Jacques 1

1Kɛse maam Jak m'debm tɛɗn naabm Raa ɔɔ gɛn Mɛljege Isa al‑Masi ɓo m'raaŋ m'ɔlsen tɔɔsum naase jee Raage tun wɔɔkkiga taa naaŋge tun gɔtɔ ɓaa se paac se. 2Gɛnaamge, kɛn nakŋ ɔɔn̰ jaay aanga dose ki num, ɔn̰ki maakse 'raapo. 3'Jeelki, nakgen ɔɔn̰ se jaay aan dose ki se, taa kaal maaksen kɛn naase aalki do Raa ki se, asen kɛɗn kaay kaama. 4Num ute kaay kaamse se 'ɗaarki tɔɔgɔ bini aki kaan do taar tɔɔlin̰ ki. Kɛn bin se naase aki tɛɗn jee salal ɔɔ ɗim tap ɓo asen daay eyo. 5Kɛn maakse ki jaay nam jeel‑taar ey num, n̰'tɔnd mɛtn Raa an̰ kɛɗn jeel‑taara. Taa Raa se, naan̰ ɛɗ naka ute maraadin̰a ɔɔ uun kaam nam eyo. Ɗeer ɗeer, debm tɔnd mɛta se, naan̰ an̰ kɔŋ kɛɗa. 6Num debm jaay ɓaa tɔnd mɛtn Raa num, n̰'aal maakin̰ paac do Raa ki ɔɔ n̰'ɔn̰te naaja, taa debm maakin̰ naaj naaj se, tec aan gɔɔ maan baar kɛn kuulu ɔl ɓaansin̰ kaam ara kaam ara se. 7Debm bin se, ɔn̰ten saapm n̰'ɔɔ naan̰ 'kɔŋ ɗim gɔtn Mɛljege tu. 8Taa debkilim bin se, ɔn̰ saapin̰ iŋg kaam kalaŋ eyo, ɔɔ ɗim naan̰ 'bɛɛr kuun jaay an̰ tɛɗin̰ 'kaan̰ kaama tap ɓo, gɔtɔ. 9Ɔn̰ gɛnaa ɗoobm al‑Masi kɛn debm daaye se, n̰'tɛɗn maak‑raapo, taa Raa utu an̰ magalin̰ naanin̰ ki. 10Gɛnaa debm maala kɛn ɗoobm al‑Masi ki se kic, n̰'ɔn̰ maakin̰ raapo do kɛn kɛn Raa tɛɗin̰ n̰'ɔɔp ron̰ baat se. Taa debm maala se, naan̰ kic utu deel aan gɔɔ pɔɔn̰ kambgen maakŋ kaag ki. 11Taa kɛn kaaɗa jaay ookoga ɔɔ ɔŋgga se, tuutn ute muge se naatn ɔɔ pɔɔn̰in̰gen aak bɛɛ se lɛ utu sia. Bin ɓo debm maala kic, ɓii kalaŋ maakŋ naabin̰ge tun naan̰ iŋg tɛɗ paac se, naan̰ utu 'kooy deel bin kici. 12Maak‑raapo deb kɛn jaay aay kaamin̰ ɗaar tɔɔgɔ ro nakge tun ɔɔn̰ kɛn Raa ɔn̰in̰ aan don̰ ki. Kɛn naan̰ jaay ɔŋ aasin̰ga do ron̰ ki se, naan̰ utu 'kɔŋ bɛɗin̰a. Kɛse ɓo kaajn̰ gɛn daayum kɛn Raa taaɗga taaɗ ɔɔ utu 'kɛɗn jeege tun paacn̰ jen̰ se. 13Kɛn nam jaay nakŋ naama aanga don̰ ki num, ɔn̰ten ɗeekŋ ɔɔ: kɛse Raa ɓo naamuma. Taa Raa se nam tap ɓo an̰ kɔŋ naam jaay an̰ kɔlin̰ 'tɛɗn kusin̰ eyo. Ɔɔ naan̰ kic lɛ naam nam eyo. 14Gaŋ debkilimi se jaay nakŋ naam aanga don̰ ki se, kɛse saapm jig ey iin̰o maakin̰ ki se ɓo kɛn ɔlin̰ naan̰ lee dɔŋɔ. 15Kɛn saapm jig ey se jaay utu maakin̰ ki num, naan̰ ooj kusin̰a ɔɔ kɛn kusin̰ jaay dɛnga roi ki num, ɔli yo ki. 16Gɛnaa maakjemge, ɔn̰ten kaan̰ki rose dala: 17nakgen jiga ɔɔ aak bɛɛ paac se, iin̰o gɔtn Raa ki, naan̰ ɓo Mɛl‑kaal gɔtn wɔɔrɔ. Ɓɛrɛ, Raa se, ɔŋ tɛrl ron̰ aan gɔɔ nakgen do naaŋ kɛn lee tɛrl roɗe se eyo. Daayum naan̰ tiŋg gɔɔin̰ ki. 18Raa uunoga doa ɔɔ aajjekiga aan gɔɔ kɛn maakin̰ jen ro ki ute taarin̰ kɛn mɛt ki se, taa bin ɓo naajege se, maakŋ nakge tun naan̰ aalɗeno paac se, naajege ɓo j'aki tɛɗn deete. 19'Booyki gɛnaa maakjemge, 'saapki do taar kɛn maam m'je m'asen taaɗ se: naŋa naŋa kic ɓo naar uɗ bia do taar kɛn k'taaɗsen se. Ɔɔ kɛn nam jaay je kuun taara 'taaɗ kic num, ɔn̰ ron̰ urlu ɔɔ ɔn̰ten naar tɛɗn maak‑taara. 20Taa debm jaay maakin̰ taarin̰ga se, naan̰ kɔŋ tɛɗn nakŋ kɛn ute ɗoobin̰ eyo aan gɔɔ kɛn Raa maakin̰ jen ro ki. 21Taa naan̰ se ɓo, nakgen paacn̰ asen tujn̰ rose se, ɔɔɗki dose ro ki ɔɔ nakgen kusin̰ se paac kic ɓo ɔɔɗki dose ro ki. Ɔn̰ki rose urlu gɛn kɔkŋ taar kɛn naase 'booyin̰kiga se, taa taar se ɓo ɔk tɔɔgɔ kɛn asen kaaja. 22Nakŋ kɛn taar Raa taaɗsen se, 'tɛɗin̰ki, ɔn̰ten 'booyin̰ki ute bise sum. Taa debm jaay booy taar kɛn Raa taaɗin̰ ɔɔ tɛɗin̰ ey se, kɛse naan̰ mala ɓo aan̰ ron̰ dala. 23Debm jaay booy taar Raa ɔɔ 'took do ki ey se, naan̰ se tec aan gɔɔ debm aak daan‑kaamin̰ maakŋ kaam‑kaay‑naaŋ ki, 24naɓo kɛn naan̰ aak aas jaay ɓaa ɓaa se, kɛn naan̰ ɓo tec ɔɔ ɗi kic ɓo, naar tɛɗin̰ dirigi. 25Num gaŋ debm jeel ɔk Ko Taar mɛc gɛn Labar Jiga kɛn ɔɔɗ do jeege maakŋ kusin̰ ki ɔɔ ɔkin̰ ɔɔn̰ se, kɛn naan̰ jaay booyin̰ga se dirigin̰ eyo num iŋg do ki. Debm bin se, maakin̰‑raapo do nakge tun naan̰ tɛɗ se paac. 26Debm saap ɔɔ ɔk taar Raa ɔɔn̰ɔ jaay ɔŋ bɔɔb ɔk rɔɔn̰in̰ ey se, kɛse naan̰ dɛrl ro naan̰ malin̰a ɔɔ ɗoobm Raa naan̰ uun se lɛ, ɔs aay eyo. 27'Booyki! Debm jaay uun ɗoobm Raa mala mala ɔɔ tɔɔl Bubjege tu Raa ki se, kɛse debm kɛn aak do gɛnaalge tu ɔɔ aak do mɛnd‑daayge tu maakŋ dubarɗe ki, ɔɔ bɔɔb ɔk ron̰ ro nakge tun kusin̰ kɛn maakŋ duni ki.

will be added

X\