Colossiens 4

1Naase mɛlge se: ɓulsege se 'tɛɗɗeki nakŋ ute ɗoobin̰a ɔɔ kɛn mɛt ki taa 'jeelki naase kic ɔkki Mɛlɛ maakŋ raa ki. 2Daayum aayki kaamse eemki Raa, ɔn̰te 'tooɗki bia, 'tɔɔmki Raa. 3Ɔɔ 'tɔndki mɛtn Raa taa naaje kici: taa naan̰ ajen kɔɔɗn ɗoobo gɛn ɓaa taaɗn nakŋ kɛn gɔtn al‑Masi ki jaay jeege jeel mɛtin̰ ey se. Taa naan̰ se ɓo, maam j'ɔkum daŋgay ki taarin̰a. 4'Tɔndki mɛtn Raa taa taar kɛn maam m'je m'an̰ taaɗin̰ tak se 'tooɗn tal. 5Maakŋ jeege tun ɗoobm al‑Masi ki ey se, iŋgki do mɛtɛkse ki. Ɔɔ kɛn ɗoobin̰ jaay utu se, naase 'tɛɗɗeki bɛɛ. 6Ɔn̰ taarsegen naase aki taaɗ se, 'taaɗin̰ki ute taargen nijimi ɔɔ bɛɛ. Bin ɓo naŋa naŋa kic ɓo an̰ki tɛrl taar ute ɗoobin̰a. 7Gɛnaaje Tisik kɛn debm tɛɗn naabm tuj ɔrmin̰ ey kɛn naaje k'jen̰ki ɔɔ kɛn tɛɗn naabm Mɛljege ute maam tɛl se, naan̰ ɓo debm asen ɓaa taaɗn labarum paac. 8Maam m'ɔlin̰ gɔtse ki tap ɓo taa naan̰ asen ɓaa taaɗn labarje ɔɔ asen ɓaa kɛɗn kaay kaama kici. 9Onezim kɛn k'jen̰ki, naan̰ kic gɛnaajegen tuj ɔrmin̰ eyo, ɔɔ goon naaŋse mala se utu 'ɓaa ute Tisik. Naaɗe se ɓo asen ɓaa taaɗn nakŋ kɛn aan doje ki paac gɔtn ara se. 10Aristarkŋ kɛn maakŋ daŋgay ki ute maam ara se, 'tɛɗsen tɔɔsɛ ɔɔ Markŋ goon taasn Barnabas kic, 'tɛɗsen tɔɔsɛ. Markŋ ese ɓo, maam m'taaɗsenoga taaɗ mɛtn taarin̰ m'ɔɔ kɛn naan̰ jaay ɓaaga gɔtse ki num, ɔkin̰ki jiga. 11Isa, kɛn k'daŋin̰ Justus se, 'tɛɗsen tɔɔsɛ kici. Ɔɔ maakŋ Yaudge tun took aal maakɗe do Isa ki se, naaɗe se sum ɓo, kɛn tɛɗ naaba ute maama gɛn maakŋ Gaar Raa. Naaɗe se ɓo, kɛn ɛɗum kaay kaama. 12Epaprasn, gɛn naase mala se kic, 'tɛɗsen tɔɔsɛ. Naan̰ se debm tɛɗn naabm Isa al‑Masi. Ɔɔ naan̰ se ɗaar cir gɛn tɔnd mɛtn Raa taa naase, taa naase daayum aki kiŋg tɔɔgɔ, aki tɛɗn jee Raagen mɛc ɔɔ taa naase aki 'dɔɔkŋ maakse gɛn tɛɗn nakŋ kɛn Raa maakin̰ jen ro ki. 13Epapras se, naan̰ tɛɗ naaba dɛn aak eyo taa naase, taa jee Laodise ki ute jee Erapolis ki se ɔɔ maam Pɔl se m'aakin̰ga ute kaamuma. 14Mɛɗjege daptor Luk ute Demas kic tɛɗsen tɔɔsɛ. 15'Tɛɗki tɔɔsɛ gɛnaage tun maakŋ gɛgɛr kɛn Laodise ki. Ɔɔ 'tɛɗki tɔɔsɛ Nimpa ki ute jee egliz kɛn lee tus maakŋ ɓeen̰ ki se kici. 16Kɛn naase 'dooyin̰kiga maktubm kɛn maam m'raaŋsesin̰ se num, ɔlin̰ki egliz kɛn maakŋ gɛgɛr kɛn Laodise ki se kici an̰ dooyo. Ɔɔ naase kic maktubm kɛn maam raaŋin̰o jeege tun Laodise ki se jaay ɔlsesin̰oga num, 'dooyin̰ki kici. 17Ɔɔ 'taaɗki Arsip ki: Naabm gɛn Mɛljegen ɔn̰in̰sin̰ kaam jin̰ se, n̰'tɛɗn n̰'aasin̰ ute ɗoobin̰a. 18Tɔɔsn kɛn maam m'raaŋ m'ɔlsen ese se, maam Pɔl mala ɓo m'raaŋin̰ ute jima. Maam se m'daŋgay ki. 'Saapki dom ki ɔɔ ɔn̰te 'dirigumki. Ɔn̰ Raa asen tɛɗn bɛɛn̰a.

will be added

X\