Jacques 4

1Kɛn ɔlsen jaay tɛɗki dɛkɛn̰ɛ ɔɔ mooyki ute naapa tap ɓo ne ɗi? Kɛse nakŋ daa rose jese ɓo ɔlsen 'tɛɗki nakgen ese. 2Kɛn naase 'jeki ɗim jaay ɔŋki te ey se, ɔlsen naase 'tɔɔlki jeege. Naase 'dɔŋki nakgen kɛn naase ɔkki eyo jaay ɔŋki te ey se. Naase 'mooyki te naapa ɔɔ 'tɔndki naapa. Kɛn naase jaay 'jeki naka ɔɔ ɔŋki te ey se, taa naase 'tɔndkiro te mɛtn Raa eyo. 3Naase 'tɔndki mɛta jaay ɔŋki te ey se, taa naase 'tɔndki te mɛta jig eyo. Naase ɔkki saapm jig eyo ɔɔ kɛn ɔŋkiga kic ɓo, an̰ki kutn gɛn nijim daa rose cɛr sum. 4Naase se, jeegen maakse kalaŋ do Raa ki eyo! Naase 'jeelki jeegen jaay je nijim dunia paac se tɛɗga jee wɔɔy Raage. Ɔɔ debm je nijim dunia se, naan̰ se tɛɗn debm wɔɔy Raa. 5Ɔn̰ten 'saapki ɔɔki taar Kitapm taaɗ se cɛrɛ, kɛn taaɗ ɔɔ: Raa jaay ɛɗjeki Nirl Salal se, taa naajege se k'tɛɗkiga jee naan̰ge ɔɔ naan̰ je ɔɔ j'aki kiŋg ute Nirl naan̰ se sum. 6Anum Raa se, bɛɛ naan̰ tɛɗjeki se cir nakge paac. Taa naan̰ se ɓo, Kitap ɗeek ɔɔ: Jeegen jaay magal roɗe naanin̰ ki se Raa tookɗen eyo. Num jeegen jaay ɔɔp roɗe baat naanin̰ ki se, naan̰ tɛɗɗen bɛɛn̰a. 7Taa naan̰ se ɓo, naase 'took uunki taar Raa ɔɔ 'ɗaarki tɔɔgɔ naan Ɓubm sitange tu ɔɔ naan̰ 'kaan̰ naatn dɔkɔ rose ki. 8'Ɓaakiro gɔɔrɔ cɛɛsn Raa ki ɔɔ naan̰ kic aɗe ɓaa gɔɔr cɛɛsse ki. 'Tug 'ɗaapki jisege naasen jee tɛɗn kusin̰ge se. Ɔɔɗki kusin̰ kɛn maakse ki, naasen maaksege di di se. 9Ɔn̰ki maakse 'tuju taa kusin̰ kɛn naase 'tɛɗki. 'Tɔɔyki makɔn̰ɔ ɔɔ eemki nɔɔ, 'kooy koogse se utu 'dɛl keeme, ɔɔ maak‑raapse se utu 'dɛl maak‑tuju. 10Ɔɔpki rose baata naan Mɛljege tu, ɔɔ naan̰ ɓo debm asen kuun rose raan. 11Gɛnaamge, ɔn̰te kɔɔɗki naapa. Taa debm jaay taaɗ taargen iŋg kus ɓo ro gɛnaan̰ ki ey lɛ ɔjin̰ bɔɔrɔ don̰ ki se, kɛse aan gɔɔ naan̰ taaɗ taargen iŋg kus ɓo ro Ko Taar kɛn gɛn Labar Jiga se. Bin se naan̰ took iŋg do ki eyo, num naan̰ taaɗ taargen iŋg kus ɓo ro Ko Taar kɛn gɛn Labar Jiga ki sum. 12Raa se naan̰ kalin̰ ki sum ɓo debm kɛɗ Ko Taar jeege tu, ɔɔ naan̰ kalin̰ ki sum ɓo debm 'kɔjn̰ bɔɔrɔ do jeege tu. Ɔɔ naan̰ sum ɓo debm aaj jeege ey lɛ kɛn utɗe. Num naai se, naŋa kaca jaay ɓo 'kɔjn̰ bɔɔrɔ do naapi ki se? 13Num 'booyki bɛɛ, naasen kɛn 'taaɗki ɔɔki: jaaki ey lɛ mɛtbeeki se, naaje k'kiin̰ ɓaa kiŋg maakŋ gɛgɛr kɛn se, j'aɗe 'tɛɗn suuk j'aɗe looko ɔɔ j'aɗe kɔŋ gurs dɛna! 14Naase 'taaɗki bin se, nakŋ kɛn 'tɛɗn mɛtbeeki se kic ɓo naase 'jeelki eyo. Naasen 'tecki aan gɔɔ muubm kɛn iin̰o ɔɔ naar wɔɔk naatn se sum. 15Bɛɛki num, naase aki ɗeek ɔɔki: kɛn Mɛljege je num, ajeki bɔɔbm kojege jaay j'aki kɔŋ tɛɗn nakgen se. 16Num naase 'magalki rosege ute taargen naase 'taaɗki ɔɔ magal ro bin se, ɓɛrɛ, jig eyo. 17Taa naan̰ se ɓo, debm jaay jeel tɛɗn bɛɛ ɔɔ ɔŋ tɛɗin̰ te ey se, kɛse naan̰ tɛɗga kusin̰a.

will be added

X\