2 Thessaloniciens 2

1Gɛnaamge, Mɛljege Isa al‑Masi utu aɗe ɓaa ɔɔ naajege j'utu j'aki tusn cɛɛn̰ ki. Taa naan̰ se naaje k'taaɗsen j'ɔɔ: 2nirlse ɔn̰ten naar teece ɔɔ ɔn̰ten 'ɓeerki do taar kɛn jeege taaɗ ɔɔ ɓiin Mɛljege aɗe ɓaa se aanga. Taar se kɛn nam taaɗ taar teeco taar Raa ki ɓo ɓaaɗo taaɗseni, lɔ kɛn nam kuuy ɓo taaɗsen ute taarin̰a ey lɛ kɛn nam ɓo taaɗsen ɔɔ naaje ɓo k'raaŋin̰a, ɔn̰ten 'tookki do ki. 3Ute ɗoobm taar gay kic ɓo, ɔn̰ten kɔn̰ki nam asen dɛrlɛ. Bɛɛki se, kɔr jee dɛna 'kɔɔɗn kund Raa se, Debm Kusin̰ deelga te gɔtin̰ kɛn Raa an̰ kutin̰ maakŋ pooɗ ki se, j'utu j'an̰ kaakŋ tal. 4Debm Kusin̰ ese se 'gaasn jeege gɛn keem Raa ey lɛ gɛn kɛrgŋ naan nakge tun kuuy. Bini, naan̰ ɓaa kɛnd kisn kiŋg maakŋ Ɓee Raa ki ɔɔ taaɗn jeege tu ɗeek ɔɔ: maam se ɓo m'Raa. 5'Saapki tu kaaɗ kɛn j'iŋgkiro tɛl se do nakge tun se maam m'taaɗsenoga ey la? 6Ɓɔrse Debm Kusin̰ kɛn deel te gɔtin̰ ese se nakŋ gaasin̰ ɗoobo se naase kic 'jeelin̰ki; num kɛn kaaɗn Raa ɔndin̰ se aasga jaay, naan̰ utu aɗe teecn̰ tal. 7Tɔɔgŋ kɛn k'jeel mɛtin̰ eyo gɛn Debm Kusin̰ deelga te gɔtin̰ se ɓɔrse naan̰ tɛɗ tɛɗn naabin̰a naɓo bini debm gaasin̰ ɗoobo se 'tɛɗn gɔtɔ jaay ɓo j'utu j'an̰ kaakŋ naan̰ aɗe 'teecn̰ tal. 8Gɔtn se Debm Kusin̰ deelga te gɔtin̰ ese se j'utu j'an̰ kaakin̰ teecn̰ tal, ɔɔ kɛn Mɛljege Isa jaay aɗe ɓaa se, ute kuul 'teecn̰ taarin̰ ki se sum ɓo an̰ tɔɔlin̰ mak ɔɔ ute tɔɔgin̰ se naan̰ utu an̰ kutn kap. 9Kɛn Debm Kusin̰ deelga te gɔtin̰ ese aɗe ɓaa ute tɔɔgŋ Ɓubm sitange se, naan̰ 'tɛɗn napar nakŋ‑kɔɔɓge ute nakgen magal magal deel do se, taa an dɛrl jeege. 10Naan̰ 'tɛɗn napar nakgen jig ey se kaam dɛna taa an dɛrl jeegen kɛn ɓaa ɓaa gɔtn kut ki. Jee se 'kut se taa naaɗe je tookŋ do taar kɛn mɛt ki eyo. Ey num kɛn naaɗe jaay booy uunoga kuun num, daan Raa aɗeno kaaja. 11Taa naan̰ se ɓo, Raa ɔlɗen saapm gɛn bi doɗe, kɛn ɔlɗe naaɗe aal maakɗe do nakŋ kɛn mɛt ki ey se. 12Taa naan̰ se ɓo jeegen jaay baate tookŋ do taar kɛn mɛt ki ɔɔ maakɗe‑raapo gɛn tɛɗ kusin̰a sum se, bɔɔrɔ utu koocn̰ doɗe ki. 13Gɛnaamge, naasen kɛn Mɛljege jese, daayum naaje k'tɔɔm Raa taa naase. Taa kaaɗ kɛn Raa utu aal kaal duni se ɓo naan̰ bɛɛr tɔɔɗsenoga tɔɔɗɔ taa asen kaaja ute tɔɔgŋ Nirl Salal. Naan̰ tɛɗsen naase 'tɛɗkiga jee naan̰ge ɔɔ aajse se taa naase 'tookkiga took do taar kɛn mɛt ki. 14Raa daŋseno se taa asen kaaja ute Labar Jigan gɛn al‑Masi kɛn naaje k'taaɗseno se, taa naase aki kɛnd maakŋ nookŋ gɛn Mɛljege Isa al‑Masi ki. 15Taa naan̰ se, gɛnaamge, 'ɗaarki tɔɔgɔ ɔɔ nakgen paacn̰ naaje k'taaɗseno ute taarje, ey lɛ k'raaŋseno maakŋ maktub ki gɛn tɛɗa se, iŋgki do ki. 16Ɔn̰ Mɛljege Isa al‑Masi naan̰ mala ɔɔ Bubjege Raa kɛn jejeki, ɔɔ ute bɛɛn̰ se, ɛɗjeki kaay kaam gɛn daayum ute nakŋ j'anki kɔnd dojege do Raa ki gɛn kɔŋ kaaja, 17asen sɛl maakse ɔɔ asen kɛɗn tɔɔgɔ gɛn tɛɗn nakgen bɛɛ, ɔɔ bɛɛ ese se maakŋ nakge tun naase 'tɛɗki ey lɛ do taarge tun paacn̰ kɛn naase 'lee taaɗki kici.

will be added

X\