɛn kalaŋ jaay oocga num, naan̰ utu 'kɔɔcn̰ lɔɔmpɔ ɔɔ 'kɔtn maakŋ ɓeen̰a se bini an̰ je kɔŋ jaay ey la? 9Kɛn naan̰ jaay ɔŋin̰ga num, naan̰ aɗe daŋ tusn mɛɗin̰ge ute jee do daamboogin̰ge ɔɔ aɗen taaɗn ɔɔ: ‹'Ɓaakiro, j'aki tɛɗn maak‑raapo ute maama, taa tamman iigo se, maam m'ɔŋin̰ga.› 10Bin ɓo, 'booyki m'asen taaɗa: kɛn debm kusin̰ kalaŋ sum ɓo tɛrlga maakin̰ do Raa ki se, taa debm ese se, kɔɗn Raage maakɗe raapo.» 11Gɔtn se Isa tɛr taaɗɗen daala ɔɔ: «Gaaba kalaŋ ɔk gaangen gaabge dio. 12Goon baat se ɗeek bubin̰ ki ɔɔ: ‹Bua, maakŋ maalige tun kɛn naai ooyga num j'ajesin̰ nig se, ɛɗumo bɛɗuma.› Gɔtn se bubin̰ tooko ɔɔ nigɗesin̰a. 13Kɛn j'ɛɗin̰ bɛɗin̰ jaay tɛɗ ɓii kandum se, nakin̰ge se, naan̰ tɔs dugɗe naatn ɔɔ ute gursn se, naan̰ iin̰ ɓaa taa naaŋ dɔkɔ. Gɔtn naane se, naan̰ iŋg cɛɛpm te gursin̰ se cɛrɛ. 14Kɛn naan̰ jaay ut naŋ gursin̰ sum se, gɔtn se, ɓo ɛnd maakŋ naaŋ kɛn se ɔɔ tɔɔl tɛɗ daama jeege tu ɔɔ ɓo se, ɔlin̰ maakŋ daay ki. 15Gɔtn se, naan̰ iin̰ ɓaa tɛɗn naaba gɔtn gaab ki kalaŋ bini, gaabm se ɔlin̰ n̰'ɓaa n̰'bɔɔbm kin̰zirin̰ge maakŋ‑gɔt ki. 16Naan̰ je 'kɔsn kɔjn̰ mɔrɔmb kɛn kin̰zirge lee ɔs se kic ɓo, gaŋ nam ɛɗin̰ eyo. 17«Gɔtn se, naan̰ baag saapm do ron̰ ki ɔɔ taaɗ te maakin̰ ɔɔ: ‹Nakage, bubum se ɔk jee tɛɗn naabge kando kando kɛn ɔs ɔɔp taarɗe ki, naɓo maam m'kɔn̰ rom gɔtn ara m'kooy gɛn ɓo ne? 18Ɓɔrse, maam m'kiin̰ tɛrl ɓaa gɔtn bubum ki, m'an̰ ɓaa ɗeekŋ m'ɔɔ: bua, maam se m'tujga naan Raa ki ɔɔ m'tujga naai ki kici; 19ɔɔ maam se, m'aas te gɛn kɔŋ tɛɗn gooni ey sum; aakum aan gɔɔ jee tɛɗn naabige se sum.› 20Gɔtn se naan̰ iin̰ uun ɗoobm ɓee bubin̰a. «Kɛn naan̰ ɓaa ɓaa jaay utu teeco dɔk naane sum ɓo, bubin̰ aakin̰ se, ɛɛjin̰ don̰ ki ɔɔ naan̰ aan̰ ɓaa dɔɔɗin̰a, baam ɔkin̰ kaaɗin̰ ki. 21Gɔtn se goonin̰ ɗeekin̰ ɔɔ: ‹Bua, maam se m'tujga naan Raa ki ɔɔ m'tujiga naai ki. Ɔn̰te 'kaakum aan gɔɔ m'gooni sum.› 22Gaŋ bubin̰ ɗeek jee tɛɗn naabin̰ge tu ɔɔ: ‹'Ɓaankiro ute kal aak bɛɛ se yɔkɔɗɔ, uusin̰sin̰ki ron̰ ki, ɔlin̰ki kɔɗɔkɔ jin̰ ki ɔɔ 'tɔlin̰ki saa jɛn̰ ki. 23Ɔk 'ɓaankiro ute goon maraŋ kɛn eer sal sal se, 'tɔɔlin̰ki, ɔɔ 'tɛɗjeki kɔsɔ, taa j'aki tɛɗn maak‑raapjege. 24Taa goonum kɛn ey num ooyga kooy ɗɛl ɗɛl se, aajga ɔɔ naan̰ kɛn iigga kiig ɗɛl ɗɛl se, ɔk tɛrl ɓaaɗoga ɓeene.› Gɔtn se naaɗe baag tɛɗn maak‑raapɗe. 25«Kaaɗ kɛn se, goonin̰ magal se utu maakŋ‑gɔt ki. Kɛn naan̰ ɓaaɗo ɓaa jaay aan gɔɔr ute ɓee se, naan̰ booy kaa ɔkga lɛt ɔɔ jeege daam daama. 26Gɔtn se maakŋ jee tɛɗn naabm bubin̰ge tu se, naan̰ daŋo deb kalaŋ ɔɔ tɔnd mɛtin̰ ɔɔ: ‹Ɗi ɓo tɛɗa?› 27Gaabm se tɛrlin̰ ɔɔ: ‹Gɛnaai ɓo ɓaaɗoga. Taa naan̰ tɛrl ɓaaɗo ɔŋga bubi ute lapi se ɓo, bubi tɔɔlin̰ga goon maraŋ eer sal sal se.› 28Gɔtn se goon magal se maakin̰ tuju ɔɔ naan̰ baate kɛnd ɓeene. Naan̰ kɛn se, bubin̰ teec ɓaaɗo ɔŋin̰a ɔɔ sɛlin̰ mɛtin̰a. 29Naɓo naan̰ tɛrl bubin̰ ki ɔɔ: ‹'Booyo! Ɓaara ɓaara ɓo, maam m'lee m'tɛɗi naabige se aan gɔɔ debm tɛɗn naabi sum ɔɔ ɓii kalaŋ tap ɓo, m'baate te taari eyo. Ute naan̰ se kic ɓo, ɓii kalaŋ jaay naai am kɛɗn goon bin̰i kalaŋ taa m'an tɛɗn maak‑raapo ute mɛɗumge kic ɓo gɔtɔ. 30Num gaŋ gooni kɛn ut naŋo maalige ute mɛnd kɛɛsn gaabge jaay ɔk tɛrlo se, naai 'tɔɔlin̰ goon maraŋ eer sal sal se!› 31Gɔtn se bubin̰ tɛrlin̰ ɔɔ: ‹Goonuma, naai se daayum utu te maama ɔɔ maal maam m'ɔk se lɛ, paac gɛn naai. 32Gaŋ bɛɛki num, ɓaaɗo j'aki kɔsɔ ɔɔ j'aki tɛɗn maak‑raapjege. Aaka! Gɛnaai se ey num ooyga kooy ɗɛl ɗɛl, naɓo aajga ɔɔ naan̰ kɛn iigga kiig ɗɛl ɗɛl se, ɔk tɛrl ɓaaɗoga ɓeene.›»

will be added

X\