2 Pierre 3

1Naase mɛɗn kɔɔn̰ maakumge, kɛse maktubm kɛn maam m'raaŋsen gɛn k‑dige. Maakŋ maktubge tun di kɛn maam m'raaŋsen se maam m'taaɗ m'ɗɔɔlsen mɛtn taargen naase 'jeelin̰kiga jeele, taa taargen se asen kɔl naase aki 'saapm do ki jiga. 2'Saapki do taarge tun do dɔkin̰ kɛn jee taaɗ taar teeco taar Raa ki kɛn salal taaɗo ɔɔ 'saapki do nakŋ kɛn Mɛljege ɔɔ Debm Kaajjege ute jee kaan̰ naabin̰ge kɛn taaɗo ɔɔ j'an̰ki tɛɗ se kici. 3Deet deet se, 'jeelki, ɓiigen kaam mɔɔtn se, jeegen jee kaakŋ mɛtn jeege se utu aɗe ɓaao ɔɔ naaɗe se lɛ tɛɗn nakŋ daa roɗege ɓo jea. 4Naaɗe utu 'taaɗn ɔɔ: «Taar kɛn naan̰ taaɗo aɗe ɓaa se tap ɓo 'tɛɗn nuŋ ki? Ey num do dɔkin̰ gɔtn ɓugjege ooy sum se, ɓɔrse kic nakge paac utu iŋg gɔtɗe ki aan gɔɔ kɛn Raa utu aalo kaal dunia tap!» 5Do dɔkin̰ se kɛn Raa aalo maakŋ raa ute do naaŋa se ute taarin̰a, Raa 'tusn maane kaam kalaŋ jaay ɔn̰ do naaŋa ɔɔ do naaŋa se kic ɓo naan̰ aalin̰ ute maane. Gaŋ do taar kɛn ese se jee se baate tooko. 6Ute maane se ɓo, Raa gɔɔb tɔɔlo jeegen do dɔkin̰ do naaŋ ki se kici. 7Maakŋ raa ute do naaŋ se ɓɔrse kic ɓo Raa bɔɔbɗe ute taarin̰a, bini 'kaan ɓii kɛn naan̰ an̰ tɔɔcin̰ ute pooɗo. Naan̰ bɔɔbɗe se taa ɓii kɛn naan̰ an kɔjn̰ bɔɔrɔ do jeege tu se; jee aal Raa maak ki ey se, naan̰ aɗen kutn naatn kap. 8Naase, mɛɗn kɔɔn̰ maakumge, ɔn̰te 'tɛɗsen dirigi taa naan Raa ki se, ɓii kalaŋ se aan gɔɔ ɓaar dupu ɔɔ ɓaar dupu se aan gɔɔ ɓii kalaŋ. 9Mɛljege se nakŋ naan̰ taaɗga ɔɔ an̰ tɛɗ se utu an̰ naar tɛɗa, gaŋ jee mɛtin̰ge se saap ɔɔ Raa se deer dɛn dɛna. Num naan̰ baate tɛɗin̰ yɔkɔɗ se taa naase; taa naan̰ je nam 'kut eyo ɔɔ je jeege paac tɛrl maakɗe. 10Kɛn kaaɗin̰ jaay 'kaan se, Mɛljege aɗe ɓaa aan gɔɔ debm ɓoogo. Ɓiin Mɛljege ano ɓaa se jeege booy aan gɔɔ Raa taata naɓo 'taatn cir kaaɗ kɛn maane eeɗ keeɗe ɔɔ ɓii kɛn se maakŋ raa kic ɓo 'kaan̰ kiigŋ gam. Nakgen maakŋ raa ki paac se 'kɔsn pooɗo ɔɔ do naaŋa ute nakgen do ki paac se mɛtin̰ utu tooɗn tal. 11Aan gɔɔ nakge paac utu kɔsn pooɗo se, bin se 'leeki aak bɛɛ naan Raa ki ɔɔ Raa se 'ɓeerin̰ki! 12Aakki kaam ɓiin kɛn Raa ano ɓaao, bin se ɓo aayki kaamse 'tɛɗki nakŋ jiga ɔɔ kɛse ɓo kɛn an̰ kɔlin̰ naan̰ aɗe naar ɓaao. Ɓii kɛn se ɓo maakŋ raa ute magalin̰ se 'kɔsn pooɗo ɔɔ nakgen maakŋ raa ki se 'kɔsn pooɗo paac. 13Num gaŋ naajege se, Raa taaɗjekiga taaɗ ɔɔ utu ajeki kaal maakŋ raa ute do naaŋ kiji ɔɔ gɔtn naane se ɓo nakge paac 'tɛɗn ute ɗoobin̰a. Kɛse ɓo nakŋ kɛn naajege j'iŋg j'aakki kaama. 14Taa naan̰ se ɓo naase mɛɗn kɔɔn̰ maakumge, aan gɔɔ naase utu iŋg aakki kaak kaam Mɛljege utu aɗe ɓaa se, aayki kaamse 'tɛɗki jee salal ɔɔ nakŋ aak kus se j'ɔn̰te kɔŋ rose ki ɔɔ naan̰ asen kɔŋ se, naase utu iŋgki kiŋg ute lapia. 15'Jeelki, Mɛljege jaay baate ɓaaɗo yɔkɔɗ se, naan̰ je taa naase aki kɔŋ kaaja. Taa naan̰ se ɓo gɛnaajege Pɔl naan̰ kɛn mɛɗn kɔɔn̰ maakjege se, naan̰ raaŋsenoga taargen se ute jeel‑taar kɛn Raa ɛɗin̰ se. 16Maakŋ maktubge tun kɛn naan̰ raaŋɗeno paac se, naan̰ taaɗoga mɛtn taar nakgen se ɔɔ mɛtn taar nakgen naan̰ taaɗno se booy kɔkin̰ ɔɔn̰ɔ. Taa naan̰ se ɓo jee jeel ɔk te mɛtn taar Raa eyo ɔɔ iŋg kaam kalaŋ ey se, mɛtn taargen ese se, naaɗe lee taaɗin̰ ute ɗoobin̰ eyo aan gɔɔ kɛn naaɗe lee taaɗ tuj Taar Raa gɔt kuuy se kici. Kɛn naaɗe jaay tɛɗ bin se, naaɗe ut kut ɓo roɗege. 17Bin ɓo, naase mɛɗn kɔɔn̰ maakumge, taa taargen se lɛ, maam m'aalsenga bise ki: taa naan̰ se ɓo m'ɔɔ ɔndki kɔndɔ ɔɔ iŋgki do mɛtɛkse ki. Ɔn̰te kɔn̰ki rose jee aal Raa maak ki ey se asen kiigi num 'ɗaarki tɔɔgɔ. 18Ɔn̰ bɛɛ ute jeel gɛn Mɛljege ɔɔ Debm Kaajjege Isa al‑Masi se 'ziiɗn ɓaa ute naanin̰ maakse ki. Ɔn̰ jeege paac an̰ nookŋ ɓɔrse ɔɔ gɛn daayum daayum. Amin.

will be added

X\