2 Corinthiens 7

1Jee maak‑jemge, aan gɔɔ Raa taaɗjenkiga taaɗ ɔɔ utu ajeki tɛɗn nakgen se, k'tug k'ɗaapki rojege: j'ɔn̰te 'saapki ɔɔ j'ɔn̰te 'tɛɗki nakŋ kusin̰ naan Raa ki. Aan gɔɔ naajege k'ɓeerki Raa ki se, iŋgki kiŋg kɛn salal naanin̰ ki. 2Ɔɔɗjeki maakse ɔɔ 'jejeki. Naaje lɛ, k'tɛɗ te nakŋ kusin̰ nam ki eyo, k'rɛj te nam gɛn tuj nam eyo, ɔɔ nam lɛ j'aan̰in̰ te dal gɛn kuun ɗimin̰ eyo. 3Kɛn maam jaay m'taaɗsen taargen se, taa m'asen kɔkŋ mindse eyo. Ɗeere, taar se maam m'taaɗin̰oga taaɗa m'ɔɔ: naaje se k'jese ɔɔ kɛn yoje lɔɓu kaajje, naaje se k'tɛɗkiga kalaŋ ute naase. 4Maam se m'jeelse, maakum tap ɓo naaj dose ki eyo. Ute nakgen ɔɔn̰ kɛn aan doje ki se kic ɓo, maam m'ɔk maakum tɔɔgɔ ɔɔ ute naan̰ se kic ɓo, maakum raap dɛn aak eyo. 5'Jeelki, kɛn naaje jaay j'aan taa naaŋ Masedoan ki se, naaje j'ɔŋ te gɔtn tɔɔl maakje eyo. Num gɔtɔ ɓaa se paac nakgen ɔɔn̰ aan doje ki, jeege iin̰o roje ki ɔɔ gɔtn se nirlje ɔndje gak gak. 6Num Raa debm ɛɗjen kaay kaam se, naan̰ ɓo sɛljenga maakje ɔɔ ɛɗjenga kaay kaama ute kaan Titn gɔtn ara se. 7Num ute kaanin̰ gɔtn ara sum eyo, naɓo Tit taaɗjenoga ɔɔ naase ɛɗin̰kiroga kaay kaama. Kɛse ɓo kɛn sɛljen maakje ɔɔ ɛɗjen kaay kaama naaje ki kici. Naase 'jeki ɔkki amki kaakŋ ute kaamse tak. Taa nakŋ naase 'tɛɗki jig ey se ɛɗsenga maak‑tuju. Naase se 'je amki naaka ji jee wɔɔyumge tu. Kɛn maam jaay m'booy taar se, maakum raap dɛn aak eyo. 8Taa naan̰ se ɓo, maktubm kɛn maam m'raaŋsen se jaay tujsenga maakse kic num, naɓo maam ki se m'aakin̰ se ɔk taar eyo. Ɗeere, mɛtn‑jiki se, maam m'ɔɔ m'raaŋin̰ te ey kic ɓo jiga, taa maktubm se maam m'aakin̰ se tujsenga maaksen dɛn aak eyo, naɓo kɛn tujsen maakse se daanin̰ dɔk te eyo. 9Num gaŋ ɓɔrse, maam maakum raap taa maktubm kɛn maam m'raaŋsen se. Ey num maam se maakum raap taa maaksen tujse eyo. Num kɛn ɔlum jaay maakum raap se, taa naase 'jeelkiga kusin̰se ɔɔ 'tɛrlkiga maakse do Raa ki. Taa naan̰ se ɓo, maak‑tujn̰ naase se aan gɔɔ kɛn Raa maakin̰ jen ro ki, bin se naaje se k'tɛɗsen te kusin̰ eyo. 10Taa maak‑tujn̰ kɛn iin̰o gɔtn Raa ki se ɔl deba tɛrl maakin̰a ɔɔ ɔlin̰ gɔtn kaaj ki; ɔɔ maak‑tujn̰ bin se ɔk taar eyo. Num gaŋ maak‑tujn̰ gɛn do duni se lɛ, naan̰ se ɔl deba yo ki. 11Ɗeere, maak‑tujn̰ naase se iin̰o gɔtn Raa ki. Aakki nakŋ kɛn naan̰ ɔlse naase 'tɛɗki: ɓɔrse naase 'naar 'tɛrlkiroga gɛn tɛɗn nakŋ bɛɛ, naase 'jeki aki taaɗ 'ɗaapm taarse, nakŋ naase 'tɛɗkiro se 'saapin̰ki ɔɔki kɛn tɛɗin̰kiro te ey kic ɓo bɛɛ, kusin̰ naase 'tɛɗki se ɔlsenga ɓeere maakse ki, naase je amki kaaka, naase 'dɔŋki 'je aki tɛɗn nakŋ kɛn Raa maakin̰ jen ro ki, ɔɔ debm kɛn tɛɗ kusin̰ se, naase 'jeki j'an̰ dabara. Ute nakgen naase 'tɛɗki paac se, naase 'jeki taaɗn jeege tu ɔɔki maakŋ nakge tun se, ɔlsen naase eyo. 12Bin ɓo, maktubm kɛn maam m'raaŋsen se, maam m'raaŋ debm kɛn tɛɗ kusin̰ naapin̰ ki se eyo, ey lɛ deb kɛn naan̰ k'tujin̰ maakin̰ se eyo kici. Num maam m'raaŋsen se, taa m'je naan Raa ki se, naase malin̰ge aki jeel rose ki, naase se 'jejeki ute maakse paac ɔɔ 'jeelki taar naaje k'taaɗsen se lɛ, taar mɛt ki. 13Kɛse ɓo nakŋ kɛn ɛɗjeno kaay kaama. Naan̰ se ɛɗjeno ɓo kaay kaam sum eyo, num naaje se maakje raapo dɛn aak eyo kɛn j'aak Tit jaay maakin̰ raap se, taa naase paac 'raapin̰kiroga maakin̰ aak eyo. 14Kɛn maam jaay m'ɔlin̰ gɔtse ki se, maam m'tɔɔmsenga naanin̰ ki ɔɔ ɓɔrse naase ɔlumki te maakŋ sɔkɔn̰ ki eyo. Taa taargen paacn̰ naaje k'taaɗseno se, mɛt ki ɔɔ tɔɔm kɛn naaje k'tɔɔmseno naan Tit ki se kic ɓo, mɛt ki, k'tɛɗ te taar‑kɔɔɓ eyo. 15Kaaɗ kɛn naan̰ iŋgo gɔtse ki se, naase 'dɔɔɗ ɔkin̰kiroga jiga, aalin̰kiroga maak ki ɔɔ 'took uunkiroga taarin̰a. Kɛn naan̰ jaay saap do nakge tun naase 'tɛɗin̰kiro paac se, ɔlin̰ naan̰ jese dɛn cir kɛn deete. 16Maam se maakum raapo taa m'jeelse, naase se jee kɛn maam m'kɔŋ kaal maakum dose ki paac.

will be added

X\