Luc 14

1Ɓii kalaŋ se, Isa ɓaa kɔsn maakŋ ɓee magal Parizige tu kalaŋ bini, gaŋ ɓiin se, ɓii sebit. Ɔɔ jee iŋg gɔtn ese ɔndin̰ kaama tak. 2Gɔtn se gaaba kalaŋ mɔɔɓga mɔɔɓ se, ɓaaɗo ɗaar naanin̰ ki. 3Naan̰ kɛn se, Isa taaɗ jee jeel taaɗn tɔɔkŋ mɛtn Ko Taar Raage tu ute Parizige tu ɔɔ: «Gɛn naase ki num, ɓii sebit ki se, debm kɔɔn̰ɔ se j'ɔk ɗoobm j'an̰ kɛɗn lapia lɔɓu gɔtɔ lɛ?» 4Gaŋ naaɗe do ɗɛk ɔɔ baate tɛrlin̰ taara. Gɔtn se Isa ɔk debm kɔɔn̰ɔ se, ɛɗin̰ lapia ɔɔ ɔn̰in̰ ɓaa ɓeen̰ ki. 5Tɛr Isa ɗeekɗen ɔɔ: «Maakse ki se jaay, debm kɛn goonin̰a ey lɛ maraŋin̰a ooc maakŋ buɗ ki ute ɓii sebit se, 'bɔɔy an̰ naar kuun ey ne?» 6Gɔtn ese, taar kɛn naaɗe 'kɔŋ jaay an̰ tɛrl tap ɓo, ɔk eyo. 7Kɛn Isa aak jeegen k'daŋɗeno gɔtn kɔs ki jaay je je gɔtn kiŋg naan ki se, naan̰ aan̰ɗen kaa taara ɔɔ: 8«Kɛn naai jaay k'daŋiga gɛn ɓaa kɔsn gɔtn kɔkŋ mɛnd ki num, ɔn̰te 'ɓaa kiŋg naan ki. Ey num sɔm, maakŋ jeege tun k'daŋɗeno se, nam kuuy magal ciri naai se utu aɗe ɓaa. 9Ɔɔ debm kɛn daŋseno se, utu aɗe ɓaa, ai ɗeekŋ ɔɔ: ‹Mɛɗuma, iin̰ ɔn̰ gɔtn ese; kɛse gɔtn kiŋg naai eyo.› Kɛn naai 'kiin̰ gɔtn ese jaay ɓo, 'ɓaa kiŋg gɔtn kaam mɔɔtn se, naan̰ kɛn se, naai sɔkɔn̰ɔ ai tɔɔlɔ. 10Num taa naan̰ se ɓo, kɛn k'daŋiga num, 'ɓaa iŋg gɔt kɛn kaam mɔɔtn. Bin se debm daŋi se jaay aanga num ɔɔ aaki naai iŋg kiŋg kaam mɔɔtn se, gɔtn se naan̰ ai ɗeekŋ ɔɔ: ‹Mɛɗuma, iin̰ 'ɓaaɗo iŋg naan ki ara.› Naan̰ kɛn se, jee kɛn k'daŋɗeno gɔtn kɔs ki se paac ute naai se, naaɗe ai kaaki se ai kaali maak ki. 11Taa debm nookŋ ron̰a raan se, utu 'kɔɔpm baate ɔɔ debm ɔɔp ron̰a baat se, ron̰a utu 'kookŋ raan.» 12Gɔtn se Isa taaɗ gaab kɛn daŋin̰o ɓeen̰ ki se kici, ɗeekin̰ ɔɔ: «Kɛn naai jaay 'daŋ jeege katar ki ey lɛ tɛgɛr gɛn kɔsɔ, ɔn̰te daŋo mɛɗige, gɛnaaige, taasige ɔɔ ɔn̰te daŋ jee do daamboogigen jee maalge. Ey num sɔm, ɓiin kuuy se, naaɗe utu ai daŋ kici ɔɔ nakŋ naai ɛɗɗesin̰ga se lɛ, naaɗe aisin̰ tɛrl gɔɔn̰ ki. 13Num gaŋ kɛn naai jaay 'je kɛɗn kɔsn ɓii laa ki ute maak‑raapo num, 'daŋo jee daayge, jee kɛn kɔɔn̰ tujɗege tuju, jee cɛkɛɗge ɔɔ jee kaam‑tɔɔkge. 14Bin se, ai 'tɛɗi maaki 'raapo, taa nakŋ naai ɛɗɗen se lɛ, naaɗe aisin̰ kɔŋ tɛrl gɔɔn̰ ki eyo. Num naan̰ se, Raa mala ɓo aisin̰ tɛrl gɔɔn̰ ki, kaaɗ kɛn naan̰ utu 'dur jee kɛn tɛɗ nakge ute ɗoobin̰a daan yoge tu se.» 15Maakŋ jeege tun kɛn ɓaaɗo kɔsn gɔtn ese se, deb kalaŋ jaay booy taar Isa taaɗ se, naan̰ ɗeek Isa ki ɔɔ: «'Maak‑raapo deb kɛn jaay utu 'ɓaa kɔsn maakŋ Gaar Raa ki se!» 16Gɔtn se Isa tɛrlin̰ ute kaal naagŋ taara ɔɔ: «Gaaba kalaŋ se, tɛɗ kɔsɔ dɛna ɔɔ naan̰ daŋo jeege kic ɓo dɛna. 17Kɛn kaaɗn kɔsɔ jaay aas se, gaabm se ɔl debm tɛɗn naabin̰ gɛn ɓaa daŋ jeegen k'daŋɗeno gɔtn kɔs ki se, ɗeekɗen ɔɔ: ‹'Ɓaakiro ɓɔrse! Ɓɛrɛ, kɔsɔ se ooyga.› 18Gaŋ gɔtn se, jee kɛn k'daŋɗe paac se baag ɗaapm taarɗege. Debm deet deet se ɗeek debm kɛn j'ɔlin̰o se ɔɔ: ‹Maam se, m'utu m'dugu dug maakŋ gɔtɔ. Bɛɛki num, m'an̰ m'ɓaa kaakin̰ jaayo. Bin se 'ɓaa ɗeekin̰ n̰'mooyuma, maam se m'kɔŋ kaan eyo.› 19Ɔɔ deb kuuy se ɗeekin̰ ɔɔ: ‹Maam se m'utu m'dugu dug maraŋge sik gɛn tɛɗn naaba ɔɔ maam m'je m'aɗen ɓaa naam gɛn tɛɗn naaba. Bin se 'ɓaa ɗeekin̰ n̰'mooyuma, maam se m'kɔŋ kaan eyo.› 20Tɛr deb kuuy ɗeekin̰ ɔɔ: ‹Maam se, m'utu m'ɔk kɔk mɛnda. Taa naan̰ se ɓo, maam m'kɔŋ kaan eyo.› 21Kɛn debm tɛɗn naabm se jaay tɛrl ɓaa ɔŋ mɛlin̰ se, naan̰ taaɗin̰ mɛtn taargen k'taaɗin̰o se paac. Kɛn mɛlin̰ jaay booy se, maakin̰ taarin̰a ɔɔ ɗeek debm tɛɗn naabin̰ ki se ɔɔ: ‹Yɔkɔɗɔ, 'ɓaa gɔtn jeege lee tusni daan ɗoobge tu maakŋ gɛgɛr ki, 'ɓaa daŋo jee daayge, jee kɛn kɔɔn̰ɔ tujɗeki tuju, jee kaam‑tɔɔkge ute jee cɛkɛɗge 'ɓaanɗeno gɔtn ara.› Gɔtn se debm tɛɗn naabin̰ se iin̰ ɓaa. 22Kɛn naan̰ jaay tɛrl ɓaaɗo ɔŋ mɛlin̰ se ɗeekin̰ ɔɔ: ‹Mɛluma, naabm naai ɔlum taarin̰ se, maam m'tɛɗin̰oga, gaŋ ute naan̰ se kic ɓo, gɔtɔ utu tap.› 23Gɔtn se mɛlin̰ ɗeekin̰ ɔɔ: ‹'Ɓaa daan ɗoobge tu ɔɔ naagŋ salige tu, jee se 'ɓaanɗeno ute taa tɔɔgɔ taa aɗe 'ɓaa utu 'ɗoocn̰ maakŋ ɓeem se.› 24Taa naan̰ se ɓo, maam m'ɗeeksen m'ɔɔ: maakŋ jeege tun k'daŋɗeno paac jaay baate ɓaaɗo se, maakɗe ki se deb kalaŋ kic ɓo, 'kɔŋ nam kɔsum se eyo.» 25Kɛn jee dɛnge jaay ɓaa ɓaa ɗoob ki ute Isa se, gɔtn se naan̰ tɛrl aakɗe ɔɔ ɗeekɗen ɔɔ: 26«Debm kɛn je aɗe ɓaa mɛtum ki jaay, je bubin̰a, kon̰a, mɛndin̰a, gɛnin̰ge, gɛnaan̰gen gaabge ute kɛngen mɛndge cir maama ɔɔ jem te maam cir ron̰ mal ey se, naan̰ 'kɔŋ tɛɗn debm mɛtn maam ki eyo. 27Debm kɛn baate kuun kaagŋ j'ansin̰ tupm ro ki ɔɔ ɔk mɛtum ey se, naan̰ se 'kɔŋ tɛɗn debm mɛtn maam ki eyo kici. 28«Taa naan̰ se ɓo, maakse ki se nam jaay je kiin̰ ɓee jɛrlɛ num n̰'iŋg naaŋ ki, mɛɗn kaakŋ gursin̰ kɛn an̰ kaasn kiin̰ ɓeen̰ se, jaay ey la? 29Ey num, kɛn naan̰ jaay uunga mɛta ɔɔ ɔɓ naŋin̰ te ey se, jee deel deel gɔtn ese jaay aakga num, an̰ tɛrɛcn̰ mɛtin̰ ki, 30an̰ ɗeek ɔɔ: ‹Aakki tu! Gaabm ara ɔɔ iin̰ kiin̰ ɓeen̰ kaca, naɓo ɔŋ aasin̰ te eyo.› 31Kɛn gaar gam jaay ɓaa tɛɗn bɔɔrɔ ute gaar kuuy num, naan̰ 'kiŋg naaŋ ki, 'kaakŋ asgarin̰gen dupu‑sik se, 'kaasn tɛɗn bɔɔrɔ ute asgargen dupu‑si‑di jaay ey la? 32Ey num, kɛn gaar naane utu dɔk sum ɓo, naan̰ 'kɔl jeege gɔtin̰ ki taa j'kɔkŋ taasa. 33Bin ɓo, maakse ki se debm jaay ɔn̰te nakin̰ge ey paac se, 'kɔŋ tɛɗn debm mɛtn maam ki eyo. 34«Ɗeere, nakŋ nijim aan gɔɔ kaata se gɔtɔ. Num kɛn kaata jaay kiŋgin̰ nijim se gɔtɔga num, j'an̰ tɛɗn j'ɔɔ ɗi jaay 'tɛɗn nijim gɔtin̰ ki se? 35Kɛn kaata jaay kiŋgin̰ teecga se, k'sin̰ naaŋ ki lɛ ɔŋ ɗaapm naaŋ eyo ɔɔ ɔŋ tɛɗ gɔtɔ gur eyo. Naan̰ se, bɛɛki num, nakin̰ si naatn sum.» Tɛr naan̰ ɗeekɗen ɔɔ: «Debm kɛn jaay ɔk bi gɛn booyo num, 'booy taar se.»

will be added

X\