Hébreux 5

1Magal debm tɛɗn sɛrkɛ Raa ki tak ɓo k'bɛɛr k'j'ɔɔɗin̰ maakŋ jikilimge tu gɛn tɛɗn naabm Raa taa tɔnd ɗaapm jeege naanin̰ ki. Naan̰ Raa ɔndin̰ se taa an̰ kɛɗn nakge sɛrkɛ ɔɔ kɔjn̰ mooso taa kusin̰ jeege. 2Magal debm tɛɗn sɛrkɛ Raa ki se, naan̰ kic ɓo ɔk tɔɔg eyo aan gɔɔ jikilimgen ɓaa se paac, taa ɗi jeegen jeel ɔk mɛtn ɗoobm Raa eyo ɔɔ tɛɗn nakgen mɛt ki ey se, naan̰ aɗen kɛɛjn̰ doɗe ki. 3Aan gɔɔ naan̰ kic ɔk tɔɔg ey se, naan̰ 'kɛɗn sɛrkɛ Raa ki taa kusin̰ jeege sum eyo, num taa kusin̰ naan̰ malin̰ kici. 4Naan̰ se kalin̰ ki sum ɓo 'kɔŋ kuun ron̰ raan gɛn tɛɗn magal debm tɛɗn sɛrkɛ Raa ki se eyo, num magal debm tɛɗn sɛrkɛ Raa ki se, Raa mala ɓo bɛɛr ɔɔɗin̰a aan gɔɔ kɛn naan̰ bɛɛr ɔɔɗo Aarun do dɔkin̰ se. 5Bin ɓo al‑Masi kic naan̰ mala ɓo uun ron̰ raan gɛn tɛɗn magal debm tɛɗn sɛrkɛ Raa ki eyo. Num naan̰ se Raa ɓo bɛɛr ɔɔɗin̰o ɔɔ ɗeekin̰ ɔɔ: Naai se Goonuma, jaaki maam m'taaɗn naan jeege tu paac, maam ɓo m'Bubi. 6Ɔɔ gɔt kuuy maakŋ Kitap ki kic Raa taaɗga taaɗ ɔɔ: Naai se debm tɛɗn sɛrkɛ Raa ki gɛn yɛmin̰a aan gɔɔ Mɛlkisɛdɛk. 7Kɛn Isa iŋgo do naaŋ ki se, naan̰ tɔnd mɛta, eem nɔɔ ɔɔ tɔɔyɔ ute kaa‑maane mɛtn Raa ki naan̰ kɛn je num an̰ kɔŋ kaajn̰ maakŋ yo ki. Ɔɔ Raa se booyin̰ga keemin̰a taa naan̰ se debm took uun taarin̰a. 8Isa se naan̰ ɓo Goon Raa. Ute naan̰ se kic ɓo naan̰ aakoga dubar ɔɔ ute ɗoobm se ɓo naan̰ deel ron̰a gɛn tookŋ kuun taar bubin̰a. 9Ɔɔ Raa tɛɗin̰o naan̰ tɛɗ aasoga naabin̰ paac ute ɗoobin̰a ɔɔ naan̰ tɛɗga debm kaajn̰ gɛn daayum gɛn jeegen paacn̰ took uunga taarin̰a. 10Anum Raa se taaɗga tal ɔɔ naan̰ se magal debm tɛɗn sɛrkɛ Raa ki aan gɔɔ Mɛlkisɛdɛk. 11Do taarge tun se, naaje j'ɔk taarge dɛna gɛn taaɗa, naɓo kɛn j'asen taaɗn mɛtin̰ se tɛɗjen ɔɔn̰ɔ, taa naase se 'tɛɗkiga jeegen 'booy ɔkki taara yɔkɔɗ eyo. 12Ey num do dɔkin̰ tap ɓo naase k'dooysenoga dooy nakgen se ɔɔ bɛɛki num, naase kic aki tɛɗn jee dooy jeege, naɓo maam m'aakse naase se 'jeki j'asen dooy ute nakgen kɛn k'lee k'dooy jeegen kɛn utu aal kaal maakɗe do Raa ki. Anum ɓɔrse kic ɓo, maam m'aaksen naase se 'jeki ɓo j'asen kɛɗn sia, ey num kɔsgen deer se, naase ɔŋ aasin̰ki eyo. 13K'jeelki, debm utu aay kaay si se naan̰ goon k'taace; debm bin se 'kɔŋ bɛɛr kuun nakŋ ute ɗoobin̰ eyo. 14Num gaŋ kɔsn deer se gɛn jee magala. Ɔɔ naaɗe se jeel ɔk nakŋ jiga ɔɔ nakŋ kɛn kusin̰a, taa nakgen se naaɗe lee tɛɗin̰ tɛɗa.

will be added

X\