Actes 20

1Kɛn mɛtn taar se jaay deel se, Pɔl ɔl k'daŋ k'tuso jee aalga kaal maakɗe do Isa al‑Masi ki ɔɔ naan̰ ɛɗɗen kaay kaama jaay ɓo ɗeekɗen ɔɔ iŋgki lapia ɔɔ naan̰ uun ɗoobm taa naaŋ Masedoan. 2Kaaɗ kɛn naan̰ aal teeco teec taa naaŋ kɛn ese se, jee aalga kaal maakɗe do Isa al‑Masi ki se, naan̰ taaɗɗenga taarge dɛna kɛn ɛɗɗen kaay kaama, jaay ɓo naan̰ iin̰ ɓaa taa naaŋ Grɛkge tu. 3Gɔtn se, naan̰ tiŋg laapa mɔtɔ. Aan kaaɗ kɛn jaay naan̰ ɓaa kookŋ maakŋ markab ki gɛn ɓaa taa naaŋ Siri ki se, naan̰ booy ɔɔ Yaudge se, dɔɔkga dɔɔk taarɗe ron̰ ki gɛn kutin̰a. Taa naan̰ se ɓo, naan̰ uun doa gɛn tɛrl ɓaa taa naaŋ Masedoan ki. 4Jeegen kɛn lee ute naan̰ se, naaɗe se ɓo: Sopatrɔs goon Pirus kɛn iin̰o maakŋ gɛgɛr kɛn Bere, Aristark ute Sekundus, naaɗe se iin̰o maakŋ gɛgɛr kɛn Tɛsalonik ki ɔɔ Gayusn kɛn iin̰o maakŋ gɛgɛr kɛn Derbe ɔɔ Tisik ute Tropim kɛn iin̰o taa naaŋ Azi kɛn kaam kalaŋ ɔɔ kɛse Timote. 5Jee se ɔnd naana ɓaa booyje maakŋ gɛgɛr kɛn Troas ki. 6Gaŋ naaje se k'tɛɗ Laa mappan ɔk ɔrɔm eyo aas jaay ɓo, j'iin̰ Pilip ki se, j'ook maakŋ markab ki k'tɛɗ ɓii mii jaay ɓo k'ɓaa k'j'ɔŋɗe maakŋ gɛgɛr kɛn Troas ki. Gɔtn se, naaje k'tiŋgo ɓii cili. 7Kɛn aan ɓii sebit ki tɛgɛr se, naaje k'tus k'j'ɔs kalaŋ jaay ɓo k'j'uun sɛn‑sɛn. Gɔtn se Pɔl baag taaɗn gɛnaage tun ɗoobm Isa al‑Masi kɛn tus gɔtn ese. Aan gɔɔ naan̰ mɛtbeeki sum ɓo ɓaa ɓaa se, naan̰ taaɗɗen taara bini aan daan ɓea. 8Maakŋ ɓee kɛn k'j'ɔɓin̰ do naapin̰ ki gɛn k‑mɔtɔge tu se, gɔtn se ɓo naaje k'tus maak ki ɔɔ maakŋ ɓee kɛn ese se, k'tɔɔc k'tɔndga lɔɔmpɔge dɛna. Gɔtn se, goon kɔɗɔ kalaŋ k'daŋin̰ Utik se, naan̰ iŋg kiŋg taa pɛnɛtɛr ki. Aan gɔɔ Pɔl taaɗ ɔn̰ ey se, gɔtn se bi ɓaa ɔkin̰ se tooɗ sen̰. Gaŋ maakŋ tooɗn bin̰ ki se, naan̰ iik ujo ɔɔ aal ooc naaŋ ki. Kɛn deb kalaŋ bɔɔy ɓaa ɔŋin̰ jaay je an̰ kuun se, ɔŋin̰ naan̰ ooyga. 10Gɔtn se Pɔl bɔɔyo ɔɔ no uunin̰ ɔkin̰ kaaɗin̰ ki ɔɔ ɗeekɗen ɔɔ: «Naase ɔn̰ki rose urlu. Ɓɛrɛ, naan̰ utu zɛɛrɛ!» 11Gɔtn se, Pɔl ɔk tɛrl ook ɓaa maakŋ ɓee ki gɔtin̰ ki, naan̰ dup ɛɗɗen mappa ɔɔ k'j'ɔs tɛlɛ. Tɛr, naan̰ baagɗen taaɗn daala bini gɔtɔ iipi, jaay ɓo naan̰ ɗeekɗen ɔɔ: «Iŋgki lapia. Maam se m'ɓaaga jaayo!» 12Num, kɛn goon kɔɗn duro se lɛ, naaɗe ɔk ɓaansin̰ ɓeen̰ ki ɔɔ gɔtn se, jee paacn̰ kɛn aakin̰ se, maakɗe raapo. 13Naan̰ kɛn se, naaje k'j'ook maakŋ markab ki j'ɔnd naana gɛn ɓaa maakŋ gɛgɛr kɛn Asɔs, gɛn ɓaa kuun Pɔl gɔtn ese. Taa Pɔl se, uunga kuun doa gɛn ɓaa ute jɛn̰a. 14Kɛn Pɔl jaay ɓaa ɔŋje maakŋ gɛgɛr kɛn Asɔs ki se, gɔtn se naaje k'j'uunin̰ maakŋ markab ki ɔɔ k'ɓaa maakŋ gɛgɛr kɛn Mitɛlɛn ki. 15Mɛtbeen̰ki k'j'iin̰ gɔtn ese ɔɔ k'ɓaa maakŋ gɛgɛr kɛn Sio ki, ɔɔ mɛtbeen̰ kɛn kuuy se, naaje k'j'iin̰ k'ɓaa maakŋ gɛgɛr kɛn Samɔs ki. Tɛr, ɓii kɛn kuuy se, j'iin̰ Samɔs ki se, k'ɓaa maakŋ gɛgɛr kɛn Milɛ ki. 16Naaje k'j'uun ɗoobm se taa Pɔl se, bɛɛki num, je naar ɓaa Jeruzalɛm ki gɛn ɓaa tɛɗn Laa Pantekɔt. Taa naan̰ se ɓo, naan̰ deel cɛɛ gɛgɛr kɛn Ɛpɛz ki kic ɓo, baate kaal maak ki, taa naan̰ je takal ron̰a taa naaŋ Azi ki se eyo. 17Kɛn naaje k'j'aan maakŋ gɛgɛr kɛn Milɛ ki se, Pɔl ɔl k'ɓaa k'daŋo jee naan eglizn Ɛpɛz ki, taa utu an̰ kɔŋ gɔtn ese. 18Kɛn naaɗe jaay aan ɔŋin̰ se, Pɔl tɛɗɗen tɔɔsɛ ɔɔ ɗeekɗen ɔɔ: «Gɔtn maam m'aan gɔtse ki jaay m'tiŋgo maakse ki sum se, naase 'jeelumki. 19Kɛn maam m'tiŋgo maakse ki se, maam m'ɔɔpo rom baat jaay ɓo m'tɛɗo naabm Mɛljege Isa se. Kaaɗ kɛn se, maam m'iŋgo maakŋ kaa‑maan ki ɔɔ m'dabarga dɛna taa Yaudgen dɔɔkga dɔɔk taarɗe jaay 'je am tɔɔl se. 20'Jeelki, naan̰ kɛn se, maam m'dooyseno ɔɔ m'taaɗseno taar Raa naan jeege tu, ɔɔ maakŋ ɓeesege tu se, taargen jaay asen noogse, kalaŋ tap ɓo, maam m'dirigŋ te eyo. 21Maam m'taaɗ Yaudge tu ute jeegen Yaudge eyo m'ɔɔ k'tɛrl maakɗe do Raa ki ɔɔ j'aal maakɗe do Mɛljege Isa ki. 22«Ɓɔrse, maam se m'ɓaa ɓaa Jeruzalɛm ki. Kɛse Nirl Salal ɓo ɔlum ɔɔ m'ɓaa ɔɔ maam se m'jeel eyo nakŋ jaay utu kaan dom ki gɔtn naane se. 23Naɓo, maakŋ gɛgɛr kɛn maam m'aanga tak se, Nirl Salal ɔɔjum ɔɔ kɛn maam jaay m'ɓaaga Jeruzalɛm ki se, j'utu j'am ɓaa kɔl daŋgay ki ɔɔ j'utu j'am dabar dɛna. 24Gaŋ maam se m'aak kiŋgum do naaŋ ki se, aan gɔɔ nakŋ cɛrɛ; nakŋ kɛn ɔɔn̰um maam ki tak se, m'je naabm kɛn Mɛljege Isa ɛɗumsin̰ kaam jim se, m'an̰ tɛɗn kaasin̰ ute ɗoobin̰a ɔɔ naabm kɛn Mɛljege ɛɗumsin̰ se taa m'taaɗn Labar Jigan gɛn Isa al‑Masi ɔɔ ute naan̰ se ɓo, Raa tɛɗn bɛɛn̰a jeege tu. 25«'Booyki, maam kɛn m'tiŋgo daanse ki jaay, m'taaɗseno taar Gaar Raa se mɔɔtn naan ki se, naase amki kaak ey sum. 26Taa naan̰ se ɓo, jaaki maam m'ɔk mind kaluma ɔɔ m'ɗeekseni naan ki se, debm jaay utga num, maam se ɔlum eyo. 27Taa maam se m'taaɗsenoga nakŋ kɛn paacn̰ Raa maakin̰ jen ro ki, taar ɗim kalaŋ tap ɓo, maam m'ɔysesin̰ te eyo. 28«Ɓɔrse, naase se iŋg ɔndki kɔndɔ ɔɔ 'saapki do egliz kɛn Nirl Salal ɛɗsesin̰ kaam jise se ɔɔ aakɗeki doɗe ki; bin se, 'gaamɗeki aan gɔɔ dɔɔl baatge, taa egliz se Raa dugin̰ga dugu ute moosin̰a. 29«Maam m'jeele, kɛn maam jaay m'ɓaaga se, jeege se ute aɗe goon̰ kɛnd maakse ki aan gɔɔ k‑sogsogigen ɛndga maakŋ dɔɔl baatge tu num, lee wɔɔkɗe se. 30Ɔɔ maakse ki se kic jee mɛtin̰ge utu dooy jeege ute taargen mɛt ki eyo. Naaɗe utu kɔl jeegen aalga kaal maakɗe do Isa ki se, kic ɓo utu kuun taarɗe. 31Bin se, iŋgki do mɛtɛkse ki. 'Jeelki maakŋ ɓaar kɛn mɔtɔ se, nɔɔrɔ katara, maam m'ɔn̰ te eyo ɔɔ naŋa kic ɓo, maam m'dɛjin̰ga ɔɔ taa naase se, maam m'eemga dɛn aak eyo. 32«Ɓɔrse, maam m'ɔn̰se kaam ji Raa ɔɔ naase 'saapki do taar Raa kɛn maam m'taaɗseno m'ɔɔ: Raa se naan̰ debm bɛɛ. Ute taar se ɓo, naan̰ asen kɛɗn tɔɔgɔ do kaal maakse kɛn naase aalki do Isa ki se. Ute naan̰ se, naase aki kɔŋ bɛɗse ute jee kɛn naan̰ tɛɗɗenga tɛɗga jee naan̰gen salal se. 33«Gaŋ maam lɛ, m'jeɗe te gurs nam eyo ɔɔ daab ute kal nam kic lɛ, maam m'jeɗe te eyo. 34Naase 'jeelki ute naabm kɛn maam m'tɛɗ ute jim mala se ɓo, maam m'ute jeemge se aasjen kiŋgje. 35Ute naabm daayum maam m'tɛɗ daanse ki se, maam m'je m'asen taaɗn m'ɔɔ: 'tɛɗki naaba jaay ɓo j'anki noogŋ jee daayge. Ɔɔ k'saapki do taar Mɛljege Isa kɛn taaɗ ɔɔ: ‹Debm ɛɗ naka deb ki se, maakin̰ raap cir debm kɛn j'ɛɗin̰ kɛɗa.›» 36Kɛn Pɔl jaay taaɗ naŋ taarin̰ se, naan̰ ɛrg naaŋ ki ute naaɗe paac ɔɔ eem Raa. 37Gɔtn se naaɗe paac baag keeme ɔɔ naŋa naŋa kic ɓo ɓaaɗo baam ɔk Pɔl kaaɗin̰ ki kaaɗin̰ ki, ɔɔ nakŋ kɛn ɔl maakɗe tuj se, taa kɛn Pɔl taaɗɗenga taaɗ ɔɔ: «Naan ki se, mɔɔtn naase amki kaak ey sum.» Gɔtn se, naaɗe ɓaa ɔlin̰ mɛtn markab ki ɔɔ ɗeekin̰ ɔɔ: «'Ɓaa te lapia.»

will be added

X\