Jean 12

1Kɛn Isa jaay aan Betani ki gɔtn kɛn naan̰ duro Lazar daan yoge tu se, ɔɔpga ɓii mɛcɛ sum ɓo, Yaudge 'tɛɗn laa Paak. 2Gɔtn se k'tɛɗ kɔsɔ taa naan̰a ɔɔ Mart uuno kɔsɔ se, ɓaaɗo tɔndɗesin̰a. Gaŋ maakŋ jeege tun iŋg ɔs kɔs te Isa se, Lazar kic utu maakɗe ki. 3Gɔtn se Mari uuno itir aas kaam ɗoocn̰ kurku ɔɔ itir se k'daŋin̰ nard ɔɔ naan̰ se itir salal ɔɔ ɔɔn̰ɔ. Naan̰ jɛɛr itir se do jɛ Isa ki ɔɔ ɔtin̰sin̰ ute bɛɛkin̰a ɔɔ ɓee naaɗe iŋg maak ki se, oot itir itir sum. 4Gɔtn ese maakŋ jee mɛtin̰ ki se, debm kɛn k'daŋin̰ Judas Iskariɔt se, naan̰ ɓo kɛn tɛɗga num utu an̰ kut se, ɗeek ɔɔ: 5«Bɛɛki se, itir se jaay k'dugin̰ga utu tamma kaar‑mɔtɔ ɔɔ gursn se k'nigŋ jee daayge tu num bɛɛ ey la?» 6Kɛn Judas jaay taaɗ bin se, taa naan̰ saap ɓo do jee daayge tu eyo, num gaŋ taa naan̰ debm ɓoogo; aan gɔɔ naan̰ debm kɔkŋ gursɗe ɗey se, naan̰ iin̰ga num lee tuun tuun mɛtn gursn ese. 7Gɔtn se Isa ɗeek ɔɔ: «Mɛnda se ɔn̰in̰ kaam kalaŋ! Nakŋ naan̰ tɛɗum se kɛse ɓo aasga gɛn ɓii duubuma. 8Jee daayge se daayum utu te naase. Num gaŋ maam se, daayum m'kɔŋ kiŋg te naase eyo.» 9Kaaɗ kɛn se Yaudge dɛna kɛn booy jaay j'ɔɔ, ɔɔ Isa utu Betani ki se, naaɗe iin̰ ɓaaɗo. Naaɗe ɓaaɗo se taa Isa sum eyo, num naaɗe ɓaaɗo se taa kaakŋ Lazar kɛn naan̰ durin̰o daan yoge tu se kici. 10Gɔtn se magal jee tɛɗn sɛrkɛ Raage tu uun doa gɛn tɔɔl Lazar kici. 11Taa Lazar se, Yaudge dɛna iin̰ rɛsɗe ɔɔ ɓaaɗo uun taar Isa. 12Mɛtbeen̰ki se, jee dɛn ɓaaɗo gɛn tɛɗn laa Paak se, booy ɔɔ Isa utu ɓaaɗo Jeruzalɛm ki. 13Naaɗe gaaŋo doomo jiɗege tu, ɔɔ teec ɓaaɗo dɔɔɗ Isa. Naaɗe dɔɔɗin̰ se, ɗɔɔb ɔɔy ɔɔ: «Ozaana, Raa tɛɗn bɛɛn̰ do deb kɛn ɓaaɗo te ro Mɛljege Raa, naan̰ se ɓo Gaar Israɛlge.» 14Isa ɔŋ goon buur gaaba se ook iŋgo do ki, aan gɔɔ taar kɛn k'raaŋo do dɔkin̰a kɛn ɗeek ɔɔ: 15Jee maakŋ gɛgɛr kɛn Sion ki, ɔn̰te 'ɓeerki, aakki gaarse ookoga do goon buur kɛn gaaba utu ɓaaɗo. 16Nakgen deel mɛtn‑jiki paac se kaaɗ kɛn se, jee mɛtin̰ ki se ɔŋ jeel ɔk te mɛtin̰ eyo. Num gaŋ kɛn Isa Raa nookin̰ se jaay ɓo, naaɗe saap ɔŋin̰a nakŋ Isa tɛɗ se, taa nakŋ se k'raaŋin̰oga raaŋa do dɔkin̰a ɔɔ kɛse ɓo nakgen kɛn jeege tɛɗin̰sin̰ se. 17Anum jee dɛn iŋgo te Isa jaay aako kɛn naan̰ daŋo Lazar maakŋ ɓaaɗ ki jaay Lazar duro daan yoge tu se, naaɗe se ɓo ɓaaɗo ɔɔs maanin̰ jeege tu. 18Aan gɔɔ naaɗe booyga booy nakŋ‑kɔɔɓm naan̰ tɛɗo se, taa naan̰ se ɓo jeege teec ɓaaɗo dɔɔɗ Isa. 19Gɔtn se Parizige baag taaɗn te naapa ɔɔ: «Aakki! Naan̰ se lɛ cirga dojege, ɔɔ ɓɔrse se lɛ, jeege paac ɓaaga mɛtin̰ ki.» 20Ɓii laa Paak ki se, Grɛkgen mɛtin̰ge ɓaaɗo Jeruzalɛm ki gɛn keem Raa. 21Naaɗe se ɓo ɓaaɗo ɔŋ Pilip kɛn iin̰o Betsaida kɛn taa naaŋ Galile ki se ɔɔ naaɗe tɔnd mɛtin̰ ɔɔ: «Naka, naaje se k'je kaakŋ Isa.» 22Pilip ɓaa ɔŋ Andre ɔɔ taaɗin̰ ɔɔ naaɗen di se paac ɓaa taaɗ Isa ki. 23Isa tɛrlɗen ɔɔ: «Ɓɔrse kaaɗn kɛn Goon Deba nookin̰ keem se, aanga. 24'Booyki bɛɛ m'asen taaɗa: kaam teen̰e jaay j'ɔɔcin̰ te ey se, naan̰ iŋg gɔtin̰ ki sum. Num gaŋ kɛn j'ɔɔcin̰ga num, kaamin̰ se ut naatn, ɔɔ kɛn teeco se ɓaaɗo ooj dɛna. 25Debm je ron̰ se, utu kutn kon̰a ɔɔ debm do naaŋ ki ara jaay je Raa cir ron̰ se, naan̰ se utu 'kɔŋ kaajn̰ gɛn daayum. 26Debm jaay je tɛɗn naabm maam se, 'kɔkŋ mɛtuma. Gɔtn maam m'utu se, debm tɛɗn naabum se kic 'kiŋg te maama. Kɛn debm jaay tɛɗum naabm maam se, Bubum utu an̰ magala.» 27Tɛr Isa taaɗ ɔɔ: «Ɓɔrse maam m'iŋg se nirlum aayuma, num gaŋ m'taaɗn m'ɔɔ ɗi? M'taaɗn m'ɔɔ: Bua, aajuma gɛn kaaɗn dubar utu 'kaan dom ki se 'sookumsin̰ naatn rom ki bin ne? Gɔtɔ! Maam ɓaaɗo tap ɓo taa naan̰ se. 28Bua, 'nookŋ roi.» Gɔtn se k'booy mindi taaɗ maakŋ raa ki ɔɔ: «Maam se m'nookin̰ga ɔɔ m'utu m'an̰ nookŋ daala.» 29Jee dɛn iŋg gɔtn ese jaay booy se, taaɗ ɔɔ: «Kɛse Raa ɓo aata.» Gaŋ jee mɛtin̰ge ɗeek ɔɔ: «Kɛse kɔɗn Raa gam ɓo taaɗin̰.» 30Gaŋ Isa tɛrl taaɗɗen daala ɔɔ: «Mind taaɗ se taaɗ te maam eyo, anum naan̰ se, taaɗ te naase. 31Ɓɔrse kaaɗn kɛn Raa an kɔjn̰ bɔɔrɔ do jeege tun do naaŋ ki se aanga. Ɓiin se ɓo Ɓubm sitange, naan̰ ɓo Gaar jee kusin̰gen do naaŋ ki se, j'an̰ tuurin̰ naatn. 32Kɛn maam se jaay j'uun k'ɗaarumga raan se, maam m'tɛɗn jeege paac aɗe ɓaa gɔtum ki.» 33Kɛn naan̰ jaay taaɗ taargen se, naan̰ je taaɗn ɔɔ te ɗoobm gay jaay naan̰ utu 'kooyo. 34Jee dɛnge se ɗeekin̰ ɔɔ: «Naaje k'booy maakŋ Ko Taar kɛn Raa ɛɗo Musa ki se ɔɔ: al‑Masi se ɓaaɗoga num naan̰ se 'tiŋg gɛn daayum. Anum gɛn ɗi jaay naai taaɗ ɔɔ: Goon Debm j'an̰ tupm tɔɔl ro kaag ki ɔɔ j'an̰ kuun ɗaar raan se? Goon Debm ese kɛn gay daala?» 35Isa tɛrlɗen ɔɔ: «Gɔtn wɔɔr kɛn lee wɔɔrsen gɔtɔ se, kaaɗin̰ ɔɔpga gɔɔrɔ. Kaaɗ kɛn naan̰ utu se, 'leeki maakŋ gɔt kɛn wɔɔr se, taa bin se gɔtn ɔɔɗ se asen naar kɔkŋ do jise ki eyo. Taa debm lee maakŋ gɔt kɛn ɔɔɗ se lɛ, naan̰ jeel gɔtn naan̰ ɓaan se eyo. 36Kaaɗn gɔtn wɔɔr utu se, 'tookki 'leeki utu gɔtn wɔɔr se. Taa bin se naase aki tɛɗn gaan gɔt kɛn wɔɔrɔ.» Kɛn Isa jaay taaɗ naŋ taarin̰ se, naan̰ iin̰ ɔn̰ɗe ɔɔ ɓaa oom gɔtn dɔk te naaɗe. 37Ute nakŋ‑kɔɔɓgen Isa tɛɗ dɛn naanɗe ki se kic ɓo, Yaudge baate kaal maakɗe don̰ ki rɔk. 38Taa naan̰ se ɓo taar kɛn debm taaɗ taar teeco taar Raa ki ron̰ Ezayi taaɗno se aanga ɗoobin̰ ki kɛn ɔɔ: Mɛljege Raa, taari naaje jaay k'lee k'taaɗ jeege tu se, naŋa took uunga ɔɔ Mɛljege Raa tap ɓo 'tɔɔgin̰ se, naan̰ taaɗga naŋ ki? 39Yaudge jaay ɔŋ aal maakɗe do Isa ki ey se, taa Ezayi se taaɗga taaɗ taar ese se kici kɛn ɔɔ: 40Ɗeere, jee se Raa turumɗenga kaamɗege ɔɔ tɛɗɗen naaɗe tɛɗga jee do‑mɔŋgge taa kaamɗe kaakŋ kɔkŋ gɔt eyo ɔɔ biɗe booy kɔkŋ taar eyo ɔɔ ute maakɗe kic naaɗe kɔŋ booy kuun jaay aɗe tɛrl ro maam ki, ey num kaaɗ kɛn naane se, maam Raa m'aɗen kaaja. 41Kɛn Ezayi jaay taaɗ bin se, taa naan̰ aakga kaak nookŋ Isa ɔɔ taargen naan̰ taaɗo se, taaɗ ute naan̰a. 42Ute naan̰ se kic ɓo maakŋ magal Yaudge tu se, jeege dɛna aal maakɗe do Isa ki. Naɓo taa Parizige se, naaɗe ɔŋ taaɗin̰ tal naan jeege tu eyo, taa naaɗe ɓeer ɔɔ sɔm Parizige aɗen tuur naatn, maakŋ ɓee kɛn Yaudge lee tusn maak ki se. 43Taa naaɗe je tɔɔm kɛn jikilimge lee tɔɔmɗe se ɓo, bɛɛ cir kɛn Raa ɓo aɗen tɔɔmɔ. 44Gaŋ gɔtn se Isa uun mindin̰ raan taaɗ ɔɔ: «Debm jaay aal maakin̰ do maam ki se, naan̰ aal maakin̰ do maam ki sum eyo, num naan̰ se aal maakin̰ do Deb kɛn ɔlumo. 45Ɔɔ debm kɛn aakumga maam se, aakga Debm kɛn ɔlumo se kici. 46Maam se m'gɔtn wɔɔr kɛn ɓaaɗo do naaŋ ki se, taa debm jaay aalga maakin̰ do maam ki se, naan̰ 'kɔŋ kiŋg maakŋ gɔt kɛn ɔɔɗ eyo. 47Kɛn debm jaay booy taaruma ɔɔ ɔkin̰ maakin̰ ki ey se, maam ɓo m'an̰ kɔjn̰ bɔɔrɔ don̰ ki eyo. Taa maam m'ɓaaɗo se, gɛn kɔjn̰ bɔɔrɔ do jeege tun do naaŋ ki eyo, num m'ɓaaɗo se gɛn kaajn̰ jeegen do naaŋ ki. 48Debm jaay ɔɔɗ unduma ɔɔ baate tookŋ taarum se, bɔɔrɔ utu koocn̰ don̰ ki. Taa ɓiin dunia an naŋ se, taargen maam m'taaɗin̰ se ɓo utu an̰ kɔjn̰ bɔɔrɔ don̰ ki. 49Taargen maam taaɗ se, m'tɛrɛc te dom eyo. Kɛse Bu kɛn ɔlumo se ɓo ɔlum m'taaɗ taargen se ɔɔ m'dooy jeege. 50Maam m'jeele taar kɛn naan̰ taaɗumo gɛn tɛɗa se, kɛse ɓo taar kɛn ɛɗ kaaja gɛn daayum. Taar kɛn maam m'taaɗ se, m'taaɗin̰ aan gɔɔ kɛn Bu taaɗumsin̰o.»

will be added

X\