1 Pɔl taaɗɗen ɔɔ: «Bubumge ute gɛnaamge, 'booyki ɓɔrse maam m'je m'asen taaɗn mɛtn taaruma.» 2 Kɛn naaɗe jaay booy Pɔl taaɗɗen ute taar naaŋ naaɗe Yaudge se, gɔtn se naaɗe tɛr do dil cir daala. Naan̰ kɛn se, naan̰ taaɗɗen ɔɔ: 3 «Maam kic m'kɔɗ Yaud, naɓo j'oojum maakŋ gɛgɛr kɛn Tars kɛn taa naaŋ Silisi ki. Gaŋ maam se, m'teep maakŋ gɛgɛr kɛn Jeruzalɛm ki ara ɔɔ gɔtn ara ɓo, gɔtn kɛn Gamaliɛl dooyumo ute ɗoobin̰a Ko Taar kɛn Raa ɛɗo bubjege tu se. Taa naan̰ se ɓo, maam m'ɔk taar Raa se ɔɔn̰ɔ, aan gɔɔ gɛn naasen ɓɔrse utu iŋgki do ki se kici. 4 Jee kɛn Ɗoobm Isa ki se, maam m'dabarɗeno bini aan gɔɔ m'aɗenoga tɔɔlɔ. Ɔɔ mɛndge ute gaabge se, maam m'ɔl k'dɔɔkɗeno ute zin̰ziri ɔɔ m'ɓaaɗo m'ɔmbɗen daŋgay ki. 5 Magal jee tɛɗn sɛrkɛ Raage tu ute magal taa ɓee Yaudge se kic ɓo, jeele nakŋ kɛn maam m'tɛɗo se. Naaɗe se ɓo, kɛn ɛɗumo maktub jim ki, taa m'ɓaa kɛɗn Yaudge tun Damas ki. Ute naan̰ se ɓo, jee kɛn aalga kaal maakɗe do Isa al‑Masi kɛn gɔtn naane se, m'aɗen ɓaa tɔkŋ dɔɔkŋ ute zin̰ziri ɔɔ m'anɗeno ɓaa Jeruzalɛm ki taa j'aɗen dabara.» 6 «Kɛn maam ɓaa ɓaa ɗoob ki jaay, kaaɗa aan gɔɔr ute katara se, naan̰ kɛn se, maam m'aanga gɔɔr ute Damas. Gaŋ gɔtn ese sum ɓo, m'naar m'aak pooɗo iin̰o maakŋ raa ki raap lak lak ɓaaɗo deebum bat. 7 Gɔtn se, maam m'aal m'ooc naaŋ ki ɔɔ m'booy mind deba daŋum ɔɔ: ‹Sɔl, Sɔl, naai 'tap ɓo dabarum bin se, gɛn ɗi?› 8 Maam m'tɔnd mɛtin̰ m'ɔɔ: ‹Mɛluma, naai tap ɓo naŋa?› Gaŋ mind debm ese se tɛrlum ɔɔ: ‹Maam ɓo Isan, kɔɗ Nazarɛtn kɛn naai 'lee 'dabarin̰ se.› 9 Gaŋ jeegen ɓaa ɓaa ute maam se, naaɗe aak pooɗn kɛn iin̰o maakŋ raa ki raap lak lak se sum, ey num mind debm kɛn taaɗ ute maam se, naaɗe booy te eyo. 10 Gɔtn se, maam m'taaɗin̰ m'ɔɔ: ‹Mɛluma, maam tap ɓo m'tɛɗn rom m'ɔɔ ɗi?› Ɔɔ Mɛljege tɛrlum ɔɔ: ‹Iin̰ 'ɓaa maakŋ gɛgɛr kɛn Damas ki ɔɔ gɔtn naane se ɓo, j'ai ɓaa taaɗn nakgen paacn̰ kɛn Raa je ɔɔ naai an̰sin̰ tɛɗ se.› 11 Gaŋ pooɗn kɛn iin̰o maakŋ raa ki raap lak lak jaay ɓaaɗo deebum se, tɛɗum maam m'ɔŋ m'aak eyo. Taa naan̰ se ɓo, jeemgen k'ɓaa tɛl se, ɔkum jim ki, jaay ɓo tɔɔɗ ɓaansum Damas ki. 12 «Maakŋ gɛgɛr kɛn Damas ki se, ɔk gaaba kalaŋ ron̰ Ananias ɔɔ gaabm se, ɔk taar Raa se ɔɔn̰ɔ, ɔɔ Ko Taar kɛn Raa ɛɗo Musa ki, paac se, naan̰ tɛɗin̰ ute ɗoobin̰a. Gaabm se, Yaudgen iŋg gɔtn ese paac tɔɔmin̰a. 13 Gɔtn se, naan̰ ɓaaɗo ɔŋuma ɔɔ ɗeekum ɔɔ: ‹Sɔl, gɛnaama, ɔn̰ kaami se 'kɔɔɗn kaaka!› Ɔɔ gɔtn ese sum ɓo, kaamum naar ɔɔɗ aak gɔtin̰ ki ɔɔ Ananias se lɛ, maam m'aakin̰ tal tal. 14 Tɛr naan̰ taaɗum ɔɔ: ‹Sɔl, naai se, Raa gɛn bubjege ɓo bɛɛr ɔɔɗio se kaaɗ kɛn j'ooji te ey ɓɔrtɔ, taa naai 'jeel nakŋ kɛn tɔɔlin̰ naan̰ ki ɔɔ Debm Daan ki se, naai utu an̰ kaakŋ ute kaami ɔɔ 'booy naan̰ ai taaɗn ute taarin̰ mala. 15 Taa naan̰ se ɓo, do nakge tun naai aako ute kaami ɔɔ booyo ute bi se, naai 'taaɗin̰ jeege tu paac. 16 Num ɓɔrse tap ɓo, naai 'booy ɗi daala? Iin̰i, ɔn̰ j'ai batizi ɔɔ tɔnd mɛtn Isa se, taa ai tɔɔl kusin̰ige se naatn.›» 17 «Kɛn maam jaay m'ɔk tɛrl m'ɓaa Jeruzalɛm ki se, naan̰ kɛn se, ɓii kalaŋ maam m'ɓaa daan bɔɔr Ɓee Raa ki gɛn keem Raa se m'aak ne ɗim teeco naanum ki. 18 Gɔtn se, maam m'aak Mɛljege Isa ɔɔ naan̰ ɗeekum ɔɔ: ‹'Naar 'teec ɔn̰ Jeruzalɛm se naatn kɛskɛ, taa jee gɔtn ese lɛ, naaɗe kɔŋ took eyo do nakge tun naai aɗen taaɗn taa maam se.› 19 Gaŋ maam m'tɛrlin̰ m'ɔɔ: ‹Mɛluma, kaaɗn kɛn maam m'lee m'tɔko jee aalga kaal maakɗe do naai ki maakŋ ɓeege tun Yaudge lee tus maak ki se, jaay m'ɔl k'tɔndɗeno ɔɔ j'ɔmbɗeno maakŋ daŋgay ki se, nakŋ se paac, naaɗe jeele. 20 Gɔtn kɛn naaɗe tɔɔlo debm saaɗn naai Etien se kic ɓo, maam m'utu ɔɔ nakŋ naaɗe tɛɗ se kic ɓo, maam m'tooko ute naaɗe. Naan̰ kɛn se, jee tɔɔlin̰ge se, maam ɓo m'debm bɔɔbm kalɗege.› 21 Gaŋ Mɛljege ɗeekum ɔɔ: ‹Ute naan̰ se kic iin̰ 'ɓaa; maam se m'je m'ai kɔli dɔkɔ maakŋ jeege tun Yaudge eyo.›» 22 Yaudge se iŋg booy taar Pɔl bini aan do taar kɛn jaay naan̰ ɗeek ɔɔ: «Mɛljege ɗeekum ɔɔ: ‹maam m'ai kɔli gɔtn jeege tun Yaudge eyo›» ɔɔ do taar kɛn se, naaɗe ɗoob ɔɔy makɔn̰ ɔɔ: «Gaabm se, 'tɔɔlin̰ki naatn! Debm bin se ɔn̰te kɔn̰in̰ki 'kiŋg do naaŋ ki!» 23 Gɔtn se, naaɗe tɔɔy dɔɔk taara ɔɔ tɔɔɗn ute kal magalɗege jaay tɔndin̰ naaŋ ki ɔɔɗ kuɗu putur putur. 24 Ɔɔ kɛn bubm asgar Rɔmɛge jaay aak bin se, naan̰ ɔl ɔɔ k'j'ɔk k'ɓaano ute Pɔl se maakŋ ɓee kɛn tɔɔgŋ kɛn asgarge lee toom maak ki, ɔɔ naan̰ je ɔɔ j'an̰ kɔndin̰ ute mɛɛjɛ taa bin se naan̰ 'taaɗn nakŋ kɛn naan̰ tɛɗ jaay ɓo ɔl jeege tɔɔɗ tɔɔyin̰ mɛtin̰ ki se. 25 Gɔtn se, naan̰ ɔl ɔɔ Pɔl se k'dɔɔkin̰a, gaŋ Pɔl taaɗ magal asgarge tun cɛɛn̰ ki ɔɔ: «Kɔɗ Rɔmɛ jaay j'aak te mɛtn taarin̰ ey sum ɓo, naase se ɔkki ɗoobm kɛn an̰ki tɔnd ute mɛɛjɛ ne?» 26 Kɛn magal asgargen gɔtn ese jaay booy taar se, naan̰ ɓaa taaɗ bubm asgarge tu ɔɔ: «Kɛse naai 'je tɛɗn ɗi bini, ɓɛrɛ, gaabm se lɛ, naan̰ kɔɗ Rɔmɛ.» 27 Gɔtn se, bubm asgarge ɓaaɗo ɔŋ Pɔl ɔɔ tɔnd mɛtin̰ ɔɔ: «'Ɗeekum tu, naai tap ɓo kɔɗ Rɔmɛ ɗeer ne?» Pɔl tɛrlin̰ ɔɔ: «Yɛɛ, maam m'kɔɗ Rɔmɛ.» 28 Bubm asgarge tɛrl Pɔl ki ɔɔ: «Kɛn ɔlum jaay m'tɛɗ kɔɗ Rɔmɛ se, maam m'ɔgɗenga kɔgŋ gurs dɛn aak eyo.» Ɔɔ Pɔl tɛrlin̰ ɔɔ: «Gaŋ maam se, gɔtn j'oojum tap ɓo, m'kɔɗ Rɔmɛ.» 29 Gɔtn se sum ɓo, jee kɛn ɓaan̰ ɓaa kɔkɔ jaay an̰ kɔnd se, naar ɔn̰in̰a. Ɔɔ kɛn bubm asgarge se jaay ɓaa jeel Pɔl kɔɗ Rɔmɛ sum se, naan̰ ɓeere ɓaa ɔkin̰a, taa naan̰ dɔɔkin̰ga dɔɔk ute zin̰ziri. 30 Num bubm asgarge 'je 'jeel mɛtn taar kɛn Yaudge jaay ɔkŋ mind Pɔl se. Taa naan̰ se ɓo, mɛtbeen̰ki se, naan̰ ɔl k'daŋo magal jee tɛɗn sɛrkɛ Raage tu ute Yaudgen jee kaakŋ mɛtn taarge se paac. Gɔtn se, Pɔl se, naan̰ ɔl k'tuutn ute zin̰ziri ɔɔ ɔk ɓaansin̰ naanɗe ki.
