Hébreux 3

1Gɛnaamge, Raa daŋseno taa aki tɛɗn jee naan̰ge. Taa naan̰ se ɓo ɔndki saapse do Isa ki, naan̰ ɓo debm kaan̰ naabm Raa ɔɔ debm tɛɗn sɛrkŋ magal gɛn Raa. Naan̰ ɓo ɔkjeki taasa ute Raa ɔɔ do nakge tun se ɓo, naajege k'j'aalki maakjege do ki ɔɔ k'taaɗki naan jeege tu. 2Ɔɔ Isa se Raa bɛɛr ɔndin̰ gɛn tɛɗn naabin̰a ɔɔ maakŋ naabin̰ ki se naan̰ tuj te ɔrmin̰ eyo, aan gɔɔ Musa kɛn tɛɗo naaba maakŋ Ɓee Raa ki paac jaay tuj te ɔrmin̰ ey se. 3Kɛse ɗoobin̰a kɛn Isa jaay nookin̰ eem cir gɛn Musa se tec aan gɔɔ debm kɔɓm ɓee kɛn k'nookin̰ cir ɓee kɛn naan̰ ɔɓo. 4K'jeelki, ɓee tak ɓo ɔk mɛl kɔɓin̰ kɔɓin̰a, num mɛl kɔɓm nakgen ɓaa se paac se, naan̰ Raa. 5Maakŋ Ɓee Raa ki paac se, Musa tɛɗoga naaba tuj te ɔrmin̰ eyo ɔɔ naan̰ tɛɗo naabin̰ se aan gɔɔ debm tɛɗn naaba gɛn taaɗn jeege tu nakŋ kɛn Raa utu aɗen taaɗn mɛtin̰ naan ki. 6Num gaŋ al‑Masi se, naan̰ Goono, Goon kɛn tuj te ɔrmin̰ eyo ɔɔ Ɓee Raa paac se Raa ɔn̰in̰sin̰ga kaam jin̰a. Ɔɔ naajege se ɓo aan gɔɔ k'ɓee naan̰a kɛn naajege jaay k'ɓeerki eyo ɔɔ j'ɔndki dojege don̰ ki ute maak‑raapo se. 7'Booyki taar kɛn Nirl Salal taaɗ maakŋ Kitap ki ɔɔ: Jaaki jaay kɛn 'booykiga mind Raa num, 8ɔn̰ten 'tɛɗki do mɔŋgɔ aan gɔɔ kɛn do dɔkin̰ ɓugsege baate tooko taarin̰ se ɔɔ naan̰ kɛn se, naaɗe naamin̰oga do kɔɗ‑ɓaar ki. 9Tɛr Raa taaɗ ɔɔ: Ute nakgen bɛɛ maam m'tɛɗo ɓaara si‑sɔɔ se kic ɓo, ɓugsege naamumo ɔɔ naaɗe je am 'kaakŋ mɛtuma. 10Taa naan̰ se ɓo maam maakum taarum do jeege tun ese ɔɔ maam m'taaɗ ute maakum m'ɔɔ: Jee se lɛ daayum lee tɛrlum naaga ɔɔ nakŋ maam tɛɗ se lɛ, naaɗe booy ɔk eyo. 11Kɛn maakum taarum se, maam m'naam taarum m'ɔɔ: Jee se 'kɔŋ kɛnd gɔt kɛn maam m'ɗaapin̰ gɛn tɔɔl maaka se eyo. 12Gɛnaamge, ɔndki kɔndɔ nam ɔn̰te kɔn̰ maakin̰ 'tɛɗn aak kusu kɛn an̰ kɔlin̰ naan̰ 'tookŋ kaal maakin̰ do Raa ki eyo ɔɔ tɛrl naaga Raa kɛn zɛɛr se. 13Gaŋ kaaɗ kɛn naase utu 'tiŋgki tiŋg maakŋ kaaɗ kɛn Raa daŋin̰ jaaki se, ɓii‑raa ɛɗki kaay kaama naapge tu, ɔn̰ten kaan̰ki rose dala ute kusin̰a ɔɔ ɔn̰ten 'tɛɗki do mɔŋgɔ. 14Anum kɛn naajege jaay kaal maakjegen do kupm mɛt ki se jaay j'ɔkin̰ki tɔɔgɔ bini do taar tɔɔlin̰ ki se ute naan̰ se, naajege j'aki tɛɗn naaba kalaŋ ute al‑Masi. 15Bin ɓo Kitap taaɗ ɔɔ: Jaaki jaay kɛn 'booykiga mind Raa num, ɔn̰ten 'tɛɗki do mɔŋgɔ aan gɔɔ kɛn do dɔkin̰ ɓugsege baate tooko taarin̰ se ɔɔ naan̰ kɛn se, naaɗe naamin̰o do kɔɗ‑ɓaar ki. 16Anum jeegen booyo taar Raa jaay baate tooko ɔɔ tɛrlo naaga Raa ki se, tap ɓo naŋge? K'jeelki jeegen se ɓo kɛn jeegen paacn̰ Musa ɔɔɗɗeno maakŋ taa naaŋ Masar ki. 17Maakŋ ɓaarge tun si‑sɔɔ se tap ɓo, Raa maakin̰ taarin̰ do naŋge tu? K'jeelki, Raa se maakin̰ taarin̰ do jeege tun tɛɗo kusin̰ jaay ooyo do kɔɗ‑ɓaar ki se. 18Ɔɔ jeegen kɛn Raa naam taarin̰ roɗe ki ɔɔ: naaɗe se kɔŋ kɛnd gɔt kɛn maam m'ɗaapin̰ gɛn tɔɔl maak ki ey se, tap ɓo naŋge? Naaɗe se ɓo jee kɛn baate tooko taar Raa ɔɔ tɛrlin̰o naaga se. 19Bin ɓo k'jeelki, naaɗe se jaay ɔŋ ɛnd te gɔt kɛn Raa ɗaapin̰ gɛn tɔɔl maak ey se, taa naaɗe se baate tooko kaal maakɗe don̰ ki.

will be added

X\