Galates 6

1Gɛnaamge, kɛn ɔŋkiga nam jaay tɛɗ tɛɗ kusin̰ num, naasen kɛn ɔkki Nirl Raa se 'noogin̰ki, taa naan̰ aɗe tɛrl ɗoob kɛn jiga. Num 'tɛɗin̰ki te taar urlu. Naai debm an̰ noog se ɔnd kɔndɔ ey num sɔm naai kic 'koocn̰ maakŋ kusin̰ ki. 2Kɛn jee mɛtin̰ge maakse ki jaay iŋg maakŋ dubar ki num, 'noogki naapa. Kɛn 'tɛɗin̰kiga naan̰ se num, naase 'tɛɗ aaskiga taar al‑Masi. 3Kɛn debm jaay aak ron̰, ɔɔ naan̰ sum ɓo cir jeege paac se, naan̰ se debm cɛrɛ, ɔɔ dɛrl dɛrl ɓo ron̰a. 4Naŋa kic ɓo aak kiŋgin̰a, kɛn aakin̰ jiga lɛ, bɛɛn̰ naan̰ ki. Ey num kɔŋ tɔɔm ron̰ te nam kuuy eyo. 5Naŋa naŋa kic ɓo kɔŋ kaakŋ naabin̰ kɛn Raa ɛɗin̰ jin̰ ki. 6Debm kɛn lee dooy jeege te taar Raa se, jeegen naan̰ lee dooyɗe se, bɛɛki num, an̰ kɛɗn nakŋ jiga jigan naaɗe ɔk se. 7Ɔn̰te 'dɛrlki rose, Raa se gɛn cɛɛp eyo; k'jeelin̰ki kupm jaay deba ɔɔc se, aanga kaaɗn kɔj ki kic ɓo naan̰ kɔjn̰ naan̰ se sum. 8Kɛn bin num debm kɛn jaay tɛɗ nakŋ daa ron̰ ɓo je sum se, naan̰ se tec aan gɔɔ debm ɔɔc kɔɔcɔ kɛn tɛɗga num utu kɔjn̰ nakin̰ se, gaŋ naan̰ se utu kutn ron̰a. Num debm kɛn tɛɗ nakŋ Nirl Raa je se, naan̰ se tec aan gɔɔ debm ɔɔc kɔɔcɔ kɛn tɛɗga num utu kɔjn̰ nakin̰ se kici, naɓo gɛn naan̰ se, kɔŋ kaajn̰ gɛn daayum. 9Taa naan̰ se ɓo j'ɔn̰te 'kɔɔrki gɛn tɛɗn bɛɛ jeege tu ɔɔ j'ɔn̰te kɔn̰in̰ki ɗoob ki ɔɔ kɛn kaaɗin̰ jaay utu kaan se, nakŋ naaje j'ɔɔckiga kɔɔc se j'utu j'an̰ki kɔŋin̰a. 10Bin num kɛn ɓɔrse kaaɗin̰ utu se, k'tɛɗki bɛɛ jeege tu paac ɔɔ kɛn tap tap se, j'ɔn̰te dirigki gɛnaagen ɗoobm al‑Masi ki. 11Aakki maktubm kɛn raaŋin̰ magal magal se, kɛse maam mala ɓo m'raaŋin̰ te jima. 12Jeegen je ɔɔ aki kɔjn̰ pɔndɔ taa tɔɔg se, jee se je taa jeege aɗen tɔɔmɔ. Gaŋ kɛn naaɗe jaay tɛɗ naan̰ se, naaɗe je j'aɗen dabar eyo taa kooy gɛn al‑Masi ro kaag ki se. 13Ey num jeegen tɔjga tɔj pɔndɔ kic ɓo, ɔŋ took iŋg te do Ko Taar kɛn Raa ɛɗo Musa ki se ute ɗoobin̰ eyo. Naaɗe je j'asen tɔjn̰ pɔndɔ se, taa naaɗe an tɔɔm roɗege. 14Kɛn gɛn maam ki se maam tɔɔm rom se taa kooy Mɛljege Isa al‑Masi ro kaag ki kalin̰ ki sum. Taa naan̰ se ɓo, nakŋ dunia se ɔlum ey sum. Maam se m'aakin̰ aan gɔɔ nakŋ cɛrɛ taa maam se m'ooyga ute Isa al‑Masi. 15Kɛn debm ɔjga pɔndɔ, lɔ ɔj te eyo, tɛɗ ɗim eyo. Nakŋ kɛn bɛɛ cir paac se, Raa tɛɗjekiga k'tɛɗkiga aan gɔɔ jee kiji. 16Jeegen kɛn uun ɗoobm taar kɛn maam m'dooyɗeno ese se, ɔn̰ Raa aɗen kɛɗn lapia ɔɔ aɗen kɛɛjn̰ doɗe ki ɔɔ do gaan Israɛlge tun jee Raage se kici. 17Naan ki se nam ɔn̰te kɛcum sum, taa dɔlgen rom ki se taaɗ ɔɔ maam se m'tɛɗga gɛn Isa. 18Gɛnaamge, ɔn̰ bɛɛ gɛn Mɛljege Isa al‑Masi se kiŋg ute naase paac. Amin.

will be added

X\