Actes 26

1Gɔtn se, Gaar Agripa taaɗ Pɔl ki ɔɔ: «Ɓɔrse j'ɔn̰iga ɗoobo 'taaɗ mɛtn taari.» Naan̰ kɛn se, Pɔl uun jin̰ raan tɛɗɗen tɔɔsɛ jaay baagɗen taaɗn mɛtn taarin̰a ɔɔ: 2«Gaar Agripa, jaaki maam m'ɗaar naani ki ara se, maakum raap aak eyo. Taa maam m'ɔk ɗoobo gɛn taaɗn mɛtn taargen Yaudge lee ɔkum mindum se. 3Taa naai lɛ, 'jeele nakŋ bubɗegen naaɗe lee tɛɗa ute do taargen naaɗe lee naaj do ki se. Taa naan̰ se ɓo, maam m'eemi nɔɔ mɛti ki ɔɔ uɗum bi do taar kɛn maam m'ai taaɗ se. 4«'Booy m'ai taaɗa: Yaudge paac se 'jeeluma taa maam lɛ m'teep daanɗe ki Jeruzalɛm ki ara. 5Do dɔkin̰ tap ɓo, naaɗe 'jeeluma, maam se m'uun ɗoobm Parizigen tɛɗin̰ ɔɔn̰ dɛn se. Naaɗe se jeele kɛn naaɗe je kic ɓo am tɛɗn saaɗumge. 6Jaaki jaay k'j'ɔk k'ɓaansumo gɔtn kɔjn̰ bɔɔrɔ ki se, taa maam m'ɔndga kɔnd dom do nakge tun Raa taaɗo bubjege tu ɔɔ utu ajeki kɛɗ se. 7Taa naan̰ se ɓo, taa ɓeejegen sik‑kaar‑di se eem Raa nɔɔrɔ katara; taa naaɗe ɔnd doɗe ɔɔ utu kɔŋ nakgen kɛn Raa taaɗ ɔɔ utu ajeki kɛɗ se. Bin ɓo Gaar Agripa, maam kic m'ɔnd dom do nakge tun se kici, ɔɔ taa naan̰ se ɓo, Yaudge lee ɔkum mindum se. 8Bin num, gɛn ɗi jaay naase Yaudge ɔɔki Raa se 'kɔŋ dur jeegen ooyga kooy ey se? 9«Ɗeere, maam kic maakŋ saapum ki se, ute ɗoobm gay kic ɓo m'ɗo ɗo m'je ro Isan kɔɗ Nazarɛt se se 'tɛɗn gɔtɔ. 10Kɛse ɓo nakŋ kɛn maam m'tɛɗo Jeruzalɛm ki. Naan̰ kɛn se, magalgen gɛn jee tɛɗn sɛrkɛ Raage tu se ɓo, undumo kulu ɔɔ maam se, jee aalga kaal maakɗe do Isa al‑Masi ki se, jeege dɛna kɛn m'tɔk m'ɔmbɗeno daŋgay ki. Ɔɔ kɛn naaɗe jaay dɔɔk taarɗe gɛn tɔɔlɗe lɛ, maam kic m'took ute naaɗe. 11Maam m'lee m'dabarɗe maakŋ ɓeege tun kɛn Yaudge lee tusn maak ki se. Gɔtn se maam m'tɛɗɗe ute taa tɔɔgɔ. M'je naaɗe an rɛsn ute ɗoobm Isa se. Maakum jaay taarum doɗe ki se, ɔlum bini m'ɓaa m'dabarɗen maakŋ gɛgɛrge tun kɛn maakŋ taa naaŋ Yaudge te eyo kici.» 12Tɛr Pɔl taaɗ Agripa ki ɔɔ: «Taa naan̰ se ɓo, ɓii kalaŋ magal jee tɛɗn sɛrkɛ Raage tu se, ɔlum ɔɔ m'ɓaa Damas ki gɛn ɓaa tɔkŋ jee kɛn aalga kaal maakɗe do Isa al‑Masi kɛn gɔtn naane se. 13Gaar Agripa, kɛn maam m'utu m'ɓaa ɓaa ɗoob ki jaay kaaɗa aan katara ki se, maam m'aak pooɗo raap lak lak iin̰o maakŋ raa ki. Ɔɔ pooɗn se, raap cir kaaɗa, ɓaaɗo deebje maam j'utu jee k'ɓaa ɓaa ɗoob ki tɛl se. 14Gɔtn se, naaje paac k'si naaŋ ki ɔɔ maam m'booy mind deba taaɗum ute taar naaŋ Yaudge ɔɔ: ‹Sɔl, Sɔl, naai 'dabarum tap ɓo taa ɗi? Kɛse naai 'dabar roi cɛrɛ aan gɔɔ maal kɛn ɔn̰ ron̰ mɛlin̰ dabarin̰ ute mɛmɛyɛ se.› 15Maam m'tɔnd mɛtin̰ m'ɔɔ: ‹Mɛluma, naai tap ɓo naŋa?› Ɔɔ Mɛljege tɛrlum ɔɔ: ‹Maam ɓo Isan kɛn naai 'lee dabarin̰ se. 16Num gɔti ki se, iin̰ ɗaar raan. Maam m'teeco naani ki se, m'bɛɛr m'ɔɔɗi taa am tɛɗn debm tɛɗn naabuma. Jaaki, m'teeciga naani ki naai aakumga ute kaami se, maam m'utu m'teec naani ki ɔɔ m'ai taaɗn nakgen kuuy daala. 17Yaudge ute jeegen Yaudge eyo kɛn maam m'ɔli gɔtɗe ki se, maam m'ai kaaj jiɗe ki. 18Maam m'ɔli gɔtɗe ki se taa aɗe kɔɔɗn kaamɗe 'kaaka. Ute naan̰ se jaay ɓo, naaɗe aɗe teecn̰ maakŋ gɔt kɛn ɔɔɗ se, ɔɔ aɗe ɓaa gɔt kɛn wɔɔrɔ. Ɔɔ naaɗe aɗe teecn̰ maakŋ ji Ɓubm sitange tu ɔɔ 'ɓaa gɔtn Raa ki taa Raa se aɗen tɔɔl kusin̰ɗege ɔɔ naaɗe kɔŋ bɛɗɗe ute jee Raagen salal se taa naaɗe aalga maakɗe do maam ki.› 19«Taa naan̰ se ɓo Gaar Agripa, nakŋ Raa teec naanum ki jaay taaɗum m'aakin̰ ute kaamum se, maam m'ɔŋ m'baate te eyo num m'tookga do ki. 20Gaŋ booyo deet deet se, maam m'taaɗo taar Raa jeege tun Damas ki ɔɔ jeege tun Jeruzalɛm ki ɔɔ m'taaɗ m'dɔɔɗo jeege tun taa naaŋ Yaudge tu paac ɔɔ tɛr m'taaɗɗega jeege tun Yaudge eyo se kici. M'taaɗɗen m'ɔɔ, k'tɛrl kiŋgɗe ɔɔ j'aal maakɗe do Raa ki ɔɔ k'tɛɗ nakgen jiga kɛn 'taaɗn jeege tu ɔɔ naaɗe se 'tɛrlga kiŋgɗe. 21Taa naan̰ se ɓo, Yaudgen kandum se ɔkum daan bɔɔr Ɓee Raa ki ɔɔ naaɗe je am tɔɔlɔ. 22Ute naan̰ se kic ɓo, bini jaaki, Raa utu bɔɔbum bɔɔbɔ ɔɔ maam m'utu m'taaɗ taaɗ taarin̰ kɛn Musa ute jee taaɗ taar teeco taar Raa ki do dɔkin̰a taaɗo ɔɔ 'tɛɗga num al‑Masi utu aɗe ɓaa se. Kɛse ɓo taar kɛn maam lee taaɗ naan jee j'aalɗen maak ki ute jee j'aalɗen maak ki ey kici. Kɛse ɓo taaruma, 23m'ɔɔ: al‑Masi se dabarga ɔɔ naan̰ ooyga ɔɔ maakŋ jeege tun ooyga kooy se, naan̰ ɓo debm kɛn duro deet daan yoge tu ɔɔ naan̰ ɓo debm kɛn wɔɔr gɔtɔ Yaudge tu ɔɔ jeege tun Yaudge eyo kici.» 24Kɛn Pɔl jaay utu taaɗ taaɗ mɛtn taarin̰ sum ɓo, Pɛstusn kɛn magal taa naaŋ gɔtn ese se uun mindin̰ raan ɗeekin̰ ɔɔ: «Ɓɛrɛ Pɔl, naai se debm dɛrlɛ ɔɔ jeel nakgen kɛn naai ɔk se, biga doi.» 25Gɔtn se Pɔl tɛrlin̰ ɔɔ: «Jaamus, maam se, dom bi te eyo. Taargen maam m'taaɗ se, taargen mɛt ki ɔɔ kɛn ute ɗoobin̰a. 26Ɔɔ Gaar Agripa se lɛ, nakgen deel se naan̰ 'jeel mɛtin̰a. Taa naan̰ se ɓo, maam m'taaɗ naanin̰ ki kic ɓo m'ɓeer ey se; naan̰ se maam m'jeele, nakgen maam m'taaɗ se lɛ, kɛn naan̰ jeel mɛtin̰ ey se gɔtɔ. Taa nakgen deel ɓɔrse ese se lɛ jeege paac booyin̰ga. 27Gaar Agripa, taar jee taaɗ taar teeco taar Raa ki taaɗo do dɔkin̰ se, tap ɓo naai 'took do ki la? Maam m'jeele, naai se 'tookŋ do taarɗege tu se.» 28Gɔtn se Gaar Agripa tɛrlin̰ ɔɔ: «Ute taari se, naai saap ɔɔ bin sum ɓo, naai 'naar am tɛɗum m'tɛɗn debm al‑Masi bin aa!» 29Pɔl tɛrlin̰ ɔɔ: «Kɛn ɓɔrse lɔ tɛɗga jaayo, maam se m'tɔnd mɛtn Raa. Naai ute jeegen ɓɔrse iŋg 'booyki taar maam m'iŋg m'taaɗsen se, m'je aki tɛɗn aan gɔɔ maama. Naɓo nakŋ maam m'je 'kaan dose ki ey se, zin̰zir kɛn k'dɔɔkŋ sum se sum.» 30Kɛn Pɔl jaay taaɗ naŋ taarin̰ sum se, gɔtn se Gaar Agripa, magal taa naaŋ gɔtn ese, Berenis, ɔɔ jee iŋg ute naaɗe gɔtn ese se, paac se iin̰ ɔn̰ gɔtn ese. 31Kɛn naaɗe jaay iik tɔɔk cɛɛs ki se, naaɗe taaɗ ute naapa ɔɔ: «Gaabm se lɛ, naan̰ tuj te ɗim kɛn an̰ kaasn jaay j'an̰ tɔɔlɔ lɔ j'an̰ kɔkŋ daŋgay ki eyo.» 32Gɔtn se, Agripa taaɗ Pɛstus ki ɔɔ: «Kɛn gaabm se jaay taaɗ te ɔɔ j'an̰ ɓaa gɔtn Sezar ki ey num, naai an̰ kɔɔɗn kɔlɔ.»

will be added

X\