Luc 13

1Kaaɗ kɛn se, jee mɛtin̰ge ɓaaɗo taaɗ Isa ki taa Galilegen ɓaaɗo tɛɗn sɛrkɛ jaay ɓo, Pilat tɔɔlɗe kaaɗ kɛn naaɗe tɛɗ tɛɗ sɛrkɛ se. 2Gɔtn se Isa tɛrlɗen ɔɔ: «Saapm naase ki num, ɔɔki Galilegen kɛn Pilat tɔɔlɗe se ɓo, tɛɗga jee kusin̰ cir Galilegen ɓaa se paac la? 3Gɔtɔ! 'Booyki m'asen taaɗa: kɛn naase jaay 'tɛrlki te maakse do Raa ki te ey se, naase paac utu aki 'kutn bin kici. 4Lɔ jeegen sik‑kaar‑martn ɓee jɛrlɛ k'daŋin̰ Siloe kɛn ooc doɗe ki jaay tɔɔlɗe se, gɛn naase ki num, jee Jeruzalɛm ki te dɛnɗe se, ɔɔki naaɗen kɛn ooy se ɓo, jee kusin̰ge cir jee ɓaa se paac la? 5Gɔtɔ! 'Booyki m'asen taaɗa: kɛn naase jaay 'tɛrlki te maakse do Raa ki ey se, naase paac utu aki 'kutn bin kici.» 6Gɔtn se Isa taaɗ ute kaal naagŋ taara ɔɔ: «Gaaba kalaŋ ɔk ko ba maakŋ jinɛnin̰ ki ɔɔ naan̰ ɓaaɗo je koojin̰a, naɓo ɔŋ te koojin̰ eyo. 7Gaŋ naan̰ ɗeek deb kɛn tɛɗin̰ naaba maakŋ jinɛnin̰ ki se ɔɔ: ‹Aaka, ko kaagŋ se maam m'leega ɓaara mɔtɔ ɔɔ m'je koojin̰ naɓo m'ɔŋ eyo. Ɓɔrse ɔg 'gaaŋ undin̰ naatn, taa naan̰ lɛ ɗaar gaas gɔtɔ cɛrɛ sum.› 8Num debm tɛɗn naaba se tɛrlin̰ ɔɔ: ‹Mɛluma, ɔn̰umsin̰ gɛn ɓaara kalaŋ daala; maam m'an̰ kuɗn mɛtin̰a ɔɔ m'utu m'an̰ kɔmb yɛɛn̰ɛ. 9Bin sum ɓo ute naan̰ se kɔr ɓaar kuuy se, sɔm utu 'koojo ɗaam; kɛn naan̰ jaay ooj te ey lɛ, an̰ kɔgŋ kund naatn.›» 10Ɓii kalaŋ, ɓii sebit ki se, maakŋ ɓeege tun kɛn Yaudge lee tusn maak ki se, gɔtn se Isa ɓaa ɛnd maakŋ ɓee kɛn kalaŋ ɔɔ baag dooy jeege. 11Gɔtn se, mɛnda kalaŋ ɔk kɔɔn̰ sitan ɔɔ gɔtn kɔɔn̰in̰ ɔkin̰ sum se, ɔkga ɓaara sik‑kaar‑marta. Ɔɔ kɔɔn̰in̰ se ɔkin̰ durunin̰ki tɛɗin̰ tap ɓo ɔŋ sɛɛj eyo. 12Kɛn Isa jaay aakin̰ se, daŋin̰a ɔɔ taaɗin̰ ɔɔ: «Mɛnda 'booyo, maam se m'ɔɔɗiga doi maakŋ kɔɔn̰i kɛn lee dabari se.» 13Gɔtn se Isa ɔnd jin̰a do mɛnd kɛn se, ɔɔ mɛnd se naar ɔŋ lapia, iin̰ ɗaara sɛɛj tal ɔɔ baag nookŋ Raa. 14Gaŋ magal ɓee kɛn Yaudge lee tusn maak ki jaay aak Isa ɛɗ lapia mɛnd ki, ɓii sebit ki se, naan̰ maakin̰ taarin̰a. Gɔtn se naan̰ uun mindin̰ raan taaɗ jeege tu ɔɔ: «'Booyki! Naajege se, j'ɔkki ɓii mɛcɛ gɛn tɛɗn naaba. Bin se, debm je lapia ron̰ num, n̰'ɓaaɗo daan ɓiige tun se. Ey num ɓii sebit se, ɓii tɛɗn naab eyo.» 15Gaŋ Mɛljege tɛrlin̰ ɔɔ: «Aak jeegen kɛn tɛɗ roɗe aan gɔɔ jee taaɗ taargen mɛt ki ara! Maakse ki se, naŋa jaay aanga ɓii sebit ki num, kɔŋ kɔn̰ maraŋin̰a ey lɛ buurin̰a mɛtn bɛlɛn̰ ki ɔɔ an̰ tuutn gɛn ɓaa kɛɗn maan ey se? 16Num mɛnd se lɛ, naan̰ mɛtjil Abraam mala, ɔɔ aaka, gɔtn Ɓubm sitange ɔkin̰ sum se ɔkga ɓaara sik‑kaar‑marta. Bɛɛki num, ɓii sebit ki se ɓo, j'an̰ kɔɔɗn don̰a maakŋ ji Bubm sitange tu se ey la?» 17Kɛn jee taamooyin̰ge jaay ɓaa booy taar se, sɔkɔn̰ɔ ɓaa tɔɔlɗe; gaŋ jee dɛngen aak nakŋ‑kɔɔɓgen paacn̰ naan̰ tɛɗ se, maakɗe raapo. mutard 18Gɔtn se, Isa tɛr taaɗɗen daala ɔɔ: «Kɛn Raa utu 'kɔsn gaar do jeege tu tap ɓo 'tecn̰ aan gɔɔ ɗi? Maam m'an̰ kɔmb bɛyɛ ute ɗi? 19Maakŋ Gaar Raa se, tecn̰ aan gɔɔ kaam nakŋ k'daŋin̰ mutardn ese se, kɛn gaaba kalaŋ uun ɔɔcin̰ maakŋ jinɛnin̰ ki. Kɛn naan̰ jaay ɔɔcin̰ sum se, naan̰ teece ɔɔ teep tɛɗ ko kaaga. Bini yeelge kic ɓo ɓaaɗo uj kujɗege tɛlɛtin̰ge tu.» 20Isa ɗeek daala ɔɔ: «Maakŋ Gaar Raa se tap ɓo m'an̰ kɔmb bɛyɛ ute ɗi? 21Naan̰ se tec aan gɔɔ ɔrɔm kɛn mɛnda jaay tɔs rujn̰ gɛmɛ ɗooc gɔrn magala ɔɔ kɛn naan̰ jaay deepin̰ga ɔɔ ɔmbin̰ga maak ki num, iin̰in̰ paac se.» 22Kɛn Isa jaay ɓaa ɓaa Jeruzalɛm ki se, naan̰ aal teeco maakŋ gɛgɛrge tu ɔɔ maakŋ naaŋge tu ɔɔ naan̰ kɛn se, naan̰ lee dooy jeege. 23Gɔtn se nam kalaŋ bini tɔnd mɛtin̰ ɔɔ: «Mɛluma, jee kɛn utu kaaj se, baat ey ne?» Gɔtn se Isa tɛrlɗen ɔɔ: 24«Aayki kaamse ɛndki ute taa ɗoobm baata, taa maam m'ɗeeksen m'ɔɔ: jeege dɛna utu 'je ɗoobm 'kɛndɛ naɓo naaɗe an̰ kɔŋ kaas eyo. 25Kɛn kaaɗin̰ jaay utu kaan se, mɛl ɓee utu kiin̰i ɔɔ 'gaasn kaam taarin̰a ɔɔ naasen aki kɔɔpm naatn se aki baagŋ tɔnd kaam taara aki ɗeekŋ ɔɔki: Mɛlje, ɔɔɗjen kaam taara! Gaŋ naan̰ maak ki se asen tɛrl ɔɔ: Naase tap ɓo, iin̰kiro gayo? Maam se, m'jeelsen eyo. 26Kaaɗ kɛn naane se, naase an̰ki taaɗn ɔɔki: naaje se j'ɔso ɔɔ j'aayo ute naai tɛlɛ ɔɔ naai dooy jeege daan ɗoobjege tu kici. 27Gaŋ naan̰ utu asen tɛrl ɔɔ: Naase iin̰kiro gay gay se, maam m'jeelsen eyo. Iikki naatn cɛɛm ki dɔkɔ, naasen paacn̰ jee tɛɗn kusin̰ge se! 28Gɔtn naane se, naase aki ɓaa keeme ɔɔ aki taan̰ naaŋsege kɛn aki ɓaa kaakŋ Abraam, Isak ɔɔ Yakub ute jee taaɗ taar teeco taar Raa ki paac maakŋ Gaar Raa ki; naɓo naase se, j'asen tuur naatn. 29Ɓii kɛn se, jee mɛtin̰ge se aɗe kiin̰ gɔtn kaaɗa tookŋo ɔɔ jee mɛtin̰ge se aɗe kiin̰ gɔtn kaaɗa toocn̰ni, ɔɔ kɛngen mɛtin̰ge aɗe kiin̰ kaam kaam kooko ɔɔ kɛngen kuuy se aɗe kiin̰ kaam kaam bɔɔyɔ, ɔɔ paac naaɗe aɗe ɓaa utu tusn 'kiŋg kɔsn ɓii laa ki ute maak‑raapo maakŋ Gaar Raa ki. 30'Booyki! Bin ɓo, jee kaam mɔɔtn se ɓo, utu 'tɛɗn jee deet deete ɔɔ jee deet deet se ɓo, utu 'tɛɗn jee kaam mɔɔtn.» 31Naan̰ kɛn se sum ɓo, Parizige kandum bini ɓaaɗo ɔŋ Isa ɔɔ ɗeekin̰ ɔɔ: «Ɓɛrɛ, iin̰ gɔti ki se 'ɓaa; taa Ɛrɔd se lɛ je ai tɔɔlɔ.» 32Isa tɛrlɗen ɔɔ: «'Ɓaa ɔŋki k‑bukumbɔɔ kɛn ese ɔɔ 'taaɗin̰ki ɔɔki: 'Booyo, maam se m'tuur tuur sitange ɔɔ m'ɛɗ kɛɗ lapia jee kɔɔn̰ge tu jaaki ɔɔ mɛtbeeki; ɔɔ maakŋ ɓii k‑mɔtɔge tu se, maam m'naŋ naabuma. 33Bin num, jaaki, mɛtbeeki ɔɔ pɛlɛn̰ se, maam m'ɓaa ute naanuma, taa ɗoobin̰ eyo kɛn debm taaɗ taar teeco taar Raa ki jaay 'kooy Jeruzalɛm ki ey se.» 34Isa ɗeek ɔɔ: «Waay Jeruzalɛm, waay Jeruzalɛm, naai kɛn debm tɔɔl jee taaɗ taar teeco taar Raa ki ɔɔ jee kɛn Raa ɔlɗeno gɔti ki kic ɓo, naai ɓo debm tund tɔɔlɗe! Mɛt kando, maam m'je m'tusn gɛnige aan gɔɔ ko kɔrɔn̰j kɛn lee tus gɛnin̰ge taa bɛɛkŋ kɛyin̰ ki se, naɓo naase 'jeki te eyo. 35'Booyki! Ɓee Raase se utu 'tooɗn kuuɗu. 'Booyki m'asen taaɗa: naan ki se, naase 'je amki kaak kic ɓo amki 'kɔŋ eyo, bini utu 'kaan kaaɗ kɛn naase utu aki ɗeekŋ ɔɔki: Ɔn̰ Mɛlje Raa tɛɗn bɛɛn̰a do debm kɛn utu ɓaaɗo ute ro naan̰a!»

will be added

X\