Colossiens 1

1Kɛn ara maam Pɔl, m'debm kaan̰ naabm Isa al‑Masi aan gɔɔ kɛn Raa maakin̰ jen ro ki ɔɔ ute gɛnaajege Timote ɓo, 2k'raaŋsen maktubm ara se, naase jee Raage tun maakŋ gɛgɛr kɛn Kɔlɔs ki ɔɔ naase ɓo gɛnaajegen tuj ɔrmɗe eyo ɔɔ kɛn iŋg dɔɔk kalaŋ te al‑Masi. Ɔn̰ Bubjege Raa asen tɛɗn bɛɛn̰a ɔɔ asen kɛɗn lapia. 3Daayum, kɛn naaje jaay k'ɓaa ɓaa tɔnd mɛtn Raa Bubm Mɛljege Isa al‑Masi taa naase se, naaje k'lee k'tɔɔmin̰a, 4taa naaje se k'booyga j'ɔɔsjege maana taa kaal maaksen aalki do Isa al‑Masi ki ɔɔ ute maak‑je kɛn naase ɔkki do jee Raage tu paac se. 5Bin ɓo deet deetn kɛn naase 'booykiro Labar Jigan kɛn mɛt ki se, naase 'booy ɔkkiga Raa se 'bɔɔbsenga nakŋ bɛɛ maakŋ raa ki ɔɔ do taar kɛn se ɓo, naase iŋg ɔndki dose do ki. 6Ɔɔ Labar Jigan ese se wɔɔkga do naaŋ ki paac bini aanga gɔtse ki. Naan̰ se tec aan gɔɔ ko kaaggen kɛn teepe ɔɔ ooj dɛn se ɔɔ Labar Jiga se kic ɓo tɛɗn naabin̰ gɔtn jeege tu ɓaa ute naanin̰a. Bin ɓo naan̰ tɛɗn naaba daan naase ki kici, baago deet deet ɓii kɛn naase 'booykiro ɔɔ 'jeelin̰ki bɛɛ Raa se mɛt ki, jaay naase 'took ɔkin̰ki jiga se. 7Epapras ɓo debm kɛn dooyseno mɛtn taargen ese se ɔɔ naan̰ se taaɗjenga tɔɔgŋ kɛn Nirl Salal ɛɗsen gɛn je jeege se. Naan̰ se mɛɗn kɔɔn̰ maakje k'tɛɗn naaba kalaŋ ɔɔ naan̰ se debm tɛɗn naabm tuj ɔrmin̰ eyo gɛn al‑Masi gɔɔ naaje ki. 9Taa naan̰ se ɓo, ɓii kɛn naaje jaay k'booy labarse sum se, naaje k'tɔnd mɛtn Raa j'ɔn̰ eyo taa naase. Naaje k'tɔnd mɛtin̰ j'ɔɔ asen kɛɗn jeel mala mala kɛn naase anki jeel nakŋ kɛn Raa maakin̰ jen ro ki ɔɔ ɔn̰ Nirlin̰ se asen kɛɗn jeel‑taar mala mala ute mɛtɛkɛ. 10Bin jaay ɓo kiŋgse 'tɛɗn aak bɛɛ naan Mɛljege tu gɛn je nakŋ paacn̰ tɔɔlin̰ naan̰ ki. Ɔɔ naase aki tɛɗn napar nakgen jiga jiga ɔɔ Raa se naase an̰ 'jeel kɔkŋ ɓaa ute naan se. 11Ɔɔ naaje k'tɔnd mɛtin̰ asen tɛɗn jee tɔɔgŋ mala mala ute tɔɔgŋ naan̰ kɛn cir nakge paac se, bin ɓo kɛn dubar jaay aanga dose ki kic ɓo, naase aki kaay kaamse, an̰ki sɛrkɛ. 12Ɔɔ ute maak‑raapo 'tɔɔmki Raa Bubm kɛn tɛɗseno ɔŋkiga ɗoobo gɛn kɔŋ bɛɗse maakŋ nakge tun bɛɛ kɛn naan̰ bɔɔbin̰ jeen̰ge tu maakŋ‑gɔt kɛn wɔɔr se. 13Taa Raa se ɔɔɗjekiga dojege maakŋ‑gɔt kɛn ɔɔɗɔ kɛn ɔk tɔɔgɔ dojege tu ɔɔ uun ɓaanjekiga maakŋ gaar gɛn Goon maak‑jen̰ ki. 14Ute ɗoobm Goonin̰ se ɓo Raa dugjekiga dojege ɔɔ tɔɔljekiga kusin̰jege se naatn. 15Ɓii kalaŋ tap ɓo nam aak te Raa eyo. Num, kɛn Goonin̰ Isa jaay ɓaaɗo do naaŋ ki se, naan̰ ɓo tec aan gɔɔ Raa mala ɔɔ naan̰ ɓo taaɗ Raa se jeege tu. Aan gɔɔ maakŋ ɓee ki goon paraga ɓo naana se, Isa al‑Masi kic ɓo, nakgen Raa aalɗeno paac se, naan̰ ɓo naanɗe ki. 16Taa ute Isa se ɓo, Raa aalo nakgen maakŋ raa ki ute kɛngen do naaŋ ki paac; kɛngen j'aakɗe ute kɛngen j'ɔŋ j'aakɗe eyo, nakgen ɔk tɔɔgŋ kɛn j'ɔŋ j'aakɗen eyo, tɔɔggen iŋg do jeege tu, kɔɗn Raage ute magalɗege; nakgen se paac, Raa aalɗe ute Isa ɔɔ Raa aalɗeno se taa naaɗe taaɗn nookŋ Isa. 17Nakgen ɓaa se paac se, Isa ɓo naan ki ɔɔ kɛn naaɗe paac jaay utu iŋg gɔtɗe ki se, ute tɔɔgŋ naan̰a. 18Aan gɔɔ do ɓo tɔɔɗ ro te magalin̰ se, Isa al‑Masi kic, naan̰ do egliz. Nakge paac se upo mɛta do naan̰ ki ɔɔ maakŋ yoge tu se, naan̰ ɓo debm kɛn ooy duro deete. Taa bin se maakŋ nakge tun ɓaa se paac se, naan̰ ɓo naan ki. 19Ɗeere, nakŋ paacn̰ kɛn Raa ɔk se utu gɔtn Goonin̰ ki kici taa Raa se uunoga kuun doa gɛn tɛɗn naan̰ se. 20Ute goonin̰ se, Raa tɛɗga nakgen do naaŋ ki ute kɛngen maakŋ raa ki se paac ɔkga taasa ute naan̰a. Ute moosn goonin̰ kɛn ɔɔy do kaag ki se ɓo, Raa ɓaanoga ute lapia. 21Anum, naasen jee Kɔlɔs ki se, do dɔkin̰ se, naase iŋgkiro dɔk ute Raa. Naase 'saapkiro ɔɔ 'tɛɗkiro nakgen jig eyo. Kɛse ɓo kɛn gaaŋseno ute Raa ɔɔ tɛɗkiro jee taamooyin̰ge. 22Num ɓɔrse se, ute kooy kɛn Goonin̰ ɔn̰ ron̰ ooy do kaag ki se, Raa ɔkga taasa ute naase taa asen ɓaa naanin̰ ki se jee salal, ɔk taar ɗim kusin̰ roɗe ki eyo ɔɔ ɔk tuj eyo kici, 23kɛn naase jaay kaal maaksen do Isa ki se ɔkin̰ki jiga ɔɔ 'ɗaarki do ki tɔɔg gaŋ se, ɔɔ kɛn naase jaay ɔn̰ki te eyo gɛn kɔnd dose do Labar Jigan kɛn naase 'booyin̰kiro se. Ɔɔ Labar Jigan ese se ɓo k'taaɗin̰ga jeege tun do naaŋ ki paac kici ɔɔ taa naan̰ se ɓo maam Pɔl se m'tɛɗga debm tɛɗn naabin̰a. 24Ɓɔrse, maam m'dabar dɛna taa naase; ute naan̰ se kic ɓo maam maakum raapo. Aan gɔɔ Isa dabaro se, maam kic m'dabar roma taa naase eglizn kɛn 'tɛɗkiga daa ro gɛn Isa al‑Masi se. Maam m'dabar se, taa naabin̰ kɛn ɔɔp se 'kaasn ɗoobin̰ ki. 25Maam se m'tɛɗga debm tɛɗn naabm gɛn egliz, ɔɔ naabm se Raa ɛɗumsin̰ kaam jim se taa naase. Naan̰ ɛɗum naabm se taa Taar Raa se paac m'an̰ taaɗn naŋ ute ɗoobin̰ jeege tu. 26Ɔɔ taar kɛn Raa uuno doa do dɔkin̰ gɛn taaɗa jaay taaɗ te mɛtin̰ mɛtjil jeege tu paac ey se, ɓɔrse se, naan̰ taaɗga mɛtin̰ tooɗga tal jee Raage tu. 27Ɔɔ jee Raagen ese se ɓo Raa uunoga doa gɛn taaɗn nakŋ bɛɛ ɔɔ jiga kɛn jeege jeelo te mɛtin̰ eyo kɛn Raa tɛɗin̰ taa jeegen Yaudge eyo. Nakŋ se naan̰ ɓo al‑Masi kɛn utu iŋg maakse ki se ɔɔ ute ɗoobm naan̰ se ɓo, naase ɔndki doa gɛn kɛnd maakŋ nookŋ Raa ki. 28Al‑Masi se ɓo naaje k'taaɗin̰ jeege tu paac, k'j'aalɗen biɗe ki ɔɔ k'dooyɗe ute jeel‑taar paacn̰ kɛn Raa ɛɗjen se, taa naaje k'je jeegen paacn̰ dɔɔkga ute al‑Masi se, 'tɛɗn jee mɛc. 29Taa naan̰ ese se ɓo maam m'tɛɗn naaba m'ɗoa ute tɔɔgŋ al‑Masi kɛn cir nakge paac kɛn iŋg tɛɗ naaba maakum ki se.

will be added

X\