Jacques 3

1Gɛnaamge, maakse ki se, j'ɔn̰ten jeki ɗoobm jaay ɓo j'aki tɛɗn k'dɛnki jee dooy jeege. 'Jeelki naajegen k'je dooy jeege se, Raa utu ajeki kɔjn̰ bɔɔrɔ dojege tu ɔɔn̰ cir gɛn jeegen ɓaa se paac. 2Naajege paac se k'lee k'tujki gɔtɔ kaam dɛna. Anum debm jaay taaɗ tujn̰ ey se, debm bin se debm mɛc ɔɔ aasin̰ gɛn bɔɔbm kɔkŋ ron̰a. 3'Jeelki kɛn naajege jaay k'lee k'tɔlki aljam taar sɛndge tu se, taa k'tɛɗɗeki naaɗe 'tookŋ taarjege, ɔɔ gɔtn k'jeki ɓo k'ɓaanɗeki sum. 4'Jeelki markabge se, kɛngen magal magal se kic ɓo, ɔk naka kalaŋ maak ki cɔkɔ bini. Ɔɔ kɛn kuulu jaay ɔl makɔn̰ se deebo don̰ ki aan gɔɔ ɗi kic ɓo, ute nakŋ cɔkɔ se sum ɓo, debm tooɗin̰ se, ɓaan gɔt kɛn naan̰ maakin̰ jen ro ki. 5Rɔɔn̰ɔ kic naan̰ tec bini. Ey num maakŋ daa ro ki se naan̰ ɓo baata, naɓo rɔɔn̰ɔ se taaɗ taargen magal magala. Aakki naal pooɗn cɔkɔ se jaay ɔkga se, kɔsn maakŋ kaaga ute magalin̰ se paac. 6Rɔɔn̰ɔ se naan̰ tec aan gɔɔ pooɗo ɔɔ taargen iŋg kus paac teeco ro ki. Naan̰ kic ɓo maakŋ rojege tu, ɔɔ tujjeki rojege paac paac. Kiŋgjegen iin̰o gɔtn kɛn k'toojjeki bini j'anki kooy maak ki se, rɔɔn̰jege se aan gɔɔ pooɗn ɔs gɔtɔ kɛn iin̰o gɔtn Ɓubm sitange tun pooɗn kɛn dubarin̰ kɔŋ naŋ eyo. 7'Jeelki, debkilimi se napar daagen maakŋ kaag ki, yeelge, kuurge ɔɔ kɛn̰jgen maakŋ maane ki paac se, naan̰ ɓo debm kɛn ɔk tɔɔgɔ doɗe ki ɔɔ tɛɗɗe naaɗe tookin̰ taarin̰a. 8Num rɔɔn̰ɔ jaay debm ɔɔ an̰ kaasn bɔɔbm kɔk se, gɔtɔ. Naan̰ se iŋg kaam kalaŋ eyo ɔɔ naan̰ ɗooc te naa kɛn tɔɔl tɔɔl jeege. 9Ute rɔɔn̰ɔ se ɓo, naaje k'tɔɔmki Bubjege Raa naan̰ kɛn Mɛljege. Tɛr ute rɔɔn̰ɔ se sum ɓo, naaje k'naamki jikilimgen kɛn Raa aalɗeno tecin̰ tece. 10Ute taar kalaŋ ese sum ɓo k'j'ɔɔɗnki ɓooro jeege tu ɔɔ k'naamki jeege kici. Kɛn ɗeer num, gɛnaamge, k'j'ɔn̰te 'tɛɗki bini. 11Maan maakŋ buɗ kɛn kalaŋ jaay j'kɔŋ kɛn iŋg kiŋg kaata ute kɛn jiga se, gɔtɔ. 12Gɛnaamge, mɔŋgɔ se 'kɔŋ koojn̰ lemun eyo. Ɔɔ papay se 'kɔŋ koojn̰ goyab eyo. Ɔɔ gɛn buɗn maane se kic ɓo bin sum. Maakŋ buɗn kɛn maanin̰ iŋg kiŋg kaata se, 'kɔŋ ni maan jiga se, gɔtɔ. 13Maakse ki se, naŋa ɓo mɛtɛkɛ ɔɔ jeel‑taara se? Debm jeel‑taar se, ɔn̰ 'taaɗ jeege tu ute kiŋgin̰a maakŋ nakge tun naan̰ tɛɗ paac se n̰'ɔn̰ ron̰ urlu ɔɔ n̰'tɛɗin̰ ute jeel‑taara. 14Num kɛn naase jaay ɔkki maak‑kilimi ɔɔ niki ro naapge tu se ɔɔ tɛr 'saapki ɓo do naase malin̰ge tu sum se, ɔn̰ten 'tɔɔmki rose ɔɔ taar mɛt ki se, ɔn̰te 'tujin̰ki ute taar‑kɔɔɓsege. 15Num jeel‑taar bin se iin̰o gɔtn Raa ki eyo; kɛse jeel‑taar kɛn iin̰o do naaŋ ki ara sum. Naan̰ se jeel‑taar gɛn jikilimge ɔɔ naan̰ se iin̰o gɔtn Ɓubm sitange tu. 16Taa gɔtn jaay jeege ɔk maak‑kilimi ey lɛ ni ro naapge tu se, gɔtn ese jeege tɛɗ nakge paac ute ɗoobin̰ eyo ɔɔ tɛɗ nakgen paacn̰ jig eyo. 17Num gaŋ jeel‑taar iin̰o gɔtn Raa ki se, deet se naan̰ se salal, naan̰ ɓaano ute tɔɔsɛ daan jeege tu, tɛɗɗen jeege ɔn̰ roɗe urlu, doɗe mɔŋg eyo, ɛɛj do jeege tu, daayum tɛɗ nakgen jiga, bɛɛr nam eyo, naan̰ tɛɗ jeege taaɗ taar maakɗe ki. 18Debm jaay je tɔɔsɛ se, naan̰ noog jeegen kuuy taa kiŋg ute tɔɔsɛ kici. Debm bin se nakŋ naan̰ 'kɔŋ se nakŋ kɛn ute ɗoobin̰ ɗoobin̰ aan gɔɔ debm ɔɔcga maakŋ gɔtin̰ num ɔŋ bɛɛn̰ se.

will be added

X\