2 Corinthiens 11

1Ɓɔrse maam m'je m'asen taaɗn aan gɔɔ debm dɛrlɛ naɓo do taarumge tu se aayki kaamse aasin̰ki do ki. Gɛnaamge, maam se kic ɓo aayki kaamse 'sɛrkumki. 2Maam se m'saap do naase ki aan gɔɔ kɛn Raa saap dose ki kɛn tec aan gɔɔ mɛnd kɛn ni taa gaabin̰ se. Ɔɔ maam m'je m'asen kɛɗn gaab ki kalaŋ ɔɔ gaabm ese se naan̰ ɓo al‑Masi. Taa naan̰ se ɓo maam m'je m'asen ɓaa naanin̰ ki aan gɔɔ goon mɛnd kɛn iŋg bɔɔb ron̰ gaabm kɛɛsin̰ ki sum se. 3Aan gɔɔ do dɔkin̰ wɔɔjɔ ɓaaɗo dɛrl Awa se, maam m'ɓeer m'ɔɔ sɔm nam asen dɛrl bin kici ɔɔ saapse se tɛɗn jig eyo ɔɔ aki tuj ɔrmse ɔɔ aki kɔŋ dɔɔkŋ ute al‑Masi ute maakŋ kalaŋ eyo. 4Nam kuuy ɓaaɗo taaɗsen mɛtn taar Isan kuuy tec aan gɔɔ gɛn naaje k'taaɗsen se eyo, ɔɔ taaɗsen mɛtn taar nirl kuuy tec aan gɔɔ kɛn naaje k'taaɗsen se eyo ɔɔ kɛn naan̰ jaay ɓaaɗo taaɗsen Labar Jigan kuuy kɛn tec aan gɔɔ gɛn naaje ey se kic ɓo, naase 'sɛrkɗeki tap. 5Jeegen naase aakɗeki aan gɔɔ jee kaan̰ naabm Isagen k'jeel jeel gɔtɗe ese se, naaɗe se ɔŋ cirum maam eyo. 6Ɗeere, maam m'jeel taaɗn taara jiga dɛn eyo, naɓo jeel nakge sum se maam m'ɔkɔ. Naase kic ɓo 'jeelki maakŋ nakge tun naaje k'tɛɗ paac se, naaje k'taaɗsesin̰ga tal mɛt dɛna. 7Kɛn maam m'taaɗseno Labar Jiga gɛn Raa se, maam m'ɔɔp rom baata ɔɔ m'uunsen ro naase ɓo raan. Labar Jiga gɛn Raa se lɛ maam m'taaɗseno cɛrɛ. Bin se maam m'tujin̰ga la? 8Kaaɗ kɛn maam m'tɛɗo naaba gɔtse ki se, maam m'tooko eglizgen kuuy ɓo ɔgumo ɔɔ naaɗe utu jiɗe taa maama. 9Kaaɗ kɛn maam m'iŋgo gɔtse ki jaay, naka ɓaa baatum se, maam m'tɔnd te mɛtn ɗim gɔtse ki eyo. Naɓo gɛnaagen ɗoobm al‑Masi kɛn taa naaŋ Masedoan ki se ɓo ɓaaɗo ɛɗum nakŋ kɛn aasum kiŋguma. Kaaɗ kɛn se, maam se m'tɔnd te mɛt ɗim gɔtse ki eyo ɔɔ ɓɔrse kic lɛ, m'tɔnd mɛtse eyo. 10Aan gɔɔ maam m'dɔɔk ute al‑Masi se, maam m'taaɗ taar mɛt ki, do nakge tun se nam jaay am gaasn gɛn tɔɔm rom maakŋ taa naaŋ Akayi ki se, gɔtɔ. 11Gɛn ɗi jaay maam m'baate gɛn kuun naka gɔtse ki se? Bin se maam m'jesen ey la? Num Raa jeele, maam se m'jese. 12Nakŋ maam m'tɛɗ se ɓɔrse kic ɓo m'tɛɗ aan gɔɔ naan̰ ese se. Taa bin se jee tɛɗ roɗe aan gɔɔ jee kaan̰ naabm al‑Masige se kɔŋ tɔɔm roɗe eyo ɗeekŋ ɔɔ naabm naaɗe se, tec aan gɔɔ gɛn naaje. 13Jee se tɛɗ roɗe aan gɔɔ naaɗe jee kaan̰ naabm al‑Masige, ɔɔ ute naabm kɛn naaɗe tɛɗ se, naaɗe aan̰ jeege dala ɔɔ naaɗe tɛɗ roɗe aan gɔɔ jee kaan̰ naabm al‑Masige. 14Nakŋ naaɗe tɛɗ se ajenki kɔŋ kɔkŋ taaɗ eyo. Taa Ɓubm sitange kic ɓo tɛɗ ron̰a aan gɔɔ kɔɗn Raa kɛn tɛɗ gɔtɔ wɔɔr kɛlɛŋ se. 15Bin num nakgen se ɔn̰ten 'kɔksen taaɗ eyo kɛn jee tɛɗn naabm Bubm sitange jaay tɛɗ roɗe aan gɔɔ jee tɛɗn naabm ute ɗoobin̰ se. Ɓii kɛn ɓiiɗe 'naŋ se, Raa utu aɗe dabar do nakge tun kɛn naaɗe tɛɗo se. 16M'an̰ taaɗn ɗɔɔl daala, nam ɔn̰ten kaakum aan gɔɔ debm dɛrlɛ. Kɛn naase jaay 'saap ɔɔki maam debm dɛrlɛ kic, num 'tookki aan gɔɔ kɛn naase 'saapin̰ki se, bin se ɔn̰umki maam kic m'tɔɔm rom cɔkɔ. 17Taar maam m'je m'an̰ taaɗ se Mɛljege ɓo undum kul eyo, naɓo kɛn maam jaay m'tɔɔm rom se, maam se m'taaɗn aan gɔɔ debm dɛrlɛ. 18Aan gɔɔ jeege dɛna lee tɔɔm roɗe gɛn nakgen do duni ki sum se, maam kic ɓo m'tɔɔm roma. 19Kalɛ, naasen jee jeel‑taarge, jee dɛrlge se kic ɓo, naase 'sɛrkɗeki ute maak‑raapo. 20Kɛn jeege tɛɗsen ɓulu, aan̰sen dala, ɔs jise, kujunse, naaɗe tɛɗ roɗe magal cirse naase ɔɔ naaɗe tɔndse mɛtn bise ki kic ɓo, naase se aasin̰ki. 21Taar m'taaɗin̰ se sɔkɔn̰ kic ɓo tɔɔluma taa naaje se j'ɔk tɔɔg eyo gɛn tɛɗn aan gɔɔ gɛn naaɗe se. Num gaŋ kɛn deba jaay ɔk nakŋ kɛn naan̰ an tɔɔm ron̰ ro ki se, maam kic m'ɔk nakŋ kɛn m'an tɔɔm rom ro ki kici. Kɛse maam taaɗ aan gɔɔ debm dɛrlɛ ɓo taaɗa. 22Kɛn naaɗe ɓo Ɛbrege lɛ, maam kic m'kɔɗ Ɛbre. Kɛn naaɗe ɓo gaan Israɛlge lɛ, maam kic m'kɔɗ Israɛl. Kɛn naaɗe ɓo mɛtjil Abraam lɛ, maam kic mɛtjilin̰a. 23Kɛn naaɗe ɓo ɔɔ naaɗe jee tɛɗn naabm al‑Masige se lɛ, maam se m'cirɗe naaɗe se. (Gɔtn se maam m'taaɗ aan gɔɔ debm dɛrlɛ ɓo taaɗa.) Maam m'tɛɗo naaba m'ɔɔr naŋ tak tak, k'tɔkumoga daŋgay ki mɛt dɛna, k'tɔndumoga ute mɛɛjɛ dɛn aak eyo, mɛt dɛna ɔɔp cɔkɔ sum ɓo ey num j'amo tɔɔlɔ. 24Mɛtn mii se, magal Yaudge ɔkumoga tak ɓo tɔnd ɗɔɔlum ute mɛɛjɛ mɛt sik‑mɔtɔ‑kaar‑jɛrnaŋ. 25Mɛtn mɔtɔ j'ɔk k'tɔndumo ute sirɗi, jɛ‑kalaŋ k'tundumo ute koa je j'am tɔɔlɔ, mɛtn mɔtɔ markaba tɛrɛcɛ ɔɔ maam m'ɔɔpo maakŋ maane ki, jɛ‑kalaŋ se m'tooɗo ɔɔ m'lɛko maakŋ baar ki. 26Maam m'leeɗoga mɛrtɛ mɛt dɛna, m'nirlum teece gɛn gaaŋ oolge se, jee ɓoogge teecumo nirluma, taasum Yaudge teecumo nirluma ɔɔ jee kɛn Yaudge ey kic ɓo teecumo nirluma, maakŋ gɛgɛrge tu se ɓeer tɛɗumoga, do kɔɗ‑ɓaarge tu se ɓeer tɛɗumoga, do baar ki ɓeer tɛɗumoga ɔɔ jee kɛn tɛɗ roɗe aan gɔɔ jeegen ɗoobm al‑Masi ki se kic ɓo, teecumo nirluma. 27Maam m'dabar m'tɛɗn naaba m'ɔɔr naŋ tak tak mɛt dɛna, bi kaamum kic m'tooɗ eyo. Gɔtn mɛtin̰ge se ɓo tɔɔlumo ɔɔ maane kic ɓo tɔɔlumo, mɛt dɛna m'ɔs ɗim eyo, kuulu ɔɔn̰uma ɔɔ kala kic ɓo aasum eyo. 28Dubargen kuuy kic ɓo utu, naɓo m'kɔŋ taaɗ ey sum. Daayum maam se m'saap dɛna do eglizge tu paac. 29Kɛn nam jaay ɔk tɔɔg ey se, m'aakin̰ se tɛɗum ɔɔn̰ɔ aan gɔɔ maam kic ɓo tɔɔgum gɔtɔ. Ɔɔ kɛn nam jaay tɛɗga gɛnaan̰ oocga maakŋ kusin̰ ki se, m'aakin̰ se tɛɗum ɔɔn̰ aak eyo. 30Maam se m'je tɔɔm rom eyo num kɛn naase 'jeki maam m'tɔɔm rom tak kic num, m'tɔɔm rom do tɔɔgum kɛn baat se. 31Raa kɛn Bubm Mɛljege Isa, naan̰ kɛn jeege lee tɔɔmin̰ gɛn daayum daayum se, jeele maam se taaɗ taar‑kɔɔɓ eyo. 32Do dɔkin̰ kɛn maam m'iŋgo maakŋ gɛgɛr kɛn Damas ki se, gaar taa naaŋ gɔtn ese ron̰ Aretas, magal kɛn naan̰ ɔndin̰ maakŋ gɛgɛr kɛn ese se, tɔnd jeege taa‑ɗoobge tu taa am kɔkɔ. 33Gaŋ naaɗe uun ɔlumo maakŋ baar ki ɔɔ uun bɔɔyumo naagŋ durdur ki ute taa pɛnɛtɛr ɔɔ gɔtn se, maam m'aan̰ m'ɔtɔ.

will be added

X\