Actes 3

1Ɓii kalaŋ tɛgɛr aan kaaɗa mɔtɔ kɛn k'lee k'j'eem Raa jaay aas se, Piɛr ute Jan ook ɓaa daan bɔɔr Ɓee Raa ki gɛn keem Raa. 2Gɔtn se k'j'uun k'ɓaano ɓaa ute gaaba kalaŋ gɔtn k'j'oojin̰ tap ɓo naan̰ k‑ruŋguyu. Gaabm se, ɓii‑raa naaɗe ɓaaɗo lee tɔl tɔndin̰ cɛɛ taa ɗoobm Ɓee Raa kɛn k'daŋin̰ taa Ɗoobm Aak Jiga se ɔɔ ɓii‑raa, naan̰ lee baay baay gɔtn jeege tun lee ɓaaɗo daan bɔɔr Ɓee Raa ki se. 3Kɛn naan̰ jaay aak Piɛr ute Jan ɛndo kɛnd daan bɔɔr Ɓee Raa ki se, naan̰ baay ɗim gɔtɗe ki. 4Kɛn naaɗe jaay booy taarin̰ se, gɔtn se naaɗe ɔk ɗaara ɔɔ ɔndin̰ kaama tak ɔɔ Piɛr ɗeekin̰ ɔɔ: «'Tɛrl aakjen tu!» 5Gɔtn se gaabm se tɛrl aakɗe ɔɔ naan̰ saap maakin̰ ki ɔɔ kaaɗn naane naaɗe an̰ kɛɗn ɗim. 6Gaŋ Piɛr ɗeekin̰ ɔɔ: «Daab ute pudda se maam m'ɔk eyo, num nakŋ maam m'ɔk se ɓo, m'aisin̰ kɛɗa. M'ɔɔ ute ro Isa al‑Masi kɛn kɔɗn Nazarɛt se, iin̰ 'lea!» 7Gɔtn se naan̰ ɔkin̰ ute ji daamin̰a ɔɔ uun ɗaarin̰a ɔɔ gɔtn ese sum ɓo kaam kiricin̰a ute kaam jɛn̰ se naar sɛɛj ɗaapa. 8Gɔtn se naan̰ iin̰ kirit ɔɔ ɗaara ɔɔ baag lea! Naan̰ ɛnd ute naaɗe daan bɔɔr Ɓee Raa ki, lea, taala ɔɔ tɔɔm Raa. 9Jee ute dɛnɗe paac se aakin̰a kɛn naan̰ lea ɔɔ tɔɔm Raa se. 10Jee se paac aak jeelin̰a naan̰ ɓo debm kɛn lee tiŋgo cɛɛ taa ɗoobm Ɓee Raa kɛn k'daŋin̰ taa Ɗoobm Aak Jiga jaay lee baayo se. Kɛn naaɗe paac jaay aak nakŋ tɛɗ ese se, nakŋ se deel doɗe ɔɔ ɔkɗen taaɗ eyo. 11Gɔtn se Piɛr ute Jan naaɗe ɗaar ɗaar mɛtn daab ki ɔɔ daabm se k'daŋin̰ Daabm Salomon . Gaabm se kɔkŋ naan̰ tɔkɗe se ɔɔɗ ɔlɗen eyo. Gɔtn se jeege dɛna aan̰ ɓaaɗo ɔŋɗe taa nakŋ deel paac se ɔkɗen taaɗ eyo. 12Kɛn Piɛr jaay aak jee dɛngen aan̰ ɓaaɗo gɔtɗe ki se, naan̰ ɗeekɗen ɔɔ: «Naase gaan Israɛlge, gɛn ɗi jaay gaabm ese ɔŋ lapi sum ɓo jaay naase ɔksen taaɗ ey se? Naase aakjeki bin se gɛn ɗi? Gɛn naase ki num 'saapki ɔɔki gaabm kɛn iin̰ lee se ute tɔɔgje lɔɓu, ɔɔki j'ɔk taar Raaje se ɓo ɔɔn̰ ɓo naan̰ ɔŋ lapi lɛ? 13Raa gɛn bubjege Abraam, gɛn Isaka ɔɔ gɛn Yakub se, naan̰ ɓo debm kɛn nook Isan, debm tɛɗn naabin̰a, kɛn naase ɔk ɔlin̰ki kaam ji tɔɔgge tu ɔɔ ɔɔɗ undin̰ki naan Pilat ki. Ey num Pilat se, je an̰o kɔɔɗn kɔlɔ. 14Naan̰ lɛ, debm salal ɔɔ debm daan ki naan Raa ki, gaŋ naase 'baatin̰ki ɔɔ 'jeki debm tɔɔl jeege se ɓo, j'asesin̰ kɔɔɗn kɔlɔ. 15Num Mɛl‑kaaja tap ɓo, naase 'tɔɔlin̰ki. Gaŋ Raa se durin̰oga daan yoge tu ɔɔ naaje se j'aakin̰ga ute kaamje. 16Anum gaabm naase aakin̰ki naanse ki ese se, naase paac 'jeelin̰ki. Naan̰ jaay ɔŋ lapi se ute ro Isa, taa naaje j'aalga kaal maakje don̰ ki. 17«Num ɓɔrse, gɛnaamge, maam m'jeele nakŋ naase ute magalsege 'tɛɗin̰kiro se, naase 'jeel ɔkkiro te mɛtin̰ eyo. 18Gaŋ taar kɛn Raa ɔlo jee taaɗo taargen teeco taarin̰ ki taaɗo se ɓo, aanga ɗoobin̰ ki kɛn ɔɔ: al‑Masi ɓaaɗoga num, utu 'dabara. 19Bin se naase 'tɛrlki maakse ɔɔ 'ɓaakiro gɔtn Raa ki, taa naan̰ asen tɔɔl kusin̰se. 20Bin jaay Mɛljege Raa asen kɛɗn gɔtn tɔɔl maaka ɔɔ utu aseno kɔl Isa, naan̰ ɓo al‑Masi kɛn Raa bɛɛr ɔɔɗsesin̰o. 21Kɔr se, Isa kiŋg maakŋ raa ki bini 'kaan ɓii kɛn Raa 'tɔnd ɗaapm nakge paac 'tɛɗn kiji. Kɛse ɓo nakŋ kɛn jee salal kɛn taaɗo taargen teeco taar Raa ki taaɗo do dɔkin̰ se. 22Ey num Musa kic taaɗoga taaɗ ɔɔ: Maakŋ gɛnaasege tu se, Mɛlse Raa utu aseno bɛɛr kɔɔɗn debm taaɗ taar teeco taar Raa ki aan gɔɔ maama, ɔɔ taar kɛn naan̰ utu asen taaɗn paac se, 'booy uunin̰ki. 23Ɔɔ debm jaay baate booy kuun taarin̰ se, maakŋ jeen̰ge tu se j'an̰ kɔkŋ kutn naatn. 24«Jee taaɗ taar teeco taar Raa ki paacn̰ iin̰o do Samuɛl ki ute jeegen ɓaaɗo mɛtn naan̰ ki se, taaɗoga taa nakgen kɛn ɓɔrse aanga se kici. 25Gɛnaamge, naase se 'gaan jee kɛn taaɗ taar teeco taar Raa ki do dɔkin̰a ɔɔ dɔɔkŋ kɛn Raa dɔɔko ute bubsege se, dɔɔk ute naase kici. Taa naan̰ se ɓo, naan̰ taaɗ Abraam ki ɔɔ: Ute mɛtjil naai se, maam m'tɛɗn bɛɛ mɛtjil jeege tun do naaŋ ki paac. 26Deet deet se Raa ɔɔɗo debm tɛɗn naabin̰ Isa se naase gaan Israɛlge tu. Naan̰ ɔlin̰o se taa asen tɛɗn bɛɛ ɔɔ bin se naŋa naŋa kic ɓo 'tɛrl naaga do nakge tun jig ey kɛn naan̰ lee tɛɗin̰ se.»

will be added

X\