Luc 12

1Kaaɗ kɛn se, jeege tus dupu kando kando bini baag tuum naapa. Gɔtn se Isa baag taaɗn jeege tun mɛtin̰ ki se ɓo deete ɗeekɗen ɔɔ: «Naase se, ɔndki kɔndɔ ute ɔrɔm Parizige. Ɔrɔm naaɗe se je taaɗn ɔɔ naaɗe tɛɗ roɗe aan gɔɔ naaɗe ɓo jee taaɗ taar mɛt ki. 2«Taa kaaɗin̰ jaay utu 'kaan se, nakŋ paacn̰ j'ɔyin̰ga kɔy se, utu tooɗn tal. Ɔɔ nakŋ ɓɔrse k'jeelki mɛtin̰ ey se, j'utu j'an̰ki jeele. 3Bin ɓo, nakŋ paacn̰ naase 'taaɗin̰ki maakŋ nɔɔr ki se, 'ɓaa 'taaɗin̰ki jeege tu ute kaam kaaɗa. Nakŋ kɛn naase 'booyin̰ki k'taaɗsen naaŋ ki mɛtn bisege tu maakŋ ɓee ki se, 'wɔɔkin̰ki do ɓeege tu kici. 4«Mɛɗumge, taar se maam m'taaɗsen naase ki: ɔn̰te 'ɓeerki jeege tun 'tɔɔl daa roa, num mɔɔtn asen kɔŋ tɛɗn ɗim ey se. 5Num 'booyki m'asen taaɗn debm kɛn naase an̰ki ɓeere: 'ɓeerki deb kɛn ooykiga kic ɓo, naan̰ ɔk tɔɔgŋ kɛn asen kɔl maakŋ pooɗ kɛn gɛn daayum. Ɗeere, 'booyki m'asen taaɗa: kɛse ɓo debm kɛn naase an̰ki ɓeere. 6«'Jeelki, yeelge sɛɛm sɛɛm mii se k'dugin̰ ute kɔbɔrɔ di sum ey la? Ute naan̰ se kic ɓo, Raa ɔŋ dirig kalaŋ maakɗe ki eyo. 7Num gaŋ naase se bini bɛɛkŋ dosege se kic ɓo, Raa jeelin̰ kalaŋ kalaŋ. Bin se, ɔn̰te 'ɓeerki! Naan Raa ki se naase 'cirki yeelge se dɔkɔ. 8«'Booyki m'asen taaɗa: debm taaɗ naan jeege tu ɔɔ naan̰ debm maam se, maam Goon Deba kic ɓo maam m'taaɗn naan kɔɗn Raage tu m'ɔɔ naan̰ se debm maama. 9Num debm kɛn baatum naan jeege tu se, maam kic m'utu m'an̰ baatin̰ naan kɔɗn Raage tu. 10Ɔɔ debm kɛn tuj taarin̰a ro Goon Deb ki se, Raa an̰ tɔɔl kusin̰in̰ ese se; num debm kɛn jaay naaj Nirl Salal se, naan̰ se Raa an̰ tɔɔl kusin̰in̰ se eyo. 11Kɛn naase jaay k'tɔk k'ɓaansenga maakŋ ɓee kɛn Yaudge lee tusn maak ki se ey lɛ naan gaarin̰ge tu ɔɔ gɔtn tɔɔgge tu se num, naase ɔn̰te 'ɓeerki do taar kɛn naase aki ɓaa taaɗn naanɗe ki kɛn anki nakŋ kɔɔɗn dose. 12Taa kaaɗ kɛn se, Nirl Salal ɓo asen kɔl naase aki jeel taaɗn taara naanɗe ki.» 13Maakŋ jee dɛnge tu se, deb kalaŋ bini ɓaaɗo ɔŋ Isa ɔɔ ɗeekin̰ ɔɔ: «Debm dooy jeege, gɛnaam se ɔl nam ɓaa 'taaɗin̰, n̰'ɓaaɗo num maal bubje se ɔn̰ naai ɓo ajesin̰ nigi.» 14Gɔtn se Isa tɛrlin̰ ɔɔ: «Debm kɛn ɔndum gɛn kaakŋ mɛtn taarsege ey lɛ gɛn nigŋ maalsege se, tap ɓo naŋa?» 15Tɛr naan̰ taaɗ jeege tu paac ɔɔ: «Ɔndki kɔndɔ! Ɔɔ naase se ɔndki dose daan ki, bɔɔbki rose ro tama ki. Taa debkilim se, maalin̰ dɛn aan gɔɔ ɗi kic ɓo, kɛn ɔlin̰ iŋg se, maalin̰ eyo.» 16Gɔtn se tɛr Isa taaɗɗen ute kaal naagŋ taara ɔɔ: «Debm maala kalaŋ bin se, maakŋ gɔtin̰ ooj tuun karat karat. 17Kɛn naan̰ aak nakin̰ jaay ooj dɛn se, naan̰ baag taaɗn ute maakin̰ ɔɔ: ‹Ɓaar jaaki tap ɓo, maam m'tɛɗn rom m'ɔɔ ɗi? Ɓɛrɛ, gɔtn am kaasn m'an kɔmb nakumge se lɛ gɔtɔ.› 18Tɛr naan̰ taaɗ ute maakin̰ ɔɔ: ‹Ɓɔrse, kɛse ɓo nakŋ maam m'utu m'tɛɗa: giijumge se m'aɗen tɔɔkŋ paac naatn ɔɔ m'kɔɓm kɛngen kuuy magala magala cir naaɗege se daala. Kɛn m'ɔɓɗenga jaay aasga num, teen̰umge ute nakumge paac se, m'aɗen tusn kɔmb maak ki. 19Gɔtn se maam m'ɗeekŋ rom ki m'ɔɔ: ai roma, 'tɔɔl kɔɔri gɛn ɓaara ɓaara, taa kɔsɔ ute kaayi lɛ, dɛna. Taa naan ki se maam m'kɔsɔ, m'kaaye ɔɔ m'tɛɗ nakgen kɛn maakum jea.› 20Num gaŋ Raa ɗeekin̰ ɔɔ: ‹Kalɛ debm dɛrlɛ, maakŋ nɔɔr kɛn ese sum ɓo, naai lɛ 'kooyo; num nakigen naai 'tusin̰ se, tap ɓo 'kɔɔpm naŋ ki?› 21'Booyki! Kɛse nakŋ kɛn utu 'kaan do deb kɛn tusn maala dɛna do duni ki, naɓo naan Raa ki se, naan̰ ɔk ɗim ey se.» 22Gɔtn se Isa taaɗ jeege tun mɛtin̰ ki ɔɔ: «Taa naan̰ se ɓo, maam m'ɗeeksen m'ɔɔ: taa kose se ɔn̰ten 'kuunki nirlse taa nakŋ naase aki kɔsɔ ɔɔ taa rose se ɔn̰ten 'kuunki nirlse do kal kɛn naase aki tuusu. 23Taa kose se, naan̰ cir nakŋ kɔsɔ ɔɔ rose se lɛ, naan̰ cir kala. 24Aakki tu gaakge se; naaɗe lɛ ɔɔc eyo ɔɔ ɔk teen̰ gɛn kɔj eyo ɔɔ giiji lɛ, naaɗe ɔk eyo ɔɔ gɔtn kɔmb kɔrbɔtɗe kic ɓo, naaɗe ɔk eyo. Ute naan̰ se kic ɓo, Raa ulɗe. Num naase se mɛt kando yeelge se, naase 'cirɗeki? 25Maakse ki se, naŋa jaay ute kuun nirlin̰ sum ɓo 'kɔŋ ziiɗn ɓii kiŋgin̰ do naaŋ ki ne? 26Kɛn ese jaay naase ɔŋ aasin̰ki te ey num, gɛn ɗi jaay naase uunki nirlse do nakge tun ɔɔp ɓaa se? 27«Aakki tu pɔɔn̰ nakgen taak bɛɛ maakŋ kaag ki se; naaɗe se ɔɓ kuubu eyo ɔɔ ɔnd cɛkɛ eyo. Naɓo 'booyki m'asen taaɗa: Gaar Salomon do dɔkin̰ se, ute maalin̰ dɛn paac se kic ɓo, ɓii kalaŋ ɔŋ uus te kal aak bɛɛ tec aan gɔɔ gɛn naaɗe se eyo. 28Mu jaaki ɗaar maakŋ kaag ki ɔɔ mɛtbeeki sum ɓo j'utu j'an̰ tɔɔc se kic ɓo Raa tamarin̰ aak bɛɛ bɛɛ se, mɛt kando asen kɔŋ kɛɗn kal tuusu naase ki ey ne? Ɓɛrɛ, naase se jee kɛn aalki te maakse paac do Raa ki eyo. 29Ɔɔ ɔn̰te 'kuunki nirlse gɛn je nakŋ naase aki kɔsɔ ɔɔ aki kaaye. 30Nakgen bin se paac, jee jeel Raa mal ey ɓo daayum iŋg saap do ki. Ey num, Bubsen maakŋ raa ki se jeele nakŋ kɛn naase 'jeki. 31Num naase se 'jeki ɓo Raa kɔsn gaara dose ki ɔɔ nakgen ɔɔp se, naan̰ asesin̰ kɛɗn do ki. 32Naasen dɔɔl baatgen cɔkɔ ara, ɔn̰te 'ɓeerki! Taa Bubsen maakŋ raa ki se, nakŋ kɛn tɔɔlin̰ naan̰ ki se, naase utu aki kiŋg ute naan̰a maakŋ gaarin̰ ki.» 33«Bin se, nakŋ naase ɔkki se, dugin̰ki naatn ɔɔ gursin̰ se, ɛɗin̰ki sɛrkɛ jee daayge tu. Bin se gɔɔ naase ɔmbkiga naksege gɔtn 'kɔŋ 'tuj eyo ɔɔ daayum asen tooɗn kɔrbɔtɔ maakŋ raa ki. Gɔtn naane se, debm ɓoogo gɔtɔ ɔɔ k‑n̰ɔɔ kic ɓo an̰ kɔŋ tuj eyo. 34Taa gɔtn maalse ro ki se, gɔtn ese ɓo maak‑saapse iŋg ro ki kici.» 35«Iŋgki daayum ute kal tɛɗn naabse rose ki, ɔɔ ɔn̰te 'kɔn̰ki lɔɔmpsege 'kooyo. 36Ɔɔ naase iŋgki aan gɔɔ jeegen kɛn iŋg aak kaak kaam mɛlɗen kɛn utu aɗe tɛrl gɔtn kɔkŋ mɛnd ki se. Taa kɛn naan̰ jaay aanga ɔɔ tɔndga kaam taara num, naaɗe an̰ naar kɔɔɗɔ. 37Maak‑raapo naaɗe kɛn mɛlɗe ɓaaɗo ɔŋɗega jaay naaɗe utu iŋg kiŋg zɛɛr se. 'Ɓooyki bɛɛ m'asen taaɗa: mɛlɗe se, naan̰ mala 'kuun kuusn kal tɛɗn naabin̰a aɗen kɔŋ naaŋ ki ɔɔ naan̰ ɓo aɗen kɛɗn kɔsɔ. 38Maak‑raapo naaɗe kɛn mɛlɗe 'kaan daan nɔɔr ki lɔ do mɛtbeeki kɛn aɗen kɔŋ naaɗe utu iŋg zɛɛr se. 39«Naase 'jeelki, kɛn mɛl ɓee jaay jeel kaaɗn debm ɓoogo ano ɓaa num, naan̰ 'kɔn̰ ɓeen̰ se debm ɓoogo an̰ tɛrɛc eyo. 40Naase kic 'ɗaapki rose, iŋgki do mɛtɛkse ki, taa kaaɗn kɛn Goon Deba jaay aɗe ɓaa se lɛ, naase 'jeelki eyo.» 41Gɔtn se Piɛr tɔnd mɛtin̰ ɔɔ: «Mɛluma, kaal naagŋ taar kɛn naai taaɗ se, taaɗ ute naaje sum lɔɓu ute jeege paac lɛ?» 42Mɛljege tɛrlin̰ ɔɔ: «Debm tɛɗn naabm mɛtɛkɛ ɔɔ tuj ɔrmin̰ ey se kɛn gay? Naan̰ ɓo debm kɛn mɛlin̰ utu an̰ kɔn̰ jee tɛɗn naabgen kuuy kaam jin̰a ɔɔ kɛn aanga kaaɗin̰ ki num, aɗen lee 'nigŋ nakŋ kɔsɔ. 43Maak‑raapo debm tɛɗn naab kɛn mɛlin̰ aan jaay ɔŋin̰ naan̰ utu tɛɗin̰ tɛɗn naabm kɛn naan̰ ɔn̰in̰sin̰ kaam jin̰ se. 44'Booyki bɛɛ m'asen taaɗa: debm tɛɗn naabm bin se, mɛlin̰ utu an̰ kɔn̰ nakin̰ge paac kaam jin̰a. 45Num gaŋ kɛn debm tɛɗn naabm se jaay taaɗ ute maakin̰ ɔɔ: Mɛlum se aɗe kɔŋ tɛrl yɔkɔɗ eyo, ɔɔ gɔtn se naan̰ iin̰ baag tɔnd jee tɛɗn naabgen mɛndge ute gaabge, jaay naan̰ ɔsɔ ɔɔ aay oono. 46Gaŋ mɛl gaabm ese se, ɓiin jaay naan̰ ano tɛrl se, naan̰ ɔnd eyo ɔɔ kaaɗ kɛn naan̰ aan kaan kic lɛ, naan̰ saap do ki eyo. Kɛn mɛlin̰ jaay aanga num, utu an̰ tuur naata ɔɔ an̰ kɔlin̰ 'dabar ute jee kɛn baate kaal maakɗe do Raa ki. 47Debm tɛɗn naabm kɛn jeel naabm kɛn mɛlin̰ maakin̰ jen ro ki se, naɓo ɔŋ tɛɗin̰ te ey se, naan̰ se mɛlin̰ utu an̰ kɔnd dɛn aak eyo. 48«Num gaŋ debm tɛɗn naabm jeel eyo naabm kɛn mɛlin̰ maakin̰ jen ro ki se, kɛn naabin̰ se jaay tujga kic num, j'an̰ kɔndin̰ kaam dɔɔɗin̰ki sum. «Taa naan̰ se ɓo, debm kɛn j'ɛɗin̰ga nakge dɛn num, k'je gɔtin̰ ki kic ɓo dɛna ɔɔ debm kɛn j'ɔn̰in̰ga nakge dɛn kaam jin̰ se, j'utu k'tɔnd mɛtn nakge dɛna gɔtin̰ ki kici.» 49Isa taaɗ ɔɔ: «Maam se m'ɓaano ute pooɗo do naaŋ ki ɔɔ m'je pooɗn se 'kɔkɔ. 50Kɔr naan̰ se kaan se, maam m'ɔk batɛm dubar kɛn maam m'utu m'batizi. Naan̰ se ɓo, nakŋ deerum kɛn iŋg booyum bini m'utu m'an̰ tɛɗn 'kaasn jaay se. 51«Ɔn̰ten 'saapki ɔɔki maam se m'ɓaano ute lapia ɓo do naaŋ ki. Gɔtɔ! 'Booyki, m'asen taaɗa: maam se m'ɓaaɗo ɓo gɛn gaaŋ jeege ute naapa. 52Taa naan̰ se ɓo, naan ki se, jee maakŋ ɓeeɗe ki mii se utu gaaŋ ute naapa. Maakɗe ki se, jee mɔtɔ taarɗe 'kɔŋ kɔkŋ mɛtn naapa ute jee di eyo ɔɔ jee di se kic ɓo taarɗe 'kɔŋ kɔkŋ mɛtn naapa ute jee mɔtɔ eyo. 53Naaɗe utu gaaŋ ute naapa: bubu se, utu 'gaaŋ te goonin̰ gaaba ɔɔ goon gaaba se, utu 'gaaŋ ute bubin̰ kici; ko se, utu 'gaaŋ ute goonin̰ mɛnda ɔɔ goon mɛnda se, utu 'gaaŋ ute kon̰a kici. Moom mɛnda se, utu 'gaaŋ ute mɛnd goonin̰a ɔɔ mɛnd goono se, utu 'gaaŋ ute moomin̰ mɛnda kici.» 54Isa taaɗ jee dɛnge tu daala ɔɔ: «Kɛn naase jaay aakkiga gapara ɔsga mɛtn raa ki num, ɓɔrse sum ɓo naase naar ɔɔki maane utu aɗe ɓaao. Ɔɔ maane se ɓaaɗo ɗeere. 55Kɛn naase jaay aakkiga kuulu baagga kɔl ɓaa kaam kaam bɛrɗe se, naase ɔɔki, jaaki se gɔtɔ utu 'kɔŋgɔ ɔɔ gɔtɔ ɓaaɗo ɔŋg ɗeere. 56Kɛn naase jaay 'jeelki kaakŋ jeel kaaɗn nakgen kɛn tɛɗ do naaŋ ki, ute kɛn tɛɗn maakŋ raa ki num, 'tɛɗ ɔɔ ɗi jaay 'jeel ɔkki mɛtn nakgen kɛn deel daanse ki ey se? Naase se jee kɛn saap ɔkki mɛtn nakge eyo. 57«Gɛn ɗi jaay naase ɔŋ aak ɔkki mɛtn nakgen gɛn tɛɗ ute ɗoobin̰ ey se? 58Taa naan̰ se ɓo, kɛn naai 'ɓaa ɓaa gɔtn kɔjn̰ bɔɔr ki num, ɗoob ki se, ute debm taamooyi se naai ai kaami ɗaap taari. Ey num, ɓɛrɛ, naan̰ ai ɓaa kɔli gɔtn debm kɔjn̰ bɔɔr ki ɔɔ debm kɔjn̰ bɔɔrɔ se lɛ ai kɔli gɔtn asgarge tu ɔɔ asgarge se, ai kɔkŋ kɔli daŋgay ki. 59'Booy m'ai taaɗa: nakŋ doi ki paac se, bini kɔbɔrɔ kic ɓo ɔg naŋin̰ te ey se, naai 'kɔŋ teecn̰ maakŋ daŋgay ki eyo.»

will be added

X\