2 Jean 1

1Maam kɛn naan egliz ɓo m'raaŋi maktubm se naai ki ute gɛnige, naai ɓo Mɛnd kɛn Raa bɛɛr ɔɔɗio. Maam se m'jese ute maakum paac. Maam m'kalumki sum ɓo m'jese eyo, num gaŋ jee jeel taar mɛt ki paac se jese kici. 2Ɔɔ taar mɛt ki se utu iŋg maakjege tu ɔɔ daayum utu tiŋg ute naajege. 3Ɔn̰ Raa Bubjege ute Goonin̰ Isa al‑Masi se ajeki tɛɗn bɛɛɗe, ajeki kɛɛjn̰ dojege tu ɔɔ ajeki kɛɗn lapia. Bin ɓo j'aki kiŋg ute maak‑jea ɔɔ ute kɛn mɛt ki. 4Maam se maakum‑raap aak eyo kɛn m'ɔŋ gɛnigen mɛtin̰ge jaay lee ɗoobm Raa kɛn mɛt ki se. Naaɗe se tɛɗ nakgen kɛn Raa Bubu taaɗjeki gɛn tɛɗa se. 5Bin se Mɛnda, ɓɔrse maam m'taaɗi m'ɔɔ: k'jeki naapa. Ɔɔ nakŋ kɛn Raa taaɗjeki gɛn tɛɗa se jaay ɔlum maam m'raaŋi se, kɛse kiji eyo. Gaŋ kɛse taar kɛn naajege k'booyin̰kiro do kuun mɛt ki. 6Kɛn naajege jaay k'jeki Raa se: kɛse naajege k'tɛɗki nakŋ kɛn Raa taaɗ ɔɔ gɛn tɛɗa. Taa nakŋ kɛn Raa taaɗo gɛn tɛɗa kɛn naase 'booyin̰kiro do kuun mɛt ki se, iŋgki do taar kɛn se. 7Jeegen lee aan̰ jeege dal se ɓaaɗoga dɛna do naaŋ ki. Num jee se ɓo kɛn Isa al‑Masi jaay ɓaaɗo tɛɗ ron̰ debkilimi do naaŋ ki se, naaɗe took do taar kɛn se eyo. Debm kɛn tɛɗ bin se ɓo kɛn lee aan̰ jeege dala ɔɔ naan̰ ɓo debm kɛn gɛc al‑Masi. 8Taa naan̰ se ɓo naase ɔndki kɔndɔ taa naabsen 'tɛɗki se 'kutn cɛr eyo, anum naabsen 'tɛɗki se utu aki kɔŋ bɛɗse ute maraadse. 9'Jeelki debm jaay naar aan̰ deel naan ki ɔɔ iŋg do taar al‑Masi dooyjekiro ey se, debm bin se Raa ute naan̰ eyo. Gaŋ debm jaay iŋg do taar al‑Masi dooyjekiro se, debm bin se naan̰ iŋg dɔɔk ute Raa Bubu ɔɔ ute Goonin̰a. 10Taa naan̰ se ɓo nam jaay ɓaaɗo taaɗsenga taar kɛn jaay tec gɛn Isa al‑Masi kɛn k'lee k'dooyjekiro ro ki ey se, debm bin se ɔn̰te 'kɔkin̰ki ɓeesege tu ɔɔ ɔn̰te 'tɛɗin̰ki tɔɔsɛ. 11Num debm jaay tɛɗin̰ga tɔɔsɛ ɔkin̰ ɔɔn̰ se, debm bin se ɛndga maakŋ kusin̰ kɛn debm se lee tɛɗ se. 12Ey num maam m'ɔk nakge dɛna kɛn m'je m'asen raaŋa, naɓo taargen se m'je m'aɗen raaŋ maakŋ maktub ki eyo. Taa maam mala m'saap m'utu m'asen ɓaa kaaka ɔɔ kɛn m'aanga naane naɓo j'aki taaɗn taara ute taara. Taa bin se maak‑raapjege se 'tɛɗn maak‑raap maraadin̰ ki. 13Gɛnaai Mɛnd kɛn Raa bɛɛr ɔɔɗin̰o ute gɛnin̰ge se 'tɛɗi tɔɔsɛ naai ki kici.

will be added

X\