Galates 5

1Al‑Masi se ɔɔɗjekiga dojege ɗeer ɗeer. Bin num, ɗaarki tɔɔgɔ ɔɔ ɔn̰te 'kɔn̰ki nam asen 'tɛɗn ɓulu daala. 2'Booyki! Kɛse maam Pɔl ɓo m'ɗeekseni: kɛn naase jaay je aki tɔjn̰ pɔndɔ num, nakŋ al‑Masi tɛɗsen se 'tɛɗga nakŋ cɛrɛ. 3'Booyki m'asen taaɗn daala: debm jaay je kɔjn̰ pɔndɔ se, bɛɛki num, Ko Taar kɛn Raa ɛɗo Musa ki se naan̰ an̰ tɛɗin̰ aas kart. 4Bin se naase jeegen 'saapki ɔɔki iŋgkiga do Ko Taar kɛn Raa ɛɗo Musa ki sum ɓo, aki tɛɗn jee aak bɛɛ naan Raa ki se; kɛn bin num naase se 'gaaŋkiga te al‑Masi ɔɔ naase se aki kɔŋ bɛɛ Raa ey sum. 5Kɛn gɛn naaje ki num, naaje se j'ɔnd doje do bɛɛ Raa kɛn tɛɗa. Naan̰ ɓo debm utu ajenki tɛɗn j'aki kaakŋ bɛɛ naanin̰ ki, taa naaje j'aalkiga kaal maakjege do nakge tun Isa al‑Masi tɛɗo se. Taa naan̰ se ɓo j'utu j'aak kaamin̰ te tɔɔgŋ Nirl Salal. 6Kɛn debm jaay tɛɗga gɛn Isa al‑Masi se, kɛn ɔj pɔndɔ, ɔj eyo tɛɗ ɗim eyo. Kɛn ɔɔn̰ cir paac se, naaje j'aki kaal maakjege do naan̰ ki, ɔɔ naan̰ se ɓo ajeki tɛɗn j'aki je naapa. 7Do dɔkin̰ se naase 'leekiro jiga jiga; num ɓɔrse se naŋa jaay gaassen gɛn kuun taar mɛt ki se? 8Raa kɛn daŋseno ɔɔ aki tɛɗn jeen̰ge se, nakŋ ɓɔrse naase 'lee 'tɛɗki se naan̰ ɓo ɔlsen eyo. 9'Booyki taar jeege lee taaɗ ɔɔ: ɔrɔmɔ cɔkɔ jaay j'ɔmbin̰ga do rujn̰ gɛm kɛn j'ɛcin̰ga kɛc se, iin̰in̰ paac. 10Ɓɔrse se naajege paac k'tɛɗkiga te Mɛljege kalaŋ ɔɔ maam m'jeele maak‑saapm naase kic ɓo tec aan gɔɔ gɛn maama. Gaŋ debm jaay ɓaaɗo ɛcse se kɛn 'tɛɗn naŋa naŋa kic ɓo, Raa utu an̰ dabara. 11Gɛnaamge, kɛn ɓɔrse jaay maam m'utu m'taaɗ taaɗ mɛtn taar kɔjn̰ pɔndɔ num, gɛn ɗi jaay jeege utu dabarum dabar rɔk se? Kɛn bin num gɛn ɗi jaay k'lee k'taaɗ mɛtn taar kooy Isa al‑Masi ro kaag ki kɛn lee tuj maakŋ jeege se. 12Jeegen ɛcse do Ko Taar kɛn Raa ɛɗo Musa ki jaay ɔɔ aki kɔjn̰ pɔndɔ se, bɛɛki num, m'je naaɗe se tɔjn̰ pɔndɗege sum eyo, num k'j'ɔjin̰ te gɔrumɗege paac. 13Anum naase gɛnaage, naase se Raa ɓo daŋseno taa aki kɔŋ dose. Num ɔŋkiga dose se ɔn̰te 'tɛɗki nakŋ maakse ɓo jea. Num 'jeki naapa ɔɔ 'noogki naapa. 14Taa Ko Taar kɛn Raa ɛɗo Musa ki paac se, tum do taar kɛn kalaŋ ese sum. Taar se ɔɔ: 'Je naapi aan gɔɔ roi mala. 15Num kɛn naase jaay 'baagkiga tɛɗn aan gɔɔ daagen maakŋ kaag kɛn don̰ tɔɔl ɔs naapa se, ɔndki kɔndɔ, ey num naase aki kutn naapa. 16'Booyki m'asen taaɗa: ɔn̰ki rose Nirl Salal ɓo asen tɔɔɗɔ, bin se naase aki kɔŋ tɛɗn nakŋ daa rose ɓo je eyo. 17Nakŋ kɛn daa ro debkilimi je se Nirl Salal je eyo, ɔɔ nakŋ Nirl Salal je se lɛ, daa ro debkilimi je eyo. Naaɗen di se ɔŋ tum kalaŋ eyo. Taa naan̰ se ɓo naase ɔŋ 'tɛɗki nakŋ kɛn naase 'jeki ro ki ey se. 18Kɛn Nirl Salal ɓo tɔɔɗse num, naase aki kɔŋ tɛɗn ɓulu do Ko Taar kɛn Raa ɛɗo Musa ki ey sum. 19Nakŋ kɛn daa ro debkilimi je se, naan̰ tooɗ tal. Nakgen naan̰ je se: kɛɛsn naapm rɛn̰ rɛn̰, nakŋ tuj debkilimi naan Raa ki, tɛɗn nakŋ maakin̰ jea, 20daan maragge, oojn̰ ron̰a, tɛɗ dɛkin̰ te naapa, mooy te naapa, tɛɗ maak‑kilimi, je taamooyo, saap do ron̰ ki sum, gaaŋ te naapa, taarin̰ ɔk mɛtn naapa ute jeege eyo, 21dɔŋ nakŋ jeege, je kaay koono, kaam kɔsɔ ɔɔ tɛɗ nakgen kuuy kic ɓo tec aan gɔɔ naaɗegen se. 'Ɓooyki m'ɔɔj se, ey num taar se m'taaɗsesin̰ga taaɗ tap m'ɔɔ: jeegen tɛɗ nakgen bin se kɔŋ kɛnd maakŋ Gaar Raa ki eyo. 22Num gaŋ 'booyki, nakŋ kɛn Nirl Salal tɛɗ se: tɛɗ jeege je naapa, iŋg te maak‑raapo, iŋg te lapia, tɛɗɗe jee maakɗe deere, tɛɗɗe jee bɛɛ, jeel tɛɗn bɛɛ jeege tu, tɛɗɗen naaɗe tuj ɔrmɗe eyo, 23tɛɗɗe jee dalul ɔɔ bɔɔb ɔk roɗe; num Ko Taar kɛn Raa ɛɗo Musa ki jaay ɔɔ ɔn̰te tɛɗn nakgen se num, gɔtɔ. 24Jee tɛɗga gɛn Isa al‑Masi se, nakgen kɛn daa roɗe je paac se, naaɗe rɛsin̰ga. Gɛn naaɗe ki num nakgen se paac ooyga te Isa al‑Masi ro kaag ki. 25Kɛn naajege jaay j'iŋgki ute Nirl Salal num, j'ɔn̰in̰ki naan̰ ɓo ajeki tɔɔɗɔ. 26J'ɔn̰te magalki rojege ɔɔ j'ookki do naapge tu eyo ɔɔ j'ɔn̰te tɛɗki maak‑kilimi do jeege tu.

will be added

X\