Hébreux 8

1'Booyki! Ko Taar kɛn naaje k'taaɗsen mɛtin̰ se, kɛse ɓo napar magal debm tɛɗn sɛrkɛ Raa ki kɛn naajege k'j'ɔkki se. Ɔɔ naan̰ se ookga maakŋ raa ki utu iŋg do ji daam kaag do Raa ki ɔɔ Raa Sidburku ɓo gaar magal kɛn cir nakgen ɓaa se paac. 2Isa tɛɗn naabm salal maakŋ kɔrɔr Raa kɛn mala mala ɔɔ kɔrɔr se jikilimge ɓo ɗaapin̰ eyo num Mɛljege ɓo debm ɗaapin̰a. 3Magal jee tɛɗn sɛrkɛ Raa ki paacn̰ kɛn k'tɔndɗe se naŋa naŋa kic ɓo ɔk nakŋ kɛn naan̰ 'kɛɗn Raa ki ɔɔ an̰ kɔjn̰ mooso. Bin ɓo magal debm tɛɗn sɛrkɛ Raa ki gɛn naajege se kic 'kɔkŋ ɗim tak kɛn 'kɛɗn Raa ki. 4Kɛn al‑Masi jaay debm do naaŋ ki sum num, naan̰ 'kɔŋ tɛɗn debm tɛɗn sɛrkɛ Raa ki eyo, taa kaaɗ kɛn se jee kuuy utu kɛn lee ɛɗ nakge sɛrkɛ Raa ki aan gɔɔ kɛn Ko Taar kɛn Raa ɛɗo Musa ki taaɗno se. 5Naaɗe se ɓee kɛn naaɗe tɛɗn naaba maak ki se, naan̰ se kaam nirli sum ɔɔ tec tec ɓo Ɓee Raa mala mala kɛn maakŋ raa ki. Bin ɓo kɛn Musa jaay ɓaa ɗaap kɔrɔr magal se, Raa dɛjin̰ ɔɔ: Aakin̰ jiga. 'Ɓaa ɗaapin̰ 'tec raa raa aan gɔɔ kɛn maam m'taaɗisin̰ do ko ki se. 6Ɗeere, ɓɔrse, naabm Isa se magal cir paac paac. Taa dɔɔkŋ kɛn Raa dɔɔk ute jeege, ute ɗoobm naan̰ se jiga cir paac paac. Ɔɔ Isa se naan̰ ɓo daan Raa ute jeege ɔɔ ute ɗoobm naan̰ se, Raa taaɗga taaɗ ɔɔ utu kɛɗn nakgen bɛɛ cir paac paac jeege tu. 7Kɛn dɔɔkŋ kɛn Raa dɔɔko ute jeege do dɔkin̰ se jaay tɛɗ naabin̰ aasga ute ɗoobin̰ num, Raa se 'kɔŋ dɔɔkŋ ute jeege kuuy eyo. 8Num kɛn Raa jaay mooy jeen̰ge se taa kusin̰ naaɗe tɛɗ se naan̰ ɗeek ɔɔ: 'Booyki, maam Mɛlɛ m'taaɗsen m'ɔɔ ɓiigen utu aɗe ɓaa naan ki se, maam m'utu m'dɔɔkŋ kiji ute mɛtjil gaan Israɛlge ɔɔ ute taa ɓee Juda kici. 9Dɔɔkŋ kɛn maam m'dɔɔko ute naaɗe se 'tec aan gɔɔ dɔɔkŋ kɛn maam m'dɔɔko dɔkin̰ ute ɓugɗege se eyo. Kaaɗ kɛn naane se ɓo, maam m'tɔkɗeno jiɗe ki ɔɔ m'tɔɔɗ m'ɔɔɗɗeno naatn maakŋ taa naaŋ Masar ki. Gaŋ dɔɔkŋ kɛn maam m'dɔɔko ute naaɗe se, naaɗe tujga ɔrmɗe ro ki. Taa naan̰ se ɓo maam m'tɛrlɗeno naaga. Kɛse ɓo taar Mɛljege taaɗa. 10Tɛr Mɛljege Raa taaɗ ɔɔ: Taa dɔɔkŋ kɛn maam m'utu m'dɔɔk ute gaan Israɛlge, kɛn ɓiigen aɗe ɓaa naan ki se, maam m'aɗe kɛɗn jeele gɛn jeel ɗoobumge ɔɔ ɗoobumge se m'aɗesin̰ taaɗn kɔmb maakɗe ki. Maam m'aɗen tɛɗn Raaɗe ɔɔ naaɗe tɛɗn jee maamge. 11Maakɗe ki se nam 'dooy naapin̰ ute gɛnaan̰ gɛn jeel Raa ey sum, taa jeege paac am jeelum maam Raa, 'kɔnd do gaange tu bini 'kaan do jee magalge tu. 12Taa ute bɛɛm se, maam m'aɗen tɔɔl tujɗege ɔɔ kusin̰ɗege se m'an̰ dirigin̰ naatn. 13Kɛn Raa jaay daŋ dɔɔkŋ kɛn naan̰ utu dɔɔkŋ ute naaɗe kiji se, naan̰ je taaɗn ɔɔ dɔɔkŋ kɛn naan̰ dɔɔko deet deet se gɔtin̰ deelga; taa nakŋ jaay daanin̰ dɔkga se naan̰ ooyga koono ɔɔ ɔɔpga baata utu 'deele.

will be added

X\