Ephésiens 1

1Maktubm se maam Pɔl ɓo m'raaŋseni, maam se Raa ɓo je m'tɛɗn debm kaan̰ naabm Isa al‑Masi. Maktubm se maam m'ɔlsesin̰ naase jee Raage tun Ɛpɛz ki kɛn tujki te ɔrmse eyo ɔɔ iŋg dɔɔkki kalaŋ ute Isa al‑Masi se. 2Ɔn̰ Bubjege Raa ɔɔ Mɛljege Isa al‑Masi asen tɛɗn bɛɛɗe ɔɔ asen kɛɗn lapia. 3K'tɔɔmki Raa, naan̰ ɓo Bubm Mɛljege Isa al‑Masi! Naan̰ tɛɗjekiga bɛɛ ɔɔ ɛɗjekiga nakgen jiga aak eyo paacn̰ kɛn iin̰o maakŋ raa ki ɔɔ tɛɗjekiga k'dɔɔkkiga kalaŋ ute al‑Masi. 4Kɛn do dɔkin̰ Raa aalo te duni ey ɓɔrt se, Raa bɛɛr tɔɔɗjekiroga tɔɔɗo taa j'aki dɔɔkŋ kalaŋ ute Isa al‑Masi taa j'aki tɛɗn jee salal ɔɔ jee ɔk ɗim aak kus roɗe ki eyo naanin̰ ki. 5Aan gɔɔ naan̰ jejeki se, naan̰ uunga kuun doa do dɔkin̰ tap ɓo, taa ajeki tɛɗn j'aki tɛɗn aan gɔɔ gɛnin̰ge mala te ɗoobm Isa al‑Masi. Kɛse ɓo nakŋ kɛn naan̰ maakin̰ jen ro ki. 6Taa naan̰ se ɓo j'an̰ki tɔɔmɔ gɛn bɛɛn̰ kɛn jiga aak ey se. Bɛɛ se naan̰ tɛɗjesin̰ki ute maraadin̰a taa k'tɛɗkiga kalaŋ te Goon maak‑jen̰a. 7Raa dugjekiga dojege ute moosn Goonin̰a, taa te Goonin̰ se naajege k'tɛɗkiga kalaŋ. Naan̰ tɔɔljekiga kusin̰jege ɔɔ naan̰ tɛɗ bin se je ajeki taaɗn bɛɛ naan̰ kɛn dɛn se. 8Bɛɛ kɛn naan̰ tɛɗjeki dɛn se, tɛɗjekiga naajege k'tɛɗkiga jee jeel‑taarge ute jee jeel nakge. 9Nakŋ kɛn maakin̰ jen ro ki se naan̰ taaɗjekiga mɛtin̰a. Kɛse ɓo nakŋ kɛn naan̰ uuno doa je an̰ tɛɗin̰ ute ɗoobm Isa al‑Masi, 10nakŋ kɛn naan̰ je tɛɗa se jaay kaaɗin̰ aasga num, Raa utu 'tusn nakgen maakŋ raa ki ɔɔ ute kɛngen do naaŋ ki paac kaam ji Isa al‑Masi ɔɔ naan̰ ɓo tɛɗn doɗe. 11Raa tɛɗ nakge paac aan gɔɔ kɛn maakin̰ jen ro ki. Taa do dɔkin̰ tap ɓo naan̰ uunga kuun doa taa naajege j'aki tɛɗn kalaŋ te Isa al‑Masi, ɔɔ naan̰ ɛɗjekiga bɛɗjege maakŋ nakge tun jiga kɛn naan̰ ɛɗ jeen̰ge tu se. 12Bin se naajege kɛn j'ɔndkiga kɔnd dojege deet do Isa al‑Masi ki se, ute ɗoobm naajege se ɓo jeege an̰ nooko ɔɔ an̰ tɔɔmɔ. 13Naasen 'tɛɗkiga kalaŋ te Isa al‑Masi se, taa naase 'booykiroga booy taar kɛn mɛt ki, kɛse ɓo Labar Jigan gɛn Isa al‑Masi kɛn aaj jeege se. Kɛn naase aalkiga maakse do Isa al‑Masi ki ɔɔ 'tɛɗkiga kalaŋ ute naan̰ se, Raa tɛɗsenga nakŋ j'ansen kaakŋ jeel ro ki, kɛse ɓo Nirlin̰ kɛn naan̰ taaɗo ɔɔ utu ajesin̰ki kɛɗ se. 14Naan̰ jaay ɛɗjekiro Nirlin̰ se, naan̰ jejeki taaɗn ɔɔ utu ajeki kɛɗn nakŋ kɛn naan̰ utu kɛɗn jeen̰ge tu. Nakgen se jaay, j'utu j'aɗeki kɔŋ se kaaɗ kɛn Raa utu ajeki kaajn̰ mala mala. Taa naan̰ se ɓo jeege an̰ nooko ɔɔ an̰ tɔɔmɔ. 15Taa naan̰ se ɓo kaaɗ kɛn jaay maam booy j'ɔɔ naase aalkiga maakse do Mɛljege tu Isa ki ɔɔ 'jeki jee Raage paac se, 16daayum kɛn maam jaay m'ɓaa tɔɔm Raa taa naase se, maam m'tɔnd mɛtin̰ m'ɔn̰ eyo taa naase kici. 17Ɔn̰ Raa kɛn gɛn Mɛljege Isa al‑Masi, naan̰ ɓo Raa Bubm kɛn k'nookin̰ gɔtn ɓaa se paac, naan̰ ɓo asen tɛɗn naase aki tɛɗn jee jeel‑taarge. Bin ɓo naase aki jeel kɔkŋ Raa mala mala. 18Maam m'tɔnd mɛtin̰ kici taa asen tɛɗn maakse ki aki jeel nakgen jiga kɛn naase iŋg ɔndki dose ro ki, taa naan̰ se ɓo naan̰ daŋseno se. Ɔɔ maam m'je se naase aki jeele maakŋ nakge tun jigan kɛn naan̰ utu 'kɛɗn jeen̰ge tu se, naase kic utu aki kɔŋ bɛɗse. 19Bin se, naase aki jeele naan̰ se debm ɔk tɔɔgɔ dɛn aak eyo. Taa ɗi ute tɔɔgin̰ se, naan̰ lee noogjeki naajegen j'aalkiga kaal maakjege don̰ ki se, taa tɔɔgŋ Raa se naan̰ cir nakge paac. 20Raa, ute tɔɔgin̰ se ɓo, duro al‑Masi daan yoge tu ɔɔ uun ɔndin̰ do ji daamin̰ ki maakŋ raa ki. 21Gɔtn se Isa al‑Masi iŋg do kɔɗn Raage tu, do Ɓubm sitange tu, do maragge tu ɔɔ do nakge tun ɓaa se paac, maakŋ duni kɛn ara lɔ maakŋ duni kɛn kuuy kic ɓo nam j'an̰ kɔnd magal jaay an̰ cir naan̰ se num, gɔtɔ. 22Ɗeere, nakge paac Raa ɛɗin̰sin̰ga kaam jin̰a ɔɔ Raa uun ɔndin̰ga do nakge tu paac ɔɔ naan̰ tɛɗin̰ tɛɗga do egliz. 23Egliz se naan̰ aan gɔɔ ro Isa al‑Masi ɔɔ naan̰ mala daayum utu iŋg maak ki. Taa Isa al‑Masi se bɛɛ Raa paac se, utu gɔtn naan̰ ki.

will be added

X\