Actes 25

1Kɛn Pɛstus jaay aan Sezare ki, tɛɗ ɓii mɔtɔ sum se, gɔtn se naan̰ ook ɓaa Jeruzalɛm ki. 2Kɛn naan̰ jaay aan Jeruzalɛm ki se, magal jee tɛɗn sɛrkɛ Raa ki ute magal Yaudge se, ɓaaɗo sakak Pɔl gɔtin̰ ki. Gɔtn se, naaɗe taaɗ dɔɔk taara, 3ɔɔ tɔnd mɛtin̰ ɔɔ: «Bɛɛki num, naaje k'je Pɔl se, ajensin̰ kɔn̰ aɗe ɓaa Jeruzalɛm ki ara.» Taa naaɗe se, oom koom Pɔl taa kɛn naan̰ jaay ɓaa ɓaa num, naaɗe an̰ tɔɔl ɗoob ki. 4Gaŋ gɔtn se, Pɛstus tɛrlɗen ɔɔ: «Pɔl se, utu daŋgay ki Sezare ki naane ɔɔ maam kic m'tɛɗga sum ɓo m'utu m'tɛrl naane. 5Ɔn̰ki magalsege kandum se 'ɓaa ute maam tɛlɛ. Ɔɔ kɛn gaabm se jaay tujga ɗim lɛ, amki ɓaa taaɗn mɛtin̰ naane.» 6Kɛn Pɛstus aan Jeruzalɛm ki se, naan̰ tɛɗo ɓii marta lɔ ɓii sik sum. Kɛn naan̰ jaay tɛrl ɓaa Sezare ki se, mɛtbeen̰ki sum ɓo, naan̰ ɓaa iŋg gɔtn kɔjn̰ bɔɔr ki ɔɔ ɔl k'ɓaa k'daŋo Pɔl. 7Kɛn Pɔl jaay aan gɔtn kɔjn̰ bɔɔr ki se, Yaudgen iin̰o Jeruzalɛm ki ɓaaɗo ute Pɛstus se, ɓaaɗo gurugin̰a ɔɔ baagin̰ tɔɔl taargen iŋg kus dɛna don̰ ki. Naɓo taarɗegen naaɗe taaɗ se, debm jaay kɔŋ taar mɛt kɛn an̰ kɔkŋ mindin̰ tap ɓo, gɔtɔ. 8Gaŋ Pɔl taaɗ mɛtn taarin̰ ɔɔ: «Maam se, m'tuj te Ko Taar kɛn Raa ɛɗo Yaudge tu se eyo, m'tuj te Ɓee Raa eyo ɔɔ Gaar magal iŋg Rɔm ki kɛn k'daŋin̰ Sezar se kic lɛ, m'tujin̰ te ɗim eyo.» 9Gaŋ Pɛstus je raapm maakŋ Yaudge se, taaɗ Pɔl ki ɔɔ: «Kɛn 'kookŋ ɓaa Jeruzalɛm ki jaay j'ai ɓaa kaakŋ mɛtn taari naanum ki se 'took la?» 10Gaŋ Pɔl tɛrlin̰ ɔɔ: «Aan gɔɔ maam m'ɓaaɗoga gɔtn kɔjn̰ bɔɔr kɛn gɛn Sezar ɗey se, maam m'je j'am kɔjn̰ bɔɔrɔ gɔtn ara. Taa Yaudge se lɛ, maam m'tujɗen te ɗim eyo aan gɔɔ kɛn naai kic 'jeelin̰ tak se. 11Ɗeere, kɛn maam jaay m'tujga ɗim lɔ tɛɗga nakŋ jaay aas tɔɔlum se, naan̰ se, maam m'tooko j'am tɔɔlɔ. Num gaŋ jee ɔkum mindum se lɛ, nakɗe mɛt ki eyo; bin se, nam tap ɓo am kɔŋ kɔkŋ kɔlum jiɗe ki eyo. Maam se, j'am ɓaa kɔjn̰ bɔɔrɔ naan Sezar ki.» 12Kɛn Pɛstus jaay booy taar se, gɔtn se naan̰ ɓaa taaɗ ute jeen̰ge, jaay ɓo ɓaaɗo tɛrl Pɔl ki ɔɔ: «Naai 'je j'ai kɔjn̰ bɔɔrɔ naan Sezar ki ɗey se, ɓɔrse maam m'ai kɔli 'ɓaa naan naan̰ ki.» 13Kɛn naaɗe aak mɛtn taar Pɔl jaay tɛɗ ɓii kandum se Pɛstus aan Sezare ki, gɔtn se Gaar Agripa ute gɛnaan̰ mɛnda, ron̰ Berenis, ɓaan̰o tɛɗn tɔɔsɛ. 14Aan gɔɔ naaɗe tiŋgga ɓii dɛna gɔtn ese se, ɓii kalaŋ Pɛstus taaɗin̰ mɛtn taar Pɔl se, ɔɔ ɗeekin̰ ɔɔ: «Kɛn Pɛliks ɓaa ɓaa se, naan̰ ɔn̰ga gaaba kalaŋ maakŋ daŋgay ki ara. 15Kaaɗ kɛn jaay maam m'iŋgo Jeruzalɛm ki se, magalgen gɛn jee tɛɗn sɛrkɛ Raage tu ute magal taa ɓee Yaudge se, ɓaaɗo sakakin̰ gɔtum ki ɔɔ ɗeekum ɔɔ: ‹Gaabm se ɔjin̰ bɔɔrɔ don̰ ki.› 16Ɔɔ maam m'tɛrlɗen m'ɔɔ: ‹Naaje Rɔmɛge se, deba se j'aak mɛtn taarin̰ jaayo. Taa jee ɔkin̰ mindin̰ se, aɗe ɓaa k'booy mɛtn taarɗe ɔɔ mɛtn taar naan̰ kici, ey num j'an̰ kɔŋ kɔjn̰ bɔɔr don̰ ki, bin sum eyo.› 17Gɔtn se, magal Yaudge se, iin̰ ɓaaɗo ute maama Sezare ki, ɔɔ maam kic m'tooɗ te bi do taar kɛn se eyo. Mɛtbeen̰ki sum ɓo, maam m'ɓaaɗo gɔtn kɔjn̰ bɔɔr ki ɔɔ m'ɔl k'daŋ k'ɓaano ute Pɔl. 18Kɛn jee kɛn ɔkin̰ mindin̰ jaay aan se, maam m'saap m'ɔɔ kaaɗ naane, naaɗe ɔkin̰ mindin̰ se do nakge tun kusin̰ kɛn naan̰ tɛɗa. Num gaŋ, do nakge tun kɛn naaɗe ɔkin̰ mindin̰ se, kɛn mɛt ki tap ɓo, maam m'ɔŋ te eyo. 19Gaŋ maam m'ɔŋɗe se, naaɗe naaj naaj ɓo do ɗoobm naaɗe Yaudge tu ɔɔ do gaab ki kalaŋ k'daŋin̰ Isa. Gaabm ese se ooyga kooyo, naɓo gaŋ Pɔl ɔɔ gaabm se utu iŋg zɛɛrɛ daayum. 20Taa naan̰ se ɓo, taargen bin se, maam se m'jeel taaɗ mɛtin̰ eyo. Naan̰ kɛn se ɓo, maam m'taaɗ Pɔl ki m'ɔɔ n̰'je num n̰'ɓaa Jeruzalɛm ki j'an̰ ɓaa kaakŋ mɛtn taarin̰ naane. 21Gaŋ Pɔl baate tookŋ do taar kɛn se. Naan̰ ɗeek ɔɔ: ‹Naan̰ se, j'an̰ ɓaa kɔl gɔtn Sezar ki se ɓo an̰ ɓaa kaakŋ mɛtn taarin̰a.› Taa naan̰ se ɓo, maam m'ɔl asgarumge utu bɔɔbin̰ maakŋ daŋgay ki, bini ɓii kɛn m'an̰ kɔlin̰ gɔtn Sezar ki.» 22Gɔtn se, Gaar Agripa taaɗ Pɛstus ki ɔɔ: «Gaabm se, maam kic m'je booy mɛtn taarin̰a.» Ɔɔ Pɛstus tɛrlin̰ ɔɔ: «Kɛse jiga. Mɛtbeeki sum ɓo, naai utu 'booy mɛtn taarin̰a.» 23Mɛtbeen̰ki se, Gaar Agripa ute gɛnaan̰ mɛnda ron̰ Berenis, naaɗe tuso kal gaarin̰ge ɔɔ ɓaaɗo ute magal asgarge ute magalgen gɛn maakŋ gɛgɛr gɔtn ese. Naaɗe ɓaaɗo ɛnd maakŋ ɓee kɛn jeege lee tusn se. Gɔtn se, Pɛstus ɔl k'daŋ k'ɓaano ute Pɔl. 24Ɔɔ Pɛstus ɛɛp taarin̰ ɔɔ: «Gaar Agripa ɔɔ naasen iŋgki ute naaje maakŋ ɓee ki ara ki paac, aakki, kɛse ɓo gaabm se, Yaudge ute dɛnɗe ɓaaɗo ɔŋum Jeruzalɛm ki bini k'ɓaaɗo Sezare ki ara. Naaɗe taaɗum mɛtn taar gaabm se ɔɔ tɔɔɗ tɔɔy ɔɔ: ‹Gaabm se, k'tɔɔlin̰ naatn!› 25Ɔɔ kɛn maam jaay m'booy mɛtn taarin̰ se, m'ɔŋin̰ naan̰ se tuj te ɗim jaay 'kaasn j'ansin̰ tɔɔl ro ki eyo. Num gaŋ naan̰ mala taaɗ ɔɔ j'ansin̰ ɓaa naan Gaar magal kɛn iŋg Rɔm ki ɗey se. Taa naan̰ se ɓo, maam m'je m'an̰ kɔl gɔtn naane. 26Num maam se, taar m'kɔŋ jaay m'raaŋ Gaar magal kɛn iŋg Rɔm ki se, m'ɔk eyo. Taa naan̰ se ɓo, maam m'ɔkŋ m'ɓaansin̰o naanse ki ɔɔ kɛn tap tap se, naan naai Agripa ki, taa gaabm se jaay 'booyin̰kiga mɛtn taarin̰ num. Bin sum ɓo, amki kɔŋ mɛtn taar kɛn maam m'raaŋ Gaar magal kɛn iŋg Rɔm ki se. 27Ey num, kɛn debm daŋgay jaay j'ɔŋ te nakŋ kɛn naan̰ tuj te ey se, j'an̰ kɔkŋ kɔl Rɔm ki j'ɔɔ ɗi?»

will be added

X\