2 Corinthiens 12

1Maam m'je tɔɔm rom eyo naɓo naase ɔlumki m'tɔɔm rom tak. Naɓo m'aakin̰ se tɔɔl sɛr eyo. Ɓɔrse maam m'je m'taaɗn ute nakgen Mɛljege teeco naanum ki jaay taaɗumo mɛtin̰ se. 2Maam m'jeele gaaba kalaŋ debm al‑Masi se, ɓɔrse ɔkga ɓaara sik‑kaar‑sɔɔ, ɔɔ gaabm se Raa uun ɓaansin̰ maakŋ raa kɛn raan cir paac paac, jaay ɓo ɔk tɛrlo. (Kɛn naan̰ ook ɓaa raan se kɛn utu ron̰a lɔ ute ron̰ eyo, maam m'jeel eyo, kɛse Raa ɓo jeele). 3M'jeele, gaabm se Raa uun ɓaansin̰ga gɔtn naan̰ ki mala (naɓo kɛn naan̰ ook ɓaa raan se utu ron̰a lɔ ute ron̰ eyo, maam m'jeel eyo, kɛse Raa ɓo jeele) ɔɔ kɛn naan̰ jaay aan gɔtn naane se, naan̰ booy taargen deel do kɛn debkilimi an̰ kɔŋ kaasn taaɗ eyo ɔɔ Raa undin̰ te kulu gɛn taaɗn naan̰ se ey kici. 5Ey num gɛn debm bin se, maam m'kɔŋ tɔɔm roma, naɓo gɛn maam malin̰ se, m'tɔɔm rom do tɔɔgum kɛn baat se sum. 6Kɛn maam jaay m'je tɔɔm rom kic ɓo, maam m'kɔŋ tɛɗn debm dɛrl eyo, taa taargen maam m'taaɗ se, taar mɛt ki. Naɓo maam se m'je tɔɔm rom eyo taa sɔm jeege am kaakum aan gɔɔ debm k'jeel jeel gɔtin̰a ɔɔ am kɔkŋ maam ɓo ɔɔn̰ cir taar kɛn naaɗe booyo teeco taarum ki ute nakgen naaɗe aakum maam m'tɛɗo se. 7Taa nakgen Mɛljege teeco naanum ki jaay taaɗum mɛtin̰ se, m'aakɗen se deel doa. Taa m'kɔŋ tɔɔm rom do nakge tun maam m'aakɗeno ey se, Mɛljege ɔn̰o nakŋ aan gɔɔ kɔrɔndɔ maakŋ rom ki, ɔɔ nakŋ aan gɔɔ kɔrɔndɔ se Ɓubm sitange ɓo ɔlo kɔɗin̰ taa am dabara ɔɔ am gaasn m'kɔŋ tɔɔm rom eyo. 8Mɛt mɔtɔ maam m'eem nɔɔ mɛtn Mɛljege tu m'ɔɔ nakŋ se n̰'ɔɔɗumsin̰ naatn rom ki. 9Num gaŋ naan̰ tɛrlum ɔɔ: «Bɛɛ maam m'tɛɗi se ɓo, aasiga sum. Taa kaaɗ kɛn naai 'tɔɔgi baat se ɓo, maam m'taaɗn tɔɔgum ute maraadin̰ doi ki.» Bin ɓo maam se m'tɔɔm roma do tɔɔgum kɛn baat se, taa al‑Masi se taaɗn tɔɔgin̰ dom ki. 10Taa naan̰ se ɓo do tɔɔgum kɛn baat se, kɛn k'naajuma, nakgen ɔɔn̰ kɛn aan dom ki, kɛn k'dabaruma, kɛn k'lee k'teecum nirluma, kɛn nakgen se jaay aan dom ki se, maam maakum raapo taa al‑Masi se; taa kaaɗ kɛn maam tɔɔgum baat se jaay ɓo, maam m'ɔŋ tɔɔgɔ. 11Maam m'taaɗseno aan gɔɔ debm dɛrlɛ se, ɔɔ naan̰ se naase ɓo ɔlumki taa tɔɔgɔ. Ey num naase ɓo jee kɛn amkiro magala. Kɛn naaɗe jaay taaɗ ɔɔ maam se m'tɔɔl sɛr eyo kic ɓo, naaɗen jee kɛn aak roɗe aan gɔɔ jee kaan̰ naabm Isagen k'jeel jeel gɔtɗe se, ɔŋ cirum eyo. 12Kɛn maam jaay m'iŋgo gɔtse ki se, naase ɔŋumki maam se m'debm maakum deere, ɔɔ m'aasin̰ do nakge tun paacn̰ aan dom ki. Ɔɔ ute tɔɔgŋ Raa se, maam m'tɛɗoga nakŋ‑kɔɔɓge ute nakgen deel doa. Ute nakgen maam m'tɛɗ se ɓo kɛn taaɗsen ɔɔ maam se, debm kaan̰ naabm al‑Masi. 13Anum nakgen kɛn maam m'tɛɗo eglizge tun kuuy se, gɔtn naase ki kic ɓo maam m'tɛɗin̰oga. Nakgen kɛn maam m'tɛɗin̰o te gɔtn naase ki ey se, maam m'tɔnd te mɛtn ɗim gɔtse ki ey sum. Bin se m'tɛɗsenga kusin̰ la? Kɛn tɛɗsega kic num, 'tɛɗumki kalɗɛ gɛn kɛn maam m'tɔnd mɛtn ɗim gɔtse ki ey se! 14'Ɓooyki m'asen taaɗa: tɛr daala ɓɔrse maam m'ɗaapga roma gɛn ɓaa gɔtse ki gɛn k‑mɔtɔge, ɔɔ m'ɓaa gɔtse kic ɓo maam m'je ɗimse eyo, num maam se m'je naase malin̰ge ey num m'je ɗimse eyo. Taa bubge ɓo tus naka gɛnɗege tu ey num gaange ɓo, tus naka bubɗege tu eyo. 15Maam se kɛn m'ut jim paac taa naase kic num, maakum raapo. Ɗeere, maam se m'je kutn jim sum eyo, naɓo rom paac kic ɓo m'an̰ kɛɗin̰ taa naase. Anum kɛn maam jaay m'jese dɛn bin se, naase kic amki kɔŋ je baatn ne? 16Naase 'jeelki maam se m'tɔnd te mɛtn ɗim gɔtse ki eyo. Naɓo jeegen mɛtin̰ge maakse ki se taaɗ ɔɔ maam se nakum mɛtɛkɛ ɔɔ maam m'aan̰seno kaan̰ ɓo dala ey num maam m'ɔŋga ɗim gɔtse ki. 17Maakŋ jeege tun maam m'ɔlɗen gɔtse ki se, deb kalaŋ maakɗe ki se ɔsga jise la? 18Maam m'ɗaar mɛtn Tit ki cirr ɔɔ m'ɔl gɛnaa kuuy kɛn maam m'taaɗseno taarin̰ se ute naan̰a. Kɛn Tit jaay iŋgo gɔtse ki se ɔsoga jise la? Lɔ maam m'ute Tit se naabm kɛn naaje k'tɛɗo se ɔɔ saapje se tec naap ey la? 19Taargen naaje k'raaŋseno maakŋ maktub kɛn ese se, naase 'saap ɔɔki kaaɗn naane naaje k'je ɗaapm taarje ɓo naanse ki sum. Bin eyo! Naaje se k'taaɗsen naan Raa ki aan gɔɔ kɛn al‑Masi jen ro ki ɔɔ 'jeelki, jee maak‑jejege, taargen naaje k'taaɗsen se, taa asen noogo aki ziiɗn ɓaa ute naanse ɗoobm al‑Masi ki. 20Anum kɛn ɔlum maam m'ɓeer se m'ɔɔ kaaɗn kɛn jaay maam m'ɓaa gɔtse ki se, m'asen kɔŋ aan gɔɔ kɛn maam m'jen ro ki eyo ɔɔ naase kic lɛ amki kaakse amki kɔŋum aan gɔɔ kɛn naase 'jenki ro ki ey kici. Maam m'je se m'asen kɔŋ naase 'tɛɗki tɛɗ dɛkɛn̰ɛ ute naap eyo, 'tɛɗki tɛɗ maak‑kilimi ro naapge tu eyo, 'tɛɗki tɛɗ taa mooyo ute naap eyo, 'niki ni ro naapge tu eyo, ɔɔɗki kɔɔɗ naap eyo, 'taaɗki taaɗ taar iŋg kusu ro naapge tu eyo, 'magalki magal rosege eyo ɔɔ ɛcki kɛc naap eyo. 21Maam m'ɓeer m'ɔɔ sɔm ɓii kɛn maam m'tɛrl gɔtse ki kuuy daal se, Raam am kɔlum sɔkɔn̰ɔ am tɔɔl naanse ki. Maam m'ɓeer m'ɔɔ sɔm, kɛn m'kaan gɔtse ki se, m'kɔŋ jee kusin̰ge dɛna kɛn tɛrl te maakɗe do Raa ki eyo. Kaaɗn naane, naaɗe utu iŋg tɛɗ nakŋ tuj debkilimi naan Raa ki ɔɔ lee ɛɛs naapa rɛn̰ rɛn̰ ɔɔ tɛɗ nakgen jig eyo kɛn maakɗe jen ro ki. Taa naaɗe se ɓo kɛn am kɔlum maam m'utu m'ɓaa keeme.

will be added

X\