Galates 2

1Tɛr kɛn tɛɗ ɓaara sik‑kaar‑sɔɔ jaay aas se, maam te Barnabas ɔɔ m'ɔk Tit kici k'tɛrl k'ɓaa Jeruzalɛm ki tɛlɛ. 2Kɛn ɔlum ɓaa se, taa Raa ɓo teec naanum ki ɔɔ taaɗum ɔɔ m'ɓaao. Kɛn j'aan se, maam te magalge se, j'iik k'tɔɔk cɛɛs ki gɔtn se, maam taaɗɗen Labar Jigan gɛn Isa al‑Masi kɛn maam lee taaɗ jeege tun Yaudge ey se, taa maam m'je naabum m'tɛɗ tɛɗ se 'kutn cɛr eyo. 3Debum Tit se naan̰ kɔɗ Grɛk, gaŋ te naan̰ se kic ɓo naaɗe tɛɗin̰ te taa tɔɔg eyo taa kɔjn̰ pɔndɔ. 4Jeegen tɛɗ roɗe aan gɔɔ naaɗe ɓo gɛnaagen ɗoobm al‑Masi ki se ɓo, ɓaaɗoga maakjege tu. Naaɗe ɗeek ɔɔ bɛɛki num j'an̰ kɔjn̰ pɔndɔ. Jee se goon̰ ɛndo maakjege tu se je kaakŋ ɔɔ ɗi jaay naajege j'ɔŋki dojege te Isa al‑Masi. Taa naaɗe je ajeki tɛɗn ɓulu daala do Ko Taar kɛn Raa ɛɗo Musa ki. 5Jee se naaje j'ɔn̰ɗe te ɗoob eyo ɔɔ taarɗe lɛ k'took te eyo. Taa naaje k'je Labar Jigan gɛn Isa al‑Masi kɛn mɛt ki se, naaɗe an̰ kɔŋ tuj eyo, num ɔn̰in̰ki 'kiŋg maakse ki gɔtin̰ ki. 6Jee kɛn j'aakɗe j'ɔɔ jee magal se, magal naaɗe se maam m'an ɗim eyo: taa naan Raa ki se jeege paac aas kaasa. Jee se maam taaɗɗen Labar Jigan gɛn Isa al‑Masi kɛn maam lee taaɗ jeege tu se. Num naaɗe se ɔŋ taaɗum te taar ɗim kuuy ey sum. 7Gaŋ naaɗe jeelga Raa se ɛɗumga taarin̰ aan gɔɔ kɛn ɛɗo Piɛr ki se kici. Maam ki naan̰ taaɗum ɔɔ m'ɓaa taaɗn Labar Jiga jeege tun Yaudge eyo, aan gɔɔ Piɛr ɓaa taaɗ Labar Jiga, Yaudge tu se. 8Taa Raa kɛn ɔl Piɛr tɛɗ debm kaan̰ naabm Isa al‑Masi, gɛn ɓaa taaɗ Taarin̰ Jiga Yaudge tu se, naan̰ ɓo debm ɔlum maam kici, m'tɛɗga debm kaan̰ naabm Isa al‑Masi, gɛn ɓaa taaɗn Taarin̰ Jiga se jeege tun Yaudge eyo. 9Gɔtn se Jak, Piɛr, Jan, kɛn jee Raage jeelɗe aan gɔɔ jee magalɗege se, naaɗe se kic ɓo jeele Raa se ɛɗumga naabin̰ jim ki. Taa naan̰ se ɓo naaɗe ɔl jiɗe tɔk jije maam te Barnabas. Kɛse je ɗeekŋ ɔɔ taarje tum tɛɗga kalaŋ. Gɔtn se naaje j'iin̰ k'ɓaa taaɗn Labar Jigan gɛn Isa al‑Masi se jeege tun Yaudge eyo ɔɔ naaɗe lɛ, ɓaa taaɗ Yaudge tu. 10Naaɗe taaɗjen naka kalaŋ sum ɓo gɛn tɛɗa. Naaɗe ɗeekjen ɔɔ k'saapm do jee daayge tun Jeruzalɛm ki. Kɛse ɓo nakŋ kɛn maam m'ɔŋ dirigin̰ te eyo. 11Ɓii kalaŋ se, Piɛr ɓaaɗo kaakŋ jee Antiɔs ki; ɓii se maam taaɗin̰sin̰ tal naan jeege tu, taa nakŋ naan̰ tɛɗ se jig eyo. 12Ey num Piɛr se lee tɔs tɔs te gɛnaagen ɗoobm al‑Masi kɛn Yaudge eyo. Num gaŋ Yaudgen iin̰o gɔtn Jak ki jaay aan se, Piɛr aakɗe se iik tɔɔk cɛɛs ki, baate kɔsn te naaɗe taa naan̰ ɓeer ɓeer jeege tun se. 13Yaudgen mɛtin̰ge kɛn ɗoobm al‑Masi ki se kic ɓo tɛɗ maakɗege di di aan gɔɔ Piɛr se, ɔɔ ɔl Barnabas kic ɓo tɛɗ aan gɔɔ naaɗe. 14Kɛn maam m'aakɗe jaay naaɗe lee ute kɛn mɛt ki eyo do Labar kɛn Jiga se, maam taaɗ Piɛr ki naan jeege tu paac m'ɔɔ: naai kɛn kɔɗ Yaud jaay iŋg aan gɔɔ jee Yaudge ey se. Gɛn ɗi jaay naai 'taaɗ jeege tun Yaudge eyo ɔɔ tɛɗn aan gɔɔ Yaudge se? 15Naaje se k'mɛtjil Yaudge, anum naaje se k'tec aan gɔɔ mɛtjil jeegen Yaudge eyo kɛn jee kusin̰ge se. 16Kɛn bin num naaje k'jeelki, debm kɛn Raa aakin̰ bɛɛ naanin̰ ki se debm kɛn aal maakin̰ do nakge tun Isa al‑Masi tɛɗo se, ey num debm kɛn iŋg do Ko Taar kɛn Raa ɛɗo Musa ki se eyo. Taa naan̰ se ɓo naaje k'j'aalki maakjege do nakge tun al‑Masi tɛɗo se kici, taa Raa ajeki kaakŋ kaamin̰ ki se aan gɔɔ jee aak bɛɛ. Num kɛn ajeki tɛɗn j'aki kaakŋ bɛɛ naan Raa ki se Ko Taar kɛn Raa ɛɗo Musa ki eyo, ey num te Ko Taar kɛn Raa ɛɗo Musa ki se nam jaay 'tɛɗn aak bɛɛ naan Raa ki se gɔtɔ. 17Kɛn naaje Yaudge kic ɓo kɛn k'je j'aki tɛɗ jee aak bɛɛ naan Raa ki se, j'aki kaal maakje do al‑Masi ki jaayo. Kɛn k'tɛɗki bin se naaje k'teckiga aan gɔɔ jee kusin̰gen iŋg ɓaa se paac se. Kɛn bin num al‑Masi se ɔljekiga maakŋ kusin̰ ki la? Anum gɔtɔ. 18Bin eyo kɛn maam jaay m'ɔk tɛrl gɛn kiŋg do Ko Taar kɛn Raa ɛɗo Musa ki kɛn maam rɛsin̰oga rɛs se num, kɛse maam mala ɓo m'ɔn̰ bɔɔrɔ ooc dom ki. 19Gɛn kiŋg do Ko Taar kɛn Raa ɛɗo Musa ki se, maam se aan gɔɔ debm ooyga kooyo. Nakgen se jaay paac aan se taa maam m'kiŋg gɛn Raa. Taa do dɔkin̰ k'tɔɔl Isa al‑Masi ro kaag ki se, maam se aan gɔɔ m'ooyga kooy ute naan̰a. 20Taa naan̰ se kɛn maam m'iŋg se, Isa al‑Masi ɓo iŋg maakum ki. Kɛn ɓɔrse kiŋgum do naaŋ ki se, maam m'aal maakum do Goon Raa kɛn jema, ɔɔ ɔn̰ ron̰ ooy taa maama. 21Bɛɛ Raa se maam m'an̰ kɔŋ tɛɗn nakŋ cɛr eyo; taa maam se m'kɔŋ tɛrl gɛn kiŋg do Ko Taar kɛn Raa ɛɗo Musa ki se ey sum. Kɛn debm jaay je tɛɗn aak bɛɛ naan Raa ki te Ko Taar kɛn Raa ɛɗo Musa ki se num, kɛse je ɗeekŋ ɔɔ kooy al‑Masi se, nakŋ cɛrɛ.

will be added

X\