Galates 1

1Maktubm se maam Pɔl ɓo m'raaŋseni, maam kɛn debm kaan̰ naabm Isa al‑Masi ey num nam ɓo bɛɛr ɔɔɗum eyo ɔɔ debkilimi ɓo ɔlumo eyo; num Isa al‑Masi mala ute Raa Bubu kɛn durin̰o daan yoge tu, naaɗe se ɓo kɛn ɔlumo. 2Maam ute gɛnaagen gɔtn ara, k'tɛɗsen tɔɔsɛ naase jee eglizge tun taa naaŋ Galat ki. 3Ɔn̰ Raa Bubjege te Mɛljege Isa al‑Masi asen tɛɗn bɛɛɗe ɔɔ asen kɛɗn lapia. 4Isa al‑Masi se ɛɗ ron̰ sɛrkɛ taa kusin̰jege taa ajeki kɔɔɗn dojege maakŋ nakge tun jig eyo do duni ki ara. Naan̰ tɛɗin̰ se aan gɔɔ Raa Bubjege maakin̰ jen ro ki. 5Bin se Raa se daayum k'nookin̰ki. Amin. 6Kɛn maam booy labarse se taar se ɔkum taaɗ eyo! Raa kɛn daŋseno ute bɛɛ al‑Masi kɛn tɛɗseno ɔɔ gaŋ yɔkɔɗ bin sum ɓo, naase 'rɛsŋki ute Labar Jigan gɛn Isa al‑Masi se naatn ɔɔ 'tɛrlkiga naaga Raa ki ɔɔ uunkiga labar jigan kuuy, 7m'aakin̰ se aan gɔɔ Labar Jigan kuuy utu. Num labar jigan kuuy se ɓɛrɛ, gɔtɔ. Naɓo jee kuuy maakse ki se je an tujn̰ ute Labar Jigan gɛn al‑Masi se. 8Num kɛn nam kuuy jaay ɓaaɗo taaɗsen labar jigan kuuy kɛn tec gɔɔ kɛn maam taaɗsesin̰ ey se, kɛn tɛɗn naaje, ey lɛ kɔɗn Raa bɔɔy raan kic ɓo, Raa an̰ naamin̰a! 9Naaje k'taaɗsenoga, tɛr ɓɔrse m'asesin̰ taaɗn ɗɔɔl daala, nam kuuy jaay ɓaaɗo taaɗsenga labar jigan kɛn tec aan gɔɔ kɛn naase 'booyin̰kiro ey se, nam bin se, ɔn̰ Raa an̰ naamin̰a! 10Anum ɓɔrse m'raaŋsen bin se, m'je jikilimge ɓo am tɔɔm lɔɓu Raa lɛ? Maam m'je jikilimge ɓo am tɔɔm eyo. Kɛn m'je jikilimge ɓo am tɔɔm num, maam kɔŋ tɛɗn debm tɛɗn naabm al‑Masi eyo. 11'Booyki gɛnaamge m'asen taaɗa: Labar Jigan gɛn Isa al‑Masi maam taaɗseno se taar se iin̰o gɔtn debkilim ki eyo. 12Taa taar se, maam booyin̰o gɔtn debkilim ki eyo, ɔɔ nam ɓo dooyum eyo, num gaŋ Isa al‑Masi mala ɓo teec naanum ki ɔɔ taaɗumo mɛtin̰a. 13Naase mala 'jeelki kiŋgum do dɔkin̰ se paac, kɛn maam lee do ɗoobm Yaudge tu se. Kaaɗ kɛn se, maam lee m'dabaro dɛna eglizn gɛn Raa, ɔɔ m'je ɗoobm m'aɗeno kutu. 14Maakŋ mɛtjilum ki, ute parumgen k'lee ɗoobm Yaudge tu se, maam ɓo debm kɛn m'ɔkin̰ ɔɔn̰ dɛna m'cir jee mɛtin̰ge. Taa do ɗoobm bubjege tu se maam ɓo debm m'iŋg dɔɔk maakum ro ki. 15Raa kɛn bɛɛr ɔɔɗumo maakŋ koyum ki se, daŋumo ute bɛɛn̰a taa m'an̰ jeelin̰a, ɔɔ gaŋ kaaɗn Raa jen ro ki jaay aan se, 16ɔɔ tɛr taaɗum m'jeelga Goonin̰a taa m'an̰ taaɗin̰ jeege tun Yaudge eyo. Naan̰ kɛn se naar maam m'ɓaa m'tɔnd te mɛtn nam gam ey sum. 17Gaŋ kaaɗ kɛn se maam m'ɓaa m'aano te Jeruzalɛm ki eyo gɛn kaakŋ jee kaan̰ naabm Isa al‑Masigen aalo maakɗege deet do maam ki se; num gaŋ maam gaaŋ m'ɓaa taa naaŋ Suge tu ɔɔ m'ɔk m'tɛrl ɓaaɗo maakŋ gɛgɛr kɛn Damas ki. 18M'tɛɗ ɓaara mɔtɔ jaay ɓaa Jeruzalɛm ki, taa k'ɓaa jeel naapa ute Piɛr. Gɔtn se maam m'iŋgo ɓii sik‑kaar‑mii ute naan̰ tɛlɛ. 19Gɔtn se maam m'aako Jak kalin̰ ki gɛnaa Mɛljege Isa al‑Masi, ey num m'ɓaa m'aak te debm kaan̰ naabm Isa al‑Masi gam kuuy ey sum. 20Raa jeele taar maam m'raaŋsesin̰ se, taar mɛt ki. 21Tɛr maam m'iin̰ m'ɓaa taa naaŋ Siri te gɛn Silisi. 22Naɓo eglizgen taa naaŋ Jude ki kɛn gɛn al‑Masi se aakum te ɓii kalaŋ eyo. 23Naaɗe booy booy sum ɓo ɔɔ debm lee dabarjekiro do dɔkin̰ se, ɓɔrse aalga maakin̰ do Isa ki ɔɔ baagga taaɗn taar Isa al‑Masi jiga se jeege tu; ey num taar se ɓo kɛn do dɔkin̰ naan̰ je an̰ tuj se. 24Kɛn naaɗe jaay booyo taar maam se, naaɗe tɔɔm Raa taa maama.

will be added

X\