2 Pierre 1

1Kɛse maam Simon Piɛr, maam kɛn m'debm tɛɗn naabm Isa al‑Masi ɔɔ m'debm kaan̰ naabin̰ se ɓo, m'raaŋsen maktubm ara se, naase jeege tun kɛn took aalkiga maakse jiga do al‑Masi ki aan gɔɔ naaje se kici, ute nakgen kɛn Raajege ɔɔ Mɛl Kaajjege Isa al‑Masi tɛɗin̰ ute ɗoobin̰ se. 2Ute jeel kɛn naase 'jeelki Raa ute Mɛljege Isa al‑Masi se, ɔn̰ Raa asen tɛɗn bɛɛ ɔɔ asen kɛɗn lapia ute maraadin̰a. 3Taa ute tɔɔgŋ Raa se naan̰ ɛɗjekiga nakgen jiga kɛn ajeki kaasn gɛn tiŋgi ɔɔ gɛn kɔkŋ taarin̰ ɔɔn̰ɔ. Naan̰ tɛɗjekiga k'jeelkiga debm daŋjekiro taa j'aki kɛnd maakŋ nookin̰ ki mala ɔɔ j'aki kɔŋ bɛɛ naan̰ kɛn jiga cir paac se. 4Ute nakgen se ɓo nakgen jig aak eyo kɛn do dɔkin̰ Raa taaɗjekiro ɔɔ ajeki kɛɗ se, naan̰ ɛɗjesin̰kiga. Bin ɓo ute nakgen naase ɔŋin̰kiga se asen tɛɗn naase aki kaan̰ kɔtn ro nakge tun jig ey kɛn jee jeel Raa mal eyo, lee dɔŋ se ɔɔ naase aki kiŋg tec aan gɔɔ kiŋg gɛn Raa. 5Taa naan̰ se aayki kaamse 'ziiɗki do kaal maakse ki se, kiŋg kɛn aak bɛɛ naan jeege tu, ɔɔ do kiŋg kɛn aak bɛɛ naan jeege tu se, 'ziiɗin̰ki jeel Raa, 6ɔɔ do jeel Raa ki se, 'ziiɗin̰ki 'bɔɔb kɔkŋ ro jiga ɔɔ do bɔɔb kɔkŋ ro kɛn jiga se, 'ziiɗin̰ki tɔɔgŋ maaka ɔɔ do tɔɔg maak ki se, 'ziiɗin̰ki kɔkŋ taar Raa ɔɔn̰ɔ, 7ɔɔ do kɔkŋ taar Raa kɛn ɔɔn̰ se, 'ziiɗin̰ki kɔkŋ naapm ɔɔn̰ɔ ɔɔ do kɔkŋ naap kɛn ɔɔn̰ se, 'ziiɗin̰ki maak‑jea kici. 8Kɛn napar nakgen se jaay naase ɔkki ute maraadin̰ se, naase aki kɔŋ tɛɗn nakgen jiga aki ɓaa ute naan se. Bin jaay naase aki jeel kɔkŋ Mɛljege Isa al‑Masi se jiga. 9Num gaŋ debm kɛn tɛɗn nakgen ese ey se, naan̰ se aan gɔɔ debm kaam‑tɔɔkŋ kɛn ɔŋ aak ɔk gɔtɔ jig eyo. Ey num Raa se, kusin̰in̰ do dɔkin̰ se naan̰ tɔɔlin̰sin̰ga, naɓo naan̰ se, dirigin̰ga naata. 10Taa naan̰ se ɓo gɛnaamge, aayki kaamse daala 'dɔɔkki maakse do Raa kɛn daŋseno ɔɔ 'bɛɛr tɔɔɗseno se. Kɛn naase jaay 'tɛɗki bin num, mɔɔtn naase aki kɔŋ koocn̰ ɗoobm Raa ki eyo. 11Ɗeere bin ɓo, Raa asen kɔɔɗn taa ɗoobm tooɗn waŋ gɛn maakŋ gaar daayum gɛn Mɛljege ɔɔ Debm Kaajjege Isa al‑Masi se ɔɔ naase aki kɛnd maak ki. 12Taa naan̰ se ɓo daayum m'asen lee taaɗn ɗɔɔl daala mɛtn taargen se, ey num taargen se naase 'jeelɗekiga ɔɔ ɓɔrse kic ɓo utu iŋgki jiga do taarge tun kɛn mɛt ki kɛn k'dooyseno se. 13Ɗeere, kaaɗ kɛn maam m'utu m'iŋg zɛɛr se, m'je daayum taargen se m'asen lee taaɗn ɗɔɔlɔ. 14Maam se m'jeele ɔɔpga baata m'kooyo taa Mɛljege Isa al‑Masi se taaɗumga taaɗa. 15Bin se ɓo maam m'aay kaamum m'taaɗsen taargen se, taa kɛn maam m'ooyga kic ɓo, daayum naase aki kɔŋ dirigŋ taargen se eyo. 16Taa naaje se k'taaɗsenoga j'ɔɔ Isa al‑Masi se utu aɗe ɓaa ute tɔɔgin̰a ɔɔ taargen naaje k'taaɗseno se tec aan gɔɔ taargen kɛn jikilimge lee tɛrɛc ute daan doɗege ɓo taaɗ se eyo. Num gaŋ naaje se j'aako nookin̰a ute kaamje mala. 17Kaaɗ kɛn jaay Raa Bubu nookin̰a ɔɔ magalin̰ se, naan̰ kɛn se naaje mala j'utu. Naaje k'booyo taargen Raa kɛn magal cir nakge paac kɛn taaɗin̰ ɔɔ: «Naan̰ se Goonuma, Goon maak‑jema ɔɔ naan̰ tɔɔlum jaay maam m'bɛɛr m'ɔɔɗin̰o.» 18Kaaɗ kɛn se naaje kic ɓo j'utu te naan̰a do ko kɛn salal ese ɔɔ taar kɛn Raa taaɗo maakŋ raa ki se, naaje mala kic ɓo k'booyin̰oga ute bije. 19Do naan̰ ki se tɛr naajege j'ɔkki taar jee gɛn taaɗ taar teeco taar Raa ki. Ɔɔ taar naaɗege se taar mɛc ɔɔ kɛn naase jaay iŋg uɗki bi do ki se, taar se mɛt ki. Taa taar naaɗege se tec aan gɔɔ lɔɔmpɔ kɛn iŋg wɔɔr gɔtn kɛn ɔɔɗɔ kɔr bini gɔtɔ kiipi ɔɔ k‑dijn̰, kɛn k'daŋin̰ bɛbɛlɛ se, aɗe kooko ɔɔ asen wɔɔr maakse. 20Deet deet se taargen se 'jeelɗeki jiga: taargen jee taaɗ taar teeco taar Raa ki do dɔkin̰ raaŋin̰o maakŋ Kitap ki se, taargen se naaɗe uun doɗege tu sum ɓo taaɗ eyo. 21Num taargen jaay jee taaɗ taar teeco taar Raa ki do dɔkin̰ taaɗo se, iin̰o maakŋ maak‑saapm jikilimge tu eyo. Gaŋ taargen se Nirl Salal ɓo ɔlɗeno naaɗe taaɗo ɔɔ taargen naaɗe taaɗo se, iin̰o gɔtn Raa ki.

will be added

X\