2 Timothée 4

1'Booy m'ai taaɗa: naan Raa ki ɔɔ naan Isa al‑Masi kɛn aɗe ɓaa kɔjn̰ bɔɔrɔ do jeege tun zɛɛrɛ ɔɔ do jeege tun ooyga kooy se, ɔɔ naan̰ kɛn aɗe ɓaa aan gɔɔ gaarge, m'ɔɔ: 2'wɔɔk Taar Raa jeege tu kɛn maakŋ gɔt kɛn jiga ey lɛ ɔɔn̰ kic ɓo, aay kaami. Kɛn naai 'dooyɗe dooy se, daayum uɗɗen bia, uunɗe kaamɗe, 'dɛjɗe ɔɔ 'mooyɗe. 3Taa kaaɗin̰ utu 'kaan se, taar mɛt ki se, jeege je an̰ booy ey sum, num naaɗe je ɓo 'tɛɗn nakŋ kɛn maakɗe jea. Taa naan̰ se ɓo naaɗe 'lee ɓaa gɔtn jee dooyge tun dɛn kɛn aɗen taaɗn taar kɛn aɗen kɛɗn maak‑raapo. 4Taargen mɛt ki se, naaɗe 'je an̰ booy eyo. Naɓo naaɗe je ɓo 'booy taargen rɛn̰ rɛn̰ se. 5Anum naai se, do nakge tu paac se, naai iŋg do mɛtɛki ki. Kɛn dubar aanga doi ki kic ɓo, aay kaami sɛrkin̰a, aan gɔɔ debm kɛn lee wɔɔk Labar Jigan gɛn Isa al‑Masi. Ɔɔ naabi se, 'tɛɗn naŋin̰ ute ɗoobin̰a. 6Anum maam Pɔl se lɛ, aan gɔɔ j'ɔk k'tɔɔlumga sɛrkɛ Raa ki. Ɔɔ ɓii kooyum lɛ ɔɔpga gɔɔrɔ. 7Maam se m'tɛɗoga tɛɗ bɔɔr jɛt. Ɔɔ maam m'aan̰ m'aanga ute ɗoobin̰a gɔtn kaan ki ɔɔ m'bɔɔbga jiga ɗoobm al‑Masi. 8Ɓɔrse se, nakŋ kaal aacn̰ ute ɗoobin̰ kɛn Raa amsin̰ kɛɗ se te booyum maakŋ raa ki. Kɛse Mɛljegen debm daan kɛn utu kɔjn̰ bɔɔrɔ do jeege tu se ɓo amsin̰ kɛɗn ɓii kɛn se. Ɔɔ naan̰ am kɛɗn maam ki kalum ki sum eyo, num naan̰ utu 'kɛɗn jeege tun paacn̰ jen̰a ɔɔ utu iŋg aak kaamin̰ ɓii kɛn naan̰ utu aɗe ɓaa se. 9Bin se, aay kaami 'ɓaaɗo ɔŋum kɛskɛ. 10Taa Demas lɛ rɛsumga, iin̰ ɓaaga gɛgɛr kɛn Tɛsalonik ki taa naan̰ uunga nakŋ dunia ɓo ciri. Kresen se, j'ɔlin̰ ɓaaga taa naaŋ Galat ki ɔɔ Tit kic ɓo j'ɔlin̰ ɓaaga taa naaŋ Dalmati ki. 11Ɔɔp Luk kalin̰ ki sum ɓo te maama. Kɛn naai 'ɓaaɗo ɓaa num, Mark se 'ɓaamsin̰o, taa naan̰ se utu am noogŋ maakŋ naab ki. 12Tisik se, maam m'ɔlin̰ ɓaaga maakŋ gɛgɛr kɛn Ɛpɛz ki. 13Kɛn 'ɓaakiro ɓaa se, uunumo kal kuulum magal se kɛn maam m'ɔn̰in̰o maakŋ gɛgɛr Troas ki gɔtn Karpos ki se. Ɔɔ 'tɔs 'ɓaamo ute kitapge ɔɔ kɛn maam jen̰ tap tap se kɛngen k'teelɗenga teel se. 14Kɔɗ‑kɔrɗn‑tɔɔl kɛn ron̰ Alekzandɛr se, tɛɗumoga kusin̰ aak eyo. Nakŋ naan̰ tɛɗ se, Mɛljege utu an̰sin̰ tɛrl don̰ ki. 15Naai kic ɔnd kɔnd te gaabm se, taa do taar kɛn naaje k'dooy jeege se, naan̰ took do ki eyo paac paac. 16Kaaɗ kɛn deet deetn gɔtn kɔjn̰ bɔɔr ki jaay, maam m'taaɗ taargen am naakŋ kɔɔɗn dom se, nam tap ɓo ɓaa te mɛtum ki eyo. Jeege paac rɛsumo. Taa nakŋ naaɗe tɛɗ se, ɔn̰ Raa ɔn̰te kɔkɗesin̰ ɔɔn̰ɔ. 17Naɓo Mɛljege mala se utu te maama ɔɔ naan̰ ɛɗumga tɔɔgɔ bin ɓo maam m'taaɗga taarin̰ jeege tu ute maraadin̰a ɔɔ taar Raa se, jeegen kɛn Yaudge ey se kic ɓo paac booyga. Ɔɔ Mɛljege se lɛ, aajumga taar tupiy ki. 18Mɛljege se, maakŋ gɔt kɛn ɔɔn̰ɔ paac se utu am kɔɔɗn doma ɔɔ am kaaja taa ansum ɓaa maakŋ gaarin̰ kɛn maakŋ raa ki. Ɔn̰ daayum daayum Mɛljege se, jeege an̰ nooko. Amin! 19'Tɛɗ tɔɔsɛ Priska ute Akilas ki ɔɔ 'tɛɗ tɔɔsɛ jeege tun maakŋ ɓee Onezipor ki kici. 20Erast se ɔɔpoga maakŋ gɛgɛr kɛn Kɔrint ki ɔɔ Tropim lɛ, maam m'ɔn̰in̰oga maakŋ gɛgɛr kɛn Milɛ ki, taa naan̰ kɔɔn̰ɔ. 21Kɔr kaaɗn kuulu 'kaan se, 'naar 'ɓaaɗo ɔŋuma. Ebul, Pudan, Linus, gɛnaa mɛnd Klɔdia ute gɛnaage paac tɛɗi tɔɔsɛ. 22Ɔn̰ Mɛljege se 'tɛɗn ute naai. Ɔɔ ɔn̰ naan̰ asen tɛɗn bɛɛn̰ naase ki paac.

will be added

X\