Actes 24

1Kɛn Pɔl aan Sezare ki jaay tɛɗ ɓii mii se, naan̰ kɛn se, Ananias kɛn magal jee tɛɗn sɛrkɛ Raage tu ute magal taa ɓee Yaudge kandum se, naaɗe ɔko gaaba kalaŋ ron̰ Tartɛlus. Ɔɔ gaabm se jeel kɔjn̰ bɔɔrɔ k'ɓaaɗo tɛlɛ Sezare ki. Gɔtn se, naaɗe sakak Pɔl gɔtn magal kɛn taa naaŋ Jude ki se. 2Kɛn naaɗe aan se, magal taa naaŋ kɛn gɔtn ese ɔl k'daŋo Pɔl ɔɔ gɔtn ese sum ɓo, Tartɛlus se, baagin̰ kɔk mindin̰a. Naan magal taa naaŋ kɛn gɔtn ese, naan̰ taaɗ ɔɔ: «Jaamus, barka ute naai jaay ɓo ɓɔrse naaŋje ɗaap se. Ɔɔ ute mɛtɛki se sum ɓo, ɓɔrse naai 'noogjen j'iŋg lapia ute maraadje se. 3Maakŋ naaŋje ki se, gɔtɔ ɓaa se paac daayum naaje k'tɔɔmi taa bɛɛ kɛn naai tɛɗjen se. 4Ɓɔrse se, maam m'je m'ai tujn̰ naabi eyo, num 'mooyje uɗ bi do mɛtn taar kɛn naaje j'ai taaɗ se. 5Gaabm ese se, naaje j'ɔŋin̰ naan̰ debm jig eyo. Naan̰ se ɓo, kɛn lee ɛc Yaudgen gɔtɔ ɓaa se paac ɔɔ jee uun ɗoobm kɔɗ Nazarɛt se lɛ, naan̰ ɓo bubɗe. 6Ey num, naan̰ ɓo je an tujn̰ te Ɓee Raa se kici. [Taa naan̰ se ɓo, naaje k'j'ɔkin̰o ɔɔ k'je j'an̰ kɔjn̰ bɔɔrɔ don̰ ki aan gɔɔ kɛn Ko Taar Raaje taaɗjen ro ki. 7Gaŋ gɔtn se, bubm asgarge ɓaaɗo ute asgarin̰ge ɔɔɗin̰ ute taa tɔɔg jije ki. 8Naan̰ taaɗjen ɔɔ debm jaay je kɔkŋ mind Pɔl num aɗe ɓaa gɔti ki.] Anum, Jaamus, naai mala ɓo 'tɔnd mɛtn gaabm se. Ute taar kɛn naan̰ ai taaɗ se sum ɓo, naai 'jeel taar kɛn naaje k'taaɗ ron̰ ki se, taar mɛt ki.» 9Yaudgen ɓaaɗo ute naan̰ se kic took do taar kɛn se ɔɔ taaɗ ɔɔ: «Ɗeere, taar naan̰ taaɗ se, mɛt ki.» 10Gɔtn se magal taa naaŋ Jude ki se, tɛɗ ute jin̰ Pɔl ki ɔɔ n̰'taaɗa. Naan̰ kɛn se, Pɔl ɛɛp taarin̰ ɔɔ: «Jaamus, m'jeele gɔtn naai baag kɔjn̰ bɔɔrɔ do Yaudge tu sum se, ɔkga ɓaara dɛna; taa naan̰ se ɓo, maam m'ɓeer eyo kɛn m'ai taaɗn mɛtn taarum se. 11Gɔtn m'ɓaaɗo Jeruzalɛm ki gɛn keem Raa daan bɔɔr Ɓee Raa ki sum se, aas te ɓii sik‑kaar‑di eyo. Taarum m'taaɗi se, kɛn naai 'tuur mɛtin̰ kic ɓo an̰ kɔŋin̰ ɗoobin̰ ki. 12Daan bɔɔr Ɓee Raa ki lɔ maakŋ ɓeege tun Yaudge lee tusn maak ki, ey lɛ maakŋ gɛgɛr ki gɔtn kɛn jeege lee tusn se kic ɓo, naaɗe, ɓii kalaŋ, ɔŋum te naaj naaj te jeege eyo ɔɔ m'ɔɔs kɔɔs mɛtn jeege eyo. 13Mɛtn taar naaɗe jaay ɔkum mindum ro ki se, naaɗe aisin̰ kɔŋ taaɗn mɛtin̰ tal tal eyo. 14«'Booyo m'ai taaɗa: nakŋ maam m'jeel se, maam se m'uun ɗoobm Raa bubjege ute ɗoobm kɛn naaɗe aakin̰ aan gɔɔ ɗoobm se ɗoobm jig eyo. Ey num, maam kic m'aal maakum do taarge tun k'raaŋin̰o maakŋ Ko Taar Raa ki ute kɛngen jee taaɗ taar teeco taar Raa ki raaŋo do dɔkin̰ se kici. 15Maam se, m'ɔnd dom do Raa ki ɔɔ do mɛtn taar kɛn Raa utu dur jeege daan yoge tu jee kɛn tɛɗ naka ute ɗoobin̰a ɔɔ kɛngen tɛɗ naka ute ɗoobin̰ eyo aan gɔɔ naaɗe kici. 16Taa naan̰ se ɓo, daayum maam m'aay kaamuma m'lee naan Raa ki ɔɔ naan jeege tu se ute maakŋ kalaŋ. 17Maam se, m'ɔkga ɓaara dɛna m'ɓaaɗo te Jeruzalɛm ki eyo. Num, kɛn ɓɔrse jaay m'ɓaaɗo se, m'ɓaano ute nakŋ noogŋ jee daaygen maakŋ naaŋum ki ɔɔ m'ɓaano ute sɛrkɛ Raa ki kici. 18Naan̰ kɛn se, naaɗe ɔŋum daan bɔɔr Ɓee Raa ki m'tug m'ɗaap ɗaap rom naan Raa ki. Kaaɗ kɛn se lɛ, jeege tus te cɛɛm ki eyo ɔɔ jeege lɛ ul te taar ey kici. 19Gaŋ Yaudgen iin̰o taa naaŋ Azi ki se ɓo, jee mɛtin̰ge ɓaaɗo ɔŋuma. Kɛn bɛɛn̰ ki se, kɛn maam jaay m'tujga ɗim num naaɗe se ɓo, jee kɛn aɗe ɓaa naani ki am kɔkŋ minduma. 20Ey lɛ, jee kɛn ɓaaɗo naan naai ki ara ki se, kaaɗ kɛn jaay naaɗe ɔkuma mindum naan Yaudge tun jee kaakŋ mɛtn taarge se, k'taaɗum nakŋ kɛn maam m'tujga se. 21Nakŋ kɛn maam m'jeel se, m'taaɗga ɓo taara kalaŋ: kaaɗ kɛn maam m'ɗaaro daan naaɗe ki se, maam m'uuno mindum raan ɔɔ m'ɗeekɗeno m'ɔɔ, jaaki jaay naase 'je amki kɔjn̰ bɔɔrɔ dom ki se, taa maam m'aalga kaal maakum do Raa kɛn utu dur jeege daan yoge tu se!» 22Pɛliksn magal taa naaŋ Jude se, Ɗoobm Isa sum se, naan̰ jeel mɛtin̰a. Taa naan se ɓo, naan̰ ɗeekɗen ɔɔ: «'Booyki, ɔn̰ki Lisiasn kɛn bubm asgarge se jaay ɓaaɗo gɔtn ara ki sum ɓo, maam m'asen kaakŋ mɛtn taarse se.» 23Gɔtn se Pɛliks ɔl magal asgargen naan̰ ɔn̰in̰ Pɔl kaam jin̰ se, ɔɔ n̰'ɓaa n̰'bɔɔb Pɔl se maakŋ daŋgay ki naɓo j'ɔn̰in̰ ɗoobo ɔɔ j'ɔn̰te gaasn jeen̰ge taa ɓaaɗo an̰ lee kaaka ɔɔ an̰ kaakŋ don̰ ki. 24Kɛn tɛɗ ɓii kandum se, Pɛliks ute mɛndin̰ Drusil kɛn mɛnd Yaud se, ɔl k'daŋo Pɔl, taa naaɗe se, je Pɔl aɗen taaɗn mɛtn taar ɗoobm al‑Masi, Isa. 25Num gaŋ, kaaɗ kɛn Pɔl jaay baagɗen taaɗn ɔɔ: «Bɛɛki num, debkilimi se, 'tɛɗ nakŋ ute ɗoobin̰a naan Raa ki ɔɔ bɔɔbm ron̰a, taa Raa se, ɓii kalaŋ, utu kɔjn̰ bɔɔrɔ do jeege tu.» Kɛn Pɛliks jaay booy taar se, nirlin̰ ɓaa teece. Gɔtn se, naan̰ ɗeekin̰ ɔɔ: «Ɓɔrse se, iin̰ 'ɓaa gɔti ki, 'tɛɗga jaay sɔm, maam m'aio daŋa.» 26Naan̰ saap ɔɔ kaaɗn naane Pɔl an̰ kɛɗn gurs lɛ ɗaam, taa naan̰ se ɓo, naan̰ daŋ ɗɔɔlin̰ cɔk cɔk gɛn kɛɛs ute naan̰ se. 27Kɛn Pɛliks jaay tɛɗ ɓaara di se, Porsius Pɛstus se k'ɓaaɗo j'ɔlin̰ gɔɔn̰ ki. Aan gɔɔ Pɛliks je raapm maakŋ Yaudge se, naan̰ ɓaa ɓaa se ɔn̰ Pɔl tiŋg maakŋ daŋgay ki gɔtin̰ ki.

will be added

X\