2 Timothée 3

1Daala 'jeele! Ɓiigen kaam mɔɔtn se, jeege kiŋgɗe utu aɗen tɛɗn ɔɔn̰ɔ. 2Taa ɓiigen kaam mɔɔtn se, jeege 'tɛɗn jee nakɔɔn̰ge, 'je gurs, 'tɛɗn jee koonge ɔɔ 'magal roɗe. Naaɗe 'naajn̰ Raa ɔɔ 'tookŋ taar kɛn̰ɗege ute bubɗege eyo. Jee se, bɛɛ kɛn k'tɛɗɗen se kic ɓo naaɗe jeele eyo. Nakŋ kɛn jee Raage aalin̰ maak ki se, naaɗe uum aalin̰ naaŋ ki; 3naaɗe se kɛn 'tɛɗn kusin̰a jeege tu kic ɓo ɔlɗen ɗim eyo, ɛɛj do jeege tu eyo, 'tɛɗn jee kɔɔɗn jeege, naaɗe ɔŋ bɔɔb ɔk roɗe eyo, tɛɗn kusin̰ jeege tu kic ɓo maakɗe raap sakan̰, ɔɔ nakŋ bɛɛ tap ɓo, naaɗe je eyo; 4naaɗe je kuɗn gɔɔ jeege, 'tɛɗn jee maak‑taarge, naaɗe magal roɗe aak eyo ɔɔ nakŋ daa roɗe ɓo je se, naaɗe jen̰ cir Raa. 5Ɗeere, naaɗe se, kɛn aakɗe num 'ɗeekŋ ɔɔ jee se, jee ɔk taar Raa ɔɔn̰ɔ, num naaɗe se, tɔɔgŋ Raa tap ɓo, naaɗe ɔɔɗ undin̰ naata. Anum jee se, naai ɔɔɗ doi roɗe ki dɔkɔ. 6Maakɗe ki se, jee mɛtin̰ge lee goon̰ ɓaa ɓee mɛndge tun ɔk tɔɔgɔ ɗoobm Raa ki eyo ɔɔ aasin̰ do roɗe ki eyo, ɔɔ mɛndgen se ɔk maakje do nakge tun jig eyo kɛn ɔlɗen maakŋ kusin̰ ki. Jee se lee dɛrlɗe taa aɗen kɔkŋ kaam jiɗe. 7Mɛndgen se je ɓo 'dooy jeele taar mɛt ki, naɓo naaɗe ɔŋ booy ɔkin̰ eyo. 8Aan gɔɔ Janez ute Jambrez baate tookŋ taar Musa se, jee se kic ɓo baate tookŋ taar mɛt ki. Naaɗe se jee tɔɔj eyo ɔɔ kaal maakŋ kɛn naaɗe ɔɔ aal do Isa ki se kic ɓo, cɛrɛ sum. 9Anum naabɗe se 'kɔŋ ɓaa dɔk eyo, taa jeege utu aɗen jeel paac, naaɗe se jee tɔɔj eyo aan gɔɔ Janez ute Jambrez se. 10Naai Timote se uunga bɔlɔtuma maakŋ dooy kɛn maam lee dooyo jeege se, kiŋguma, nakgen kɛn maam m'saap do ki gɛn tɛɗa, kaal maakum do Isa ki, maakum kɛn deere, maak‑je kɛn maam m'ɔk do jeege tu, kaay kaamum se, 11dubar kɛn jeege lee dabaruma ɔɔ dubar kɛn maam mala m'lee dabara. Naai 'jeele nakŋ kɛn jeege tɛɗumo dom ki maakŋ gɛgɛr kɛn Antiɔsn kɛn taa naaŋ Pizidi ki, ute kɛngen maakŋ gɛgɛrge tun Ikɔniɔm ute kɛn Listir ki se, ɗeere, gɔtn se jeege dabarumga dɛn aak eyo. Gaŋ Mɛljege ɔɔɗumoga doma maakŋ nakge tun se paac. 12Anum 'booyo! Jee paacn̰ kɛn je kɔkŋ ɗoobm Isa al‑Masi ɔɔn̰ se, naaɗe se jeege utu aɗen lee dabara. 13Anum jee kusin̰ge ute jee kɔrɗge se lɛ, utu 'tɛɗn kusin̰ 'ɓaa ute naanɗe. Naaɗe utu 'dɛrl jeege ɔɔ naaɗe kic jeege utu aɗen dɛrl naaɗe kici. 14Num naai Timote taar kɛn jeege dooyio jaay naai 'tooko ɔɔ aal maaki do ki se, ɔkin̰ tɔɔgɔ. Taa jeegen dooyio taar se jaay naai 'took do ki se lɛ, naai kic 'jeelɗe. 15Ɗeere, gɔtn naai iin̰ baatiki tap ɓo, naai 'jeel taargen salal kɛn k'raaŋin̰oga raaŋ maakŋ Kitap ki ɔɔ taargen se ɓo ɔk tɔɔgɔ kɛn ai tɛɗi naai 'jeel taara kɛn ai kaaja ute kaal maaki kɛn naai aal do Isa al‑Masi ki se. 16'Booyo: Kitapm Raa se kɛse Raa mala ɓo kɛn ɔl jeege raaŋin̰o. Taar se jiga aak eyo gɛn dooy jeege, ɔɔ taargen kɛn k'lee dooy jeege mɛt ki ey se lɛ, naan̰ taaɗ took mɛtin̰ tooɗ tal. Ɔɔ Kitapm Raa se ɔnd jeege do ɗoob ki ɔɔ taa jeege 'tɛɗn nakŋ ute ɗoobin̰a naan Raa ki. 17Bin jaay ɓo, debm tɛɗn naabm Raa se 'tɛɗn debm mɛc, 'kɔŋ ɗaapm ron̰a ɔɔ tɛɗn naabgen jiga jiga.

will be added

X\