2 Corinthiens 2

1Maam se m'uunoga doa, m'kɔŋ tɛrl gɔtse ki jaay, m'asen ɓaa tujn̰ maakse ey sum. 2Anum kɛn maam jaay 'tujsega maakse se, maam kic ɓo maakum 'tuju, bin se nam am tɛɗum jaay maakum raap se gɔtɔ, taa naase lɛ paac, maakse tujga. 3Kɛn ɔlumo jaay m'raaŋseno maktub se, taa maam m'je eyo kaaɗ kɛn m'ɓaa gɔtse ki se, jeegen am kɛɗn maak‑raap se ɓo, 'tɛrl am tujn̰ maakuma. Maam m'jeel maakum ki, kɛn maam jaay maakum raap se, naase kic ɓo 'paacki maakse 'raapo. 4Kaaɗ kɛn maam m'raaŋseno se, maam maakŋ maak‑tuj ki ɔɔ m'maakŋ kaa‑maan ki ɔɔ m'uun nirlum dɛna dose ki. Maam m'raaŋseno se taa m'asen tujn̰ maakse eyo, num taa aki jeele maam se, m'jese dɛn aak eyo. 5Kɛn deba jaay tujga maakŋ jeege se, kɛse naan̰ tujum maakŋ maam eyo, num naan̰ tujsen maakŋ naase paacki. Naɓo taar se j'ɔn̰te 'tɛɗin̰ki 'deel doa. 6Gɛn debm bin se, kɛn jee dɛna uunin̰ga kaamin̰ se ɓo, bɛɛn̰ga sum. 7Taa naan̰ se ɓo naase 'tɛɗin̰ki kalɗɛ, ɔɔ ɛɗin̰ki kaay kaama, ey num sɔm maak‑tujn̰ ese se 'deel don̰a. 8'Booyki m'asen taaɗa, debm bin se 'taaɗin̰ki tal, naan̰ 'jeele, naase se 'jen̰ki. 9Anum kɛn ɔlumo jaay maam m'raaŋseno maktubm se, kɛn naase jaay 'tookki taarum paac lɛ, maam m'kaakŋ jeel ro ki. 10Num 'booyki m'ɗeekseni: debm jaay naase 'tɛɗin̰kiga kalɗɛ se, maam kic m'tɛɗin̰ga kalɗɛ, kɛn maam ɓo m'tɛɗin̰ga kalɗɛ naan al‑Masi ki kic num, taa naase. 11Bin ɓo Ɓubm sitange ajeki kɔŋ kaan̰ dal eyo, ɔɔ nakŋ naan̰ je tɛɗa se lɛ, naajege k'jeelin̰ki tak. 12Kɛn maam jaay m'aan maakŋ gɛgɛr kɛn Troas ki gɛn taaɗn Labar Jiga gɛn al‑Masi jeege tu se, ey num gɔtn se Mɛljege ɔɔɗumga ɗoobo ute maraadin̰a. 13Naɓo kɛn m'aan jaay m'ɔŋ te gɛnaam Tit ey se, maakum tap ɓo ɔŋ ɗaar eyo. Gɔtn se maam m'iin̰ m'ɔn̰ gɛnaagen ɗoobm al‑Masi ki ɔɔ m'ɓaa taa naaŋ Masedoan ki. 14K'tɔɔmki Raa, ute ɗoobm al‑Masi se daayum naan̰ tɛɗjeki k'leeki j'ɔkki mɛtn Isan cir nakge paac se. Gɔtn ɓaa se paac Raa ɔljen naaje se ɓo k'taaɗ taar al‑Masi se jeege tu taa an̰ jeele. Ɔɔ taar naan̰ se lɛ, tec aan gɔɔ nakŋ oot nijimi kɛn oot wɔɔk dɔɔɗ gɔtɔ ɓaa se paac se. 15Ɗeere, naajege se k'tecki aan gɔɔ nakŋ oot nijimi kɛn al‑Masi ɛɗ Raa ki se. Naajege k'taaɗki taar al‑Masi jeege tun Raa utu aɗen kaaja ɔɔ jeege tun Raa utu aɗen kut kici. 16Jee mɛtin̰gen uun ɗoobm kutu se lɛ, nakŋ ootn nijim ese se ootɗen aan gɔɔ nakŋ ooyga kooyo kɛn aɗen kɔl gɔtn yo ki ɔɔ jee mɛtin̰gen kuuy uun ɗoobm kaaja se lɛ, nakŋ ootn nijim ese se ootɗen aan gɔɔ nakŋ iŋg zɛɛrɛ kɛn aɗen kɔl gɔtn kaaj ki. Num naabm magal ese se tap ɓo naŋa jaay an̰ kaasn gɛn tɛɗn naan̰ se? 17Naaje se k'tecki aan gɔɔ jee dɛngen kuuy eyo, kɛn lee taaɗ taar Raa jeege tu tɛɗin̰ aan gɔɔ nakŋ suukŋ gɛn kɔŋ ɗim ro ki se. Num gaŋ k'tɛɗkiga kalaŋ ute al‑Masi se, naaje k'taaɗki taar mɛt ki ute maakŋ kalaŋ aan gɔɔ jee kɛn Raa ɓo ɔlɗeno.

will be added

X\