Actes 2

1Kɛn ɓii gɛn tɛɗn laa k'daŋin̰ Pantekɔt jaay aan se, ɓii kɛn se jee aal maakɗe do Isa al‑Masi ki se tusga paac gɔtɔ kaam kalaŋ. 2Gɔtn se naaɗe naar booy naka maakŋ raa ki eemo uu uu aan gɔɔ kuul kɛn ɔl makɔn̰ɔ ɔɔ ɓaaɗo ɛnd maakŋ ɓee kɛn naaɗe tusn maak ki se ɔɔ gɔtɔ se, tɛɗ dir dir. 3Tɛr naaɗe aak ne ɗimge se tec aan gɔɔ rɔɔn̰ pooɗge bɔɔy ɓaaɗo wɔɔk tis doɗege tu. 4Gɔtn se Nirl Salal ɓaaɗo ɛnd ɗooc maakɗe ɔɔ naaɗe baag taaɗn taar naaŋ jee kuuyu. Kɛse Nirl Salal ɓo ɔlɗe naaɗe taaɗ taar naaŋgen se. 5Ɓii kɛn se, Yaudgen ɔk ɗoobm taar Raaɗe ɔɔn̰ se iin̰o gɔtn ɓaa se paac ɔɔ ɓaaɗo Jeruzalɛm ki. 6Kɛn jee se jaay booy nakŋ tɛɗ dir dir se, naaɗe ɓaaɗo tus dɛna gɔtn se. Ɔɔ kɛn naaɗe jaay booy jee aal maakɗe do Isa al‑Masi ki jaay taaɗ taar naaŋɗege se, gɔtn se ɗoobm roɗe tap ɓo, naaɗe jeel eyo. 7Nakŋ se deel doɗe ɔɔ ɗoobm taaɗin̰ tap ɓo naaɗe jeel eyo ɔɔ naaɗe taaɗ ute naapa ɔɔ: «Jee taaɗ taargen se lɛ, naaɗe paac Galilege, 8tɛɗ ɔɔ ɗi jaay ɓo naŋa naŋa kic ɓo booy naaɗe taaɗin̰ ute taar naaŋin̰ naaŋin̰ se? 9Ey num naajege se jee mɛtin̰ge iin̰o Paart ki, jee mɛtin̰ge iin̰o Mɛɗ ki ute Elamit ki ɔɔ jee mɛtin̰ge iin̰o Mɛzapotami ki, jee mɛtin̰ge iin̰o taa naaŋ Jude ki, jee mɛtin̰ge iin̰o taa naaŋ Kapados ki, jee mɛtin̰ge iin̰o taa naaŋ Pɔŋ ki ute taa naaŋ Azi ki, 10jee mɛtin̰ge iin̰o taa naaŋ Prigi ki ute gɛn Pampili ki, jee mɛtin̰ge iin̰o taa naaŋ Masar ute gɛn Libi kɛn cɛɛ Sirɛnai ki ɔɔ jee mɛtin̰ge iin̰o Rɔm ki, 11paac naajen kɛn k'Yaudge ɔɔ jeegen kɛn tɛɗga tɛɗ roɗe Yaudge, jee iin̰o Krɛt ki ute jee iin̰o taa naaŋ Suge tu, paac naaje k'booyki naaɗe taaɗ nakgen magal magal kɛn Raa tɛɗin̰ ute taar naaŋjege.» 12Nakŋ se deel doɗe ɔɔ naaɗe jeel ɗoobm taaɗin̰ eyo. Naaɗe taaɗ ute naapa ɔɔ: «Kɛse tap ɓo je ɗeekŋ ɔɔ ɗio?» 13Gaŋ jee mɛtin̰ge se tɛrɛc mɛtn jeege tun aalga kaal maakɗe do Isa al‑Masi ki ɔɔ ɗeek ɔɔ: «Naaɗe se lɛ, ɓɛrɛ, aay oonga koono.» 14Kɛn Piɛr jaay booy taar se, naan̰ iin̰ ɗaar ute jee kaan̰ naabm Isa al‑Masigen sik‑kaar‑kalaŋ kuuy se ɔɔ uun mindin̰ raan taaɗɗen ɔɔ: «Naase Yaudge ute naase jee kɛn iŋgki Jeruzalɛm ki se, uɗki bi jiga do taar kɛn maam m'asen taaɗa ɔɔ nakgen deel paac se 'booy ɔkin̰ki jiga jaayo. 15Kɛn naase ɔɔki jee se jaay jee kaay koonge num kɛse mɛt ki eyo, taa ɓɔrse se naaje j'utuki maakŋ kaaɗn mɛs ki ɓɔrtɔ. 16Num gaŋ nakŋ aan se, kɛse taar kɛn debm taaɗ taar teeco taar Raa ki k'daŋin̰ Jɔɛl kɛn taaɗo do dɔkin̰ se ɓo ɓɔrse aanga ɗoobin̰ ki, kɛn taaɗo ɔɔ: 17Raa ɗeek ɔɔ: Ɓiigen kaam mɔɔtn se, maam m'utu m'aɗe kɔl Nirlum utu 'bɔɔy do jeege tu paac. Bin se gɛnsegen gaabge ute kɛngen mɛndge se, utu 'taaɗn taargen teeco taarum ki ɔɔ gɛnsegen gaan kɔɗge se utu 'kaakŋ nakgen kɛn maam m'teecn̰ naanɗe ki jaay m'aɗen taaɗn mɛtin̰a ɔɔ bubsege se kic m'utu m'aɗen taaɗn maakŋ niɗege tu. 18Ɗeere, ɓii kɛn se, maam m'aɗe kɔl Nirluma utu 'bɔɔy do jee tɛɗn naabumge tun gaabge ute kɛngen mɛndge ɔɔ naaɗe utu taaɗ taargen teeco taarum ki. 19Maam m'utu m'tɛɗn nakgen deel doa maakŋ raa ki ɔɔ m'utu m'tɛɗn nakŋ‑kɔɔɓge do naaŋ ki, jeege 'kaakŋ mooso, pooɗo ɔɔ ute saa 'kiin̰ tul tul. 20Kɔr Mɛljege jaay aɗe ɓaa se, ɓii kɛn se kaaɗa 'tɛɗn ilim dib ɔɔ laapa se 'tɛɗn aac dɛŋ aan gɔɔ mooso. Ɓii Mɛljege se 'tɛɗn ɓii kalin̰ ki ɔɔ 'tɛɗn ɓii bɛɛ dɛn aak eyo, naɓo ɓii se 'kɔl ɓeere jeege tu. 21Ɓiin se jaay debm eemga Mɛljege num, naan̰ 'kɔŋ kaaja.» 22Tɛr Piɛr taaɗ ɔɔ: «Naase gaan Israɛlge, 'booyki taar maam m'asen taaɗa! Ute Isan kɛn iin̰o gɛgɛr kɛn Nazarɛt ki ɔɔ kɛn Raa ɔlin̰o gɔtse ki se, naase 'jeelki Raase tɛɗga nakŋ‑kɔɔɓge ute nakgen deel doa daanse ki taa asen taaɗn tɔɔgŋ Raa. 23Gaabm se, Raa mala ɓo ɔn̰sesin̰ jise ki. Taa do dɔkin̰ tap ɓo, Raa se jeele nakŋ naase utu an̰ki tɛɗn don̰ ki se. Taa naan̰ se ɓo, naase ɔk ɔlin̰ki ji jee kusin̰ge tu ɔɔ naaɗe ɓaa tup tɔɔlin̰ ro kaag ki; 24num gaŋ Raa se durin̰oga daan yoge tu ɔɔ ɔɔɗin̰ga don̰a naatn maakŋ yo ki taa yo se ɔk tɔɔgɔ don̰ ki eyo. 25Taa naan̰ se ɓo ɓugjege Daud taaɗo mɛtn taar naan̰a maakŋ Kitap ki ɔɔ: Daayum maam m'aak Mɛljege Raa naanum ki. Taa naan̰ utu cɛɛm ki se, maam tap ɓo m'ɓeere ɗim ki eyo. 26Ɔɔ maam se maakum‑raapo ɔɔ m'aar kaa ute maak‑raapuma; kɛn m'ooyga kic ɓo, maam se m'ɔnd dom do Raa ki. 27Taa naai Mɛluma, naai se am kɔŋ kɔn̰um maakŋ yoge tu eyo, ɔɔ naai 'kɔŋ kɔn̰ mɛɗn doi se 'ruum maakŋ ɓaaɗ ki eyo. 28Mɛluma, naai ɓo taaɗumga ɗoobm kaaja ɔɔ daayum naai utu cɛɛm ki se, maam maakum‑raap puk.» 29Tɛr Piɛr taaɗ daala ɔɔ: «Gɛnaamgen Yaudge, 'booyki maam m'asen taaɗn tal. Ɓugjege Daud se ooyga do dɔkin̰a. Naan̰ j'uun j'ɔlin̰ga maakŋ ɓaaɗ ki ɔɔ ɓaaɗin̰ se jaaki kic ɓo utu gɔtjege tu ara. 30Num gaŋ aan gɔɔ naan̰ debm taaɗ taar teeco taar Raa ki se, naan̰ jeele taa Raa se naamga naam taarin̰a ɔɔ tɛɗga num maakŋ mɛtjilin̰ ki se 'kɔɔɗn deb kalaŋ se ɓaaɗo 'kɔsn gaara gɔɔn̰ ki. 31Taa naan̰ se ɓo, Daud se, naan̰ jeele al‑Masi se ɓaaɗo ooyga kic ɓo utu duru daan yoge tu. Taa naan̰ se ɓo naan̰ ɗeek ɔɔ: ‹Raa se rɛsin̰ te maakŋ yoge tu eyo ɔɔ ron̰ lɛ, naan̰ ɔn̰in̰ ruum te maakŋ ɓaaɗ ki eyo.› 32Taa naan̰ se ɓo maam m'taaɗseni: Raa se naan̰ duroga Isa daan yoge tu ɔɔ naaje se paac j'aakin̰ga ɔɔ naan̰ se utu te kaamin̰a. 33Raa uun ɓaansin̰ga ute tɔɔgin̰a maakŋ raa ki. Ɔɔ Raa Bubu se ɛɗin̰ga Nirl Salal kɛn naan̰ taaɗ ɔɔ utu kɛɗn jeege tu se. Ɔɔ Nirl se ɓo kɛn Isa ɔlin̰ ɓɔrse bɔɔy wɔɔk doje ki aan gɔɔ kɛn naase aakin̰ki ute kaamse ɔɔ 'booyin̰ki ute bise se. 34Ey num ɓugjege Daud lɛ ook ɓaa te maakŋ raa ki eyo, gaŋ naan̰ taaɗ ɔɔ: Mɛljege Raa ɗeek Mɛlum ki ɔɔ: Naai se ɓaaɗo iŋg do ji daamum ki, 35ɓii kalaŋ maam m'ai tɛɗi jee taamooyige paac se, naai utu kiŋg doɗe ki. 36Ɔn̰ gaan Israɛlge paac 'jeel taar se: Isan naase 'tup 'tɔɔlin̰ki ro kaag ki se, naan̰ se ɓo Raa tɛɗin̰ tɛɗga Mɛljege ɔɔ naan̰ ɓo al‑Masi se.» 37Kɛn jeege jaay booy taar ese se, naaɗe maakɗe tuj kasak kasak ɔɔ naaɗe tɔnd mɛtn Piɛr ute jee kaan̰ naabm Isa al‑Masige gɛn kuuy se ɔɔ: «Gɛnaajege naaje tap ɓo k'tɛɗn roje j'ɔɔ ɗi?» 38Gɔtn se Piɛr tɛrlɗen ɔɔ: «'Tɛrlki maakse ɔɔ naŋa naŋa kic ɓo ɔn̰ ron̰ j'an̰ batizn ute ro Isa al‑Masi, taa Raa an̰ tɔɔl kusin̰in̰a bin jaay Raa asen bɔɔy Nirl Salal dose ki. 39Taa naan̰ taaɗga taaɗ ɔɔ utu aɗe kɔl Nirl Salal dose ki, do gɛnsege tu ɔɔ do jeege tun iŋg dɔɔk te Raa ɔɔ do jeege tun dɛn kɛn Raa ute aɗeno daŋ se.» 40Gɔtn se tɛr Piɛr taaɗɗenga taarge dɛna taa aɗen tɛɗn naaɗe 'tooko ɔɔ kaay kaamɗe. Naan̰ ɗeekɗen ɔɔ: «Jee duni kɛn ɓɔrse se, ɓɛrɛ, naaɗe se jee kɛn baate Raa! 'Teecki naatn maakɗe ki taa naase aki 'kɔŋ kaaja.» 41Jee kɛn took uun taar Piɛr se, ɓii kɛn se sum ɓo k'batizɗe. Naaɗe se ɓaa ɓaa nakŋ jeege dupu‑mɔtɔ ɔɔ naaɗe ɓaaɗo tum do jeege tun deetn kɛn aalga kaal maakɗe do Isa al‑Masi ki se. 42Jee paacn̰ kɛn aalga kaal maakɗe do Isa al‑Masi ki se, naaɗe daayum lee booy taargen jee kaan̰ naabm Isa al‑Masige lee dooyɗe ɔɔ naaɗe iŋg aan gɔɔ gɛnaagen kon̰ɗe kalaŋ ɔɔ bubɗe kalaŋ. Naaɗe lee ɔs kalaŋ ɔɔ lee eem Raa taa naapki. 43Ute jee kaan̰ naabm Isa al‑Masige se, Raa tɛɗ nakŋ‑kɔɔɓge dɛna ute nakgen kɛn taaɗ tɔɔgŋ Raa. Ute nakgen jaay naaɗe tɛɗse ɔl jeege paac ɓeer Raa ki. 44Ɔɔ jee kɛn aal maakɗe do Isa al‑Masi ki se, naaɗe ɔk taarɗe kalaŋ ɔɔ nakŋ paacn̰ jaay naaɗe ɔkse nig aakin̰ ute naapa. 45Naaɗe dugŋ naatn ute maakŋ‑gɔtɗege ɔɔ ute nakɗege ɔɔ gursn se naaɗe nig aakin̰ ute naapa ɔɔ naŋa naŋa kic ɓo j'ɛɗin̰ nakŋ kɛn an̰ kaasn kiŋgin̰a. 46Daayum ɓii‑raa naaɗe tus daan bɔɔr Ɓee Raa ki ute maakŋ kalaŋ. Naaɗe lee ɔs kalaŋ ɓee naapge tu ɔɔ gɔtn kɔsɗe ki se, naaɗe lee tɔs ute maak‑raapo ɔɔ taar ɗim tap ɓo, naaɗe ɔk maakɗe ki eyo. 47Kɛn jeege jaay aakɗe naaɗe tɛɗ bin se, naaɗe jeɗe. Ɔɔ jee kɛn aal maakɗe do Isa al‑Masi ki se naaɗe tɔɔm Raa, ɔɔ te naan̰ se ɓii‑raa Mɛljege Isa al‑Masi lee aaj jeege maakŋ kusin̰ɗe ki ɔɔ daayum jeege ziiɗ do jeege tun aalga kaal maakɗe don̰ ki se.

will be added

X\