3 Jean 1

1Maam kɛn naan egliz ɓo m'raaŋi maktubm se naai Gayus ki. Naai ɓo debm kɛn maakum jei ɔɔ maam se m'jei ute maakum paac. 2Mɛɗn kɔɔn̰ maakuma, maam m'je se, nakŋ naai tɛɗ paac se 'kaan̰ kaama. Ɔɔ m'je lapi roi se 'tɛɗn jiga aan gɔɔ kɛn naai 'lee jiga ɗoobm Raa ki se. 3Maam se maakum‑raap aak eyo, taa gɛnaagen iin̰o gɔti ki jaay lee ɓaaɗo gɔtje ki ara se, taaɗjenga saaɗn naai kɛn iŋg do taar kɛn mɛt ki jiga se: ɗeere, naai se utu iŋg do taar kɛn mɛt ki. 4Kɛn maam jaay booy j'ɔɔ gɛnumge utu iŋg jiga do taar kɛn mɛt ki se, kɛse ɛɗum maak‑raapo dɛn aak eyo. 5Mɛɗn kɔɔn̰ maakuma, naai se debm utu iŋg do taar kɛn k'dooyio se jiga ɔɔ gɛnaagen iin̰o gɔt kuuy kɛn naai jeelɗe eyo jaay ɓaaɗoga mɛrtɛ gɔti ki kic ɓo, naai ɔkɗen jiga. 6Jeegen naai ɔkɗeno jiga se, kɛn ɓaaɗoga gɔtn ara num naaɗe tɔɔmi naan jeege tun egliz ki ɔɔ ɗeek ɔɔ naai se debm 'jeɗe dɛna. Bin se m'taaɗi m'ɔɔ aay kaami ɔɔ jee bin se lee noogɗe daayum ute noogŋ naai se jaay ɓo, aɗen noogŋ maakŋ lee mɛrtɗege tu aan gɔɔ kɛn Raa jen ro ki. 7Taa naaɗe lee mɛrtɛ se gɛn tɛɗn naabm al‑Masi ɔɔ jeegen jeel Raa mal ey se ɗim tap ɓo naaɗe tɔnd mɛta gɔtɗe ki eyo. 8Taa naan̰ se ɓo naajege se, jeegen bin se naajege j'aɗeki noogo, taa j'aki tɛɗn naaba kalaŋ ɔɔ taar mɛt kɛn j'aki taaɗn jeege tu se ɓaa ute naanin̰a. 9Ey num maam m'raaŋ m'ɔlga maktub egliz ki, naɓo Deotrep se baate tookŋ taarje, taa naan̰ se je ɓo gɔtn magal ron̰a daan jee Raage tu. 10Taa ɗi kɛn jaay maam m'utu m'asen ɓaa kɔŋ se, m'asen ɓaa taaɗn nakŋ jig eyo kɛn naan̰ iŋg tɛɗ se, ute taar‑kɔɔɓm naan̰ lee tɔkjen doje ki. Naan̰ ese sum eyo, num gaŋ naan̰ tɛɗ nakgen cir naan̰ se daala, naan̰ se baate kɔkŋ gɛnaagen ɗoobm Raa ki ɔɔ jee kɛn je ɔɔ aɗen kɔk kic ɓo, naan̰ gaasɗe ɔɔ tuurɗen naatn maakŋ egliz ki. 11Mɛɗn kɔɔn̰ maakuma, ɔn̰te kuun bɔlɔtn jeegen lee tɛɗ nakgen jig ey se, num gaŋ uun bɔlɔtn jeegen lee tɛɗ nakgen jiga. Taa debm tɛɗ nakŋ jiga se, naan̰ debm Raa. Num gaŋ debm tɛɗ nakŋ jig ey se, naan̰ se jeel Raa eyo. 12Anum jeege se paac taaɗ taargen jiga ro Demetrus ki ɔɔ kiŋg naan̰ iŋg jiga do taar kɛn mɛt ki se kic ɓo tɛɗin̰ saaɗa. Naaje kic ɓo k'saaɗin̰ge. Taa naan̰ se ɓo naai kic 'jeele saaɗn naaje se saaɗn mɛt ki. 13Ey num m'ɔk nakge dɛna kɛn m'je m'aisin̰ raaŋa, naɓo m'je m'aisin̰ raaŋ maakŋ maktub ki eyo. 14Taa maam se ɔɔpga gɔɔrɔ m'saap m'utu ɓaa gɔti ki, ɔɔ kɛn ɓaa m'ɔŋiga jaay ɓo k'ɓaa taaɗn taara ute taara. 15Ɔn̰ Raa ai kɛɗn lapia. Mɛɗigen gɔtn ara se tɛɗi tɔɔsɛ ɔɔ mɛɗigen gɔtn naane se, naŋa naŋa kic ɓo naai 'tɛɗin̰ tɔɔsɛ.

will be added

X\