Galates 4

1Kɛse ɓo nakŋ maam saapin̰ m'je m'asen taaɗa: goono jaay utu baat num, booy taar jeege aan gɔɔ ɓul booy taar mɛlin̰a. Ey num nakge paac kaam jin̰a. 2Num gaŋ kɛn naan̰ utu goon cɔkɔ se, jeege ɓo aakin̰ don̰ ki ɔɔ dɛjin̰a; naan̰ aɗen booy kuun taarɗe bini 'kaan kaaɗ kɛn bubin̰ mala jen ro ki. 3Naajege kic ɓo j'iŋgkiro aan gɔɔ gaangen sɛɛm se, nakgen ɔk tɔɔgɔ do duni ki se tɛɗjekiro ɓulge. 4Gaŋ kaaɗn Raa taaɗn jaay aan se, Raa ɔlo Goonin̰ do naaŋ ki. Ɔɔ naan̰ se mɛnda ɓo oojin̰a ɔɔ iŋgo do Ko Taar kɛn Raa ɛɗo Musa ki, 5taa dugŋ do jeegen iŋg maakŋ ɓul ki do Ko Taar kɛn Raa ɛɗo Musa ki se. Ute naan̰ se ɓo j'aki tɛɗn gaan Raage. 6Nakŋ kɛn taaɗ ɔɔ naase 'tɛɗkiga gaan Raage se, taa Raa ɔloga Nirl gɛn Goonin̰a maakse ki kɛn daŋ ɔɔ Abba . Abba se je ɗeekŋ ɔɔ: Bua . 7Bin se ɓɔrse naai ɓul ey sum, num 'tɛɗga goon Raa. Aan gɔɔ naai 'tɛɗga goonin̰ se, Raa ute bɛɛn̰ se utu ai kɛɗn nakŋ naan̰ ɔn̰ gɛnin̰ge tu se kici. 8Do dɔkin̰ kɛn naase 'jeelki Raa ey ɓɔrt se, naase iŋgkiro ɓul maragge, num gaŋ maragge se raagen ɗeer eyo. 9Num ɓɔrse naase 'jeelkiga Raa, ey lɛ m'ɗeekŋ m'ɔɔ Raa jeelsega naase, num taa ɗi jaay naase 'tɛrlki daala do nakge tun ɔk tɔɔgɔ do naaŋ ki ara ɔɔ kɛn tɔɔl sɛr ey se. Naase 'je aki tɛrl kiŋg ɓulu do nakge tun se daal la? 10Taa naase 'taaɗki ɔɔki ɓiigen mɛtin̰ge ɓii sɛrkɛ, laapgen mɛtin̰ge ɔɔki gɛn sɛrkɛ, kaaɗgen mɛtin̰ge ɔɔki gɛn sɛrkɛ, ɔɔ ɓaargen mɛtin̰ge kic ɓo ɔɔki gɛn sɛrkɛ. 11Nakŋ naase 'tɛɗki se ɔlum ɓeere maakum ki, taa maam m'je naabm maam m'tɛɗin̰ daanse ki se kutn cɛr eyo. 12Gɛnaamge m'eemsen nɔɔ: ɓɔrse maam tɛɗga aan gɔɔ naase se, naase kic ɓo 'tɛɗki aan gɔɔ maama. Ey num naase lɛ 'tujumki te ɗim eyo. 13Naase 'jeelki, kɛn maam m'iŋgo daanse ki se, kaaɗ kɛn se maam m'kɔɔn̰o. Naan̰ kɛn se ɓo, maam m'taaɗseno Labar Jigan gɛn Isa al‑Masi se deet deet. 14Naase 'dabarkiga taa maama kɛn maam kɔɔn̰ɔ se. Num gaŋ te naan̰ se kic ɓo, naase 'baatumki te eyo ɔɔ 'rɛsumki te eyo. Anum naase ɔkumkiro aan gɔɔ kɔɗn Raa, ɔɔ aan gɔɔ Isa al‑Masi mala. 15Kaaɗ kɛn naane se naase maakse 'raapo; num taa ɗi ɓɔrse naase maakse 'raap ey se! Ey num m'jeele kɛn m'iŋgo maakse ki se, kɛn ɔkki ɗoobm kɛn jaay aki tooɗn kaamsege amɗekiro kɛɗ kic num, kaaɗn naane ɛɗumɗekiroga. 16Num ɓɔrse kɛn m'taaɗsen taar mɛt ki se ɓo, m'dɛlga debm taamooyse la? 17Jee kɛn taaɗsen taar mɛt ki ey se, je aki ɓaa te naaɗe. Num maak‑saapm naaɗe se, maak‑saapm jig eyo. Gaŋ kɛn naaɗe tɛɗ bin se je ajeki gaaŋ te naapa, taa naase aki ɓaa te naaɗe. 18Bɛɛki se, ɔŋki jeege jaay taarɗen naaɗe taaɗ se mɛt ki num, dɔɔkki taarse daayum ute naaɗe. Kɛn maam gɔtɔ kic num, bɛɛki se, taar se ɓo naase an̰ki kɔkŋ maakse ki daayum. 19Gaan maak‑jemge, 'booyki m'asen ɗeeke: maam se tɛr dabar dabar daala aan gɔɔ mɛnd ɓaa koojo. Dubar kɛn maam dabar taa naase se, maam m'je bini naase aki tɛɗn aan gɔɔ al‑Masi. 20Maakum ki se m'je m'tɛɗn te naase jaay, m'jeel ɗoobm taaɗin̰a, ey num ɓɔrse se taar se ɔkum taaɗ eyo. 21'Ɗeekumki tu, naase jeegen 'jeki ɔɔki aki kiŋg do Ko Taar kɛn Raa ɛɗo Musa ki se: Ko Taar se naase 'jeel ɔkki mɛtin̰ ɗey? 22Kitap ɗeek ɔɔ Abraam se ɔk gaangen gaabge dio: kɛn kalaŋ ɓulin̰ ɓo oojin̰ ɔɔ kɛn kalaŋ goon mɛnd gɛndin̰a. 23Goon kɛn ɓulin̰ ɓo oojin̰ se, j'oojin̰ aan gɔɔ gaangen ɓaa se paac. Gaŋ goon gɛn mɛnd gɛndin̰ se koojin̰ tec te bin eyo. Anum goon se, Raa mala ɓo taaɗga taaɗ Abraam ki ɔɔ utu an̰sin̰ kɛɗa. 24Raa je ajeki taaɗn te ɗoobm nakgen deel se, naan̰ je ɗeekŋ ɔɔ, mɛndgen dio se tec aan gɔɔ dɔɔkŋ kaam dio, kɛn Raa dɔɔk te jeege. Agar, mɛndin̰ kɛn ɓulu se, tec aan gɔɔ dɔɔkŋ Raa dɔɔko te Musa do ko kɛn Sinai. Num gaan Agarge se j'oojɗen ɓo ɓulge. 25Agar, se naan̰ aan gɔɔ ko Sinai kɛn ute taa naaŋ Suge tu se. Ɔɔ tɛr naan̰ aan gɔɔ Jeruzalɛm kɛn utu iŋg ɓɔrse se, taa jeegen iŋg maak ki se naaɗe ɓulge do Ko Taar kɛn Raa ɛɗo Musa ki se. 26Num gaŋ Jeruzalɛm maakŋ raa ki se, jeegen iŋg maak ki se, naaɗe se ɓulge eyo. Kɛse ɓo naaŋ naajege ɔɔ naan̰ se ɓo aan gɔɔ kon̰jege. 27Taa Kitap taaɗ ɔɔ: Naai mɛnd, mɛndkarta raap maaki, naai kɛn ɓii kalaŋ naam te dubar kooj ey se tɔɔl nirli, taa mɛnd kɛn gaabin̰ rɛsin̰ga rɛs se utu 'kɔŋ gaange dɛn cir mɛnd ute gaabin̰a. 28Gɛnaamge, ɓɔrse se naase 'tɛɗkiga gaan Raage mala, aan gɔɔ Isakŋ kɛn Raa taaɗo do dɔkin̰ Abraam ki, ɔɔ te an̰sin̰ kɛɗ se. 29Num gaŋ goon k'j'oojin̰ aan gɔɔ gaangen ɓaa se paac se, lee dabaro goon kɛn j'oojin̰ te tɔɔgŋ Nirl Raa se. Ɓɔrse kic ɓo utu bin kici. 30Num 'saapki tu Raa tap ɓo taaɗ ɔɔ ɗi maakŋ Kitap ki: 'Tuur mɛnd ɓulu se ute goonin̰ naata. Taa goon mɛnd ɓulu se kɔŋ kɔsn kaagŋ ɓee tɛlɛ ute goon mɛnd gɛndi se eyo. 31Ɓɔrse gɛnaamge, naajege se k'gaan mɛnd kɛn ɓulu se eyo. Num gaŋ k'tɛɗkiga aan gɔɔ gaangen gɛn mɛnd gɛndin̰ se.

will be added

X\