Actes 23

1Kɛn Pɔl jaay aan naan Yaudge tun jee kaakŋ mɛtn taarge se, naan̰ ɔndɗen kaama tak ɔɔ ɗeekɗen ɔɔ: «Gɛnaamge, maam se, leem kɛn m'lee naan Raa ki bini aan jaaki se, maam m'jeel maakum ki, maam se m'tuj te ɗim eyo.» 2Gaŋ Ananias kɛn magal jee tɛɗn sɛrkɛ Raa ki se, taaɗ jeege tun kɛn cɛɛ Pɔl ki se ɔɔ: «Pɔl se, k'j'ɔndin̰ taarin̰ ki.» 3Gɔtn se Pɔl tɛrlin̰ ɔɔ: «Naai kɛn tec aan gɔɔ durdur j'ɔlin̰ ron̰ raap raap se, Raa utu ai kɔnd naai. Naai ɓo debm aal Ko Taar Raa maak ki eyo ɔɔ gɔtn ese se 'je am kɔjn̰ bɔɔrɔ dom ki ute Ko Taar Raa ɔɔ ɔl ɔɔ k'j'ɔnduma.» 4Gaŋ jee iŋg cɛɛ Pɔl ki se, taaɗin̰ ɔɔ: «Naai se ɓo, 'naaj magal debm tɛɗ sɛrkɛ Raa ki tu ne?» 5Gɔtn se, Pɔl tɛrlɗen ɔɔ: «Gɛnaamge, kɛn gaabm se jaay magal debm tɛɗ sɛrkɛ Raa ki se, maam m'jeel eyo. Ey num, Kitap se taaɗga ɔɔ: Magal jee taa naaŋi ki se ɔn̰te naajin̰a.» 6Yaudgen jee kaakŋ mɛtn taargen tus se, Pɔl jeel maakɗe ki se, jee mɛtin̰ge se Sadusege ɔɔ kɛngen mɛtin̰ge se lɛ Parizige. Taa naan̰ se ɓo, naan̰ taaɗɗen makɔn̰ɔ ɔɔ: «Gɛnaamge, maam se m'kɔɗ Parizi ɔɔ bubum kic ɓo Parizi, naɓo kɛn ɔl k'j'ɔk k'ɓaansumo gɔtn kɔjn̰ bɔɔr ki se, taa maam se m'ɔnd dom do Raa kɛn utu dur jeege daan yoge tu se.» 7Kɛn naaɗe jaay booy Pɔl taaɗɗen taar se, Sadusege ute Parizige se baag naajn̰ ute naapa ɔɔ ɔl jee dɛngen tus gɔtn ese se, ɓaa gaaŋ naapa gɔtɔ kaam dio. 8Taa Sadusege se saap ɔɔ jee ooyga kooy se lɛ, 'kɔŋ dur ey sum ɔɔ kɔɗn Raage ute sitange se kic ɓo naaɗe gɔtɔ; gaŋ Parizige se paac tooko ɔɔ nakgen se utu. 9Gɔtn se, naaɗe iin̰ ul taara gajalaŋ. Ɔɔ maakŋ Parizige tu se, jee mɛtin̰ge se jee jeel taaɗn tɔɔkŋ mɛtn Ko Taar Raage, naaɗe se iin̰ taaɗ makɔn̰ ɔɔ: «Gaabm se, j'ɔn̰te 'kɔkin̰ki mindin̰a taa naan̰ lɛ tuj te ɗim eyo. Kaaɗn naane kɔɗn Raa gam lɔ ɗim gam ɓo, taaɗin̰ga lɛ ɗaam.» 10Aan gɔɔ naaɗe ul taar gajalaŋ ɔn̰ ey se, ɔl bubm asgarge se kic ɓo ɓeere ɓaa ɔkin̰a ɔɔ sɔm naaɗe an tɔɔl ute Pɔl se cɛrɛ. Taa naan̰ se ɓo naan̰ taaɗ asgarge tu ɔɔ: «'Bɔɔy 'ɓaaki maakŋ jeege tun ese, ɔɔ Pɔl se ɔk ɓaansin̰kiro maakŋ ɓee kɛn tɔɔgŋ kɛn asgarge lee toom maak ki se ara.» 11Gaŋ maakŋ nɔɔr kɛn ese se sum ɓo, Mɛljege ɓaaɗo teec naan Pɔl ki ɔɔ ɗeekin̰ ɔɔ: «Aay kaami! Aan gɔɔ naai 'taaɗoga taa maama jeege tun Jeruzalɛm ki se, bɛɛki num, 'ɓaa taaɗn saaɗum jeege tun maakŋ gɛgɛr kɛn Rɔm ki kici.» 12Mɛtbeen̰ki se, Yaudgen mɛtin̰ge dɔɔk taarɗe ɔɔ naam roɗe naan Raa ki ɔɔ: «Pɔl se, jaay k'tɔɔlin̰ te ey num, naaje se j'kɔs eyo ɔɔ j'kaay eyo.» 13Jee jaay naam roɗe naan Raa ki taa taar se, naaɗe se cir gaabge si‑sɔɔ. 14Jee se ɓaa ɔŋ magal jee tɛɗn sɛrkɛ Raage tu ute magal taa ɓee Yaudge ɔɔ ɗeekɗen ɔɔ: «Naaje se k'naamga naam roje naan Raa ki, kɛn Pɔl se jaay k'tɔɔlin̰ te ey num, naaje se j'kɔs eyo ɔɔ j'kaay eyo. 15Bin se, 'ɓaaki ute ro jee kaakŋ mɛtn taarge se, 'ɓaa ɔŋki magal asgarge se 'taaɗin̰ki ɔɔki n̰'ɔk n̰'ɓaano ute Pɔl gɔtn kɔjn̰ bɔɔr ki ara. Naase se 'tɛɗki raay aan gɔɔ jee kɛn je kaakŋ kɔkŋ mɛtn taarin̰ jiga. Gaŋ naaje se lɛ, k'ɗaapga ɗaap roje kɔr naan̰ 'kaan gɔtse ki ey sum ɓo, naaje j'an̰ tɔɔlɔ.» 16Num gaŋ, taar se ɓaa ooc bi goon gɛnaa Pɔl kɛn mɛnda. Naan̰ naar iin̰ ɓee kɛn tɔɔgŋ kɛn asgarge lee toom maak ki se ɔɔ ɛnd ɔŋ Pɔl se ɔɔ aalin̰ bin̰ ki. 17Maakŋ magal asgarge tu se, Pɔl daŋo deb kalaŋ ɔɔ ɗeekin̰ ɔɔ: «Goon kɔɗn ese se, ɔk ɓaansin̰ gɔtn bubm asgarge tu, taa naan̰ se ɔk taara je an̰ taaɗa.» 18Gɔtn se, magal asgarge se ɔk ɓaansin̰o gɔtn bubm asgarge tu se, ɔɔ ɗeek bubm asgarge tu ɔɔ: «Pɔl debm daŋgay se ɓo, daŋumo ɔɔ taaɗum ɔɔ 'ɓaano ute goon kɔɗn ese se, taa naan̰ se ɔk taara je ai taaɗa.» 19Gɔtn se, bubm asgarge se ɔk goon kɔɗɔ se jin̰ ki ɔɔ iik tɔɔkin̰sin̰ cɛɛs ki ɔɔ tɔnd mɛtin̰ ɔɔ: «Taari naai 'je am taaɗ se tap ɓo, taar ɗi?» 20Anum, goon kɔɗɔ se taaɗin̰ mɛtn taarin̰ ɗeekin̰ ɔɔ: «Maam m'booy Yaudge se, dɔɔkga taarɗe ɔɔ utu 'tɔnd mɛti. Taa Pɔl se, naaɗe je ɔɔ mɛtbeeki se, naai ansin̰ ɓaa naan Yaudge tun jee kaakŋ mɛtn taarge ɔɔ naaɗe se lɛ, 'tɛɗn raay aan gɔɔ jee kɛn je kaakŋ kɔkŋ mɛtn taarin̰ jiga se. 21Num gaŋ, taar naaɗe se ɔn̰te kuunu taa gaabge cir si‑sɔɔ se oom koom Pɔl, taa naaɗe naamga naam roɗe naan Raa ki ɔɔ kɛn naaɗe jaay tɔɔlin̰ te ey num, naaɗe se 'kɔs eyo ɔɔ 'kaay eyo. Ɔɔ kɛn ɔɔp se, naaɗe booy kɛn naai aɗen tookŋ taarɗe sum.» 22Kɛn goon kɔɗɔ se jaay taaɗ mɛtn taarin̰ aas se, bubm asgarge se taaɗin̰ ɔɔ: «Mɛtn taar kɛn naai taaɗum mɛtin̰ se, ɔn̰te taaɗn nam ki.» Jaay ɓo, naan̰ ɔlin̰ ɓaao. 23Gɔtn se, bubm asgarge daŋo maakŋ magal asgarge tu se, gaabge dio ɗeekɗen ɔɔ: «'Daŋ 'tuskiro asgarge kaar‑dio, jee sɛndge si‑cili ɔɔ asgargen lee ute bɔɔrɗe se kic ɓo kaar‑dio. 'Ɗaapki rose, taa kaaɗn kɛɛski se, naase aki ɓaa maakŋ gɛgɛr kɛn Sezare ki. 24'Ɗaapki sɛndgen kɛn Pɔl 'kookŋ kiŋg do ki se kici, taa ansin̰ki ɓaa gɔtn Pɛliks kɛn magal taa naaŋ Jude ki se ute lapia.» 25Gɔtn se, naan̰ raaŋin̰ maktub ɔɔ maakŋ maktubin̰ ki se, naan̰ taaɗin̰ ɔɔ: 26Kɛse maam Klɔdius Lisias ɓo m'raaŋi maktubm ese. Maam m'raaŋ m'ɔli tɔɔsɛ naai Pɛliks, kɛn magal taa naaŋ Jude ki. 27Maam m'raaŋi se taa gaabm kɛn maam m'ɔk m'ɔlin̰ gɔti ki se, ey num Yaudge je an̰ tɔɔlɔ. Naɓo, kɛn maam m'booy jaay j'ɔɔ gaabm se kɔɗ Rɔmɛ se, taa naan̰ se, maam m'ɓaaɗo ute dɔɔl asgarumge jaay ɓo m'ɔk m'ɔɔɗin̰o jiɗe ki. 28Aan gɔɔ maam m'je m'jeel mɛtn taar kɛn Yaudge ɔkin̰ mindin̰ se, maam m'ɔkŋ ɓaansin̰o naan jeege tun lee aakɗen mɛtn taarɗege se. 29Kɛn maam jaay m'booy mɛtn taarɗe se, m'ɔŋin̰ gaabm se naaɗe ɔkin̰ mindin̰ taa Ko Taar Raaɗe. Gaŋ gɛn naajege num, gaabm se tɛɗ te ɗim jaay 'kaasn j'ansin̰ tɔɔlɔ, ey lɛ j'ansin̰ kɔl daŋgay ki se eyo. 30Tɛr k'j'ɔɔjum j'ɔɔ Yaudge se dɔɔkga taarɗe gɛn kutin̰a. Taa naan̰ se ɓo, maam m'naar m'ɔlin̰ gɔti ki, ɔɔ jee kɛn ɔkin̰ mindin̰ se lɛ, kɛn naaɗe ɔk taar ɗim num ɔn̰ɗe naaɗe ai ɓaa taaɗn mɛtin̰ naai ki. 31Gɔtn ese sum ɓo, asgarge iin̰ tɛɗ nakŋ kɛn bubm asgarge taaɗɗesin̰ se. Naaɗe ɔk Pɔl ɔɔ maakŋ nɔɔr kɛn ese sum ɓo, naaɗe uun bɔɔy ɓaansin̰ gɔtɔ kaam kalaŋ k'daŋin̰ Antipatris. 32Mɛtbeen̰ki se, asgargen ɓaa ute jɛɗege se, ɔk tɛrl ɓaaɗo ɓee kɛn tɔɔgŋ kɛn naaɗe lee toom maak ki se, ɔɔp jee sɛndge kalɗe ki sum ɓo, ɓaan ute Pɔl. 33Kɛn jee se jaay aan maakŋ gɛgɛr kɛn Sezare ki se, maktubm kɛn bubm asgarge raaŋ ɛɗɗesin̰ jiɗe ki se, naaɗe ɛɗin̰ ji magal kɛn taa naaŋ Jude kɛn iŋg gɔtn ese se. Ɔɔ Pɔl se kic ɓo, naaɗe ɛɗin̰sin̰ kaam jin̰a. 34Kɛn magal taa naaŋ Jude ki jaay dooy maktubm se aas se, naan̰ tɔnd mɛtn Pɔl ɔɔ: «Naai tap ɓo kɔɗ ɗi?» Pɔl tɛrlin̰ ɔɔ: «Maam se, m'iin̰o taa naaŋ kɛn Silisi ki.» 35Ɔɔ kɛn magal taa naaŋ Jude ki jaay booy taar Pɔl se, naan̰ ɗeekin̰ ɔɔ: «Jee ɔkki mindi se jaay ɓaaɗoga sum ɓo, maam m'utu m'booy mɛtn taari se.» Gɔtn se, naan̰ ɓaa ɔlin̰ k'bɔɔbin̰ maakŋ ɓee kɛn Ɛrɔd iin̰in̰ se.

will be added

X\