2 Corinthiens 10

1Maam m'ɓo kɛn jeege taaɗ ɔɔ kɛn naan̰ jaay utu te naaje se, naan̰ debm ɓeere, ɔɔ kɛn naan̰ jaay ɓaaga dɔk se, naan̰ taaɗ ɓeer nam ki eyo . Num aan gɔɔ al‑Masi debm bɛɛ ɔɔ dalul se, maam kic maakse ki se m'je tɛɗn aan gɔɔ naan̰a. 2Maam m'tɔnd mɛtse, 'tɛrlki saapse bin ɓo kɛn m'ɓaa gɔtse ki se, m'asen taaɗn aan gɔɔ debm taaɗ ɓeer nam ki ey sum. Taa jee mɛtin̰ge utu maakse ki se taaɗ taar‑kɔɔɓɔ ɔɔ: maam m'tɛɗ naaba se taa m'aan je ɗim ro ki aan gɔɔ jikilimgen lee tɛɗ se. Jeegen taaɗ bin se, maam m'aɗen taaɗn m'ɓeer eyo. 3Ɗeere, naaje se k'jikilimge aan gɔɔ jeegen ɓaa se paac. Naɓo ɗo kɛn naaje k'ɗo se, tec aan gɔɔ gɛn jikilimge se eyo. 4Gaŋ nakgen naaje k'j'uɗn bɔɔrɔ se tec gɛn jikilimge se eyo, num nakgen naaje k'j'uɗn bɔɔrɔ se, iin̰o gɔtn Raa ki. Nakgen se ɔk tɔɔgɔ gɛn tɔɔkŋ ɓee tɔɔgŋ kɛn jee wɔɔyge lee toomni. Jeegen ɔk saapm jig ey se taargen naaɗe ɓaa taaɗa se, naaje k'gaasɗe. 5Bin ɓo nakgen paacn̰ kɛn ɔk tɔɔgɔ ɔɔ magal roɗe se kɛn gaas jeege ɔŋ jeel Raa ey se, naaje k'gaasɗe kici. Jikilimge se naaje k'tɛɗɗen naaɗe tɛrlga maak‑saapɗe taa tookŋ taar al‑Masi. 6Kaaɗ kɛn jaay naase 'booy 'took uunkiga taar al‑Masi ute maakse paac se, jee kɛn baate tookŋ taarin̰ se lɛ, naaje j'utu j'aɗen kɔnd ɗoob ki. 7Naase aakki nakŋ kɛn j'aakin̰ ute kaama sum. Kɛn nam jaay ɗeek ɔɔ naan̰ tɛɗga gɛn al‑Masi se, n̰'kɔŋ jeele naaje kic ɓo gɛn al‑Masige. 8Kɛn do naabum ki se jaay, maam m'tɔɔmga rom dɛn dɛna do tɔɔgŋ kɛn Mɛljege ɛɗumo se, maam sɔkɔn̰ tɔɔlum eyo. Taa Mɛljege ɛɗumo tɔɔgɔ se, taa m'asen noogo aki ziiɗn ɓaa ute naan se, ey num gɛn kutse eyo. 9Ute maktubum gɛn maam m'raaŋsen se, maam m'je tɛɗn aan gɔɔ debm kɛn je asen kɔl ɓeere maakse ki eyo. 10Taa jee mɛtin̰ge taaɗ ɔɔ: «Kɛn Pɔl jaay raaŋ maktubge se taarin̰gen maak ki se, taargen deer deere ɔɔ ɔɔn̰ɔ, num gaŋ kɛn naan̰ jaay ɓaaɗo maakjege tu se, naan̰ tɔɔgin̰ lɛ gɔtɔ ɔɔ taarin̰ lɛ tɔɔl sɛr eyo.» 11Debm jaay taaɗ bin se, n̰'jeele, taargen naaje k'dɔk jaay k'raaŋɗen maakŋ maktubge tu se, kɛn naaje jaay k'ɓaaga maakse ki se, naaje j'an̰ tɛɗin̰ aan gɔɔ kɛn naaje k'raaŋin̰o se. 12Ɓɛrɛ, jeegen ese se tɛɗ roɗe ɓo jee magalge, ɔɔ naaje se lɛ j'kɔŋ k'taaɗn j'ɔɔ j'aas kaas ute naaɗe eyo! Kɛn naaɗe aak roɗe se, nam aas ute naaɗe gɔtɔ ɔɔ kɛn naaɗe ɓaa ɓaa dɔɔjn̰ roɗe lɛ dɔɔj ute naaɗe malin̰ge sum. Naaɗe se jee do tɛɗga gɛn naaɗe eyo. 13Num gaŋ naaje se j'kɔŋ tɔɔm roje j'an deel ute gɔtin̰ eyo. Num naaje se k'tɔɔm roje ute gɔtn naaŋ gur naabm kɛn Raa taaɗjeni kɛn ɔlje bini k'j'aano gɔtse ki. 14Kɛn naaje jaay j'iŋgo te gɔtse ki ey num, kɛse aan gɔɔ naaje k'j'aal k'deelga naaŋ gur kɛn Raa taaɗjeni. Num naaje k'j'ɔŋki j'aal deel te naaŋ gur se eyo, ɗeere, naaje ɓo j'aano deet deet gɔtse ki ute Labar Jigan gɛn al‑Masi se. 15Do naabm jeege tun kuuy se, naaje se j'kɔŋ tɔɔm roje eyo, taa naaje lɛ maakŋ naabje ki se, k'tɔɔm roje k'deel te gɔtin̰ eyo. Num gaŋ naaje j'ɔnd doje do naase ki k'je kaal maaksen do Isa al‑Masi ki se 'ziiɗn ɓaa ute naanin̰a. Ute naan̰ se ɓo naaje k'tɛɗn naaba ɔɔ naabje se ziiɗn ɓaa ute naanin̰a aan gɔɔ kɛn Raa maakin̰ jen ro ki. 16Tɛr, naaje k'ɓaa maakŋ naaŋge tun dɔk cir naaŋ naase se, taa gɛn ɓaa taaɗn Labar Jiga jeege tun kɛn ɓii kalaŋ booyin̰ te eyo, taa naaje se k'je tɔɔm roje do naab jeege tun kuuy eyo. 17Gaŋ aan gɔɔ kɛn Kitap Raa taaɗ ɔɔ: Debm jaay je tɔɔm ron̰ num, n̰'tɔɔm ron̰ do nakge tun Mɛljege tɛɗa. 18Taa debm iin̰ sum ɓo tɔɔm ron̰ se, tɔɔm ron̰ kɛn naan̰ tɔɔm se mɛt ki eyo; num gaŋ tɔɔm ro kɛn mɛt ki se, debm kɛn tɛɗ nakŋ kɛn tɔɔl Mɛljege tu.

will be added

X\