1 Taa naan̰ se ɓo aan gɔɔ Raa ute bɛɛn̰a ɛɗjega naabin̰ ese se kaam jije se, naaje j'ɔk maakje tɔɔgɔ ro ki. 2 Nakgen jig ey kɛn k'tɛɗin̰ k'j'ɔyin̰ kɔyɔ ute nakŋ sɔkɔn̰ge se, naaje k'tɛrlɗenga naaga. Naaje se k'j'aan̰ nam dal eyo ɔɔ taar Raa kic lɛ, k'tɛrlin̰ kaam kuuy eyo. Num gaŋ taar mɛt ki se, naaje k'taaɗin̰ tooɗ tal, bin ɓo naŋa naŋa kic ɓo jeel maakin̰ ki, naan Raa ki se taar naaje k'taaɗ se taar mɛt ki. 3 Anum jee mɛtin̰ge Labar Jigan gɛn al‑Masi kɛn naaje k'taaɗɗen se, naaɗe booy ɔk te mɛtin̰ eyo. Jeelɗe se aan gɔɔ k'deebin̰ga ute kala. Kɛse gɛn jeegen ɓaa ɓaa gɔtn kut ki. 4 Jeegen ese se aal maakɗe do Isa ki eyo, taa Ɓubm sitange, naan̰ ɓo raa kɛn do duni ki se, gaasɗe ɔŋ jeel ɔk mɛtin̰ eyo taa naaɗe 'kɔŋ kaakŋ gɔtn wɔɔr gɛn Labar Jigan gɛn al‑Masi se eyo. Ey num kɛse ɓo kɛn taaɗn nookŋ al‑Masi, ɔɔ al‑Masi se naan̰ ɓo kɛn tec Raa mala mala se. 5 Num naaje se k'taaɗ taa ro naaje malin̰ge eyo, anum naaje k'taaɗ j'ɔɔ: al‑Masi se, naan̰ Mɛl jeege paac. Num naaje se lɛ, taa Isa se, k'taaɗsen j'ɔɔ naaje se k'jee tɛɗn naabsege. 6 Taa Raa ese sum ɓo kɛn ɗeeko ɔɔ: Ɔn̰ gɔtn wɔɔr se, 'wɔɔr maakŋ gɔt kɛn ɔɔɗɔ, ɔɔ naan̰ ɓo debm 'wɔɔrjen maakjege kici. Ɔɔ gɔtn wɔɔr ese ɓo taaɗjeki nookŋ Raa ɔɔ nookŋ Raa ese se ɓo kɛn j'aakin̰ wɔɔr kɛlɛŋ daan kaam Isa al‑Masi ki se. 7 Num naaje se k'tec aan gɔɔ dukul nɛn̰jɛ naɓo ɔk kɔrbɔtn Raa maak ki. Bin num tɔɔgŋ deel do ese se iin̰o gɔtn Raa ki, ey num gɔtn naaje ki eyo. 8 Kaam ara kaam ara paac ɓo gɔtɔ tɛɗjen ɔɔn̰ɔ, naɓo nakgen se ɔŋ deel te doje eyo; ɗoobm roje tap ɓo k'jeel eyo, naɓo ute naan̰ se kic ɓo j'ɔŋ ɗoobm kɛn k'j'ɔɔɗn doje. 9 Jeege lee dabarje kaam ara kaam ara naɓo Raa rɛsjen te eyo; k'tɔnd k'tundje naaŋ ki naɓo j'ɔŋki cirjen te eyo. 10 Daayum jeege je ajen tɔɔlɔ aan gɔɔ kɛn naaɗe je aɗe tɔɔl Isa se, bin ɓo ute naan̰ se jeege kaakŋ jeele, Isa se utu iŋg zɛɛrɛ ɔɔ naan̰ ɓo debm kɛn bɔɔbjeki j'utu j'iŋgki zɛɛr se kici. 11 Maakŋ kiŋgje ki se jeege je ajen tɔɔlɔ aan gɔɔ kɛn naaɗe tɔɔlo Isa se, bin ɓo ute tɔɔgjen gɔtɔ se kic ɓo, naaje j'ooy te eyo. Kɛse ɓo kɛn taaɗ jeege tu 'jeele, Isa se naan̰ utu iŋg zɛɛrɛ. 12 Bin ɓo naaje se k'took gɛn lee nirl yo ki, taa ute Labar Jigan naaje k'taaɗsen se, naase aki kɔŋ kaaja. 13 Kitapm Raa taaɗ ɔɔ: Maam m'aalga maakum do Raa ki; taa naan̰ se ɓo maam m'taaɗ taarin̰ jeege tu. Taa naaje kic ɓo j'aal maakje tec aan gɔɔ debm kɛn Kitap taaɗno se, taa naan̰ se ɓo naaje k'taaɗ taarin̰ jeege tu kici. 14 Naaje k'jeelki debm duro Mɛljege Isa se, naan̰ utu ajeki dur ute Isa kici ɔɔ naan̰ anjenki ɓaa ute naase tɛlɛ naanin̰ ki. 15 Nakŋ naaje k'sɛrkin̰ paac se, taa asen noogo, bin ɓo bɛɛ Raa se 'ziiɗn ɓaa ute naanin̰a do jeege tu ɔɔ jeege 'ziiɗn tɛɗn dɛna kɛn an̰ tɔɔmɔ ɔɔ naaɗe paac taa naapki an̰ nooko. 16 Taa naan̰ se ɓo naaje j'ɔk maakje tɔɔgɔ. K'jeelki, daa rojege se tɔɔgin̰ naŋ cɔkɔ cɔkɔ bini an̰ kɔlin̰ yo ki. Num gaŋ ɓii‑raa Raa ɛɗjeki tɔɔgin̰ maakjege tu ɔɔ 'tɛɗjeki jee kiji. 17 Nookŋ Raa kɛn j'utu k'j'aki kɛnd maak ki jaay j'aki kɔŋ bɛɛ se k'dɔɔjin̰ ute dubargen ɓɔrse j'ɔŋin̰ki do duni ki ara se, j'aakki dubarjege se aas ɗim eyo ɔɔ dubarjege se naan̰ cɔkɔ sum ɓo utu 'deele. Ɔɔ naan̰ se ɗaapjeki ɗaap ɓo gɛn kɛnd maakŋ nookŋ Raa kɛn tiŋg gɛn daayum daayum se. 18 Anum naajege se, j'ɔndki kaamjege do nakge tun j'aakin̰ ute kaamse eyo, num do nakge tun k'j'ɔŋ k'j'aakɗen eyo. Taa nakgen k'j'ɔŋ k'j'aakɗen ute kaama se utu 'deele, num gaŋ nakgen j'ɔŋ j'aakɗen ey se ɓo, 'tiŋg gɛn daayum daayum.
