Colossiens 3

1Taa naan̰ se ɓo aan gɔɔ naase ooy 'durkiga ute al‑Masi se, 'jeki nakgen kɛn maakŋ raa ki, gɔtn ese ɓo kɛn al‑Masi utu iŋg do ji daam Raa ki. 2Kɛn bin num, ɔn̰te 'saapki do nakge tun do naaŋ ki, num 'saapki do nakge tun maakŋ raa ki. 3Ɗeere, naase se ooykiga ute al‑Masi ɔɔ 'kiŋgse se Raa utu bɔɔbsesin̰ kaam ji al‑Masi. 4Al‑Masi kɛn kiŋgse kaam jin̰ se, jaay ɓiin aɗe naar teecn̰ pirsil se, naase kic aki naar 'teecn̰ pirsil ute naan̰a maakŋ nookin̰ ki. 5Ɔɔ nakgen jig eyo do naaŋ kɛn utu maakse ki se, 'tɔɔlin̰ki naata aan gɔɔ: kɛɛsn naapm rɛn̰ rɛn̰, nakŋ asen tujn̰ naan Raa ki, nakŋ daa ro ɓo jea, maak‑saapm kusin̰a ute tama, taa tama se tɛɗga raa jeege. 6Taa nakgen jig ey ese se ɓo, kɛn utu ano ɓaa ute maak‑taar Raa do jeege tun kɛn baate tookŋ taarin̰ se. 7Naase kic, do dɔkin̰ se, iŋgkiro bini ɔɔ 'lee 'tɛɗkiro nakgen jig ey se kici. 8Num ɓɔrse se, nakgen se paac ɔɔɗki dose ro ki aan gɔɔ: maak‑taara, taamooyo, nakŋ kusin̰a, naaja ɔɔ taargen gɛn taaɗ ey se kic ɓo, ɔn̰ten 'teecn̰ taarse ki. 9Ɔɔ ɔn̰te 'tɛɗki taar‑kɔɔɓɔ ute naapa; taa kiŋgsen do dɔkin̰a ɔɔ ute naksen jig ey naase 'lee 'tɛɗki se lɛ, rɛsin̰kiroga naatn. 10Ɔɔ ɓɔrse naase 'tɛɗkiga jee kiji ɔɔ Raa Mɛl Kaaljege se daayum tɛɗsenga an̰ki tecn̰ naan̰a, taa an̰ki jeel kɔkŋ mala mala. 11Taa naan̰ se ɓo maakse ki se: kɛn kɔɗ Grɛki, kɛn kɔɗ Yaudi, debm ɔjga pɔndɔ, debm ɔj te eyo, debm cɛkɛ, jee kaagge, jeegen ɓulge lɔɓu jeegen ɓulge eyo, naaɗe se paac, naan Raa ki se, debm cir naapin̰ tap ɓo gɔtɔ. Num kɛn cir paac se, al‑Masi, naan̰ ɓo do nakge tu paac ɔɔ utu maakŋ jeen̰ge tu paac. 12Taa naan̰ se ɓo naase se Raa bɛɛr tɔɔɗsenoga tɔɔɗɔ ɔɔ 'tɛɗkiga jee naan̰ge kɛn naan̰ jeɗe. Bin num ɛɛjki do naapge tu, 'tɛɗki bɛɛ ute naapa, ɔɔpki rosege baata, 'tɛɗki jee dalul ɔɔ 'tɛɗki jee maakɗe deere. 13Ɔɔ 'sɛrkki naapa ɔɔ kɛn maakse ki jaay deb kalaŋ tujga naapin̰ ki se, ɔkki naagŋ naapge; aan gɔɔ Mɛljege tɔɔlsenoga kusin̰se se, naase 'tɛɗki kalɗɛ naapge tu bin kici. 14Kɛn bɛɛ cir paac se, 'jeki naapa ɔɔ kɛn naase jaay 'jeki naapa se, maakse kic 'tɛɗn kalaŋ tak. 15Ɔn̰ lapi al‑Masi se 'kiŋg maakse ki taa Raa daŋseno se taa aki kiŋg ute lapia te naapa, taa naase 'tɛɗkiga aan gɔɔ ro kalaŋ. Ɔɔ daayum iŋg 'tɔɔmki Raa. 16Ɔn̰ taar al‑Masi ute bɛɛn̰ se 'ɗoocn̰ maakse. 'Dooyki naapa aalki bi naapge tu ute jeel‑taar mala mala kɛn naase ɔkki se. Ɔɔ aarki kaa Raa ki ute maakse paac, 'tɔɔmin̰ki ute kaagen kɛn k'lee k'j'eemsin̰a ɔɔ magalin̰ki ute kaagen Nirl Salal ɔl jeege lee tɔɔmsin̰ se. 17Taargen paacn̰ kɛn naase 'ɓaan̰ki ɓaa taaɗa ute nakgen paacn̰ naase 'ɓaan̰ki ɓaa tɛɗa se, 'tɛɗin̰ki ute ro Mɛljege Isa. Ɔɔ ute ɗoobm naan̰ se, naase 'tɔɔmki Raa Bubu kici. 18Naase mɛndge: 'booy uunki taar gaabsege aan gɔɔ jee uun ɗoobm Mɛljege lee tɛɗin̰ se. 19Naase gaabge kic 'jeki mɛndsege ɔɔ ɔn̰te taaɗɗeki ute taar tɔɔgɔ. 20Gaange: 'tookki paac taar kɛn̰sege ute bubsege; kɛse ɓo nakŋ kɛn tɔɔl Mɛljege tu. 21Naase bubm gaange se, ɔn̰ten 'tɛɗki gaansege se maakɗe aɗen taara, ey num naaɗe maakɗe 'tuju. 22Naase ɓulge se: mɛlsegen do naaŋ ki se taarɗege paac 'tookɗesin̰ki. Kɛn naaɗe gɔtɔ kic ɓo 'tɛɗɗeki naabɗege jiga. Ɔɔ ɔn̰te 'tɛɗin̰ki aan gɔɔ naase 'jeki raapm maakŋ jikilimge sum, num gaŋ 'tɛɗɗeki naaba ute maakŋ kalaŋ taa naase se 'ɓeerki Mɛljege tu. 23Num naabm kɛn naase 'ɓaan̰ki ɓaa tɛɗa paac se, 'tɛɗin̰ki ute maakse paac aan gɔɔ naabm gɛn Mɛljege ɔɔ ɔn̰te 'kaakin̰ki aan gɔɔ naabm gɛn jikilimge sum. 24Naase 'jeelki Mɛljege utu asen kɛɗn bɛɗse ute jeen̰ge. Ɔɔ Mɛljege se, naan̰ ɓo al‑Masi ɔɔ naabm kɛn naase 'tɛɗki se lɛ, 'tɛɗin̰ki naan̰ ki. 25Num debm 'tɛɗ kusin̰ se, kusin̰in̰ se, utu an̰ tɛrl don̰ ki; taa Raa se, naan̰ bɛɛr nam eyo.

will be added

X\