Ephésiens 3

1Taa ɗi maam Pɔl kɛn j'ɔkum daŋgay taa Isa al‑Masi taa naasen Yaudge eyo, 2ɗeere, naase 'booykiga naabm kɛn Raa ɛɗumsin̰a taa m'an̰ tɛɗn taa naase se. Naabm se Raa ɛɗumsin̰ se ute bɛɛn̰a. 3Nakŋ naan̰ uun do do dɔkin̰ gɛn tɛɗa kɛn naajege k'jeel mɛtin̰ ey se, naan̰ taaɗumga mɛtin̰a. Taa naan̰ se ɓo maam m'raaŋsen taargen kandum se. 4Kɛn jaay 'dooykiga taargen se num, naase aki 'jeele nakŋ kɛn Raa uuno do gɛn tɛɗn te al‑Masi do dɔkin̰ se, naan̰ taaɗum maam m'jeelga mɛtin̰a. 5Do dɔkin̰ nakŋ se Raa ɔŋ taaɗo te mɛtin̰ jeege tu eyo. Num ɓɔrse ute Nirl naan̰ kɛn salal se, naan̰ taaɗga mɛtin̰ jee kaan̰ naabm Isa al‑Masige tun salal se ute jeege tun taaɗ taar teeco taar Raa ki. 6Nakŋ kɛn jaay k'jeel mɛtin̰ ey se, ɓɔrse k'jeelkiga mɛtin̰a: taa naasen kɛn Yaudge ey kic ɓo ɔŋkiga bɛɗse ute Yaudge, taa naase aalkiga maakse do Labar Jiga gɛn Isa al‑Masi ki. Ɓɔrse naase 'tɛɗkiga aan gɔɔ daa ro kalaŋ. Bin se nakŋ kɛn Raa utu kɛɗn jeen̰ge tu ute ɗoobm Isa al‑Masi se, naase kic ɔŋkiga bɛɗse. 7Raa se naan̰ m'tɛɗumga bɛɛ ɔɔ ute tɔɔgin̰ se, naan̰ tɛɗum m'tɛɗga debm tɛɗn naabin̰a, gɛn taaɗn Labar Jigan gɛn Isa al‑Masi se jeege tu. 8Maakŋ jee Raage tu paac se, maam ɓo m'ko kaam mɔɔtɗe. Ute naan̰ se kic ɓo Raa tɛɗumga bɛɛ ɔɔ tɛɗum m'tɛɗga debm taaɗn taarin̰ gɛn Isa al‑Masi kɛn bɛɛn̰ naŋ ey se, do jeege tun Yaudge eyo. 9Naan̰ ɛɗumga naabin̰ taa m'taaɗ tɔɔkŋ mɛtn nakŋ jeege jeel mɛtin̰ ey se jeege tu. Naan̰ kɛn Mɛl‑kaal nakge paac se, do dɔkin̰ se nakŋ se naan̰ ɔŋ taaɗ te mɛtin̰ nam ki eyo. 10Anum ɓɔrse ute egliz se, Raa taaɗ kɔɗn Raage tu, ute nakgen ɔk tɔɔgɔ paacn̰ maakŋ raa ki se, ute ɗoobm egliz se tɔɔggen se jeele, Raa se naan̰ debm jeel‑taara dɛn aak eyo. 11Kɛse ɓo nakŋ kɛn Raa aal te duni ey tap ɓo, naan̰ uunga kuun doa gɛn tɛɗin̰a. Ɓɔrse ute ɗoobm Mɛljege Isa al‑Masi se nakŋ se naan̰ tɛɗin̰ga. 12Ute Isa al‑Masi se naajege k'tɛɗkiga kalaŋ taa j'aalkiga maakjege don̰ ki. Taa naan̰ se ɓo naajege j'ɔŋkiga dojege ɔɔ kɛn k'ɓaaki ɓaa gɔtn Raa ki kic ɓo k'ɓeerki ey paac paac. 13Bin se ɓo maam m'taaɗseni m'ɔɔ maakse ɔn̰te tuju taa dubar kɛn maam m'ɔŋ taa naase se. Dubar kɛn maam m'dabar se bɛɛn̰ naase ki. 14Taa naan̰ se ɓo, maam m'ɛrg naan Bubjege tu Raa. 15Naan̰ ɓo Bubm jeegen kɛn maakŋ raa ki ɔɔ gɛn jeegen do naaŋ ki paac. 16Ɗeere, Raa se naan̰ magal aak eyo, ɔɔ naka paac kaam jin̰a. Taa naan̰ se ɓo maam m'tɔnd mɛtin̰a taa Nirlin̰ asen kɛɗn tɔɔgɔ maakse ki ɔɔ te naan̰ se jaay naase aki tɛɗn jee tɔɔgɔ ɗoobm naan̰ ki. 17Ɔn̰ al‑Masi se 'kiŋg maakse ki taa naase aalkiga maakse don̰ ki se. Tɛr maam m'tɔnd mɛtin̰ kici taa naase aki je Raa ɔɔ aki je naapa. Bin se naase aki 'tɛɗn jee tɔɔgŋ ɗoobm Raa ki aan gɔɔ kaagŋ iirin̰ bɔɔy naaŋ ki ɔɔ ɗaar tɔɔgɔ ɔɔ aan gɔɔ ɓee kɛn j'iin̰in̰ ɗaar tɔɔg se. 18Bin se maam m'je naase ute jee Raagen kuuy se, naase aki kɔŋ jeel mɛtn kando Isa jejeki ɔɔ maak‑je Isan do naajege tu se, ɔk naŋ gur ey se. 19Bin jaay naase aki jeel maak‑je al‑Masi kɛn naan̰ ɔk dose ki se cir nakge paac ɔɔ ɔn̰ nakgen jiga kɛn maakŋ maak‑saapm Raa ki se 'ɗoocn̰ maak‑saapm naase kici. 20Taa Raa se naan̰ ɔŋ tɛɗ nakge paac ute ɗoobin̰a ɔɔ nakŋ naan̰ tɛɗ se deel dojege ɔɔ nakgen naan̰ tɛɗjeki se cir nakgen naajege k'jeki naan̰ ajeki tɛɗa ɔɔ nakgen se naan̰ lee tɛɗin̰ ute tɔɔgin̰ kɛn maakjege tu. 21K'tɔɔmin̰ki taa bɛɛ kɛn naan̰ tɛɗn egliz ki ute ɗoobm Isa al‑Masi se. Ɔn̰ jeegen k'toojɗega ɔɔ kɛn j'utu j'aɗen toojn̰ paac se daayum daayum an̰ tɔɔmɔ. Amin.

will be added

X\