Actes 10

1Maakŋ gɛgɛr kɛn Sezare ki se, gaaba kalaŋ k'daŋin̰ Kɔrney ɔɔ gaabm se asgargen kaaru se, naan̰ ɓo bubɗe. Naan̰ maakŋ dɔɔl asgarge tun k'daŋɗe Italige. 2Gaabm se ɔk taar Raa ɔɔn̰ɔ ɔɔ naan̰ ute jee maakŋ ɓeen̰ ki paac se, ɓeer Raa ki. Naan̰ tɛɗ bɛɛ Yaudge tun jee daayge ɔɔ daayum naan̰ lee eem Raa. 3Ɓii kalaŋ kaaɗn tɛgɛr ki se, Kɔrney aak kɔɗn Raa tal tal ɛndo kɛnd ɓeen̰ ki ɔɔ kɔɗn Raa se daŋin̰ ɔɔ: «Kɔrney!» 4Kɛn Kɔrney jaay aak kɔɗn Raa se, ɓeer ɔkin̰a ɔɔ naan̰ taaɗ kɔɗn Raa ki ɔɔ: «Kɛse ɗio, Jaamus?» Kɔɗn Raa tɛrlin̰ ɔɔ: «Keem Raa kɛn naai lee eeme ute tɛɗn bɛɛ kɛn naai lee tɛɗ jeege tu se, Raa dirigin̰ te eyo. 5Ɓɔrse, ɔl jeege Japa ki taa aɗe daŋ Simon kɛn k'daŋin̰ Piɛr se. 6Ɔɔ naan̰ utu iŋg ɓee gaab kɛn k'daŋin̰ Simon kɛn debm rujn̰ daara se ɔɔ gaabm se, naan̰ ɓeen̰a taa baar ki.» 7Ɔɔ kɛn kɔɗn Raa jaay taaɗ taarin̰ aas jaay ɓaa se, gɔtn se Kɔrney daŋo maakŋ jee tɛɗn naabin̰ge tu se, jeege dio ute asgar kɛn j'ɛɗin̰sin̰ kaam jin̰ se, ɔɔ asgar se, ɔk taar Raa ɔɔn̰ɔ. 8Taar kɔɗn Raa taaɗin̰ se, Kɔrney taaɗɗen mɛtin̰ paac, jaay ɓo ɔlɗen k'ɓaa Japa ki. 9Gɔtn se jee kɛn Kɔrney ɔlɗen naaba se iin̰ ɓaa, ɔɔ mɛtbeen̰ kɛn naaɗe ɓaa ɓaa ɗoob ki jaay aan gɔɔr ute gɛgɛr Japa se, kaaɗ kɛn se kaaɗ aanga katara. Ɔɔ naan̰ kɛn se, Piɛr ook do ɓee ki raan gɛn keem Raa. 10Gaŋ gɔtn se Piɛr nam ɓo tɔɔlin̰a ɔɔ je kɔsɔ. Kaaɗ kɛn jaay k'tɛɗin̰ tɛɗ kɔsɔ se, naan̰ naar aak ne ɗim iin̰o gɔtn Raa ki. 11Naan̰ aak maakŋ raa ɔɔɗ waŋ ɔɔ aak naka aan gɔɔ kala magala k'dɔɔkin̰ taarin̰ gɔtɔ kaam sɔɔ ɔɔ nakŋ se bɔɔyɔ bini aan naaŋ ki tak. 12Maakŋ nak kɛn aan gɔɔ kala se, naan̰ aak napar daage paac: kɛngen jɛɗege sɔɔ sɔɔ, kɛngen ɛrg kɛrgɛ ɔɔ ute napar yeelge paac. 13Gɔtn se naan̰ booy mind deba ɗeekin̰ ɔɔ: «Piɛr iin̰i, daagen se 'tɔk 'tɔɔlɔ ɔɔ ɔsɔ.» 14Piɛr tɛrlin̰ ɔɔ: «A‑a Mɛluma! Gɔtn maam tiŋg tap ɓo daagen gɛn kɔs ey se, ɓii kalaŋ maam m'ɔs te eyo.» 15Tɛr naan̰ booy mind debm se taaɗin̰ kuuy daala ɗeekin̰ ɔɔ: «Nakŋ kɛn jaay Raa tɛɗin̰ tɛɗga jiga se, naai ɔn̰te kaakin̰ aan gɔɔ nakŋ aak kusu.» 16Mind debm ese se taaɗ ɗɔɔlin̰ mɔtɔ, jaay ɓo nakŋ aan gɔɔ kala se tɛrl ook ɓaa maakŋ raa ki gɔtin̰ ki. 17Piɛr, nakŋ naan̰ aak se, deel don̰a ɔɔ saap mɛtn taar nakŋ se tap ɓo, naan̰ ɔnd ute mɛtin̰ eyo. Naɓo kaaɗ kɛn se sum ɓo, jee Kɔrney ɔlɗeno se, je je ɓee Simon ɔɔ kaaɗ kɛn se naaɗe aan taa ɗoobm Simon ki. 18Gɔtn se naaɗe daŋ jee maak ki ɔɔ tɔnd mɛtɗe ɔɔ: «Gaabm ron̰ Simon kɛn k'daŋin̰ Piɛr se, utu gɔtn ara ki la?» 19Kaaɗ kɛn Piɛr jaay utu iŋg saap saap ɓɔrtɔ do nakŋ kɛn naan̰ aako se, gɔtn se Nirl Salal taaɗin̰ ɔɔ: «'Ɓooyo Piɛr! Gaabge mɔtɔ utu ɗaar gɔtn ese jei jea. 20Iin̰ bɔɔy kɛskɛ 'ɓaa ɔŋɗe, ɔn̰te 'naaja ɔɔ 'ɓaaki kalaŋ taa jee se, maam ɓo m'ɔlɗeno gɔti ki.» 21Gɔtn se Piɛr bɔɔy ɓaa ɔŋ jee se ɔɔ ɗeekɗen ɔɔ: «Maam ɓo debm kɛn naase 'jen̰ki se. Num naase 'ɓaakiro gɔtum ki tap ɓo bɛɛ ɗey la?» 22Naaɗe tɛrlin̰ ɔɔ: «Naaje se bubm asgargen k'daŋin̰ Kɔrney se ɓo ɔljeno. Naan̰ se debm daan ki ɔɔ ɓeer Raa ki ɔɔ Yaudge ute dɛnɗe paac se, tɔɔmin̰a. Naan̰ se, ɓii kalaŋ kɔɗn Raa ɓaaɗo taaɗin̰ ɔɔ n̰'ɔl k'ɓaa k'daŋo Piɛr aɗe ɓaa ɓeen̰ ki, taa an̰ taaɗn taar Raa naan̰ 'booyo.» 23Gɔtn se Piɛr ɓaanɗen ɓeene ɔɔ ɔndɗe mɛrtɛ ɔɔ naaɗe tooɗ iip gɔtin̰ ki. Mɛtbeen̰ki Piɛr iin̰ ɓaa ute naaɗe ɔɔ gɛnaage kandum kɛn ɗoobm Isa al‑Masi kɛn Japa ki se, daan Piɛr. 24Mɛtbeen̰ kɛn kuuy se, naan̰ ute jeen̰ge aan maakŋ gɛgɛr kɛn Sezare ki. Gaŋ kɔr naaɗe utu aan te ey se, Kɔrney daŋo taasin̰ge ute mɛɗn don̰ge, naaɗe tus iŋg aak kaamin̰a. 25Kaaɗ kɛn Piɛr aan jaay ɛnd kɛnd ɓeen se, gɔtn se Kɔrney ɓaaɗo dɔɔɗin̰a ɔɔ ooc mɛtn jɛn̰ ki aan gɔɔ debm kɛn ɓaa keem Raa se. 26Gaŋ Piɛr ɔk jin̰a ɔɔ uun ɗaarin̰ ɗeekin̰ ɔɔ: «Ɔn̰te 'tɛɗn bini; iin̰ raan! Ɓɛrɛ, maam kic m'debkilimi aan gɔɔ naai sum.» 27Piɛr ute Kɔrney jaay ɛnd kɛnd ɓeen se, naaɗe ɓaa ɓaao ɔɔ lee taaɗ taaɗ ute naapa. Kɛn naaɗe jaay aan se, ɔŋ jeege tusga dɛna. 28Gɔtn se Piɛr ɗeekɗen ɔɔ: «'Jeelki, maakŋ Ko Taar Raa naaje Yaudge tu se gaasje ɔɔ j'ɔn̰te kiŋg ute jeegen Yaudge eyo ɔɔ j'ɔn̰te lee ɓeeɗege tu. Gaŋ maam se, Raa taaɗumga tal ɔɔ m'ɔn̰te kaakŋ jee kuuy se aan gɔɔ jee aak kusu naanin̰ ki. 29Taa naan̰ se ɓo, kɛn naase ɔlki jaay k'daŋumo se, maam naajo te eyo num m'ɓaaɗoga. Ɓɔrse se 'taaɗumki tu, naase tap ɓo 'daŋumkiro se taa ɗi?» 30Kɔrney tɛrlin̰ ɔɔ: «Ɓɔrse tɛɗga ɓii mɔtɔ aan kaaɗn do tɛgɛr ki aan gɔɔ kaaɗn ara se, maam m'iŋg m'eem keem Raa maakŋ ɓeem ki m'aak kaak bin se, m'aak gaaba kalaŋ ɗaar ɗaar naanum ki ute kalin̰ raap lak lak. 31Naan̰ taaɗum ɔɔ: ‹Kɔrney! Keem Raa kɛn naai lee eem se, Raa booyiga ɔɔ bɛɛ kɛn naai lee tɛɗ jeege tu se lɛ, Raa dirigin̰ te eyo. 32Ɓɔrse, ɔl jeege Japa ki, taa aɗe daŋ Simon kɛn k'daŋin̰ Piɛr se, taa aɗe ɓaa gɔtn ara. Naan̰ ute ɓee gaab kɛn k'daŋin̰ Simon kɛn debm rujn̰ daar kɛn ɓeen̰ taa baar ki se.› 33Gɔtn se maam m'naar m'ɔl jeege Japa ki, taa ai ɓaa daŋa ɔɔ kɛn naai aanga se, naaje maakje raap aak eyo. Taa naan̰ se, ɓɔrse naaje k'tusga paac naan Raa ki ɔɔ k'je k'booy taar kɛn Mɛljege Raa taaɗio ɔɔ ajen taaɗ se.» 34Gɔtn se Piɛr ɛɛp taarin̰a ɗeekɗen ɔɔ: «Ɗeere, maam se m'jeelga Raa se naan̰ bɛɛr nam eyo. 35Gaŋ maakŋ mɛtjil jikilimge tun gay gay kic ɓo, debm kɛn ɓeer Raa ki ɔɔ tɛɗn nakgen ute ɗoobin̰ se, naan̰ se ɓo kɛn tɔɔl Raa ki. 36Raa taaɗo taarin̰ gaan Israɛlge tu ɔɔ ute ɗoobm Isa al‑Masi se, naan̰ ɓaanoga te Labar Jiga kɛn 'kɛɗn tɔɔsɛ jeege tu. Taa Isa se, naan̰ ɓo Mɛl jeege paac. 37Naase 'jeelki nakgen ɓɔrse deel taa naaŋ Jude ki paac se, nakgen se baago taa naaŋ Galile ki, kaaɗ kɛn Jan‑Batist taaɗo mɛtn taar batɛm kɛn naan̰ lee batizo jeege se. 38Naase 'jeelki Raa kɛn bɛɛr ɔɔɗ Isan kɔɗn Nazarɛt se, ɛɗin̰ga tɔɔgŋ Nirl Salal. Ɔɔ naase 'jeelki kici, Isa se leeɗoga gɔtn ɓaa se paac ɔɔ naan̰ tɛɗ bɛɛ jeege tu ɔɔ ɛɗ lapia jeege tun kɛn Ɓubm sitange tɔkɗega tɔk kaam jin̰a, taa Raa se utu te naan̰a. 39«Naaje, jee kaan̰ naabm Isage se, j'aakga ute kaamje ɔɔ k'booyga ute bije, nakŋ kɛn naan̰ tɛɗo maakŋ naaŋ Yaudge tu ɔɔ maakŋ gɛgɛr kɛn Jeruzalɛm ki se. Naan̰ se ɓo kɛn Yaudge ɔk tup tɔɔlin̰ ro kaag ki se. 40Gaŋ kɛn tɛɗ ɓii mɔtɔ se, Raa durin̰oga daan yoge tu ɔɔ ɔlin̰ naan̰ teec naan jeege tu, 41naɓo naan̰ se teec te naan jeege tu paac eyo. Gaŋ naan̰ se teec naan naaje kɛn Raa bɛɛr tɔɔɗjenoga tɔɔɗ do dɔkin̰a taa naaje k'tɛɗn saaɗin̰ge. Naaje se, kɛn naan̰ ooy duro se kic ɓo, naaje j'ɔsoga ɔɔ j'aayoga ute naan̰a. 42Naan̰ taaɗjeno ɔɔ k'ɓaa k'taaɗ Yaudge tu nakŋ kɛn naaje k'j'aako ɔɔ k'booyo se ɔɔ j'aɗen taaɗn j'ɔɔ: Isa se ɓo, debm kɛn Raa bɛɛr ɔɔɗin̰o gɛn kɔjn̰ bɔɔrɔ do jeege tun ooyga kooyo ɔɔ kɛngen utu zɛɛrɛ. 43Jee taaɗ taar teeco taar Raa ki do dɔkin̰ se paac taaɗoga saaɗn naan̰a; naaɗe ɗeek ɔɔ: ‹Debm jaay aalga maakin̰ do naan̰ ki num, Raa an̰ tɔɔl kusin̰in̰ se paac naatn.›» 44Kaaɗ kɛn Piɛr jaay utu ɗaar taaɗɗen taaɗ ɓɔrt sum ɓo, gɔtn se Nirl Salal naar bɔɔy do jeege tun paac iŋg booy booy taarin̰ se. 45Yaudgen took aalga kaal maakɗe do Isa al‑Masi kɛn ɓaaɗo ute Piɛr jaay aak nakŋ se, ɔkɗen taaɗ eyo taa naaɗe aak Raa se jeegen Yaudge ey se kic ɓo, naan̰ took ɛɗɗen Nirl Salal! 46Taa naaɗe booy jee se taaɗ taaɗ taar naaŋ jeegen kuuy ɔɔ tɔɔm Raa ɔɔ: «Raa se, naan̰ debm magal aak eyo.» Gɔtn se Piɛr taaɗɗen ɔɔ: 47«Ɓɔrse, jee se lɛ, Raa ɛɗɗenga Nirl Salal aan gɔɔ naaje kici. Kɛn bin num j'ɔn̰te gaasɗeki gɛn batizn maan.» 48Gɔtn se naan̰ taaɗɗen ɔɔ: «Jee se k'batizɗe ute ro Isa al‑Masi.» Ɔɔ jee kɛn k'batizɗe se taaɗ Piɛr ki ɔɔ: «J'ɔɔp j'iŋg ute naaɗe gɛn ɓii kandum.»

will be added

X\