2 Timothée 1

1Kɛn ara maam m'Pɔl ɓo m'raaŋi maktubm se, maam kɛn m'debm kaan̰ naabm Isa al‑Masi aan gɔɔ kɛn Raa maakin̰ jen ro ki. Naan̰ ɓo ɔlumo taa m'ɓaa taaɗn jeege tu taar kaajn̰ kɛn naan̰ taaɗga taaɗ ɔɔ utu 'kɛɗn jeege tu ute ɗoobm Isa al‑Masi se. 2Maktubm se maam m'raaŋin̰ naai Timote ki, goon maak‑jema: ɔn̰ Raa Bubu ute Mɛljege Isa al‑Masi tɛɗn bɛɛɗe, ai kɛɛjn̰ doi ki ɔɔ ai kɛɗn lapia. 3Maam se m'tɔɔm Raa kɛn maam m'lee m'tɛɗin̰ naabin̰ ute maakŋ kalaŋ aan gɔɔ gɛn ɓugumgen lee tɛɗo do dɔkin̰ se. Nɔɔrɔ katara, kɛn maam jaay m'ɓaan̰ ɓaa keeme se, daayum maam m'tɔnd mɛtin̰ taa naai Timote. 4Kɛn maam m'saapo do keemi kɛn naai eemo taa maam se, maam m'je ute maakum paac tɛrl m'ai ɓaa kaakŋ ute kaamum jaay ɓo, maakum 'raapo. 5Maam m'saap do kaal maaki kɛn mala mala kɛn naai aal do al‑Masi ki se; kaal maakŋ bin se ɓugi mɛnd Lois naan̰ kic aalo maakin̰ do Raa ki jaay ɓo koi Enis kic ɓo aalo maakin̰ bin kici ɔɔ ɓɔrse maam jeel maakum ki, naai kic ɓo aal maaki do Isa al‑Masi ki bin kici. 6Taa naan̰ se ɓo m'je m'ai taaɗa: 'saap do naabm kɛn Raa ɛɗisin̰ gɛn tɛɗa se, kaaɗ kɛn maam m'ɔndo jim doi ki. Ɔɔ naabm se ɔn̰te 'dirigin̰a. 7Taa Nirl kɛn Raa ɛɗjekiro se ajeki tɛɗn j'aki ɓeer eyo, num Nirl Raa se, ɛɗjeki gaab‑tɔɔgɔ, maak‑je do jeege tu ɔɔ tɛɗjeki k'bɔɔb j'ɔkki rojege. 8Taa naan̰ se ɓo ɔn̰ten tɛɗn sɔkɔn̰ɔ gɛn tɛɗn saaɗn Mɛljege; ɔɔ ɔn̰ten tɛɗn sɔkɔn̰ɔ taa maam kɛn j'ɔkum daŋgay taa al‑Masi. Num gaŋ 'dabar ute maama taa Labar Jigan gɛn Isa ute tɔɔgŋ Raa kɛn ɛɗi se. 9Raa se naan̰ ɓo debm aajjekiro jaay daŋjekiro taa j'aki tɛɗn jee naan̰ge. Num naan̰ tɛɗin̰ naan̰ se taa naajege ɓo k'tɛɗkiroga tɛɗ nakŋ jig eyo, num taa bɛɛn̰ kɛn naan̰ mala maakin̰ jen ro ki. Ɔɔ bɛɛ ese se, naan̰ tɛɗin̰ ute ɗoobm Isa al‑Masi kaaɗ kɛn naan̰ taaɗ te taa kaal do naaŋ ey ɓɔrtɔ, 10ɔɔ ɓɔrse, Mɛl Kaajjege, Isa al‑Masi se ɓaaɗo sum se, bɛɛn̰ se, naan̰ taaɗin̰ tooɗga tal. Taa Isa al‑Masi se naan̰ ɔk tɔɔgɔ do yo ki, ɔɔ yo se naan̰ tɛɗga aan gɔɔ nakŋ cɛrɛ; ute Labarin̰ Jiga se Isa ɓaanoga te kaajn̰ gɛn daayum kɛn 'kɔŋ ɗaar eyo. 11Taa Labar Jigan ese se ɓo, Raa tɛɗum m'tɛɗga debm kaan̰ naabm Isa, debm wɔɔkŋ taarin̰a ɔɔ debm dooy jeege. 12Taa naan̰ se ɓo maam m'utu m'dabar dabar rɔk se. Naɓo sɔkɔn̰ tɔɔlum eyo, taa debm maam m'aal maakum don̰ ki se lɛ, maam m'jeelin̰a ɔɔ naan̰ ɔk tɔɔgŋ kɛn 'bɔɔbm nakgen paacn̰ kɛn naan̰ ɔn̰umsin̰ kaam jim se bini 'kaan ɓii kɛn kaam mɔɔtn kɛn Raa utu 'kɔjn̰ bɔɔrɔ do jeege tu paac. 13Ute kaal maaki ɔɔ ute maak‑je kɛn naai ɔk do jeege tu kɛn ɗoobm Isa al‑Masi ki se, taar mɛcn̰ kɛn maam m'dooyi se, 'ɓaa te naan̰ se. 14Taar kɛn jiga kɛn maam m'dooyi se 'bɔɔbin̰ maaki ki jiga. Ɔɔ Nirl Salal kɛn utu maakje ki se ai noogo. 15Naai 'jeele gɛnaagen paacn̰ kɛn taa naaŋ Azi ki se, rɛsumga. Maakɗe ki se Pigel ute Ermogen kici. 16Ɔn̰ Mɛljege 'tɛɗn bɛɛn̰ maakŋ ɓee Onezipor ki. Taa Onezipor se daayum ɛɗum kaay kaama ɔɔ kɛn maam maakŋ daŋgay ki se kic ɓo, naan̰ sɔkɔn̰ tɔɔlin̰ eyo taa maama. 17Anum kɛn naan̰ aan maakŋ gɛgɛr kɛn Rɔm ki sum se, naan̰ jem wɔrɔk wɔrɔk bini jaay ɓaa ɔŋuma. 18Ɔn̰ ɓii kɛn kaam mɔɔtn Raa kɔjn̰ bɔɔrɔ do jeege tu se, Mɛljege Isa al‑Masi an̰ kɛɛjn̰ don̰ ki naan Raa ki. Bɛɛ kɛn naan̰ tɛɗumo maakŋ gɛgɛr kɛn Ɛpɛz ki paac se, nam jaay jeelin̰ aan gɔɔ naai Timote se gɔtɔ.

will be added

X\