2 Timothée 2

1Naai goonuma, ɔk maaki tɔɔgɔ do bɛɛ kɛn ɗoobm Isa al‑Masi ki se. 2Ɔɔ taar kɛn naai 'booyo maam m'dooyo jeege naan saaɗge tun dɛn se, taar se 'ɓaa dooyin̰ jeege tun 'booy kɔkŋ mɛtin̰ mɛc taa naaɗe 'kɔŋ kaasn dooy taar se jeege tun kuuy kici. 3Naai kic 'dabar te maama aan gɔɔ asgar Isa al‑Masi kɛn mɛc. 4Asgar jaay je 'tɔl deb kɛn uunin̰ se, naan̰ ɔlin̰ te nakgen jeege lee tɛɗ se ey sum. 5Aak jee taan̰ge se: debm aan̰ aan̰ga te ɗoobin̰a ɔɔ aanga deet jaay ɓo, j'aalin̰ aace. 6Debm aay kaamin̰ kurs maakŋ‑gɔtin̰ se, kɛn maakŋ‑gɔt se jaay oojga num, naan̰ ɓo kɔsn nakin̰ deete. 7'Saap jiga do taarge tun maam m'taaɗi se. Ɔɔ Mɛljege ai tɛɗi naai 'jeel kɔkŋ mɛtn nakgen se paac. 8'Saap do Isa al‑Masi ki: naan̰ se teeco mɛtjil Gaar Daud ki. Naan̰ se ooyga ɔɔ duro daan yoge tu ɔɔ kɛse ɓo Labar Jigan kɛn maam m'lee m'taaɗ jeege tu se. 9Taa Labar Jigan se ɓo, maam m'dabar bini, k'j'ɔk k'dɔɔkum aan gɔɔ debm kɛn tujga tuj ɗim. Naɓo taar Raa se, j'an̰ kɔŋ gaas eyo. 10Taa naan̰ se ɓo, maam m'sɛrk nakge paac taa jee kɛn Raa bɛɛr tɔɔɗɗenga tɔɔɗ do dɔkin̰ se, taa naaɗe kic 'kɔŋ kaaja ute ɗoobm Isa al‑Masi ɔɔ 'kɔŋ nookŋ gɛn daayum. 11'Booyo! Taargen ese se taargen mɛt ki: Kɛn naajege jaay j'ooykiga te naan̰ se, j'utu j'aki kɔŋ kaaja te naan̰ kici; 12kɛn naajege jaay k'dabarki ute naan̰ se, j'utu j'aki ɓaa kɔsn gaara te naan̰ kici. Kɛn naajege jaay k'baatin̰kiga se, naan̰ kic ajeki baat naajege kici; 13kɛn naajege jaay k'tujkiga ɔrmjege se, naan̰ se, daayum tuj ɔrmin̰ eyo, taa naan̰ se 'kɔŋ baatn ron̰ eyo. 14Taargen se paac 'tɛrl taaɗɗesin̰a. Naan Raa ki se, 'taaɗɗen ute tɔɔgi paac: j'ɔn̰te tɛɗn dɛkɛn̰ɛ do taarge tun mɛtin̰ge se. Taa naajn̰ taara se nakŋ cɛrɛ ɔɔ 'kutn jee kɛn lee booyin̰ se. 15Aay kaami, naan Raa ki se 'tɛɗ debm mɛcn̰ kɛn 'tɔɔl Raa ki, ɔɔ tɛɗ aan gɔɔ debm tɛɗn naabm kɛn ɔk sɔkɔn̰ eyo kɛn taaɗ taar Raa mɛt ki ute ɗoobin̰a naan jeege tu. 16Ɔɔɗ doi do taarge tun jeege lee ul rɛn̰ rɛn̰ jaay rɛsn ute ɗoobm Raa se. Taa jeegen lee tɛɗn naan̰ ese se, naaɗe daayum tɛɗ kusin̰a ɓaa ute naanɗe. 17Taar naaɗe se aan gɔɔ du kɛn ɔŋ eep eyo ɔɔ ɔs ɓaa ute naanin̰a. Imɛnɛ ute Pilɛtɔs se, mɛtn jee se kici. 18Jee se rɛsŋga ute taar mɛt ki. Ɔɔ naaɗe taaɗ jeege tu ɔɔ: kaaɗn kɛn Raa utu dur jeegen ooyga kooy se, deelga. Bin ɓo jee utu aal kaal maakɗe do Isa ki se, naaɗe tujɗenga kaal maakɗe se kici. 19Num gaŋ mɛtn taar kɛn Raa uuno mɛtin̰ se, utu iŋg gɔtin̰ ki tak; naan̰ se tec aan gɔɔ kuun mɛtn ɓee kɛn k'raaŋin̰ ro ki j'ɔɔ: «Mɛljege Raa se, jeel jeen̰ge» ɔɔ «Debm jaay taaɗga ɔɔ naan̰ gɛn Mɛljege se, n̰'ɔɔɗ don̰ ro kusin̰ ki.» 20Debm maal ɔk ɓee magal se maakŋ ɓeen̰ ki se, ɔk nakgen k'ɗaapɗe ute daab ɔɔ te pudda sum eyo. Num maak ki se ɔk nakgen j'ɔɓɗe te nɛn̰jɛ ɔɔ kɛngen kaagge ɓo k'cɔɔc k'ɗaapɗe kici. Nakgen jiga se, k'j'ɔɔɗɗe ute ɓiin̰ ɓiin̰a ɔɔ kɛngen mɛtin̰ge se, kɛn k'lee k'tɛɗn naaba ɓii‑raa. 21Bin num debm kɛn ɔɔɗga don̰ ro kusin̰ ki ɔɔ tɛɗ ron̰ salal se, naan̰ tɛɗga aan gɔɔ nakŋ jiga, kɛn mɛlin̰ ɔɔɗin̰ ute ɓiin̰ ɓiin̰a. Ute naan̰ se naan̰ tɛɗn naabgen jiga kɛn mɛlin̰ maakin̰ jen ro ki. 22Anum nakŋ kusin̰ kɛn gaan kɔɗge maakɗe je se, naai iik ro ki dɔkɔ. Num 'je nakŋ te ɗoobin̰a, daayum aal maaki do Raa ki, je jeege ɔɔ daan jeege tun lee eem Mɛljege ute maakŋ kalaŋ se, naai iŋg te tɔɔsɛ ute naaɗe. 23Bin num, ɓɛrɛ, ɔn̰te kɔl doi do naajn̰ taarge tun rɛn̰ rɛn̰ gɛn jee dɛrlge se. Taa naai 'jeele, naajn̰ taargen bin se, lee ɓaano ɓaa ute mooyo. 24'Jeele debm tɛɗn naabm Mɛljege se, 'kɔŋ mooy te jeege eyo. Num naan̰ 'tɛɗn debm je jeege paac, jeel dooy jeege ɔɔ sɛrkŋ jee naajn̰ taarge. 25Jee kɛn lee naaj taara se, naai 'taaɗɗen te taar urlu. Bin sum ɓo, daan Raa utu aɗen tɛrl maakɗe ɔɔ naaɗe utu 'jeel taar mɛt ki, 26ɔɔ naaɗe 'tɛrl 'tɛɗn jee mɛtɛkge ɔɔ aɗe kɔŋ teecn̰ maakŋ ji Ɓubm sitange tun kɛn ey num tɔkɗenga tɔk ɓulu gɛn tɛɗn maakjen̰a.

will be added

X\