2 Corinthiens 1

1Kɛn ara maam Pɔl, m'debm kaan̰ naabm Isa al‑Masi aan gɔɔ kɛn Raa maakin̰ jen ro ki ɔɔ maam m'raaŋ maktubm ese se ute gɛnaajege, Timote. Naaje k'tɛɗsen tɔɔsɛ naase ki jee eglizn kɛn maakŋ gɛgɛr kɛn Kɔrint ki ute jee Raagen paacn̰ taa naaŋ Akayi ki ute magalin̰a. 2Ɔn̰ Bubjege Raa ɔɔ Mɛljege Isa al‑Masi asen tɛɗn bɛɛɗe ɔɔ asen kɛɗn lapia. 3K'tɔɔmki Raa, Bubm Mɛljege Isa al‑Masi, naan̰ se Bubm kɛn bɛɛn̰ dɛna ɔɔ naan̰ ɓo Raa debm ɛɗ kaay kaama ute maraadin̰a. 4Maakŋ nakge tun ɔɔn̰ kɛn aan dojege tu paac se, naan̰ ɓo debm ɛɗjeki kaay kaama. Ute kaay kaam kɛn Raa ɛɗjeki se, naajege kic num j'an̰ki kaasn gɛn kɛɗn kaay kaama jeege tun maakŋ nakge tun ɔɔn̰ se kici. 5Aan gɔɔ naajege j'ɔŋki dubar dɛna ute al‑Masi se, bin ɓo ute ɗoobm al‑Masi se Raa ɛɗjeki kaay kaam dɛn bin kici. 6Kɛn nakŋ ɔɔn̰ jaay aanga doje ki kic num, taa Raa asen kɛɗn kaay kaama kɛn asen kɔl gɔtn kaaj ki. Ɔɔ naaje jaay Raa ɛɗjen kaay kaama se taa naase kic ɓo dubar aanga dose ki num an̰ki kɔŋ kaasa aan gɔɔ kɛn naaje dubar aan doje ki jaay j'ɔŋ j'aasin̰ se kici. 7Ɔɔ naaje k'jeel maakje ki kɔnd dojen jaay j'ɔnd do naase ki se, kɔnd do mɛc. Taa naaje k'jeele naase ɔŋkiga dubar ute naaje se, bin se Raa asen kɛɗn kaay kaama aan gɔɔ naan̰ tɛɗo naaje ki se kici. 8Anum naase gɛnaagen ɗoobm al‑Masi ki, naaje k'je naase aki jeele taa naaŋ Azi ki se k'dabarjenoga dɛn aak eyo. Ɔɔ dubar kɛn naaje k'j'ɔŋo se deeloga doje, naaje k'saapo j'ɔɔ naaje se j'kɔŋ kaaj ey sum. 9Ɗeere, naaje se k'saap j'ɔɔ ɓiije naŋga sum, naaje j'kooyo. Naɓo, naaje se j'ɔnd doje do naaje malin̰ge tu eyo, num naaje j'ɔnd doje do Raa ki, naan̰ ɓo debm lee dur jeege daan yoge tu. 10Ɔɔ Raa se ɔɔɗjenoga doje maakŋ yo kɛn gɔtn ese se ɔɔ naan̰ ajen kɔɔɗn doje kuuy daala. Ɗeere, naaje se j'ɔnd doje don̰ ki, gɔt kuuy kic ɓo naan̰ utu ajen kɔɔɗn doje daala. 11Naase kic ute keem Raa kɛn naase aki keem se, naase ajeki noogo. Ɔɔ ute tɔnd mɛtn kɛn jeege dɛna tɔnd mɛtn Raa taa naaje se, Raa ajen tɛɗn bɛɛ. Ute naan̰ se jeege dɛna 'tɔɔm Raa taa bɛɛ kɛn naan̰ tɛɗjen se. 12Anum nakŋ tɛɗjen jaay naaje k'tɔɔm roje se, naaje k'jeelin̰ maakje ki, kiŋgjen naaje j'iŋg maakŋ jeege tu, ɔɔ tap tap ute naase se, j'iŋgo ute kɛn mɛt ki ɔɔ ute maakŋ kalaŋ naan Raa ki. Num naaje k'j'iŋgo bin se ute jeel‑taar gɛn jikilimge eyo, num ute bɛɛ Raa kɛn tɛɗjen se. 13Ɗeere, taargen naaje k'lee k'raaŋsesin̰ se, naaje k'raaŋsen te taar ɗim kuuy eyo, num taargen naase 'lee 'dooyin̰ki ɔɔ 'booy ɔkin̰ki se. Aan gɔɔ ɓɔrse naase naka kaam kalaŋ 'booy ɔkjekiro te mɛtin̰ paac ey se, num maam m'saap naase utu ajeki 'booy kɔkŋ mala mala ɔɔ kɛse ɓo taar kɛn maam m'je taaɗa se: ɓii kɛn Mɛljege Isa aɗe ɓaa se, naaje k'tɔɔm roje ute naase ɔɔ naase kic lɛ aki tɔɔm rose ute naaje kici. 15Ɗeere, maam m'jeel maakum ki maam m'je m'ɓaa gɔtn naase ki ɓo deet jaayo, taa bin se naase aki kɔŋ bɛɛ maam kɛn m'ɓaa gɔtse ki ɗɔɔl di se. 16Maam m'kiin̰ gɔtse ki se m'ɓaa Masedoan ki ɔɔ kɛn m'tɛrl tɛrl Masedoan ki kic ɓo, m'aɗe kaal dose ki. Ɔɔ naase ɓo amki je nakŋ kɛn am m'kaasn gɛn ɓaa mɛrtɛ taa naaŋ Jude ki. 17Kɛn maam m'uun do gɛn ɓaa mɛrtɛ se, ute maakum paac ey la? Ey lɛ nakŋ maam m'ɓaa ɓaa tɛɗa paac se, m'tɛɗin̰ aan gɔɔ gɛn jikilimgen do nak kɛn kalaŋ sum ɓo kɛn naaɗe ɓaan̰ ɓaa tɛɗa num ɗeek ɔɔ: «Yɛɛ» ɔɔ «Yɛɛ eyo» se la? 18Taar se Raa kic ɓo jeele, do taar kɛn kalaŋ se, naaje j'ɔŋ k'taaɗseno te j'ɔɔ: «Yɛɛ» ɔɔ «Yɛɛ eyo». 19Taa maama, Silban ute Timote kɛn k'ɓaaɗo k'taaɗsen taar Goon Raa Isa al‑Masi gɔtse ki se, do taar kɛn kalaŋ sum ɓo, naaje k'taaɗ te ey «Yɛɛ» ɔɔ «Yɛɛ eyo». Num gaŋ taar naaje k'taaɗ se, daayum «Yɛɛ». 20Ɔɔ nakŋ kɛn Raa taaɗo utu tɛɗ se, ute ɗoobm al‑Masi se paac 'tɛɗn mɛt ki. Bin ɓo ute ro Isa al‑Masi se, naaje k'ɗeekki j'ɔɔki: amin Raa ki gɛn nookŋ ron̰a. 21Raa ɓo kɛn dɔɔkjeki ute al‑Masi k'tɛɗkiga tɔɔg se ɔɔ naan̰ ɓo debm tɛɗjeki k'tɛɗkiga jee naan̰ge. 22Naan̰ ɓo debm kɛn tɛɗjeki nakŋ kaakŋ jeele, kɛse Nirlin̰ kɛn naan̰ ɛɗjeki maakjege tu kɛn je ɗeekŋ ɔɔ naajege se k'tɛɗkiga jee naan̰ge ɔɔ ute naan̰ se, naan̰ je ajeki taaɗn ɔɔ utu ajeki kɛɗn nakŋ kɛn naan̰ taaɗo ɔɔ utu ajeki kɛɗ se. 23Maam se ɔn̰ Raa am tɛɗn saaɗuma ɔɔ maam se lɛ m'taaɗ taar mɛt ki. Kɛn maam jaay baate tɛrlo maakŋ gɛgɛr kɛn Kɔrint ki se, m'je m'asen tujn̰ maakse eyo. 24Naaje k'je j'asen tɛɗn utu taa tɔɔg eyo gɛn kaal maakse do Raa ki, taa kaal maakse lɛ, naase utu ɔkin̰ki tɔɔgɔ. Anum naaje k'je j'aki tɛɗn naaba tɛlɛ, taa naase kic ɓo maakse raapo.

will be added

X\